حــرية الانتــقاد ..

[ايه احبك]

هذا ما جنيته على عمرك XD
شوف أخوي ---> اونه سيريس Xp
انته نك نيمك المزوحي لكم ما يخصك في المزح XD
لوول
طيب بس حساس
دوم مواضيعيك عن العرس او الثياب او حزن في واحة الفضضه
ما حسك تنوع بس هالأيام شاد حيلك ان شالله دوم ^_^
مادري بس احسك بارد وما تغير من صفاتك يعني تعرف يور مستكيس بس ما تغير بدليل انه نفس المواضيع في واحة الفضضه
شرات ما قلت شمعه
واحسك ما تختلط في كل الأعضاء يعني بس احسك ويا الأعضاء الي في موضوع سوالفنا وطلباتكم
^^ لاتزعل مني بس انته طلبت انتقاد او لو انته عضو مب فعال و مهم في المنتدى جان ما انتقدنا ^^;
best wishes in ur life ^_^

[المزوحي]

ولو أنا ماطلبت الانتقاد مابتتنقديني .. عادي وإلا شو اللي بيخليني أنزل موضوع بكبره ..

مثل ماتعرفين كل انسان له اطباع معينه وله كذلك ميول .. فأنا أحب هالشغلات وتلقيني أطرح مواضيع

عن هالاشياء .. يعني أنا ماعرف شي عن التصوير ولو عندي كاميرا ... بس اتابع مواضيع الاعضاء ..

انا المزوحي لأني فعلا واااااااااااايد امزح يمكن هالشي مايبين عليّه في الواحات ..

لسببين ..

أولا : لأني يوم اكتب رد بدون التعابير ( تعابير الويه )

ثانيا: لأني ماخذ راحتي في الواحات، وماقدر أفضفض لأي شخص ( فتلقيني افضفض في الواحات )

وعقب صارت مواضيعي كلها عن هالشي ... فتلاحظون النك نيم اللي حاطنه غير عن كلامي

ومواضيعي ...

وبعد بقولج انتقدي مابزعل .. وبحط هالويه عسب ماتحسين إني متنرفز


بس بين ربعي وااااااااااايد أمزح ..

وإن شاء الله بشوف شو المستيكس اللي فيّه وبتغير

[ايه احبك]

كلولولولولولولوولولولولش ما زعل علي لوول هوووف وت ا ريلف ^^;
يالله نترقب مزوحي نيو فيس ْXD

[المزوحي]

حاضرين

[تحفه]

انا ما عرف شو ضروفك عشان انتقدك
نحنا حتى لو شكثر تكلمنا عن نفسنا واحاسيسنا اون لاين still مابنوصل للصوره كامله عن اي حد منا تخولنا انا ننتقد
بس اتمنى ان الدنيا تسعدك وتنصفك لانك انسان خيّر وحساس وطيب

[المزوحي]

تحفه .. صح الواحد مايعرف ظروف الغير ...

انا خوليتكم بانكم تنتقدوني لأسباب ...

اشكرج على الكلام الطيب اللي قلتيه عني ...

بس إذا عندج أي شي عني تفضلي ...

[تحفه]

ماعندي شي ,, بس اتمنى الله يفرج عنك كل همومك :>

[المزوحي]

آمين تحفه وهذا من ذوقج

[عمة العيم]

انتقادي هوووو

انك ترد على كل شخص بروحه....ليش ؟


و بعد احس وايد تتنرفز بس ماتعرف شو تسوي تحتاج حد يدزك و يقولك سير سو جي!

صح ولا انا غلطانه؟؟؟

(^_^)

االله يوفقك و يسعدك

...

[المزوحي]

هلا عموه

اتنرفز من شو مثلا ؟؟؟

شوفي إذا على طبعي أحب حد يقول لي سو جيه، مرات اتشجع ... بس مب شرط يفرض الشي ..

لا

ولكن يعني دافع أحيانا

[أنامل قلب]

السلام عليكم ..
عدنا و العود أحمد ^_^ ..

:

مثل ما سبق وقلت بردي اللي انمسح وما بان .. !

نحن اهني أخوي نحط الانتقاد (( اللي نحسبه )) بك ..
بمعنى إن مو كل انتقاد ينطرح يلزم منه ان يكون صائب ..
نحن ننتقد اللي نلاحظه ومش شرط الملاحظات تكون صحيحه دوم ..
خاصه ان نحن اهني بالمنتدى نتعامل بالكلمات وبشكل بسيط وحسب ..

وايي دورك عقب بالمقارنه بين الشخص اللي تشوفه بنفسك ..
والشخص اللي تلاحظه بكلام الغير لك .. !

:

ـ بخصوصك أخوي أحسبك والله أعلم محتاج تكون صريح أكثر مع من حولك .. !
يعني مافيها شي لو قلت اللي بخاطرك وافضيت بملاحظه او راي تحسب به الصحه بشكل طيب ..
سواء كانت الشغله عنك ،، عن الغير ،، عن حادثه ،، شغله ،، أيا كان !
بالعكس بتريح نفسك وغيرك بصراحتك الطيبه ^_^ ..

