قلة أدب أم علم؟ جراءة أو واقع؟

[الـيـاه]

مهابه
في اشيا ايجابيه وسلبيه ..
بس هني ايجابيه و قلة حيا ..

[العجيبة]

انا وايد منصدمه !!!!
العجيبه : خيبه شو عادي اقول ... عييييييييييب .. انتي شكلج ماعرفتي شي وماعرفتي شو كان موضوع
حلقتها يوم من الايام .. اللي صدق يدل على قلة ادبها وقلة ادب المتصلين ...

هالاشيا لها مكان خاص
وصح انا ماقول ان بعضضضضضها مب علمي ..

لكن عيب يطلع بهالصوره وبهالجرأة .. انا استحي ع ويهي الصراحـــــــه لو قلت شو من سوالف تقولها !

قلة حيااا

ليش مب عادي ؟
تراج تقولين هالمواضيع موجوده في الكتب .. يعني كل اللي كتبـوا في هالمواضيع هم فيهم قلة أدب ؟!
أو مواضيعهم ما تراعي الأدب العـام ؟


أنا مب فاهمة انتي شو اللي تشوفينه قلة أدب .. المواضيع أو أسلوب الدكتورة !

وفي الحالتيــن أنا ما أشوف أي قلة أدب ..

فـ إذا المواضيع فيها قلة أدب .. فـ بروحج قلتي هالمواضيع موجودة في الكتب .. شو المانع انها تكون في التلفزيون مثل كل العلوم المختلفة اللي تنطرح عالملأ في التلفزيون ؟!!!


وإذا أسلوب الدكتورة في الكلام .. فـ أبدا ما أشووف إنه فيه قلة أدب .. بالعكس هي تنتقي ألفـاظ تتناسـب والذوق العام وتراعـي الجميع في كلامهـا ..

--------

أوكـي ما قلنـا شيء المتصلين يالسين يعرضون علاقات ما قبل الزواج .. إنزيــن هاي تجـارب مر فيها الانسان وهم يالسين يقولون شو صار من ورا هالعلاقة ( نتيجة هالعلاقة سببت لهم مشكلة ) وهم متصلين لأنهم يبون حـل للي صاار .. مب متصلين عشان يقولون نحن سوينـا وبس ، أو يشهرون بعمـارهم ..

أعتقــد المشاهـد المفروض يوم يسمع مشكلة من هالنوع طبيعـي عقله يتبــرمج إنه يبتعــد عن علاقات مثل هذي لإنه ممكن يصير له مثل اللي صار للمتصل ! غير إنه بيستفيد من الحل اللي تعطيه الدكتورة ..


---------

تفكيرها علماني
و بعييد كل البعد عن الاخلاق الاسلامية

ليش علمــاني ؟ وهي في المواضيع اللي تطرحها - مب في ردودهـا ع المتصلين - تبـدأ غالباً بأحـاديث أو آيات من القرآن .. وتقول بالحرف الواحد إن الاسلام حرم هالشيء لحكمة ، وعقب تتكلم عن بعض نواحي هالحكمة اللي تتبع تخصصهــااا ..

وليش بعيد عن الاخلاق السامية !!



اذا عندكم أمثله شفتـوا فيها تشجيعهـا للعلاقات اللي قبل الزواج .. فـ نورونـا ..
يمكـن نحن نسمــع ومب منتبهـين للي تقولونه .. ترا اللي تقولونه كلام بدا يحسسني إني ( ****** ) لاني وحدة أتابع البرنـامــج بـاهتمام

[الـيـاه]

انكتبت بس بطريقه علميه ..
لكن هاي ماتستحي ع ويها اسلوبها مب حلووو وتقول أي شي ..

انتي تقولين جي لانج ماتعرفين كل شي عنها .. وماعرفتي شو من قضايا رفعوها عنها
وشو من مواضيع كانت تتكلم فيها حلقه كامله .. وماتعرفين ان سوت ضجه ودخلت سالفتها مجلس الامه ؟ تعرفين ها من قبل ؟

[مــهــابه]

تـدرون أنـتوا انـظروا للموضوع بـ ناحيـة عـاميه

يـعني مش مجتـمعنا نحـن بس

لا

مجتمعــاات كـل الـعـالم

وبتـشوفون الموضوع عــادي

[العجيبة]

شو علاقتنـا بالقضايا اللي انرفعـت ضدهـا او سببهـا أو أي كــان ؟!

سبب مثل هذا بيخليني ما أتابع برنـامجـها !! ليش ؟

نحن يالسين نتكلم عن البرنـامـج مب عن المذيعة اللي فيه ..
ودام الموضوع عن البرنـامج ما نقدر نتكلم عن المذيعة الا بأسلوبهـا والمادة اللي تقدمها وبس ! والباقي مب مهم !


عيل الناس يتابعـون أوبرا بعـد .. هاي من عمرهـا 15 سنة مغتصبنها ولد عمها أظني ! والحين يمكن انتي بروحج اتابعينهـا أو ع الاقل تمرين على برنامجها أحيـانـا ..


في شو يهمنـا ماضي الشخص أو حيـاته في اللي يقدمه لنـا ؟!


وممكن توضحيلي كيف أسلوبهـا مب حلووو ؟!!

[الـيـاه]

لانه انرفعت بسبة الموضوع اللي انطرح في حلقة كامله .. كيف شو يخصنا بعد !

[مزايا]

يمكن البعض محتج على برنامجها لانها أول خليجيه تتخصص فهالمجال
ولانها خليجيه ، قالوا عن اللي تقوله قلة أدب




هه لو أجنبيه جان دورواا برنامجها وين ماكان
وقالوا عادي كــول!!

