~ فترة الملجة ~

[المزوحي]

بـــسم الله الرحمن الرحيم

خطبة



ملجـــة


زواج



حياة ممله


روتين


تغيير


خيانة والعياذ بالله


وكل عايله ممكن تختلف عن غيرها في طريقة الخطبة او الملجة والزواج، بغض النظر عن كيفية تم

الخطبة، هل عن طريج الأهل، صدفة، في العمل .. الخ






حد يحب يسوي فترة خطوبة، وبعدين ملجه وعقبها بيومين حفلة العرس ...

حد يملج ويخلي فترة 6 شهور وبعدين العرس

ومن هذا الكلام ...ممكن الاهل يسمحون لزوج بنتهم إنه يزورها، بحيث ماتطلع وياه ...

وممكن تطلع وياه لكن يحددون المكان، او تاخذ حد وياها ولو صغير السن ..

وممكن يخلونها تسير بحيث تختار على سبيل المثال أثاث ...

شو الحدود في نظركم في فترة الملجة ؟؟

عني أنا أشوف كل شي له حد ... ونلاحظ إنه هالفترة إنه الأثنين يكونون مشتاقين يطلعون

أو إنه هو يزورها بكثرة ...

هل هالشي عادي وإلا الأفضل يكون حد، بحيث ماتطلع وياه أي مكان ولو هو حلالها ...

يعني خلاص محد يقدر يتكلم ...

وبعض الأهل يرفضون البنت تطلع وياه، ولو إنه مالجين .. وتلقى البنت في حالة زعل وليش

يرفضون هلي دام إنه ملج عليّه ..

هل فكرتي ليش سبب رفضهم ؟!!!


نبغي نقاش في الموضوع ...


لأنه الموضوع مايتكلم عن الحياة الزوجية بحد ذاتها ولكن فترة الملجة ...

[شهوووودة الأمورة]

حلو الموضوع .. لي عوده إن شاء الله ..

[بنوتة جميرا]

اول شي شكرا ياخوي على الموضوع وصدق موضوع مهم
ثاني شي بتكلم عن نفسي
انا الحين في فتره ملجه
وصارلنا تقريبا سنه ونحن مالجين والسالفه بطول بعد لين العرس
وعادي ريلي يزورني بالبيت او اني اطلع معاه لانه خلاص ريلي مالج عليه
بس اللي يقهرني سؤال الناس
صرت اكره اقول لحد اني مالجه لان اول سؤال يسألوني اياه متى العرس
اقول بخاطري انتو شو يخصكم؟؟!!
دام اني انا راضيه وريلي راضي بالوضع اني اكمل دراستي قبل
كلام الناس ما يهمني لو بعرس بعد 4 سنين من الملجه
احس ان هالشي راجع لي انا ولريلي

السبب اللي خلانا نتخذ هالراي..نملج يعني..
اول شي لانه لو تم خاطبني مب حلوة كل يوم طالع داش البيت عندنا ومافي صله تربطه فيني يعني بس خطبه
والشي الثاني إنا نتقرب لبعض اكثر افهمه ويفهمني ويكون من حقي هالشي ومن حقه بعد
احسن من اني اكون على علاقه معاه من ورا هلي
جي علاقتنا في النور وهلنا يدرون

فتره الملجه انها اتكون فتره طويله لها سلبيات ايضا
مثال
صارت بينا مشاكل لاسباب كثيره وكنا نختلف بس نرجع ونتصالح
ويمكن بعد من المشاكل
اني في مرحله جامعيه وكثير من الاوقات اكون مشغوله بدراستي او اقضي وقتي مع صديقاتي
وكنت احس ان هالشي يضايقه
وبالتالي احاول اني ارضيه وبنفس الوقت احافظ على مستوايه في الدراسه وعلاقتي مع صديقاتي

سوري على الاطاله
بس موضوعك حلو وحبيت اخذ راحتي فيه
واذا عندي شي برجع وبكتبه

شكرا مره ثانيه

[ملاك الروووح]

::

هلا المزوحـــــي ..