ـ دومهم اللي ابهم صفة الفرفشة أو الفكاهة يكون لهم جانب مخفي عن الغير ..
الجانب هذا يكون جدي اكثر .. أقـــــــــــل فكاهة بكثييـــــــر .. !
فحاول تظهر هالجانب لمن تكون بحاجه لاظهاره ..
ولو لقيت رد فعل غير محبذ من الغير لك بخصوص هالجانب ..
لا تلومهم لأنهم باختصار ما تعودو على هالجانب منك ..
لكن بالتعود بتلاقي منهم رد فعل يطيب خاطرك باذن الرحمن ..
بس حاول تكون على الطبيعة اللي تريحك دامك بطبيعتك اهني ما بتئذي الغير ..

ـ حرام تظلم نفسك بالكتم عليها ..
وتراهم يمدحون الورقه والقلم ..
انت بس حاول مره مرتين بأي شكل كان .. وبتلاحظ الفرق تالي ^_^ ..

ـ حلو ان الواحد يكون صاحب اراده ..
ولو ملك الاراده .. يزيد منها لا العكس .. وما يوقف عند حد وكأنه يقول فيه :
عيبي كذا ومشكلتي كذا واحتاج لكذا ويوقف تالي بدون فعل يشفي عليل كلام الواقع ..
فبادر بابداء الفعل لحل المشاكل ولبلوغ غايتك .. !

ـ يحبذ لو تظهر من روتين تحسبه موجود ابـ حياتك ..
في حال انوجد يعني .. !
وحاول تجرب شغلات وأنشطه يديده .. وإن كانت غير مألوفه لشخصك ..

ـ ما بكرر كلام غيري لكن أحبذ شغله الفيسس اللي طروها ..
ولا تسمع كلام عمـــــــوه .. بالعكس حلاته انك تعطي كل عضو حقه برد منفصل ^_____^ ..
شكلي بتكفخ من عموه .. !

اممم ..
هذا اللي يحضرني حاليا واذكره من الرد اللي سبق وكتبته وانمسح ^_^ ..
وللمره المليون ملاحظاتي وانتقاداي مو لك وحسب ..
لكنها لي كذلك ولكل من يحتاج لمثل هالنقد ..
وتبقى شغلات تحتمل الصواب والخطأ كـ نقد مرتبط بشخصك أخوي .. !

فـ امممم السمــــــــــــوحه جان ضايقتك بكلمه ..
ومو من عوايدي عادة النقد بالعام ..
بس يمكن لأني ماحسيته نقد ممكن يسيئك طرحه والله أعلم ..
وان شاء الله بيكون لي مرور في حال تذكرت أي شغله ثانيه ولقيت الباب مفتوح :)

جل المعذره أخي ..
وتقبل منا فــــــــــــــــــائق التقدير والاحترام ..

من غير مجامله ..
بك صفات طيبه وفكر طيب ..
حفظك الرحمن من الشر وثبتك عالخير باذنه ^_____^ ..

.....

[المزوحي]

أنا مبسوط أنامل على الرد ويسعدني مرورج وعيبتني صراحتج، وإذا في شي ثاني وتذكرتيه،

لاتترددين أبد ..

إذا عن الصراحه فالحمدلله هذا الشي فيني، ولكن بتستغربين ردي عليج الحين، يعني

ليش ما اترك هالشي بيني وبين نفسي، القصد إني أقرا اللي ينكتب عني دون تعليق ..

مب مشكلة لو علقت على ردكم برد بسيط

شكرا لج مره ثانيه

[نجمة دبي]

وعليكم السلام والرحمه

مممممم

يعني انا مب من النوع اللي انتقد الناس خصوصا اللي حواليه..

والانسان يمر بظروف مرات تكون سهله وما تأثر علينا .. ومرات من صعوبتها انتم متأثرين بهالظروف فتره طويله .. ويمكن اتغير من تصرفاتنا ونظرتنا للحياه ..

فإذا انته نزلت موضوع في واحة الفضفضه وقمت تفضفض عن مشاكلك الخاصه او الدوام او ربعك .. هذا يعني انك تأثرت بشي حصل ..

واذا نزلت موضوع في ( سوالفنا وطلباتنا ) فهالشي طبيعي .. مثلا خاطرك تعرف عن اشياء واغراض .. او تنفع غيرك بمعلومات هامه ..

ما بيلس اكتب عن كل رد او موضوع تنزله .. لاني اشوف ان هالامور جدا عاديه

مممم انته تحب تمسع اراء الغير وتحب تناقشهم ^_^ وهالشي وايد حلو

من قراءتي لردودك مرات احس انك مستانس حتى لو ما حطيت فيسس :)

ادري ان في خاصية الرد السريع ماشي فيسس .. لكن ماعليه عشانا سير الوضع المتقدم وحط لنا فيسات كثر ما تبغي ^__________^

وهذا اللي عندي :)

وربي يفرج همومك وهموم جميع المسلين
قولوا آمين :)

[المزوحي]

أهلا اختي نجمة دبي ... اسعدني تواجدج ...

يمكن لأنه سالفة ( الفيس ) تأثر .. وأحيانا يمكن أرد بكلمتين فيبين كأنه الشي مب عايبني ..

ويمكن كل واحد له ميول في شي معين .. يعني مب شرط اشارك في كل الواحات عسب أكون المزوحي

يمكن أكون بس متابع للمشاركات حتى بدون ما احط مواضيع ..

على العموم ...

في يلسه بيني وبين عمري ... عقب ما أقرا كل الردود ... وإن شاء الله بتغير ..

[نجمة دبي]

مب سالفة تغير ... انا ماشوف ان فيك شي مب طبيعي