اهتمام الرجل ... بنفسه

[فرفوش]

قال رسول الله صلى الله عليه وسلم خمس من الفطرة: تقليم الأظفار وقص الشارب ونتف الإبط وحلق العانة والختان
حديث شريف صححه الألباني

[عمة العيم]

انا حاولت وايد ويا بو الشباب

اخيرا اقتنع بالشور جل

لكن الحين بديت اقنعه انه يوميا يغسل ويهه بالغسول و يفرك ويهه بلوشن

بس تعبت رااااااسه يابس .... انا من النوع الي احب اهتم واحب انه هو يهتم..... بس هو مايهتم ياااااخي يقهرر....اونه الصحابه و الرسول ماكانوا يسووون جي ماكان عندهم كريمات و ماعرف شووووو ااااااه ينرفزني بهالرد

عطوني طريقه اخليه يقتنع.. بشرته تحتاج للفيشل عل الاقل مره في الشهرين او ثلاثه

نحن الحريم نسوي فيشل في الشهر مره مع انه مانتعرض للجو الخايس شرات الريايل ٢٤ ساعه برع في الاجواء الوصخه غير الدوام سوالف مكاين و مصانع و غازات و غبار و حاله.....يعني بشرتهم تخيس اكثر عنا و تحتاج للفيشل اكثر عنا نحن الحريم

كيف اتصرف وياه؟ اهيء

----------

على طاري قاعة القدم الخشنه....في طريقه سهله بدل البدكير....لان انا شخصيا اصلا ماحب البدكير (اتقرقط خخخخخ)
في كريم اسمه (جرجينز) للقدمين.... كل يوم قبل الرقاد تفركون اقدامكم و ترقدون خلال يومين تحسون بالفرق الاقدام تستوي ناااعمه وناسه

فـ هالشي اعتقد ينفع للريايل الي مالهم بارظ للبدكير ات از فيري قود يااار

[المزوحي]

مرات الواحد من نفسه ومرات لازم الواحد يحن عليه لين مايقتنع، بس مادري به بوالعيال لو بتشترين له غسول الويه وتخلينه

في مكان يبين، مب في الدرج، او وين يحط ادوات الحلاقه، يمكن يقتنع ويقول بجرب.

أما على طاري الفيشل صعبه إنه يتبرض يسير.

[عمة العيم]

هي والله
ان شاء الله بجرب جي اسوي بزين له المكان بعد بسوي كوشه حق الغسول و السكراب و الكريمات لعل و عسى ان يعتني في بشرته

لا الصراحه الفيشل ضروري لانه هناك حفر و آبار و براكين و اشواك لا بد من ترميمها و تنظيفها =$

[ذنـيـنـي]

عمة العيم

تراها مهمه صعبه
انا زين انه الوالده تسير تاخذلنا

يعني هالصابون مال الويه هي الي اول مرتين ثلاث خذتلنا اياه و عقب بروحي قمت يوم ادش كارفور اخذ منه
هالكريم مال الريل مال الجفاف (انا ريولي وايد يابسه) لو هي ما يت و يابت الكريم و فركت ريولي جان صدقيني ما بسوي خخخخخ

فـ الله يعينج على هالمهمه و كل شي بالتدريج, اول شي هاتيله صابون مال الويه
اول شي اميه يابتلي nevia for men oil control لأنه ويهي دهني و هالصابون يقلل بشكل كبير من الدهون

و مرة سرت كارفور عسب اخذ منه و ما كان عندهم و حصلت هذا

http://www.mymenstuff.com/wp-content...aenergetic.jpg

بصراحه وايد زين و من هاك اليوم و انا استعمله


و عقب هاتيله اشياء ثانيه على حسب الالويات
بس خلي في بالج انه في بعض الاشياء نحن ما نتقبلها كـ رياييل
يمكن انتوا تشوفونها اشياء عاديه بس نحن نشوفها اشياء مال دلع

[عمة العيم]

ذنيني... ماحبيتك.... عصبت

اونه مال دلع انتوا اصلا دلوعين كل شي ماتبون و ماتسوون لازم نحن نسوي لكم نونوااات نونواات متى بتكبرون؟

محد يدلع غيركم

لا تخلني افضفض تراني بفضفض هاء هااااء

.... تسلم ذنيني ان شاء الله باخذ له هالسوالف الي خبرتني عنها

على فكره فتره تميت احط عويهه و انظف ويهه وياي اللي احطه حقي احط له غصب ايوده فترة اسبوعين جي هاه


تصدق ربيعه في الدوام لاحظ قال له شو مسوي في ويهك محلو؟؟؟

هههههه يوم جي قال لي و عقب ما تم يسوي و يهتم قهرني وايد الصراحه

بنشوف

و بعدين وياكم

عنبو كريم وانت مغمض افرك به ريولك وانت مغمض افرك ويهك وانت راقد يالس تحلم تروم تحط

مب شغله صعبه يعني

.....

