بس قبل \ اسألوا الخـاين . . ليـش يخـون ؟ . .

[الشيـــن]

[ السلام عليكم والرحمه . . . !

من زمـاااان ماكتبت رد .. واليوم يايه أنزل موضوع!
بس مب لاقـيه حـد أقوله هالرمسـه !
و ماروم أخليهـا فـ خاطري !
وبنفس الوقت أبـى الكل يفكـر بـ هالشي (=

-- { مدخل . . .

الخائن أنواع .. نوع ظـُلـِم يومـا ونما فيه جرح يكافح ليأخذ بثأره ..
ونـوع يخـون لمـجرد أن الخيانه بـدمِه ..
والثـاني .. مسبب للأول !
والأول هو من جئت لأدافع عنه !

\
/
\

نعـم .. أنـا هنـا لأدافع عن ظالـم قـد ظُلـِم !

انا هنـا لأدافـع ..

عن من زُرِع في قلبـه ظلم الآخريـن ..
ودفع هـو وحـده الثمن غاليـا متناسيين أخطـاء غيره وهي السبب فـي حاله اليوم !!

ذاك الخـائن .. الذي تجرع كل كلمـات الكره والشتم ..
الخـائن .. الذي تنسب إليه كل المعـاني الحقيره !
الخائن .. الذي ربعـوا بين يديه قصائد الخيـانة والكراهيه !
الخـائن .. الذي تقذف عليه الكلمات من هنـا وهنـاك
لـمجرد أنه خـائن !
دون أن يسأل لم ؟ وكيف ؟ وما السبب؟
إلتمسـوا له عذرا .. اسألوه .. دعوه لـيدافع عن نفسه !

لربمـا مربه ظـرف غـير فيه خصلاته الحميده !
لربمـا فيه جـرح قـد نمـا .. يرفض أن يندمل قبل أن يأخذ بثأره !
هـو جرح ! قـد حاول هذا الذي قد خانوه يومـا أن ينساه .. أن يمحـوه .. أن يعدمه من الوجود ..
ولكن .. هـذا الـ [ جرح ] .. أبى إلا وأن يأخذ بثـأره ..
يطفئ ناره صاحب الجرح .. ولكن .. تعـود الفتيله لتشتعل مرة أخرى ..
هـي أرض يمشي عليهـا الخائن .. يحمل بحـوزته [جرحـا ] .. بدا وكأنه سيف !
يطعـن به ظهـور من هم السبب فيما هو عليه اليوم!

لم يقصـد ذلك .. ولكنه الـ [ جرح ] ..
تنامى في جسـده .. حتى غيره بشكـل لا إرادي !
ليصحى يومـا ويرى نفسـه ملطخ بـدم ملوث !
قد كرهت ذاته نفسـه .. ولكن شيء ما بداخله يرفض التغيير !
شيء يجره لـيخـووون ويخـوون ويخـون !

كم اشتكت تلك الوسـاده من دموعه !
كم أوجـع قلب الليل بـ آهاته و ندمـه .. !
هو بنفسه يرفض مايقوم به .. يتعهد أن غـدا
أجمل
و
أطهــر !!
ليـأتي [ غدا ] و الحـال كمـا هو ..
ويتكرر المشهـد ..

شيء بداخله يرفض التغيير ..
شيء بداخله أرغمه على ذلك ..

حتى يُكـشف !
وبعـد أن يرى الدموع ويسمع الأنين ..
في عين وقلب من خـااانه ..
وبعد أن يرحل ..
يرحل معه جرحـه ..

ويأتي الـ [ غـد ] .. الذي ينتظره هذا الخائن ..
لينتشله من ذالك الوحل القذر ..

فنـراه تغيـر .. تطهر .. !

ليكتشـف أن الجميع يرفضه !
وهم ذاتهم الجميع الذين [سامحـوا] صاحبه !
و [ خففوا عنه ] .. و [ ساعدوه ] !

هو خائن نعم .. وكل أعذار البشـر لا تكفيه ليتطهر من جرمه العظيم .. فـ الخيانه شيء [ قذر ] !!
لكن لـ [ تخففوا عليه الحكمـ ] ..
ولـ [ تساعدوه ] ليـتطهر بدلا من أن
تكتفوا بإحبـاطه وزرع [كره النفس ] في قلبه !

