دير دياري ~ يوميات

[الـيـاه]

الشين : لول مافهمت اللي قلتيه !!!! >.<

شمعة أمل : والله منصور شيطان اونه احين ستوا ريال S: لول بسكت بسكت عن تهزبنا انامل

[الشيـــن]

اليـأآأه : يعني حللوا جتلهـا .. يعني جتلها حلال . لول فهمتي ؟

[الـيـاه]

اووووه XD وانا اقول شو هالكلمه بعد! . كله اقراها غلط

[شمعة أمل]

اليـاه
هيه ها دومه جي من يوم صغيــر .. انا الريال وانا محرمكم p;.. كيووووووووووت!!



اليوم السبت بس أصلن الأحد
المود مستاااااااانسه
الموضوع

البارحه الى هو اليوم يعني من استوى يوم السبت وانا سهرانه على الواحات ويا الغلا ويوم هي قررت ترقد قلت خلني أسيـر أ{قد بس ماياني رقاد.. ويلست اسولف بالمسجات ويا ربيعتي في باريس ليـن الساعه خمس
نشيـت من الرقاد الساعه 1 ماكمل عشـر دقايق ولا تليفوني يرن وربيعتي متصله.. مييييييم!! يله جهزي عمرج ساعه ونص وانا ومريم 2 عندج!
وانا: هااه شوو اووه انزين باي ههههههههه! دفشه وايد

ويووو بيتنااااا وسولفنا وابويه رد البيت من وقت عادة يردون من البحر المغرب! فديته تعبان وصوته رايح! ف جي عقب ساعتيـن وحده من البنات تقولي ابا جكن فرايز من برغر كينغ.. انا حامل لا تقولولي لا!!.. ولا نشل بمعمارنا ونسيـر برغر كينغ نشتريلها أكل ويلسنا نحووط.. راوتنا البيت اليديد الى بتنتقل فيه ويا ريلها عقب آخر شي سرنا البحر تمينا جي عشـر دقايق وردينا البيت
وسولفنا شويه بعديـن ردينا طلعنا.. خذنا عشا وسرنا بيت حمدووه يلسنا هناك جي ساعه! ندق سوالف ويا امها وربيعة امها عقب تأخر الوقت وردوني البيت
صدق كان خبااااااااااااااااااااااا ال في السيـاره .. من زمااااااان ماتخبـلنا في السياره هههههه!!!
يلسنا نسترجع ذكريات الطفووله.. جان حمده تحطلنا غنيـه كنا نغنيها يوم كنا يهال!! كانت ربيعة امهااتناا أمريكيه وبتطلق من ريلها .. وبنتها شاااامييييي!! (شمسه) ربيعتنا.. ف كانت تحط هالغنيه في السياره و*بس* هالغنيـه.. ونحن الخبايل نغني وياهاا.. جي عمرنا يمكن ثمان سنين

gloria gaynor - i will survive

[حلم الطفوله]

اليوم : من يومين

المزاج : الحمد لله

الموضوع :

من يومين كنت يالسه ويا الأهل ... عاد يوم أجتمع ويا البنات !!! نستوي حشاكل أصحاب مشاكل

المهم .... لبسنا براقع ! وقلدنا العيايز .... طبعا استانسن وعطنا محاضره اشطولها عن البراقع

وعقب ما أتوعا إلا بخالتي تقول : مب جنها تشبه حلوووووووووووم !!!

وأنا جيه

حتى شكيت بعمري .... فاحمريت واخضريت وازرقيت ...

خالتي ساحره !!! وللحين مب مستوعبه السالفه

المهم ... الحين الكل يزاقرني حلووووووووووم !!! يعني اسم على مسمى

وتوته توته خلصت الحتوته

[شمعة أمل]

اليوم الاثنيـن
المود: ضغطيييييي مرتفعععععععع >_<
الموضوع:

كتبت رد شو طووووووله بعدين مسحته.. وقررت أرمس عن البـارحه.. لانه اليوم مايساعد اسبشلي الحييين! يييييه ضغطي مرتفعععععع!!!


