بالفعــل .. نحن نفتقــد المظاهر الاحتفالية في أعيادنـا ، ويمكن الأطفال هم اللي يفتقدون هالمظاهر أكثر ..

في هالعيد ... أقـارب لنـا يـوا زيـارة عندنا ، فكـانت وحدة من الضيوف تروينـي صـور للي سـوه في أول يوم ، فكـان شي من الاشياء إنهم مسويين مجسم للكعبـة ، وملبسين الصغارية إحرامـات ومخلينهم يسوون معظم الشعائر اللي تصير في الحج ، ومن بينها الطواف مثلا وذبح الهدي ...

عيبنـي اللي مسوينه ، أو يمكن صورة اليهال عيبتني ...


تغديـنـا ، ويلسنـا ، والصورة بعدها في بالي ....
وخليتهـا تنقل لي الصــور ....

ههه ما رمـت أسكـت

قلتلها ليش انتوا مسويين جي ؟ شو عندكم ؟
تبين تنزلين الخبر في الجريدة ؟ ( تراها صحفية )

قالـت بس ، عشـان نحسس اليهـال إن هذا عيد الاضحى ، وإن المسلمين يسوون جي في مكة ، يعني نفهمهم اللي يصير بأسلوب بسيط ، عشان ما يعرفون إن عيد الاضحى يعني هات الخروف وإذبحه ...


تقول ، شوفي الكرسمس بعد كم يوم ، ليش هم يسوون شجـرة ويزينـون بيوتهم ويحتفلون من الخاطر، لدرجة إن البعض يلبسون الابيض والاحمر ، هم عيدهم يوم واحد ولكنهم ما يفوتونه ... حتى في أفلامهم مرسخين فكرة العيد ...


صـدقهــا ... هالشي مب بس يحسس الاطفال بالعيد ، بالعكس ينمي فيهم أشياء ويعرفهم على أشياء ، العيد مب ملابس يديدة وفلوس وطلعات وخلاص !! العيد فرحة للمسلمين ولازم الحكومة تتعـاون ويانا أصلا ما دام نحن في دولة مسلمة ، لازم نشوف مظاهر احتفالية ....

شو المانع لو الحكومة سـوت مجسم الكعبة في أكثر من مكان لعيد الاضحى مثلا ؟
شو اللي يمنع إنهم يسوون احتفالات بأي طريقة كانت ، احتفالات اسلامية بطابع اجتماعي بما إنها مناسبة إسلامية ...

مب يترسون الفنادق والمسارح بالحفلات الغنائية التافهة ...

شو اللي يمنع إن نشـوف في شوارعنا " امباركن عيدكم" في لوحة ؟!!!

في واحد من فنادق أبوظبي ، ما اذكر شو اسمه ، ويمكن أكثر من فندق سايرين على نفس هالنهج ، مسويين صور حيوانات الايل مع عربات بابا نويل بالليتات على بوابة الفندق .... وأكيد مليون بالمية مسويين شجرتهم ومزينينها داخل الفندق ...


نحن مسلمين ونفتخـر ... طيّـب ليش ما نراويهم احتفالاتنـا ونحسسهم إنهم في بلاد مسلمة ؟!! يمكن هالشي يخليهم يحترمون دينــّـا الاسلامي أكثر ....



يقولكم كل سنة يقولون إن الحجاج الماليزيين هم أكثر الحجاج تنظيمـا وترتيبا وأقل الوفيات والاصابات تصير عندهم .. ليش ؟ تعرفون ليش ؟

ماليزيا مسوية وزارة خاصة اسمها على ما اعتقد وزارة الحج ، أي حد يبا يروح الحج ، يتم تأهيله وتدريبه في كورسات ودروس نظرية وعملية في سنة كاملة قبل ما يروح ، لدرجة ان هذه الوزارة تحتوي على مجسم كبير للكعبة بحجمها الاصلي وكل الامـاكن تقريبـا ، وهالشيء يخلي الحاج الماليزي يوم يروح ما يستغرب المكـان ولا يسوي شيء غلط !!

تخيلــو إذا نحن نهيئ أطفالنـا على معرفة هذي الشعائر من صغرهم ... كيف يوم يكبرون ...
الحين عـادي تحصل شباب ومراهقين ما يعرفون شو يصير في الحج !! مع انهم دارسين هالشي في المدارس ، لكن بيقولون نسينـا ....


شكلي طوّلت .. صحيح ؟!

خلاص بسكـت


شكــرا اختي ع الموضوع ....