احاسيس و مشاعر


الحزن
شي من الصعب الواحد فينا يستحملها، حتى اللي قلبه قاسي
ممكن يوصل لمرحله انه يضعف جدام الحزن و ينكسر
بالفعل الحزن اصعب شي ممكن يمر على الانسان بشكل عام
يوم الواحد يحس انه قلبه يتقطع و تسّود من حوالينه الدنيا
ما يعرف وين يحط راسه.

ما يعرف لمن يشكي حزنه،
يدور شخص يفضفضه و يطلع اللي بصدره عسب يرتاح

ولكن !
حتى لو لقى شخص يفضفض له ما بيقدر
يطلع كل اللي يدور بخاطره
و السبب ممكن يكون الكبرياء


صعب علينا بسبب كبريائنا انه نخلي الناس
يشوفون دموعنا مهما كانو قراب منا
و لهذا السبب تتراكم الاحزان فوق بعضها البعض
و التأثير يكون على المدى البعيد صعب


اذا اسأل اي شخص شو اسعد لحظات حياتك ؟
بيذكر لك موقف ولا ثنيين و لا بيكتفي بـ "وااايد بس ما اذكرهن"
و اذا اسألته عن لحظات الحزن ؟
و بيعطيك لسته طوويله عن اغلب لحظات الحزن
ويا الاحداث و الاسباب و النتايج كأنها صايره البارحه

ليـش ما ننسى لحظات الحزن مع انه ندري
يوم بنذكرها بعدين ممكن نتضايج منها ؟!


كلنا نمر بمواقف حزينه، متعبه، صعبه
ولكن نعيش ببتسامه على وجوهنا
فقد يكون الغد اكثر اشراقا و فرح

و الله يبعد الحزن و الهم عنكم