~ فترة الملجة ~

[المزوحي]

مهابه ... مب شرط عسب فترة الملجة احلى فترة، فالواحد منهم يسمح لعمره بأشياء، كون هالشغلات بتنمحي

بعد الزواج .. راي من رايج

[المزوحي]

في هالأيام يمكن تعرفون بعض، وحد يرفض الطرف الثاني ويتم الطلاق ..

يعني وحده من الأهل كان بتتزوج، واتطلقت كون الريال سمعته سيئة ....

لكن اتزوجت والله رزقها بأطفال، لكن الملجة غير عن الخطوبة ...

يعني بعد بتكون مطلقه في نظر البعض، لكن الخطوبة يوم تنفصخ ... مالها أثر مثل الطلاق ..

بس في نفس الوقت الواحد ما ياخذ راحته كونها خطوبة

[الهيثــم]

دام انه الريـال ملج عـ الحرمـة أشوف إنه ما في مشكلة إذا طلعوا مع بعض وساروا وردوا بما إنها صارت حرمته شرعـــا ...

[مــهــابه]

^
خـطاب :

أنـظر لـلموضوع بـ شموليـه أكثـر ، حرمـته ع العـين والرأس

بـس أنـت تـعرف شـو يصير خلال هـالفـتره ؟

أنـا مابـكون سلبية فـ التفكير ، أو انظر بسوداويه ، بـس بـعد الواحد يـنظر للـموضوع من جميع نـواحيه

انا أعـرف وايـد ناس كـانوا مالـجين وراحوا وطلعـوا وردوا ، وفـ الأخيـر ماكتمل العـرس ولسبب أو لآخر ماتم الزواج من أسـاسه وكان الطلاق بـغض الطرف عـن الأسبـاب , ,


المـزوحي :

الـبعض يـقول فـتره الملجـة هي أحـلى فـترات الزواج
ومن وجهة نـظري مـافـي شي يـقدر يـسويه فـ فـتره الملجة وماراح يقـدر يسويه بـعد الزواج , , ,

[المزوحي]

خطّاب وياك أنا إنه حرمته شرعا .. وأنا كلامي مع مهابه ..

ليش انا ما اسمح لأختي بهذا الشي واسمح لنفسي وآخذ حريتي يوم املج .. من الأساس لازم اكون واعي ..

ولا أقولها دام إنج حرمتي فلي الحرية بكل شي .. حتى لو الواحد في خاطره يباتون في مكان غير البيت ..

والمشكلة إنه متى يندم الريال أو الحرمه، إنه عقب مايصير شي مب حابينه .. يقولون الشيطان شاطر ..

فمن البداية ... كل شي له حد

[جنون امرأة]

جنون امرأة فهمت كلامج، تدرين ؟؟ مرات الوحده تقول مابسوي يوم الملجة جيه، لكن ممكن يختلف هالشي بعد

الملجه، وأتمنى الواحد يقدر الشي ... يعني لو هلج عطوج حريه، لكن تكونين قد الشي ولو هو ريلج ...

صح .. لكن يتعمد ع الريال ..

:
:

بس انا اشوف ان الاهل يحطون الحدود و يتعاملون مع الريال بطريقة لبقة و ذوق ..

و اصلا هالشي لصالحهم .. ((لان كل شي ف وقته حلو))

و بعدين معروف ان اي اثنين مالجلين تحصلهم 24 ساعه مشتاقين لبعض ف لو كانوا 24 ساعه يشوفون بعض اهم بيملون و ما بيتم شي للعرس ..

[شمعة أمل]

عندنا نحن البنت ماتشوف ريلها لين ما تملج عليه ويوم تملج عليه ممنوع تطلع وياه وفترة الملجه من شهر لـ أربع شهور بالكثير..

بس انا بغيّر هالشي

ابا اجوف ريل المستقبل وارمسه على قل كم مره قبل الملجه.. ماتخيل عمري أملج على واحد ولا مره شفته ولامره رمسته

[مــهــابه]

شمـعه :

بنـودكم شرات بنودنـا بس نحن اللي زايد عليه ، انه الوحده ماتيلس مع ريلها الروحهم ، منقوود ، لازم حد ييلس سـواء كان صغيير ولا كبييير وهالشي من أيام اختيه العوده بس مادري بيتغير علي انا وتيمون وبومبا ولا

[الهيثــم]

المزوحي & مـهـابة

ويــاكم فـ النقاط إلي ذكرتوها ، لكن في نفس الوقت ما نقدر نمنعهم إنهم ما يطلعون مع بعض بحجة هالنقااط
لأنه لو صار شي ، بيكـون عاادي وحلال لأنها حرمته على سنة الله ورسوله

ومن المواقف إلي مريت بها وشفتها سواء من شبابنا أو بناتنا في العائلـة
وقـت الملجـة خلاص تكون حرمته وهو يكون ريلها ...
يعني يطلعـون مع بعض ويتعشون مع بعض ويسيرون السينما ،، اعتقد إن ما فيها شي أبد