\
/
\

{ على الهـامش.. وبالعاميه ! }

من ينطرى [ فـلان خاين ] ..
حطـوا عليه حط .. انزين اسألوه !
شوفوه ! .. ليش تغير ! ليش خان !
هو ماكان جي ! ..
صح خاين والخاين قذر ومايستاهل
بس يمكن صارله شي [ مايستاهله بعد ] ..
ولا ارادي صـار جي .. مش بإيده
كل انسان يقول .. لو شو ماصار مابخون ..
لانه خارج الموقف .. لكن من ينحط داخل اطار الموقف
يمكن يسوي أكثر عن جي !
نفس يوم اييكم واحد .. فـلان متغير علي وسوى جي وجي وجي
شوتقولون ؟ إلبسه مايستاهل لا تعور راسك الزمن تغير ..
انزين سألتوا هالـ فلان ليش تغير؟ ليش سوى جي؟
يمكن له عذره .. ! يمكن اللي يشتكي هو اصلا السبب في ان فلان يتغير عليه !

باختصـار ..
{ اسألــوا الطـرفين قبل لا تحكمـون ) . . .
\
/
\

---{ مخرج . . .
انت الوحيد الذي يعرف ليه خنت !
وانت الوحيد اللي ما عذرني !
صدقني ما أبي اليوم أرجع ولا كنت ..
اللي أبيه .. تعدل صورتي فـ عين من كرهني ..!

\
/

كـلامي مش مرتب أبدا ولا فـ المستوى
من زماااان ماكتبت شي ..
لكن أوعدكم ان كتبت شي [ محترم ]
بنزله ..
و لانه مجرد كلام يحوووط فـ خااطري
ومب عارفه وين أطلعه يغير جو بدال هالخاطر الي
مل من معالمه P= ..

[تحفه]

كفضفضه؟ الموضوع يسكت

[الاسطوري]

السلام عليكم ..

الإنسان مايطلع من بطن أمه يعرف كل شي لازم يمر بتجارب ويتعلم منها ويحاول يستفيد من تجارب غيره
لو أمكن عشان مايطيح في الغلط ولكن للأسف بني آدم مايتعلم إلا بعدما ينقرص
ويحس بالألم ويتأكد وإذا ماحاول فورا التراجع ورا
الخطوط الحمرا ومحاولة
تصحيح اللي صار والإبتعاد عنه كليا راح ينجرف للشي هذا ويمشي في دمه وهالشي راح يظهر على صفاته
وأخلاقه وألفاظه وطريقة تعامله مع من حوله وإذا فترة طويلة وتم يحوم في بيئة
مابعد الخطوط الحمرا بيكون صعب عليه إنه يرجع
وحتى لو رجع الناس اللي
عايشين في حدود هالخطوط ماراح يتقبلونه وحتى لو تقبلوه مابيكون تقبلهم له مثل تقبلهم لباقي فئتهم،
الإنسان بيده يختار من البداية الدرب اللي يناسبه ويفتخر فيه ومثل مايقولون بعد
الفوت ماينفع الصوت وخاصة لو كانت السمعة
داخله في الموضوع لأنها
شي أساسي ولو إهتزت تهز مكانة الشخص عند أغلب الناس وهالشي بحكم الاخلاقيات يجر صاحبه إلى
مستويات غير محبذه أبدا والناس تبدأ ترمس وترمس وترمس وتزيد في الرمسه
غير الإشاعات اللي ممكن تطلع عليه والناس
يصدقونها لأنهم يتوقعون
كل شي، بس أنا أقول حسب نظرتي للناس والعالم إن في داخل كل إنسان في شخص طيب يبحث عن
السلام والراحة والسعادة ولكن الواقع المرير هو الذي يجبره على التغير ويجعله
يظهر جانب آخر غير الذي يرغب فيه وللعلم في
إمكانية إنه يرد مثل ماولدته
أمه نظيف من كل القذاره التي تعلقت به غصب عنه بإنه يرجع لربه لأن الناس كلهم مايهم شو ماكانت نظرتهم
المهم رب العالمين كيف يشوفه وهالشي يباله صراع كبير ضد عالم الخطوط
الحمرا وطبعا لازم يبدأ بالناس اللي يصاحبهم
لأنهم هم اللي سحبوه
للعالم هذا ولازم يبتعد عنهم في البداية ولا القصة مابتنتهي وبتستمر إذا ماحاول اليوم قبل باجر وليش لأ ترا
القصص كثيرة والواحد اليوم يقدر يرد دامه عايش وفي مجال للتوبة أما باجر
من يعلم هل يكون في مجال ولا لأ ولازم
الشخص يدعي ربه
ليل نهار ويعبده حق عبادته عشان يلقى اللي يبغيه والله ماينسى عباده اللي ماينسونه أبدا والسعادة في
الإيمان ومحد يختلف على هالشي بس الشيطان يغوي بني آدم واللي
في داخله يحدد مجراه وين وحتى لو
خسرنا الدنيا مب
مهم عادي ترا كلنا رايحين رايحين إذا مب اليوم باجر ولازم يكون في رصيدنا شي يضمن لنا آخرتنا مع انها
صعبه لأن الحصول على النعيم مب شي سهل ومب كل من صلى وصام
بيوصل والله يستر علينا وعليكم وعلى
الجميع ويحسن خواتمنا

