تجربة استخدام الدبل على الرملة .

[المزوحي]

بالنسبة لإستخدام الدبل على الرمله ...

أفضل إني أخليه على القير الثالث اللي هو 4HLc بدال 4LLc ؟ لأني جربت الثاني لكن الموتر

أثجل ...

ويوم نوقف الموتر ... نرد الدبل على العادي، بحيث نخلي الموتر في الخالي ..

شو عن تجربتكم في القيادة برع المدن ... ؟


وصح يقولون مب شرط الواحد يكون عنده فتك عسب يدخل الرمله ...

يعني يعتمد على السويق ..

[الاسطوري]

السلام عليكم ..

"المزوحي"

قبل كل شي لازم تنزل ضغط التواير لـ 15 أو 17 او المهم مايطوف الـ 20 ، وعقب تحطه على 4H مثل
ماقلت وهذا حق المشي العادي في كل مكان أما إذا طاح الموتر أو
دخلت مكان وصخ وكان الموتر مايتحرك عقب
تحطه في 4L عشان
يطلع عمره ومثل ماتفضلت حتى لو السيارة كانت مشايه عادي اييك واحد ويطيحها في مكان وصخ
ويضيع الوقت كله بس عشان يحاول يطلعها وإذا كنت دوم تروح يفضل إنك
تيمع لك عدة كاملة من قلص وقياسه وشيول
ومكينة للهوا والنفاخه

طبعا هالاشياء على حسب الحاجه
والرغبة ،، رحلة موفقه


الاســـطـــوري
أخوكم

[المزوحي]

الاسطوري مرحبا بك " عندنا " ... دايما يصادف يوم أشوف حد مغرز وحد يساعده .. ويبون يقلصون الموتر

ينقص القلص .. مواقف حلوه تصير أحيانا ...

صح الموتر يوم تنصخ عن التواير أفضل .. لكن نحن دوم ندخل جيه بدون تخطيط .. لا .. نكون مستنين وندخل ..

بس كلامك صح الاسطوري ...

لكن هل يفيد إنه أخليه 15 عقب مايغرز الموتر ..

[صريح]

اول شي يالمزوحي يعتمد ع الدريول .. اذا كان عاثر لو تمشيه ع الكج بعد بيغرز


يعني السواقه اول شي عقب الموتر


و عن الدبل ... الدبل العادي ينفع في كل الدروب
و ناادر ما الشخص يحتاج للدبل الثجيل الا اذا كان يبغي يضرب ع العراقيب فالبداير ولا الفايه او كان غاط في بعقه خايسه و الرمله ناعمه "دهسه"
و طبعا يوم تكون حاطنه ع الدبل الثجيل تقوم الموتر ع القير الثاني
لانه الدبل الثجيل يأثر واايد ع القير و ممكن يطحنه


و يوم توقف الموتر مب شرط ترد الدبل ع العادي لانه الموتر واقف فما يحتاي ترده ع العادي
و طبعا وناسه القير العادي احلى بمليون مره من الاتماتيك

و اذا الشخص يخاف و يوسوس واايد مثالا يوم يصعد عرقوب يخاف يكون ورااه قص او يخاف ينجلب و هو يمشي عرض ع العراقيب تأكد مليون فالميه بيغرز دوم

و عن التجارب خارج المدن

تقدر تقول بشكل اسبوعي اذا مب يوميا حتى لول
يوم الواحد ملان و يقول يالله نتمشى في جيمرا ولا ع الممزر
انا اقول يالله نسير نقطع فالبرور هههه



1 - اذا كنت داخل البر حق يلسه و مش تقطيع ما يحتاج تنصخ ع التواير لانه ما بتدخل واايد فالبر
بس اذا داخل عسب تقطع خل التواير ع الـ 20 .. و حط في بالك انه كل ما تنقص الهوا تحت الـ 20 .. الـ risk انه التاير يفصخ يزييد

2 - يوم بتوفق الموتر دووم وقفه ع صعده ولا نزله عسب يوم تبا تتحرك عقب ما تغرز ..