المهم.. شو الشي الانترستينغ في حياتي

البارحه على الفجر كتبت ورقه ولصقتها على باب حجرتي.. عشان أعرف خواتي بيوعوني الساعه تسع ونص وانا مابا.. يعني بنطلع عشر ونص وانا مابا انش تسع ونص ابا انش عشر وعشر
فـ يا عشر وعشر ونشيـت وطلعت برع شوي بس مانزلت تحت.. اسمع جي صوت ولا بنت عمي في بيتنا.. جان تطلع اختي الثانيه من الحجره وتقول انه عمي الصغيـر وعمتي الصغيـره في الدرب.. ف قلتلها تخليهم يسيرون ستاربكس ويبووولي كافيه لاتيه ويرشوون فووقه جوكلت.. < صدق خليتها تقولهم رشوو عليه جوكلت من فوق... ولا مابشربه
انيويز.. عمي (ب) < مع انه مازقره عمي ازقره بأسمه الا اكبر عني بسـنتين ونص.. سمع الكلام والله ورش عليه جوكلت
المهمممم انا سرت اييب قشاري ولا احصلهم كلهم في السيـاره وعمتي < بعد مازقرتها عمووه ازقرها باسمها واسمها مدلعينه بعد .. يعني حتى مازقرها باسمها الاصلي.. هي قدي.. اكبر عني بـشهر وشوي! .. المهـــم.. عطتني الكافيه لاتيه ماليييييييي ريوووقي هذاا
وسرنا بوظبي
وفي الدرب يالسه أتصل واحجزلي موعد هني وهناك.. واتصلت في العياده وقلتلها ابا موعد الساعه 12 جان تقولي مايستوي الدكتور مابياخذ مواعد عقب الساعه 12.. قالتلي تعالي 9 وانا في خاطري ياااربي شو بيوعيني.. بس قلت يله ماعلي ويوم آخر شي قلتلها اسمي جان تقولي انتييييي فلانه بنت فلان.. وانا هاااه هيه.. اوه خلاص تعالي 12 الدكتور مبند العياده عشان ابوج بيي.. وانااااا >> وسييييييده اتصلت في ابويه.. قلت خلني اسير وياه بس طلع انه بيسير سيده من الشغل فـ لازم اسيـر روحييي

وعقب وصلنا بوظبي موول وسييييده على آرابيسك.. والله وطلعت حافظه اسامينا وكل شي.. وانا احاول استغل هالشي عشان تعطينا ديسكاونت بس مافاد قهرتني.. رافعيـن آسعارهم وايد وايد!!! وماشي ضحكني غير يوم قالت يالسه اسوي فاتورة عليـا.. ونحن منوووو عليـا!!! .. ولا عمتنا تي وتقول اناااااا!! ونحن هااااااااه انتي مب علياااا!!.. اونه لااا كله اعطيهم عليا لانه من اقول اسمي يقولولي شوو هاه كييف.. ف ماحب اتلعوز ويوم كنت هناك اتصلت في فندق روتانا وحجزتلنا في المطعم الايطالي هناك وبعدين سرنا صلينااا وعقبه سرنا خنجي واكتشفنا انه عندهم محل في دبي في خان مرجان

عقب سرنا الفندق نتغدى.. وكل وحده تمت تمدح في شكل أكلها وانا ساكته ولا تي بنت عمي وتقول الصرااااااااااحه أكل شمعه شكله أحلى شييييييي!! < شكليا وطعمه يمممممم

عقب سرنا ستاربكس < كوفيي حق الرده.. وفي الرده متتتتتتت من الضحك.. فجأه جي هدوووء ويوم أصد ورا اختي وبنت عمي وعمتي كلهم رقوووووووووود ووصلنا دبي بالسلامه.. ومارمت أقاوم ورقدت.. وهم ماشاءالله تموو واعيين.. تعشوو عندنا عقب روحوو.. بس بنت عمي نزلناها البيت قبل لانسيـر السينما ويا ابويه



حللللللللم
شو هالموقف الكشخه الاسم وراج وراج.. من كثر ما يناسبج

[الـيـاه]

^
اويييييييه تذكرت عمج (ب) و (ج) من زمااااااااان ماجفتهم مايو بيت يدي لوووووول
يالله يا حلوه نتريااااج

[مــهــابه]

اليوم :

~ بدايه [ أسبوع ] يـديد ~ !


