فريج وماادراك مافرررررريج؟؟؟؟

[طير الحب]

السلام عليكم...\



أنا نظرتي للحلقة انها واقعية جدا ...وهم من خلالها حبوا يبينون سلبيات الفضائيات الدحيله علينا هاليومين...وناس وايد ما يعرفون ربهم الا في الضراء الله يرحمنا برحمته..

بس عموما حسيت حلقات فريج تعليمية اكثر من انها ترفيهيه

[مجموعة إنسان]

نحن في بيتنا اللي يبي يشوفه يروح الميلس ,,
لان في الصالة محد يشوفه ,,
عسب جذي بعد الفطور الكل يتعايز يتحرك ويودر الجاي القهوة بعد الفطور
وعسب جذي محد يشوفه اللا 5 سنين وتحت ..
من الآخر نحن ما نشوفه في البيت ..
..

اصلا من السنه اللي طافت ما مشى معانا فريج حسينا مادري كييف
يعني واحد ابو عياال يشوف رسوم ومادري كيف
!!!

احلى شي وصل مسج لابوي قبل ام خماس تطبخ جدرها ومادري تعدل شيلتها ومادري شوو بهنيك بقدوم رمضان ,
ابوي قال: والله عيب واحد بيدخل ال40 يشوف برنامج ويطرش مسجات مثل هذي !!

هذي وجهة نظري ,,

[مــهــابه]

حراااام

هو البرنامج الوحيد من زحمة هالمسلسلات والـخرابيط أطالعه


راح أعلق

من بعد ما اتابع الحلقـة بعد شوي!

[أنامل قلب]

اممم ..
أحييج عغيرتج بالبداية .. ما شاء الله عليج ..

اممم .. عني آنا فاللي قبلي كفو ووفو بتوضيح الصورة ..
ورايي من رايهم .. (( بمعنى إن اللي وصلني من الحلقه أهو نفسه اللي وصل لأغلب الأعضاء )) ..
غرضهم كان توضيح قضية جدا مهمه والابتسامات اللي نتجت عن الحلقه كانت سخرية عليها وعلى من شابهها ..
بالاضاافه إلى تحسرنا على من اتبعهم القول فالفعل .. !!
ولا بد أن يكون من بين من تابع من حس بوخزة تأنيب بنفسه .. والاحراج كذلك .. !!

ما لم أحبذه هو وجود بعض الألفاظ اللي تكرار سماعها سبب نوع من الاستهانه بها ..
وإن كانت بالواقع كبيره .. جدا كبيره .. !!

:

ولسبب ما الفريج اليوم ليس كما كان بالأمس جاذبا بحلقاته .. !!

ربي يديم عليج طيب النية وحسن الغيره عزيزتي ..
والسموحه جان طولنا عليج ..

ودي واحترامي ..
إختج أنامل قلب .. ^_^ ..

[عيون الليل]

أختيه لبن مثلـج . .

مثل ما قالوا الي قبـلي ماشالله عليـهم ما خلوا شي . .
كل شخص بيفهم الحلقه ع طريقته . . فأنا الي فهمته أنه الواحد يوم يمرض وبيودع قام واتطوع وسوى الخيـر وهو من سنين وينه ! عايش حياته وما يخصه ف الدين

فأنا من وجهة نظري أنه الحلقه ما كان فيها استهزاء مثل ما انتي فهمتي عزيزتي. . وطبعاً كل شخص له الحريه ف الفهم . . لكن الحق يقال . . وأنا هذا الي فهمته من الحلقه . . وأنه الكل يفتي والكل يدخل نفسه ف شي ماله علم فيه وبالذات ف الديـن الحيـن الكل يقول قوله ويحرم ويحلل . . مثل ما سوت الشيخه أم خماس لـوول

ع العموم عزيزتي . . لا هو دفاع عن محمد حارب . . لكن الحق ينقال

وتسلميـــن على الموضوع

ولا اتكدرين بخاطرج

[وحي القلم]

لاحظت أنه شي تطور في الفريج هالسنه

من ناحية المضمون و السيناريو.. شي تنوع كبير في الحلقات

أتصور اللى ما شافه كله ما يقدر يحكم على مستواه من حلقه ولا حلقتين

.
.