3 - خل وياك قلص من الكبار شرات حبال البواخر اللي ما ينقصن "ينباع في ace hardware" و ابتعد عن القلص الحدييد لانه اذا انقص ممكن يرد ع السياره او ايي في اي شخص و يكسره

4 - موول ما يحتاج تعطيه ريس كامل فالبر ... فدوم سوق ع راحتك و ع الصعدات زييد الريس .. لانه كل ما تعطيه الموتر ريس كامل بيتم يحفر واايد و هو يمشي.

5 - دوم خل فالسياره شيول و قييج هووا و وولف

6 - ابتعد عن المواتر الامريكيه فالبر لانها ثجيله و دوم الشنب يكون ناازل و بينكسر عليك طبعا نستثني الـ jeep خخخخخ

7 - اذا مغرز اتصلبنا و امره بنفزعك ع طول لو تاالي الليل.

8 - السموحه ع التفلسيف و الهذربان الزايد

[المزوحي]

طول الله بعمرك صريح وتسلم لو بتفزع لنا ..

ربيعي عنده مورانو وحدرها الرمله وماشاء الله ماغرزنا بالمره، وجدامنا لاند وفتك داقين الارض ..

وعندي فكره على الوقفه ... بس هل ارد الدبل يوم انزل من الموتر ؟؟؟ وإلا أخليه على 4H ؟

[إسهر معي ليله]

موضوع جميل الصراحه.. وانا مالي فهالسوالف بس احب اتعلم

متابع معاكم

[المزوحي]

المشكلة إني ما أسوق في البرور، مع إني أحب هالطلعات ...

وإن شاء الله اسهر معي ليله تستفيد وكلنا وياااك ..

[قرموشة]

متابعين ..
صدق الواحـد يستفـيد من خـبرات الغير ..
.
.

[الاسطوري]

"المزوحي"

يالله اقنع اسهر معي ليله انكم تروحون تقطعون في موتره،
أنا بيي عشان أصوركم بس


صريح ماشاء الله ماقصر شرح لكم السالفه من طق طق لـ سلام عليكم، في جيك متوفر في
السوق هو مثل الأحمر مال المحلات بس أصغر وأحسه عملي لأنه أسرع
في الاستخدام وتروم تحطه في جهات مختلفه يوم تغرز
ووايد يفيد للطوارئ أظن سعره بين
250 - 300 درهم

[المزوحي]

قرموشة ... أمس شفت بدويات ... ينسمن على التاير ... الموتر مغرز ...

يالله قرموشة تعلمي مافيها شي ...

ترى بتظهرون رحلات وبتصادفكم هالامور

[المزوحي]

بارك الله فيك الاسطوري على المعلومة ...

[مزن هتان]

عايبني الموضوع
يعني حتى لو ما ندخل برور بس نستفيد
مثل ما قلت !!

كنت اترجى اميه ادخل البر على ايام سيارتي
الجديمه ما كانت اتطيع، وايد تعيبني هـ السوالف
اتخيل نفسي اقطع !!

متابعه لكم

[المزوحي]

مزن .. مب مشكلة ممكن هالمعلومات تعطينها لأي حد مغرز يوم تكونين منظمة للمجموعة بس ^_^

[ملاك الروووح]

::

وينكم عنا البارحه ..

ماتم حد ما غرز ..

يقهروني اللي مالهم في البر .. ويتفلسفون .. ايون يبون يطلعون الموتر أونه

وروحهم يغرزون !!


تمينا نتريه كمن ساعه .. لين قدروا يطلعون المواتر ..

لأنه البقعه صج كانت خايسه ..

:

عيبني الموضوع وايد ..

وشكلي بسوي كوبي بيست .. وبوزعه على شباب العايله ..

كل واحد فيهم تفلسف وسوا عمره بدوي .. ودش البر

وهم مالهم فيه ..!

:

متابعيــــــــــــن

اسقونا من غيض فيضكم

[المزوحي]

مرحبتين ملاك حياااج تفضلي ... استريحي واشربي لج فنيال اقهوه ..



وبتستفيدين من التجارب ..

تمي متابعه والأيام اليايه ( إن شاء الله ) يوم بتسيرون البر .. بتعرفين تتصرفين