المزاج :


~ رايقه ولله الحمد


الموضوع :


~ تونيه طالعه من المطبخ ، سويـت لي ريوق ، ولا آحـلى


انا وختيه الصغنونه ، اول شي كآن خاطريه بحليب بالزعفـرآن

سويته وجيه ، خلآف قلت مب حلو بدون شي نآكله ، وانا من زمان خآطريه أتريق
قلت لهآ : شورايج أسوي بيض ؟ لوول
حليلهآ ماقالت : لآ !

وجآن اسوي

بس والله لو كآنن البشآكير هناك جآن حصلنآ هزبه محترمه ، مسويه البيض ، بالتاوه مالت المحلآ ، جت العواقب سليمه

~ كان حلووو ، احس اني من زمآن ماسويت بيض


~ وماشي الحين مقررين انا ويآها انواصل يلين ماشاء الله


بس نشة الصبح حلوه ، ما ادري ليش نحن نحب الرقآد لين العصر ؟


طيـاره اخويه تأخرت كآنت المفروض تطلع بليييل بس ما ادري ليش ماطلعت


يوصل لـ هنآك بالسلامه ، صح انهآ يومين وبيرجع بس بعد بفتقده


انا ماصدقت علـى الله رجع البــلاد ~ !*


الله يحفظه وين مايكون

[أنامل قلب]

:
.

اليوم : الأحد ..
المود : كالعاده مودي ما يتغير ودومه (( .... )) =)
الموضوع :

اليوم تعبت تعب ما صار ولا استوى .. كله بسبب خلل نظام النوم عندي !
والله الواحد ما يحس بقيمة الشي إلا لمن يفقده ..
وانا خلاص يأست من تنظيم هالسستم :/

+ مريت انا وزميلتي بالدوام ابـ موقف طريف اليوم مع وحده
يايه تستريح عدنا ليمن يخلصون لها ملفها وجي ..
بس الله لا يبلاكم بالاحباط اللي بكلامها احليلها .. . !

طايحه ذم بشباب اليوم .. وتشاؤم بخصوص مبدأ الزواج ..
وكيف الوحده تقعد ابـ بيت اهلها ولا جهنم ريلها =$

كله بصوب .. وشكلي آنا ورفيجتي بصوب ><" !

ربي يحفظها .. . !

:

اممم .. هذا الاسبوع القبل الأخير بالدوام ..
وربي يوفقنا باللي فيه الخير ويرضاه لعباده يارب ~

^_^ ..

[شمعة أمل]

اليوم الاربعاء
المود مستانسه
الموضوع:

على الساعه 2:30 الصبح نشيت من الرقااااد ومارمت أرقد!! تميت اتجلب لـ ساعه عقب طفرت وطلعت برع.. ودشيت المطبخ وخذتلي جبس وdip ويلست آكل شويه واشوف تلفزيوون.. وشربت كوب حليب بعد وشغلت الكنديشنات في الصاله عقب ياني رقااد ورقدت بس احلى احلى شي انه كل شوي اغمض عيوني وارد افتحها واقووول اللللللللللللللله حجره روحييييييييييي

مب متولهه على شي غير انه تكون لي حجرتي روحي :( طردوني من حجرتي الى هنيـه لول! وارقد ويا امي وبطنرد من حجرتها وبيفروني ويا اليهال مب حاله هاي >_< كل يومين ثلاث انطرد!!

عقب نشيت على حشـره >_< امي في المطبخ مسويه حشره وبنت عمووه يالسه على اللابتوب تضحك عليه.. عقب طفرت جان اسير الحجره اونه بكمل رقادي .. وهذا عـ الساعه 11 تقريبا.. وعـ الساعه 11 وربع وبدت الحشره مره ثانيه بس هالمره الفااكيووم! (مكنسه كهربائيه).. يييييه >_< حسيت اني خلاااااااااص!! يعني الوحده ماتروم تتهني برقادهااا
آخر شي نشيت غصبببببببببب >_< وعقبه بشوي ربيعتي اتصلت فييه انه بتيني.. جان اقولها توني ناشه! تريي علي شوي.. زين ما طاحت من الكرسي لول.. لاني انا دوم انش من وقت

