.:. ]|[ سلطــة الفتـّــه ]|[ .:.

[طير الغرام]

سلطة الفتـّه ع طريقتيه الخاصه صحيه واتشبع
وإن شاءالله اتعيبكم

:

:|: المقادير :|:

- بطاطا مكعبات مقليه

- خبز مقطع ومحمر
- باذنجان مكعبات مقليه

- صدور دياي مسلوقه ومفتته

- ذره

- طماط + خس + خيار + فلفل أخضر + نعناع + بقدونس

( ملاحظه : الخضره المستخدمه كله ع حسب كم تبون )

:|: مقادير خلطة التتبيل :|:

- 3 كوبات روب + فص ثوم + ملح + فلفل أسود + سماق + اشوي فلفل أحمر
+ ملعقتين طحينيه + فنجان عصير ليمون + اشوي ماي ( + ملعقتين مايونيز إذا بغيتوا أنا عني ما حطيت )

تخلط جميعها ( يفضل باليد بدال الخلاط عشان ما يستوي ماي زياده عن اللزوم )

:|: الطريقه :|:

- تخلط جميع المقادير فـ مله وتضاف لها التتبيله

توضع السلطه فـ وعاء التقديم ( عاشت اللغة العربيه الفصحى )
ويوضع من فوق اشوي من الخبز المحمر

طماطه جوريه للزينه

( حطوها فـ الثلاجه اشوي عشان تبرد حلاتها وهي بارده )

وبالعافيـــه عليـــكم

[ايه احبك]

الله يعافيج وتسلمين على الخلطه طيرووو شكلها صدق ايشهي ^_^

[طير الغرام]

ايه احبك

تسلمين ختيه

[ذنـيـنـي]

الوالده سهرانه وياي و راويتها الموضوع عسب تسوينا هالسلطه في رمضان
و تقولج مشكوووووووووورة عالوصفة الغاوية

و بعد قالت جان زين لو كل البنات يعرفون يطبخون و يبتكرون شراتج لول

[طير الغرام]

ذنـيـنـي

احم احم جان أستحي
تسلم والله ع الإطراء الغاوي والرد المشجـع

سلـّم ع الوالــده
وقوللهــا لا شكـر ع واجــب

و بعد قالت جان زين لو كل البنات يعرفون يطبخون و يبتكرون شراتج لول

بس هب زين يسهروون شراتيه

حيـــاكـ

[دمعة شوق]

صــباحـكم ئــشـطــه


سـلااااامي عليـج والله
وياحـافـظ على الحرمـة السنـعه

؛
إن شاءالله بنجـربهـا
بـس بغيت اتخبـرج اممم يوم تحـطيـن الخلطة آخر شـي
يعنـي تخليـنـها موهيـه ( وايد فيها من الخلطه يعني مغببه )
هيهيهي ماعرفت كيف اصيغ السؤال

إن شاءالله فهمتيـلي
؛

انزيييييييين ومشكوووره أئـوي أئـوي
ويعطيج العافيـة

[مايهزك ريح]

انا ابا .. بس منو بيسويلي ..
خلاص طيرالغرام .. سوي مره ثانيه .. وطرشيلي بالأرامكس .. اتقبل جميع انواع الهديا .. وخصوصا الأكل

مشكورة على الموضوع .. وتسلم ايديج

[خطايــا]

انا بعد شكلي بجربها .. ثانكس طييير الغرام ...~

منوه قدج حصلتي مديييييييح من ام ذنيني لول

[طير الغرام]

دمعة شوق

اممممم لا هب شرط أهم شي انه السلطه كلها اييها من الخلطه
وانتي ع كيفج كم الكميه اللي تبينها انا ما حددت لني الصراحه احط بس جيه بدون مقادير معينه

وعادي جان ما عيبج نوع من الخضره افااا عليج اشطبيه من القايمه

وأشكرج ع المرور الحلوو ^_^

:

مايهزك ريح

واعليه غمضتني
خلاص انطرني ع اللفه هههه يعني افهمها

سوالف بروو
اشرايك انته اتسويها مايبالها شي سهله

:

خطــايــا

العفووو ختيه
وان شاءالله اتعيبـج

و احيم احيم ههههه

حيـــاج ختيــه

[عفاريتووو]

ثانكييووو طير .. تشجعين الواحد يطبخ لول

بنجربها ان شالله ^_^

[قرموشة]

.. الله .. !
وجــان أشتهـييييهـــا يا طـير ~ !
شرايــج تستوين بنت طيبــه وتيبينـهـا جدا النخـي سيتـي وبالتحديد صوب بيتنــااا P=
تسلـم يمنــاااج حبيبتـي ع الوصــفـه وان شاءلله بيربهـــا وبحط الصور اذا قدررت
لا هنتـــي

[ملاك الروووح]

::

يمممممممممممممي

شكلها لذييييييييييذ


خلاص ان شاء الله اليوم بيربها ..

رحت توني طلعت صدور الدياي من الفريزر هع هع

وما كان شي باذنيان .. جان أطلب من الدكان ..

ان شاء الله أتذكر وأصور وانا أسوييييها



تسلمين حبيبتي عالأكلات الغاويه اللي تحطينها

ان شاء الله بحط لكم شي بعد جريب ..

::

[تنينه]

السلام عليكم والرحمـه


طييير شكلها لذيييذه ؛ تـسلم الأنامل المبدعه يا شيفتنا الحلواه ؛

[ملاك الروووح]

:::

احم احم

ما عندي وقت طبعاً ..

سويتها لهم اليوم ..

وطلعت عجيييييييييييبه !!



وايد عيبتهم ..

تخبلوا عليها .. وكلهم سألوني عن المقادير ..




تسلمين حبيبتي طيروووووه

وهاي صوره للتطبيق لووووول




واذا عندج شي ثاني .. لا تبخلين به علينا حبيبي
::

أويه توني أشوف انه كان فيها ذره !


نسيت ما حطيت !!

[قرموشة]

^ سبقتينييييييييييييي
اليوم سرت الجمـعيـه وخذت باذنجـان ما كان عندنا xD وو خـذت بطاط بعـد xD
وسرت خـذت مقادير الـ سينابون .. لول فادي أسـويه بعـد ..
بس من رديت اكتشفت انه عندي امتحـان في جـابتر واحـد ..
فـ هديت المطبخ وركييييييض ع الشنطه والكتب .. وما سويت شي xD
بجربها باجر ان شا ءالله وان افتكرت بحط الصووور D=