[الـيـاه]

منو قال عشان اول خليجيه .. بس العيب انها رمست بهالطريقه !

[مزايا]

الله يهديكم بس
إخذوا الزين من برنامجها وخلوا الشيــن

[اخت اختي]

مشكورين كلكم عالمرور والمشاركة..
أنا الصراحة لاحظت إن الشباب ولا واحد أيد البرنامج أما الفتيات ف منهم من أيد و منهم من عارض..
لكن الصراحة رايي هو إن إذا كانوا عيالي صغار ما بخليهم لكن إذا عيالي وصلوا سن ال 16.. ليش لا.. و أنا بكون يالسة معاهم.. لأن هذا علم..
إنا في أواخر سن المراهقة.. وأحس إني أشوف هذا البرنامج وأتعلم.. لأن محد ممكن يكلمني ويفهمني عن هالأشياء.. وأمي من النوع إللي تستحي، مستحيل اتفهمني هالأشياء.. فأنا أشوف هالبرنامج وأتعلم.. وأحمد ربي يوم أسمع المشاكل إللي تستوي.. أنا أؤيد هذا البرنامج لما فيه من منافع أكثر من مساوء..
إذا كان البرنامج أجنبي.. وكلمات أجنبية جان كل واحد تابع البرنامج.. وعلى فكرة.. أوبرا وايد ترمس عن مشاكل جنسية أو علاقات محرمة لكن الكل يتابعها.. فإنتوا اتعارضون هذا البرنامج لأن خليجي وعربي.. ومب متعودين على إنكم اتشوفون برامج عربية من هذا النوع..

مشكورين كلكم عالمشاركة

[المقاتل]

وشو الهـــدف إنكم تتثقفون هالثقافه الحين ؟؟

يعني أزواج المستقبل بثقفونكم هالثقافه شو هالمنكر بعد !!

وهل الشرع أمر بهالشي ؟؟ أفيدوني !!

[مزايا]

يالمقــاتل هات لنا دليل من القرآن ولا من السنه يحرم إنه نثقف

[الثعلب الرمادي]

الصراحة ...

أول مرة أشوف فيها برنامجها كانت خلال آخر إجازة لي يوم كنت في الإمارات ... يعني مادري شو اقولكم البرنامج مسلي الصراحة مب سالفة ثقافة و لا كلام فاضي و الواحد يسمع أشياء الصراحة ما يتخيلها و يقعد يضحك

بعدين شو بتستفيد بنت ناس محترمة من سوالف الاغتصاب و هتك العرض و الضرب؟

الصراحة و لا شي

المهم استمتعوا بالمشاهدة و لو كان ينباع دي في دي للحلقات الخطيرة اللي فيها قصص خطيرة كنت اشتريته والله و قعدت اشوفه و اتسلى

و الله قنوات المانيا ما فيها مثل هالاشيا القذرة و المسلية

و مثل هالمشاكل الحرمة تحلها بنفسها و في أماكن لهذي الأشيا مب قنوات التلفزيونء لكن الحريم عندنا خايفين و يتصلون يمكن كلمة او كلمتين من المقدمة تحل المشكلة

و مرة وحدة كانت تصيح و تشتكي من زوجها تخيلوا شو نصحتها فوزية؟؟؟؟

استخدمي شوية كريمات لا والله

المهم أوقات ممتعة مع البرنامج و سجلوا لي كم حلقة معاكم حرام

[رويان]

اللي ما يتابع البرنامج وما يعرف شخصيتها و ردودها الحاسمة في موضوع العلاقات الزوجية لا يسطر رد.. اتوقع بيتحاسب عليه..

اللي قالوا انها تشجع العلاقات بين الطرفين قبل الزواج
من وين يبتوا هالكلام.. ؟؟
و هي من اكثر الناس اللي لهم حكم صارم في مثل هالعلاقات.. !!!
لما تتصل وحدة وتقولها انها على علاقة وترد عليها تقولها.. خل يخطبج اذا رفض اتركيه
ما يحبج
الرد هذا دايما نسمعه..
و دايما ترد على البنات يلعبون.. يتسلون.. علاقات وهمية !!
كيف و من وين جبتوا كلام انها تشجع.. !!
.
.
و بعدين من على اي اساس ينقال انها علمانية وما خفي اعظم.. الكلام هذا فيه اجحاف
الحلول اللي تقدمها في صالح أي اثنين مقدمين على حياة زوجية و في صالح المشاهد انه يعرف..
أحيانا امور بسيطة بين اثنين تنهي علاقة كان ممكن جدا انها تكون مثمرة..
بس لانهم مب قادرين يديرونها بشكل صح تنتهي..
.
.
و اللي يقول خل الكتب كافية هذا خيار المشاهد.. و ليش ينحصر فقط في الكتب.. ؟
الكتب و المواد المسموعة أو المقرؤوة ما ترد على اي سؤال ممكن يخطر في بالك
أحيانا سؤال حساس.. تخاف تسأله ممكن يسبب بين الطرفين مشكلة أو حساسية لاعتقاد انه خطأ او ممكن يضر..
بالعكس محتاجين لمواد حية.. المتغيرات كثيرة
و محتاجين اللي يتصدى لها و يثقف الناس فيها..
.
.
و الأمثلة اللي تنضرب اتحدى كل من يسطرها لو يجيب فيديو الحلقة للتأكدون انها قاعدة تعطي حلول لمشاكل واقعية.. حل علمي من باب انها دكتورة متخصصة
حتى الأمور النفسية تتعامل معاها بعقلانية و بطريقة تحل الموضوع قياسا للمنطق..