وإن شاء الله هالهموم تزول وتعم السعاة على البشرية ويسود
السلام، فضفضه دسمه وشكلي طلعت من
الموضوع بس عادي نكبر
وننسى

الاســـطـــوري
أخوكم

[وحي القلم]

الشين

لازم نوقف وياه إذا وصل لهالحاله

لأنه معنى خيانته و تصرفه بهالطريقة أنه محتاج حد يساعده

ما نساعده عالغلط

بس نراويه أنه نحنى فاهمين ظروفه و ليش سوا جيه

بدون ما نلومه على غلطته... لين ما نكسبه

و عقب ما يثق فينا بنقدر نخليه يغير الطريج الغلط اللى هو ماشي فيه

أهم نقطة أنا نكسب ثقته.. و عقبها حل المشكله سهل

.
.

مشكوره يالشين

نتريا مواضيعج

خليهن يغيرن جو بسرعه.. ما فينا صبر

[عافك الخاطر]

السـلام عليكم

عجبني رد الاسطوري ..تقريباً اختصر الكلام اللي كنت بقوله ..
ومسألة الثقه في رد وحي القلم بعد ..اوافقها الراي..
.
.
كلامج عين العقل مثل ما يقولون ..

حتى ممكن نوسع مفهوم التسامح عشان يشمل الكل .. مب بس الخائن..
وبعدين الواحد لو يفكر فيها .. يعني ليش نحط فلان من الناس في خانة الـ - اللي ما منهم فايده - بس لأنه ارتكب كم غلطه في حياته ..ترى احنا بعد نرتكب اخطاء ..لكن نغفل عنها و نشغل عمارنا باخطاء غيرنا.. !
و من تجربة شخصيه ..
وايد ناس مروا علي في حياتي .. و كانوا معروفين بين الكل انهم مب زينين و مثل ما يقولون - رايحين فيها - ..لكن يوم تتقرب منهم و تتعامل وياهم مثل ما تعامل غيرهم .. تلقى الجانب الثاني من شخصيتهم ..
واحياناً ممكن حتى انت تكون سبب في انهم يرجعون للصواب ..

.
.

فضفضه طالعه من خاطرج ..
و فعلاً وضحتي نقاط مهمه ..
الله يبعد عنج الهموم و موفقه دوم ..
..
.

[الشيـــن]

كفضفضه؟ الموضوع يسكت

اشكـرج حبيبتي

[الشيـــن]

الأسطـوري ..
كنت كاتبه رد شـ طوله بس تعرف حركـات الواحات ..
كلامك هو واقع نلتمسه كل يـوم تقريبــا ..
ومايختلف اثنين عليه ..
أشكـرك عـ ردك الغـاااوي ..

[الشيـــن]

لي عودة للبـاجيين .. وراي شغل COMMS كثر العـالم ..

[محد يستاهل]

الشــين أنـا كــلامي من كلاام الأسطوري مـا قصــر ...

