أخوي الأسطوري
وعليكم السلام ورحمة الله
الأمر كله مرتبط بالpower transmission الصادر من الرادار ، فعلى سبيل المثال :
في دبي تكون الموجات الصادرة من الرادار محطوطة على أقل حد ، فلو تلاحظ أول ما توصل قريب الرادار وبسرعة فوق المسموح يصورك وأنت قريب جدا .
أما أبوظبي وغيرها من المناطق تكون الموجات الصادرة محطوطة على حد الوسط أو العالية نوعا ما فلذلك الرادار بيصورك من مسافة بعيدة اشوي .
لكن حقيقة أنا جربت الموديل الأقدم من هذا ، وفي دبي كان يلتقط الموجات من مسافة كافية ، ولو إن الموجات اللي كان يلتقطها ضعيفة نوعا ما . لكن كانت كافية للتنبيه .
وأنا بدوري طرشت رسالة للشركة المصنعة بنفس السؤال هذا ، لكني ما حصلت رد منهم ، فلذلك قررت إني أشتريه وأجربه بنفسي مع تأكدي إنه بيلقط لتجربتي السابقة .
ولو دخلت الوصلة اللي حطيتها ورحت على المواصفات التفصيلية راح تحصل الترددات اللي يمسكها الجهاز .
ـــــــــــــــــــــــــ ــــ
أما سالفة إن الرادار يكون مخشوش ، الفكرة من وراء هذا الجهاز هو التقاط الموجات للرادارات المخشوشة أصلا .
ففي أمريكا تحصل الشرطي منخش وماسك رادار على شكل (مسدس) .
لأن في غالب الأحيان الرادارات المعروضة في الشارع الواحد يقدر يحترز منها .
فالفكرة أصلا للرادارات المخشوشة .
ـــــــــــــــــــــــــ ــــــــ
أما وين تحطه ،
فعلى الزجاج الأمامي للسيارة ، والمثبتات اللاصقة كذلك متوفرة مع الجهاز .
ـــــــــــــــــــــــــ ــ
أما عن الGPS ، فهم موفرين لك في الجهاز شريحة موصلة مع نظام الأقمار الصناعية مباشرة .
شوف الوصلة هذي واتعرف على الشريحة بشكل أوضح :
http://www.escortradar.com/9500i-inside-look.htm
ـــــــــــــــــــــــــ ــ
أما من وين تشتريه ،
أولا لازم تعرف إن هناك قوانين أمريكية تحرم خروج أجهزة وأمور كثيرة خارج الولايات .
لذلك أبسط عملية شرائية هي كالتالي :
1- الاشتراك مع خدمة الشحن (أرامكس) في برنامج يسمونه shop and ship .
2- هم بدورهم بيفتحون لك بريد خاص في أمريكا وبريطانيا والرسوم على ما أذكر 135 درهم ولمرة واحدة في العمر .
3- بعد ما تحصل على بريدك ، تشتريه من موقع الأمازون كونه آمن ، وهذا اللي أنا سويته .
ـــــــــــــــــــــــــ ـــــــ
وأنا أقولك اتريا ، لا تشتريه لين أجربه ، وبخبركم بالنتايج .
بكون أول الضحايا
لكني متأكد من فعاليته ، ولو ما كنت متأكد ما خذته .
ـــــــــــــــــــــــــ ـــــــ
وخذ راحتك بالأسئلة أخوي .






رد مع اقتباس
مواقع النشر (المفضلة)