السلام عليكم ورحمة الله وبركاته


------- يوم الخميس------

عنود الريف: يالله يا بنتي دمعة شوق .. انقفضي يا اميه .. بيخلص العرس ونحن بعدنا في البيت .. ولا تنسين تتصلين في الوالدة وحي القلم قوليلها تخلص بعد نحن بنمر عليها وبنسير عرس قوم بن دبي ....

دمعة شوق: ان شاء الله اميه .. انا مخلصه بس بتصل في اميه عشان تعرف ان نحن بنمر عليها وترا اختي قرمووشة بتسير ويانا بعد..

عنود الريف: هيه خبرتني امج .. وبنتلاقى هناك ويا عهد الوداع بعد..

ويسيرون العيايز عرس قوم بن دبي ..

------- في اليوم التالي بعد صلاة الجمعه متيمعين على الغدا --------

خيال الحب: هاااه ما خبرتونا شو المعاريس البارحه؟
عنود الريف: يالله ما زينها العروس ما شاء الله عليها .. جمال ودلال .. الله يحفظها ..
دمعة شوق: هيه ما شاء الله عليها ..
عنود الريف: بس شي واحد ما عيبني في عرسهم ان واااايد مفشخرين فيه (مبالغين) ... الا هيه ليلة وحده والا كمن ساعة
ايه أحبك: يدوووه .. ليله وحده لكنها ليلة العمر ..
عنود الريف: خل عنج هالرمسه .. ما نباها .. شو ليلة العمر بعد .. ترانا كلنا عرسنا ولا قلنا هاي ليلة العمر وهالخربطان ... هاي السوالف الا الحين .. والا الاول ما شي
خيال الحب: الله يهديج .. زمنهم غير عن زمنا
دمعة شوق: يا عمي صح كل زمن غير عن الثاني ولكن الناس هي اللي غيرته .. ما تغير روحه ..
خيال الحب: هيه يا بنتي.. بس كل شي تغير ولازم الناس تغير عاداتها...
عنود الريف: ويقووولك دافعين مهر للبنت امية الف وغير زهبتها ميتين الف .. وغير الذهبان والشنط اللي هم يايبينها .. وغير الفندق ... وغير هالكوش بعد ما ادري كم دافعين له ...
ايه أحبك + الدلوووعة + الاسطوري+ بنات العم والخال: الكوش؟؟؟؟؟؟؟؟
دمعة شوق: قصدها الكوشة .. سكتوا غربلات ابليسكم عن تسمعكم وتواجعكم ...
ايه أحبك + الدلوووعة + الاسطوري+ بنات العم والخال: هههههه (بصوت واطي)
عنود الريف: على اشو تتضحكون انتوا ..
دمعة شوق: ما عليج منهم اميه ..
خيال الحب: يمكن هم ناس مقتدرين ... ما تدرين ..
عنود الريف: لا لا لا لا لا .. انا اسمع الحريم يقولون ان المعرس متسلف .. اشعنه يتسلف يوم انه ما يقدر على العرس ومصاريفه .. وهالناس غير بعد .. يطلبون هالكثر منه مسكين ... يعني الحين الاسطوري يوم بيعرس .. بالله عليكم كم لازم يخسر ؟؟؟ خمسيمية ألف؟؟؟ مب حرمة هاي تدفع لها هالكثر ..
وا عليه علينا نحن الاول .. 200 ربية ووافقنا .. (( اونه جنه الشور كان عندها))
دمعة شوق: بس يا اميه 200 ربية قبل كانت تسوى ... الا الحين ما تسوى ..
عنود الريف: صحيح يا بنتي .. لكن في أعراس سرنا لها نحن .. لكن مب مخسرين هالكثر .. اللي يرومون له يدفعوونه ... الرسول صلى الله عليه وسلم يقول" أقلهن مهورا .. أكثرهن بركة" الله يهدي الناس ان شاء الله ... لكن بناتي .. ما عليكن من اللي تشوفونه .. لا تطللبن مهر وااايد .. والله يوفقكم ...
وخلونا نسمي بالرحمن ونتغدى .... وبالعافية عليكم


من خلال موقف اليدة عنود الريف وباجي العايلة.. نقدر نفهم ان الاعراس استوت واايد غاليه .. ووااايد عوايل تطلب مهور وفشخرة في اعراسهم .. وفنتازيا وهالسوالف .. الانسان اللي عنده خير يقدر .. لكن الانسان اللي ما عنده ولا يقدر ..لازم باجي العواايل تتفهم هالشي ولا تبالغ في الاعراس ...