أول شي موضوعك وايد حلو

ثاني شي .. ألف مبروك حبيبتي بنوتة جميرا عالملجه .. ولو انها متأخره !


عؤبال عنــــا

:

بالنسبه لنا .. في البيت يعني ..

الوالد والوالده كانوا قبل رافضين فكرة انه خواتي يطلعون مع رياييلهم في فترة الملجه

لأنهم كانوا خايفين من كلام الناس ..!!

مع انه حلاله يعني عادي ..

حرمته على سنة الله ورسوله ..

بس تعرف العقليات كيف !

لكن الحين الأوضاع اتغيرت .. وتعرف بسبة العولمه العقليات تغيرت شوي ..

ف اختي اللي ملجت في الالفيه اليديده عطوها حريتها .. بس بحدود أكيد ..

يعني كانت تطلع وياه وجيه .. بس بشرط انها ما تتأخر وايد برع البيت ..

وترد قبل الساعه 10 ونص بالليل ..

وفي الاسبوع مره ولا مرتين بالكثير ..

وهم روحهم كانوا يبون يشتاقون حق بعض أونه ف ما كانوا يبون يشوفون بعض وايد ..

بس بعد يعتمد عالريال ..

يعني ريل اختي هذا مثلاً عاقل .. ورزين .. وشخصيه ..

ف أهلي مأمنين عليه وجيه ..

لكن لو نحن باجر يا واحد خرشه ومصرقع ما أعتقد انهم بيخلونا ناخذ راحتنا وياه

ف هو يعتمد بعد عالريال شوي أحس ..

:

وأحس انه يكونون مضطرين يطلعون مع بعض أصلاً

مثلا بيختارون الاثاث .. بيختارون الكوشه والدي جيه والبطاقات حق العرس ..

ف أحس حلو جيه انه يروحون مع بعض

::

الله يرزقنا بولد الحلال بس .. وبنشوف شو بيكون الوضع في فترة الملجه

[المزوحي]

شهوووودة الأمورة حياج الله، وتفضلي في أي وقت ... وخذي راحتج

[المزوحي]

بــنوتة جميرا .. شكرا لج على رايج في الموضوع ... وثاني شي حبيت أقولج عيبتني صراحتج، حتى لو أنا أو غيري

عند وجهة نظر ثانيه .. حتى لو فترة الملجة طويلة، المشاكل بتكون بها وإلا بعد العرس .... وصح إنه وايدين ماتبين مشاكلهم إلا عقب،

لأنه كل الطرفين يحبون يبينون الجوانب الحلوة فيهم أكثر، وبما إنه فترة الملجة طولت عندكم، فكأنه استوى إنكم

خلاص سويتوا العرس وخذتوا على بعض ..

وإذا تحسين إنه يتضايج من هالشي، لج طريقتج الخاصة كيف تفهمينه ... لكن الحلو فيج إنج موازنه كل شي ..

يعني ما أهملت الكل، عسب دخلتي حياة يديده .. يعني مانسيتي ربعج ولا قلتي بترك الدراسة عسبه ...


وإذا عندج شي ارجعي كتبي .. ^_^

[ملاك الروووح]

هيه صح أنا اتذكرت نقطه بعد ..



أحس المفروض يكون في فترة ملجه ..

يعني شي ناس .. على طول يملجون وعقب يومين يسوون العرس ..

يعني ف هالفتره .. المعاريس بياخذون على بعض ..

وبيعرفون بعض .. وبيفهمون بعض أكثر ..

وبالتالي بيتجنبون أي سوء تفاهم .. أو مشكله ممكن تصير لهم في بداية حياتهم الزوجيه

خاصه اذا المعرس ما كان من أهلها .. يعني ما تعرفه عدل ..

بس مدحوه حقها ( يوم خطبها ) .. وعيبها ( يوم شافته ) .. وصار نصيب بينهم ( عقب ما استخارت ) ..

ف أنا أفضل .. انه يكون شي فترة ملجه .. حتى لو ما يطلعون مع بعض ..