[أنامل قلب]

... ... ...

السلام عليكم والرحمه ..

اممم ..
باختصار ..
دائما قدم الـ سؤال على الـ إجابة .. !

عندما تُخبر بأن فلان به كذا وكذا وكذا من العلل ..
اسأل وإن كان السؤال بنفسك "" لما "" .. !
كيف .. و ليش .. ؟

وهل من المعقول تقييده بالـ X .. لمجرد أن أخطأ لدافع وسبب قد تكون أحد أطرافه .. ؟

مثل ما ذكر من سبق ..
الفعل منهم خاطيء وهذي شغله ما يختلف عليها اثنين ..
لكن هل الخطأ عندهم كافي ليكون رد فعلنا منهم القذف وحسب .. !

غرض المرء الاصلاح والاعانه وفهم الاطراف الأخرى ..
مثل ما يتوقع كل منا نفس الفعل من الغير في حال حدث وزلت قدمه يوما ..

ولا تزل القدم عادة إلا لعثرة وضعت بدرب أحدهم .. !

:

الواحد لازم يفكر بعقل واعي قبل لا يبدي ردود فعله ..
والتسامح شغله جدا مهمه بتعاملنا والغير ..
كما ان ربنا سبحانه موصنا باللين وحسن ظن دايم ..

وبالنهاية ..
لكل منا محاسن ومساوئ ..

لا تبان إلا لسبب .. !

:
:

:
:

طرحج قوي والردود طيبة ..
إلا إني ما ملكت المرور دون تسجيل بسيط لاسمي هنا ..

ومن دون مجامله ..
موضوعج جذبني جدا ..
أكان بالمضمون أم بالصياغه ..
فيزاج الرحمن كل خير ولا هان قدرج عزيزتي ^_^ ..

ودي وفائق احترامي لشخصج ..
اختج انامل قلب ..

والمعذره ..

:

... ... ...

[الشيـــن]

أنـامل قلب ] - - -

مثل ما ذكر من سبق ..
الفعل منهم خاطيء وهذي شغله ما يختلف عليها اثنين ..
لكن هل الخطأ عندهم كافي ليكون رد فعلنا منهم القذف وحسب .. !

وايـد عيبتني هـالجمله ..
ردج جميـل .. وهاي مشكلة الجميـع .. يبدون ردة الفعل قبل لا يسألون [ ليش ] ..
شكرا عزيزتــي

\
\
\

محد يستـاهل ] ---
شكرا اختي وكلام الأسطـوري مايختلف عليه اثنين ^^

/
/
/

عافك الخـاطر ]---

يد ناس مروا علي في حياتي .. و كانوا معروفين بين الكل انهم مب زينين و مثل ما يقولون - رايحين فيها - ..لكن يوم تتقرب منهم و تتعامل وياهم مثل ما تعامل غيرهم .. تلقى الجانب الثاني من شخصيتهم ..

بالنسبـة لـ هالنقطـه ..
وايد إلتمستهـا فـ حياتي ..
نـاس نذمهم لـ مجرد انهم [ - - - ] بس يوم نتقرب منهم
نجـوفهم حبوبين وسوالف وطيبين ..
اللي ينقصهم انسـان كان المفروض يوعيهم لـ حجم الي يسوونه !!
الله يهدي الجميع
وشكرا لج (=

\
\
\
وحي القلمـ ] ---

صح .. فـ البدايـهـ .. ما اني للشخص ونيلس نقول ونقوول ونقووول
نكسبه } .. وبعـدين .. نعرف كيف ممكن نأثر عليـه
وبـ جي .. وصلنـا للبـدايه الي بتخلينا السبب فـي تغيير هالشخص..
كل الشكر لج (=

/
/
/

آسفـه لإنـي اتاخـرت بالرد } ---

[المزوحي]

الموضوع عيبني، لكن تذكرت عمري، بس مب في الخيانة، موقف صدر مني لواحد من ربعي، كأني بغيت شي

ورد على راسي ... فهو زعل مني، ماعرف سبب تصرفي هذا .. الحمدلله عقب فتره ردت الامور طبيعية ..

بعد ما واحد وصل له ، عط الانسان فرصه واكتشف سبب اللي سواه !