عقب طلعت وياها ويا البنات وكان كششششششششششششششخه!!!!!!!!!!!! وايد استانست.. وخواتي وكزناتي من صوب يتصلون انه اسيرلهم.. وكل ماختي تتصل اقوللها لاء يعني لاء والله كنت ابا بريك. ويوم كنا في ستاربكس يلسنا انا ومريومه نرمس عن البقـر! جان هي تسيـر عند تامي وتقووولللها تامي انا ابا اكل بقره دبه مب ظعيفه.. والبنت يالسه تقرى جريده ومب متفيجتلنا ويوم طلعنا مب رايميين نمشي خلاااص! مريومه واختها اختفوو ووانا وتامي واقفيين اونه ندور الدريول.. آخر شي طلع جدام ويههنا! وحليله من الصبح جدامنا يالس يأشرعلينا ونحن ماستوعبنا انه هاا هوو.. كنا مندمجين في السوالف!..ها دريول قم مريوم كيووت.. من بين كل ربعها بس يدانيني انا لاني الوحيده الى أدل هم كلهم مايدلوون.. حتى مايدلون وين هارفي من هارودزز لوول!!
ماخلينا مكان ماسرناله! سرنا هارودز عقب هارفي عقب سلفردجززز عقب توب شوب عقب ستاربكس صوب دبنهامز عقب فريج الياااااااااااه الياااه آي مس يوووووو

كااان كشخه! واايد ضحكنااااااااااا!!!!! لا بعد خيّست قميصي فرابتشينو بس كيف ماعرف؟!!

والحييين منخشه في حجرة امي .. احب ايلس روحي!! بسير أكوي ثيابييي >_< جبل ثياب يترياني

[بنت الدلع]

اليوم: السبت استوى امس
المود: لول مادري جيه عبط على فيس عليه كل اشكال الاكشنات
الموضوع: درااااااااااااااااااااااا ااما (فلم هندي على اصوله لول)

اليوم كان من المفروض اني اسير العين ويا هلي
بس طبعا كالعاده راحت علي نومه

اني وييييز ظهرت لي شغله جدى الامرتس مول
ظهرت من البيت الساعه 3 ونص (في هالوقت هلي كانوا في الطريج رادين من العين)

كول 1 (ماما): الوو
ماما: الجو واايد مغبر اذا تقدرين ردي البيت
انا: لا ماروم انا ظهرت خلاص

كول 2 (ماما):اميه فديتج ردي البيت اذا ترومين الجو تعبااان
اخوي شل عنها التيلفون: اقولج ترا زحمه وغبااااار وماتشوفين شي
"فهمنااااا"

كول 3 (اخوي): هاا انتي ويينج ؟ "اعووذ بالله مايخلون الواحد يتهنى بالطلعه "
انا: على شارع الامارات
سمعي الجو واايد تعبااان ماينفع تطلعين غبااار وحااااله ردي احسن


كول 4 (اخوي): اعووذ بالله,, مارديت

كول 5 (اخوي): يرررن يررررن يررررن اففففف امري لله برد
الووو

انتي وين الحين
مادري انا عالقه في الزحمه
انزين شو عدالج ؟
مااادري زحمه ماشوف شي
شو من البنايات عدالج؟

عداالي شاحناات ماروم اشوف
طوفتي شيشة ادنوك؟
مااادري ما انتبهت
انزين خذي الجسر الفلاني وردي مابترومين تكملين
زحمه لييييين دااااخل دبي
الشاارع مسكر
وغبااااااار نحن بغينا نسوي حادث ردي البيت

بدييييت اعصب تراااااااا

انزين خلاص خلاص برد بس وين بتدخلني جدا الصناااعيه ؟؟
اخاف اسير هاك الصوب
شو ها كله هنوود

مافيه هنود يوم بتردين اتصلي وبدليج

خذت يمين ودشيت في الصناعيه
كول 6 (اخوي): ها وين وصلتي
انزين خذي اللفه وكملي سييييده بيطلعج عالدوار الفلاني
انزين

كملت سيده ويتني تحويلات غبيه
كول 7 (اخوي): ها وين
انته ويييين يايبني وييين هذااا
وين اسييير ؟؟
الشاااارع مسكككر
شو هااا وين مدخلني ؟!!!
ماروم لا اكمل سيده ولا اخذ يمين
لازم ارد على الشارع الي ييت منه
يعني رووونق سييييد
وبس شارع واحد الي عاليسار السياايير واقفه
انزين ردي
وييين ارد ؟؟ ادش في السيااااير؟؟
تباااني ادعم