وايد رمست


،،،

[الزرعوني]

اقوووووووووول



عاد مثل ما تعرفون شوي شوي قامت تقرب الملجة :D

و لازم نهتم في عمارنا ..

المهم .. انا صارلي من 20 قرن استخدم فرشاه Oral-B

و معجون كرست ..

و جان تبون الصراحة في حياتي ما استخدمت الغسول :S

وقبل كنت افرش مال مره - مرتين حسب التفييج

الحين 3 مرات ..

و مع ذلك مب راضي بالنتيجة

سرت عند دكتور اسنان و سوالي تنظيف ..

بعد مب راضي بالنتيجة .. و نصحني بالغسول .. و قلت بستشيركم

[عمة العيم]

احلا شي وقت الملجه تكونون بيرفكت سبحان اللله

وعقب طااااااااااف

الغسول ينفع
و اللبنان ينفع بشكل مؤقت
و الحلاوه
و هالسوالف يعني
و الهال
و النعناع
و في شي يعطر الحلج بس ماعرفه بس سامعه عنه

[الزرعوني]

لا مب عشان الريحة يعني

عشان البياض

[عمة العيم]

في ناس لون عظامهم مصفر مب ابيض و الاسنان لونها لون العظام

فـ مابيفيد وياها التبييض .... الا طبيب الاسنان يسويلك اشعه تبييض و هالشي مضر للاسنان مب زين و بيرد اللون يصفر بسرعه يعني التبييض يكون مؤقت و بشكل خفيف ما تبيض وايد

و على فكره الاسنان القويه تكون مصفره شوي مب بيضا و هالشي يدل على قوة العظام

[قصايد غلا]

الزرعوني : بيّضهن .. التنظيف تراه للتنظيف "من اسمه ينعرف شو هــو "

يعني التنظيف عن الجير و هالسوالف .... إلخ ، و الأفضل نسويه كل 6 شهووور


بس التبييض يبيّض اللون

أنا جرّبت التبييض و ما حسيت بـ فرق وااايد ، يمكن لأن الدكتورة أساسًــا مب راضية تسوي لي إيـاااه

حشرتني و تمت تتحرطم تقول لي أسنانج بييييض حلووو لونهم

و أنا بكلللل براءة أقول لها : أبااااااهم مثل الممثلّيييييييييين ، جان تنقهرررررررررررر و قالت لي : دلــــع بناااااااااااات
و ما طاعت تختار هالدوا اللي يحطونه إلا بدرجة وحدة أفتح من أسناني




جرّب الصخّام "مال أووووول" لوووول أسولف وياك

امممممم لا تشرب بيبسي ، خفف القهوة و الجاي و الأشياء اللي تخلي الأسنان صفرااااااا
و إذا كلت أو شربت هالأشيا على طووول اغسل ضروسك ===> تراني يالسة أتفلسف بروحي بس يمكن تنفع وياك هالأشيا

[المزوحي]

افضل شي المسواك ، ومثل ما قالت قصايد التنظيف العادي كل 6 شهور عن الجير، لأنه التبييض يضعف الاسنان

[الزرعوني]

لا ولا مره سويت تبييض
وكل الدكاتره يقولون التبييض ما ينفع لان اللون يرد عقب فتره


و انا من اخر مره سويت التنظيف من عند الدكتور .. شل كل التكلسات و الدم الفاسد اللي في اللثه

والحين تمام التمام.. صارلي 4 شهور الحين وما عندي تكلسات لاني مواظب على التنظيف بعد كل وجبة على طول .. :)

وحتى يوم اشرب كولا ولا كرك بروحه .. على طول من اخلص اسير اغسل

[قصايد غلا]

أخويه الزرعوني ما عليه جرّب تبيّضهن قبل الملجة :)


أنا يوم قلت ما حسيت بـ فرق وايد "أطري إنه كان ودّي يشعّن من بياضهن" بس الحمدلله ضروسي ما كانن صفررر صفر بس دايمًا الإنسان يبا كل شي فيييه بيرفكت

[شوق القلوب]

السلام عليكم...

و الله هالموضوع فنااان... ههههه ضحكتني عمووووه...

...

من اكثر الامور اللي اتميز الشباب نظافتهم و ريحتهم الحلوه.. هو دخون على دهن عود.. على عطر فرش.. يحسسك جنه توووووه طالع متسبح..

...

بس اللي يبالغ.. تراه مب شي...
يخبروني انه في شباب تهتم في كريمات تفتيح البشره... هاييلا صدق متفيجيين ..! ( وجهه نظر ) لاني احس انه هالسوالف مال الحريم ..!!

...