عالأقل .. يرمسون بعض بالتيلفون .. ويطرشون مسجات << اهم شي عاد

على أساس ياخذون على بعض ..

<< كم مره كتبت بعض ف هالرد بس

:

وبس هاي هي النقطه اللي نسيتها في ردي السابق

[المزوحي]

مرحبا ملاك الروووح ...

نحن عندنا في عايلتنا نفس هلج ... يعني بإمكانه يزورنا، لكن ماشي طلعه، ومع هذا ما صادف يظهرون حق أثاث

أو حتى يظهرون حق عشيات برع البيت ... لكن إذا على الباجيات بيستوي مثل ما ا استوى مع اختج الاخيره ..

مايندرى !

بس ريلها عطا هلج الثقة الزايدة وشي جميل الصراحة ..

[ملاك الروووح]

::

ان شاءالله يطبقون معانا النظام اللي طبقوه مع اختي


ما يخصني أبي أعيش حياتي أنا ..

يقولون انه أحلى الأيام هي أيام الملجه ..



مايندرى عاد ..


الزواج نصيب .. والواحد ما يدري وين نصيبه .. ولا متى بييه !!


الله يرزقنا الزوج الصالح .. ويرزقكم بنت الحلال

[تحفه]

انته اشبلاك شكلك متعقد من الخيانه!

ترا هالشي نادرا ما يصير واذا انت عاقل وفاهم وعرفت تتفاهم وي حرمتك لا تخاف

[جنون امرأة]

انا من وجهة نظري الشخصيه [ أكبر غلط ان فترة الملجه تكون طويله] ..

ممممم ما ينفع !!


اوكي تكون فتره بسيطه .. بالكثير يعني شهرين او ثلاث شهور مب اكثر من جي !!


و طبعا هالفتره لازم يكون فيها حدود .. و هالشي لصالحهم ..

و هاا كله يعتمد ع الريال ..

يعني لو كان واحد رزين و عاقل ما بيتم عند البنت في بيت ابوها لين عقب الساعه 10

و في بعض من الناس يقول لو كان الريال ثقه عادي خ يطلعون بعض ..

انا شخصيا اشوف ان اصلا الاب ما بيقبل في واحد اصلا هو ماا يثق فيه ..

ف جذي و لا جذي ماشي طلعه الا بوجود حد معاهم ..

و شكرا يا مزوحي :)

[بنوتة جميرا]

المزوحي
اصلا ماقدر اودر دراستي لانه هو حاب اني اكملها
ويوم اقوله بس مليت بوقف يعصب عليه..خخخ
ومثل ماقلت فيه سلبيات كثيره
بس احاول قد ما اقدر اتحاشاها
والحمدلله حياتي مستقره وان شاء الله دوم

ملاك الروح
الله يبارك فيج حبيبتي
وعقبالج ان شاء الله

[مــهــابه]

مرحبــا الســـاااع

مــن وجهـة نــظري الشخصيـة أن الفـتره بيـن الملجـة والعـرس لازم تـكون فـ حدود 6 أشــهر بـحيث أنـها لاتـكون أكثر أو حتـى أقـل

لأن ا لملجـة تـطول سنه وسنتين و3 أحسـها مب حلوه ( بتلوع جبدي منه لين حزة العرس


الحــدود من وجهـة نـظري الشخصيـه بـغض النـظر عن الأهـل فـ فـترة الملجـة ، تـكون زيـارة فقـط لا غـير ، وإذا بـتكون طلـعه أو شي للـضرورة القــصوى

لأنـه لـو طلعـنا ورحنـا ويينا فـ فـترة الملجة ، ماراح نحـس بـتغييير كبييير عـقب العــرس

فـ زيـارة كـل أسبوع أو أسبوعين مره ، أعـتقد بأنـهـا كـافيـه ، عـسب لا أمل منه :P


وبس

[فرفوش]

بتلوع جبدي منه لين حزة العرس

[المزوحي]

الله يرزقج بالزوج الصالح وعضوات الواحات يارب ...