[مــهــابه]

رجعـنا

- بـعد متابـعتي للـحلقـة ! . .

ولـو رجعـنا لـ حلقـات الفريج هالسـنة من بـدايـتهـا ولـحد اليـوم أحس فـ مضمونهـا رسـالـه يوجهـونهـا للـناس ، بطريقـة مباشـرة أو غـير مبـاشـرة ! . . .

وهذا اللي لـمسـته فـ الحلقـة اللي أنـتوا تتــكلمون عـنها ، ومثل ماقـالـوا اللي قـبلي :

مـضمونهـا جداً واقـعي ويـرمس عن شي يصـير فـ حيـاتنـا

والحلقـة بمثـابـة ~ الـنغـزة ~ لـهم ! . .


يمكن أنـتوا تـسرعـتوا فـ الحكم



وبس

[الهيثــم]

يوصلــون فكـرة لا أكثر ولا أقــل .. !

[المزوحي]

أصلا ماقمت اتابعه شرات العام، لأنه بشكل عام مستوي ممل ..

انا تابعت نص الحلقة ونهار ثاني الصبح سمعت الانتقادات في الإذاعة .. وايدين اتصلوا مب عايبنهم

اللي انعرض ..

البعض يقول هم مب قصدهم ( مجرد رسوم ) والبعض يقول تطالوا ووين الرقابة ..

في حد عطاهم العذر إنهم يبون يضحكون المشاهدين لكن ماعرفوا كيف يوصلون هالشي !

[المقاتل]

يا جمــاعة الخير .. !!

النقاط المطروحه في هاي الحلقه تلامس واقعنا المرير ، " كل من هب ودب أفتى " القصد إن السيناريو كان خاطئ .. وهذا مش كلامي أنا فقط .. عشان أكون أكثر وضوحا اليوم في الراديو أعترضوا على الحلقه و محمد سعيد حارب بنفسه تكلم وقال النقاط وبالعكس أنا أشجعه على هالشي .. بس رد عليه الشيخ بأنه هاي النقطه حساسه والمفروض إنهم يسألون أهل العلم قبل طرح حلقه تتحدث في مثل هاي المواضيع ، ولا تنسون ترا إذا نحن نفهم فهالطريقه ونحن كبار .. طيب .. اليهال كيف بيفهمونها ؟؟

رسوم موفق إن شاء الله وسلمتم على الطرح .

إعذروني إن أثقلت عليكم ^-^ .

.. المقاتل ..

[كـلـكـلـووش]

انا اللي اشوفه ان الحلقه كانت وااايد هادفه و كانت تنغز الناس اللي يقومون و يفتون و هم ما يعرفون من الدين شي ..

و سعيد حارب يابوه على نور دبي و رمس عن الموضوع .. و قال ان الهدف كان شي و الناس فهمت الموضوع شي ثاني .. لإنهم ما تابعو الحلقه بشكل واضح .. بس سمعو الاسلام قالو هذيل يستهزأون .. !

ما اعتقد ان هذا كان استهزاء بالاسلام .. هذا كان استهزاء بأم خماس ( اللي هي مثال على الناس اللي يطوعون و يفتون و ما يعرفون شي ) .. و اعتقد انها لما كانت اونها تفتي بشي كان ايي رد من ام سعيد ( الشخصيه الثانيه في الرسوم ) على الكلام اللي تقوله .. يعني ما كانت تفتي و محد يرد عليها و ينكر الكلام اللي تقوله !

و الحلقه كانت تلامس واقعنا و واقع بعض الناس اللي يستوون مفتين و هم ما يعرفون شي بالإفتاء !

