[ العجينه العجيبه ]

[ملاك الروووح]

إشحالكم يا حلوين ؟

عساكم بخير ؟!



:

كل عام وانتوا بألف خير .. بمناسبة شهر رمضان الكريم ..

اللي بيخلص جريب ..

و


مقدماً ..!

وقلنا لازم نحط لكم قبل .. أكله ولا شي ..

وف موضوع اليوم .. واللي هو


بكشف النقاب << نقاب ولا برقع عن عييني العجيب ..

واللي معتمدتنه في صنع الفطاير .. والخفايف ..

وان شاء الله يارب يعيبكم ..



وأشوف تطبيقاتكم جريب .. يا صبايا ..






بسم الله نبتدي ..

مقادير العجينه :




6 أكواب طحين ..

2 ملعقة خميره ..

نصف ملعقة كبيره بيكنغ باودر

ملعقة صغيره ملح

3 ملاعق كبيره سكر

4 ملاعق حليب بودره ( نيدو )

نصف كأس زيت

ماء دافئ .. ( ما أحب أحدد المقدار لأنه يعتمد على طريقة عجنج .. بس تقريباً 3 أكواب )


طريقة العمل :

ننخل الطحين والبيكينغ باودر والملح

ونضيف الحليب والخميره والسكر .. ونضيف عقب الزيت .. ويخلط جيداً

ثم نضيف الماء بالتدريج .. حتى نحصل على عجينه لينه ..

وبجذي عجيتنا تكون جاهزه ..



وتقدرون اتسوون فيها اللي تبونه ..

فطاير جبن .. سبانخ بيتزا .. زعتر .. أي شي ..

أنا عن نفسي .. سويت هالمره بيتزا ..

وفطاير جبن مع مايونيز وبخبركم عن الطريقه الحين





مقادير البيتزا :



بصله صغيره مقطعه قطع صغيره جداً

زعتر ( على حسب الرغبه مش ضروري )

صلصلة البيتزا ( عادي تسوونها بالكاتشب لو ما حصلتوا الصوص .. بس أكيد أحلى الصوص )

مايونيز ..

مشروم مقطع .. طماط مقطع قطع صغيره

فلفل أخضر مقطع لشرائح ..

زيتون ..

( ممكن اتحطون مارتديلا اذا حابين )

وجبن موزاريلا ..


طريقة العمل ..

نخلط ملعقتين كبار مايونيز + 3 ملاعق كبار صلصة البيتزا + ملعقة صغيره زعتر + قطع البصل


ونخلطهم جيداً ..

ثم نقوم بفرد العجين .. بشكل دائري ..

ونضعه في الصينيه المدهونه بحل تاتا .. أقصد بزيت ..

ثم نقوم بتوزيع الخليط أعلاه على العجينه

ثم نضع قطع الطمام .. والمشروم والفلفل والزيتون .
.
ثم نرش جبن موزاريلا على سطح البيتزا .. وندخله للفرن ..

<< عيل مب ثم نرش ما عرفنا لج الحين عاميه ولا فصحى



ومادري الوقت المحدد يعني .. يعتمد على حرارة الفرن

أنا كل شوي أجيك عليه اذا استوى ولالا ..

وانطلعه من الفرن



يمممممممي ..

شكله لذيذ صح ؟!


وهو فعلا كان لذيذ .. وكلهم عيبهم ..

وسهل ما يباله شي ..!






والحين براويكم الفطاير الثانيه الي ممكن تسوونها ..

فطاير الجبن بالمايونير

المقادير :

2 ملعقة كبيره مايونيز

3 ملاعق كبيره جبن

ثوم مفروم ..

شبت


طريقة العمل :

نحمر الثوم في الطابي مع ملعقة زبده

بس ما تخلينه يحترق .. يعني شوي بس ..

وعقب تضيفين المايونيز والجبن .. وتحركينه ..

وعقب تضيفين الشبت المقطع ..

ويكون شكله آخر شي جيه ..



ونفرد قطع عجينه صغيره في الصينيه .. عقب ما ندهنها ..

وانحط عليها الخليط .. وفوقه نحط جبن موزاريلا ..

( مب لازم ..بس طعمها أحلى بالجبن )




واندخلها الفرن .. بس ما تخلونها وايد ..

لما تشوفون انها تحمرت شوي من فوق طلعوها

عشان ما تحترق شرات اللي انا سويتها !

مقهووووووووووووره من الشغاله

اتخيلوا حليلي من الساعه 2 في المطبخ وأعابل .. واخر شي الحبيبه ..

حطيتهم في الفرن وقلت لها تشوفهم ويوم نزلت أشوفها متفيزره جدام التلفزيون مع خواتي وتشوف

وجه آخر .. والفطاير في الفرن .. متفحمااااات !

عسب جيه ما صورتهم اسمحوا لي ..

بس تمت شوي من العجينه سويت فيها خلية نحل هع

وطلعت عجيبه !

يعني اتخيلوا بهالعجينه اشكثر أشيا ممكن تسوون << سبحان الله لووووووول

:
السموحه لو طولت عليكم

وان شاء الله نشوف تطبيقاتكم عاد ..

يالله يربوا اتسوونها في البيت صبايا ..

تحياتي لكم

وألف صحتين وهنا