وخلاااااص اهنه بنت الدلع دمها استوى ألف
اولا ارمس بدون سماعه
ثانيه ميوده اليتلفون في ايدي وارمس
ثالثا زحمه وشاااحنات
راابعا مليووون مكااالمه سوولي وخلوووني اتوتر
اخر شي عصبت وقفلت التيلفون
ظهرت من المتاهه
وسرت الجمعيه اخر لي كمن غرض
خلصت ويوم ركبت السياره خذت نفس وهديييييت
فتحت التيلفون



25 مس كووول
من ماما ومن اخوي ومن اختي ومن ربيعتي !!

شو الي صاااااير

اتحروا اني سويت حادث وانتقلت الى رحمة الله !!!!!! "باسم الله علي"

ويوم اتصلت في اختي
انتييي وييين ؟
ووين سرتي

وانا بكل برود اعصاب: سرت الجمعيه

انتي سايره تتمشين ونحن ندور عليج ونحاتيج

يوم رديت البيت
ماما يت حضنتني وباستني: الحمدالله مافيج شي

وعقب يلسنا واتفاهمنا وهيييك وهييييك ... الخ

ههههه والله فلم هندي

ماكنت ابا هلي يتمون يحاتوني جيه
بس توترت لو ما قفلت التيلفون عادي اسوي حادث بسبت المليون اتصال

[رمــش الغـــلا]

بنت الدلع ...~

أي حد لو انحط في موقفج بيسوي نفس الشي

لانه المحاتاة الزايدة

ساعات تفقدج أعصااابج ...!

.
.

شرات أمي .. مرة كنت رادة ويا ربيعتي من الكلية وبس مريت الستي بندش محل نبا كمن غرض وبنظهر
ومن حظي النحس اني نسيت فوني في السيارة

وهي تتصل وتتصل وآخر شي يوم ركبت السيارة اشوف اشكثر مس كولز منها ومن أختي !!><

وعقب عاد قلتلها المحاتاة هاي كلها تتحرا استوابنا شي ..!

وأنا ناسية الفون فالسيارة وبس ..~

أهم شي إنج رديتي البيت بالسلامة ...~ [ لووووول ]
.
.
.

ملاكووووه

فديتج مس يو دبوووووووووووووووه

واخيرا قررتي ادشين الواحات ..~

ما بغيتي

فديتج يلا ردي نبا نشوووووووووووووفج

اسميني أمس اتغصصت يوم كل شوي النت يقطع ما رمنا نرمس :(

.
.

يلا ردّي وحطي سوالفج كلها في موضوعج

وأهم شي سلطان بروناي

أحس أكشششششششششششن ...~!!

.
.

[بنت الدلع]

رمش الغلا
هيـــــه صدقج
خصه اذا انتي تسوقين وزحمه ومليون شغله في بالج
ماترومين تركزين وتتوترين

الله يسلمج فديتج

===

ملااااااك انتيييييي فييييينك يا أمر
دخيييلج ساااعه وانا اقرا شو كاتبه
ارحمييي بحاالنا

[مزن هتان]

غمظتيني بنت الدلع
بس تدرين هذي يمكن عشانج اول
مره تظهري بـ جو كذا خافوا عليج.

أحيد مره الجو كان مغبر كلش و ما كنت اشوف شي
وقفت بـ نص الشارع ما طلعت برع الشارع !!

[المزوحي]

اليوم الخميس

قمت متأخر والله فيني رقاد، أحس بتعب، مايمديني أرقد إلا ظهر النور ... وصلت الدوام الساعه 8:45 يوم بغيت

ادخل المكتب اسمع حد يصفق، قلت بسم الله، طلع ربيعي يصفق لأني أنا ييت خخخخخخخ المهم بعد وفوق هذا

طالبين لي ريوق بدون مايسألوني هههههه

المهم أدينا واجبنا واللي علينا والشغل المعتاد ...

وخذنا استراحه ...

رديت البيت ما اتغديت .. رقدت ... قمت العصر صليت وطلعت امشي ( رياضة ) رديت البيت اتسبحت وصليت المغرب

ودخلت الواحات