بالعكس .. الحلقه كانت واايد حلوه من وجهة نظري .. و كانت وااايد هادفه .. و الحلو فيها انهم يابو اسم قناة كنوز مالت السحر .. و تمصخرو عليهم ..

فـ أعتقد ان الحلقه كانت جيده .. مع ان في ناس تحسسو منها ..

لكنهم ما غلطو على الرسول او تمصخرو على الاسلاام .. هم تمصخرو على الناس اللي ما يعرفون شي بالاسلام و و يدعون انهم علماء ..

و تبقى وجهات النظر مختلفه ..

ســـلام

[الاسطوري]

السلام عليكم ..

كل شي عبارة عن سلاح ذو حدين والواحد بيده يختار الوجه اللي
يناسبه وشي طبيعي ان إرضاء الناس
غاية لاتدرك

الاســـطـــوري
أخوكم

[الجنيه]

السلام عليكم ورحمة الله وبركاته ...

انا رايي من راي الاغلبيه الحلقه كانت تمس واقعنا بالفعل والقصد من الحلقه نغزه للي يدعون الالتزام وما يعرفون الااساسيات فيحرمون ويحللون ع كيفهم ...

بالاخير المشاهد واعي ويدرك الصح من الخطا حتى لو الكرتون له نسبه كبيره من المشاهدين الاطفال ... عيال اختي كانوا يتابعون الحلقه ويانا جان يقول ولد اختي الي عمره 5 سنين استغفر الله هاي ليش جي اتسوي وهني بدى دور الاهل الي هو توضيح الصح من الخطأ ...

[ظبية]

بالعكس كانت الحلقه جداً رائعه لان لها معنى واضح وهي تتكلم عن شريحه من الناس ..

مثال على اللي سوته أم خماس .. في فئه من الناس إذا مرضت ذكرت ربها طيب وينك قبل وانته صاحي ومعافاه ما تذكر ربك إلاا فالمصايب ..

ثاني شي بخصوص البحبحاني أنا فتحت النت بس عسب اتأكد من صحة وجود هالاسم ودورت عليه ولقيت أنه هالانسان يحلل أشياء المعروف عنها حرام ..

يعني الحلقه كانت واضحه بمضمونها ..

بس يمكن المغزى ما وصل للبعض. .

[حلم الطفوله]

السلام عليكم

كل انسان له راي ووجهة نظر بهالموضوع وبحلقات الفريج لهالسنه تحديدا

واعتقد إنه الحلقات ناقشت الواقع بكل حذافيره باعتبارنا عايشين بمجتمع مفتوح ونشوف هالشيء منتشر

يعني الحين محد ينكر إنه الأغلبيه صارت تحلل وتحرم على كيفها ! المهم إنها تقنع نفسها بإنها صح

مع إنه الغلط راكبنها من ساسها لراسها !

كواقع نعيشه أقولكم إنه محمد حارب ونجلاء الشحي وآمنه المنصوري كتبوا شيء واقعي 100%

الانسان صار يتذكر ربه يوم يمرض ...

الانسان يتذكر ربه برمضان فيصلي ويصوم ويقرأ قرآن ( جان زين بعد يتذكر)

أشكال البنات تتغير برمضان والسبب لصيام ! مع إنه الحلال بين والحرام بين بهالمسائل الدينيه

يمكن مسلسل الفريج عرض هالمواقف بأسلوب فكاهي ، لكن محد ينكر إنه مستوي عدنا

كلنا لنا عيون ونشوف وعدنا آذان ونسمع ..... وهالمسلسل فتح عيون الأهالي على واقع يمكن ما لاحظوه على عيالهم قبل ( فنسأل الله الهدايه لنا ولهم )

ودايما أقول ... اختلاف الرأي لا يفسد للود قضيه

وهاي وجهة نظر لا أكثر ....