وبخصوص كلامك يالمزوحي

ليش ما برضى على إختـي !! تراها ما سوت جريمــة
ولا انا سويت جريمة بحق بنت الناس يوم طلعتها لأنها حرمتي

بينهم عقد قران مع شهود وقت الملجة وغير ما شاء الله هالأيام وقت الملجة جنه عررس .. كل الأهل يلتموون

لا تحــرموا ما أحل الله لكم

[المزوحي]

شمعة أمل .. حلو الواحد يعرف الطرف الثاني ويتعرف عليه، لكن بما إنه مب مسموح .. يعني إذا ماشي خطوبة

وشي ملجة كيف بتقدرين ؟؟؟

إلا إذا واحد يدرس وياكم على سبيل المثال تعرفين كيف يتكلم وغيره ..

ويمكن الجيل الحينه تغير تفكيره .. اقصد إنه يبون يكونون غير عن اللي يفرضونه الأهل عليهم ..

مب شرط انتوا غلط ... لا ..

ولكن وجهة نظر مختلفه ...

يمكن يكون الكلام في حدود معينة، عسب تاخذين فكرة عامه عنه، لصالحج، كونج تعرفين شو تبين ..

[شمعة أمل]

مهابه
حتى نحن p= يفروون اليهال وياهم

قهر ماشي خصوصيه p=
بس تعرفين شو الكشخه .. ماشي يهال في بيتنا xD

[المزوحي]

خطّاب .. حلال والله حلال وأعرف صدقني ... وخلهم يظهرون ...

لكن انا عرفت شي ماحبيته ( من وجهة نظري ) ويمكن بتحسون إني أبالغ ! مادري !

حلو إنه أيام الملجة الحرمه تتعدل كونه يزورها، بغض النظر عن عقب الزواج وحفلة العرس ..

بس شو تلبس ؟؟؟ هنيه العوق ...

هل الوحده تلبس قصير ... فوق الركب وتقول حلالي .. صح حلالها ..

لكن لا تخلينه يتحرقص ...

وانتوا ادرى مابغي اتعمق ..

[شمعة أمل]

المزوحي
حتى لو يدرس ويايه .. اذا انا برمس واحد في الجامعه بيكون بخصوص الدراسه ف انا اصلن ماعرف شي عن شخصيته ..واذا لا سمح الله حد مثلا خطبني من الجامعه .. بعد احتاج ارمسه على قل كم مره بشي يخصه هوو .. لاني انا ماعرفه من الاساس >.<
اذا في يوم من الايام انخطب .. بحتشر لين مايخلوني ارمس خطيبي p=
مستحيللللللللللل اخذ حد ماعرفه .. ماتخيل عمري مالجه على حد ولا مره رمسته .. تخيل لو اخر شي يكون بااارد ولا بخييل O_o
انا مابا أطلق .. ف عشان جي ابا ارمس الريال في فترة الخطوبه .. بس مابمصخها اني اعطيه رقمي او شي

لو مايخلوني ارمس الريال ماتوقع بعرس .. لاني افضل اكون عانس ولا اني مطلقه >_<

[مــهــابه]

خـطاب :

شـو تـم للعـرس عـيل ؟
تـراها إلا فـتره بسيطه ولاحقين ع هالـشي بـعد الزواج

وبـعدين نحـن ماقلـنا حراااام ، ولـكن نـرمس من بـاب العادات والتقاليد عندنا نحـن ومن وجهة نظر شخصيـة


شمعه أمل :

يـعني انـتوا مب أحسن عـنَا
بس لازم حد ييلس ، سـواء فيه يهال ولا مافي
وانا أشوف هالشي مب حلـو ، صـدق مانحس بأي خصوصيه ، بس لاحول ولاقوة

[المزوحي]

شمعة أمل ... تدرين احترم وجهة نظرج ....

ممكن كلامج يكون صح، تبين تعرفين شخصيته قبل الملجة، ويمكن هالشي مايبين أصلا .. حتى لو بخيل ..

وفي البداية ممكن يبين لج إنه كريم .. بس بعد العرس يمكن وااايد أشياء يحذفها من القايمه ويقولج مب لازم ومب

ضروري وهذا ما تحتاجينه ... يخليج تكرهين حياتج، ومع هذا يمكن يكون شخص مقتدر، لكن بخيل ..

بس شمعة أمل أكيد ما بعيبج ردي، كوني أتكلم عن الجانب السلبي ... لا ..

ولكن انا اتكلم عن احتمالات في نظري ..

يعني لو عندج كره وكل ويلسنا 10 اشخاص حوالينها .. كل واحد بيشوف جانب الثاني مايشوفه ...

وإذا عندج أي رد، خذي راحتج في الموضوع ...