آخـــر الــمــواضــيــع

صفحة 1 من 3 123 الأخيرةالأخيرة
النتائج 1 إلى 15 من 45

الموضوع: دموع  الفـــــــــــــــــرح ..

  1. #1
    عضو فعال الصورة الرمزية راع7ي
    تاريخ التسجيل
    Sep 2003
    المشاركات
    394
    قوة التمثيل
    270
    <font color='#000080'><font color=&#39;#000080&#39;>السلام عليكم ورحمه الله وبركاته

    وحالكم وعلومكم عساكم طيبين ..

    عاده أنا يايب لكم قصـــــة وإن شاء الله تعيبكم ونتواصل مع بعض عن طريق
    ردودكم .. شرات القصة الأولانيه .. و إن شاء الله ما بنبخل عليكم بأجزاء ..

    و الحين راع انزل القصة وإذا عيبتكم بنكملها لكم .. أووجييييييييييج .. بدينا ..





    الجزء الأول ..




    راح عنه راح يالي يسمعه و يشكيله همومه و يحكي له شو يسوي في المدرسة وكل شي يصير له في حياته والحين ما عارف شو يسوي من بعد هذه العين يالي كان يقتدي فيها في كل شي روحه المسيد قراءة القرآن يقلده في كل شي و أحلامه يالي خططها وياه .. ورا البيت قاعد بروحه ريله في صدرة و الدموع على ويهه كان يصيح بصمت محد داري عنه وحالته ما عالم فيها غير رب العالمين.. أبو سيف توفى من يومين وسيف ما فطن أبوه توفى إلا من بعد ما سمع خاله يتكلم مع أمه و حس بعدم وجود أبوه من بينهم وصياح أمه وفقدان أبوه وكان يشوف حالة أمه يالي كانت منهارة و خواته الصغاريه يلعبون ما عارفين شو السالفة و أخوه الصغير يالي بعده ما كمل شهر .. إلى أخته يالي أكبر عنه بسنتين هي الوحيدة يالي تعرف من بين إخوانها .. سيف عمرة 10 سنين وهو الولد الوحيد في بيتهم وفاطمة أخته أكبر عنه بسنتين يعني عمرها 12 سنه وهي عاقلة وفاهمه جنه عمرها 17 سنه أما ريم و مريم توأم صغاريه عمرهم 5 سنين وسعود آخر العنقود عمرة يمكن ثلاث أسابيع .. أبو سيف ( راشد ) عمرة في الأربعين بس يالي يشوفه يعطيه في الثلاثين .. أما أم سيف ( عايشه ) فكانت صغيرة يوم أخذها أبو سيف كان عمرها 14 سنه و الحين عمرها 30 سنه في عز شبابها كانت تحب أبو سيف ما خذتنه عن حب وكان ولد عمها وعاشت معه حياه كل حرمة تتمنا تعيش هذه العيشة ..
    أم سيف وهي أدور ولدها: سيف يا سيف يا ربيه وين سار هذه الولد بعد ..
    فاطمة وهي شاله أخوها سعود: أمايه أنا بسير أدور عليه ورا البيت و إنتي قولي للخدامات يدورن عليه في الغرف و قولي لدريول يدور عليه برا البيت يمكن سار بيت عميه ..
    أم عايشه يدت فاطمة : وين سار و لدج يا بنيتي دوري ما أعتقد ظهر برا البيت و انت بعدين لا تعبين عمرج بروحج تعبانه ..
    أم سيف : لا يا أمايه هذه ولدي من يوم الصبح ما شفته أخاف صار له شي .. أنا بسير عند الخدامات يمكن شافوه .. وسارت أم سيف أدور على ولدها عند المطابخ على جانب البيت أما فاطمة سيده سارت ورا البيت ما تعرف ليش سارت هناك .. وبخطوات خفيفة تمشي وتتلفت يمين ويسار دخلت المطبخ شافت الخدامة تسوي الغدا ..
    أم سيف: ميري ما شفتي سيف ..
    ميري وهي تنتبه على أم سيف: لا ماماه ما في شوف سيف أسير بيت باباه أهمد دور .. " بيت عمه "
    أم سيف: لا إله إلا الله محمد رسول الله وين سار الولد .. لا قعدي إنتي كملي الغدا ونادي نورمينا تساعدج في الغدا مُحي سار بيت باباه أحمد يشوفه هناك .. سارت ميري عسب تنادي نورمينا عسب تساعدها مثل ما قالت أم سيف أما أم سيف فكانت تحاتي وايد ولدها من يومين تلاحظه متغير .. فاطمة كانت تربع ورا البيت ويوم لفت عند الشير الصغير شافت سيف قاعد وأيده على ويهه ومريم تمسح على شعرة أما ريم قاعدة تلعب حذا لهم ..
    فاطمة: سواف أمايه أدور عليك من مساعه و انت هنيه قاعد تلعب .. سيف نش ومنزل راسه ما يبي أخته تشوفه بهذه الحالة ..
    سيف: أنا بسير الغرفة وربع عنها هي استغربت من تصرفه وشلت خواتها و ودتهم داخل الصالة عند يدتها وقالت لأمها انه سيف في غرفته ..
    أم سيف وهي تنادي على ولدها: سيف يا سيف بطل الباب ..
    سيف ساكت ولا قال ولا شي منسدح على شبريته ويصيح ..
    أم سيف: سيف قوم تعال تغدا .. سيف أنا ما بروح إلا لين تبطل الباب .. سيف حس انه لازم يبطل الباب لأمه عسب بس تطمن عليه كفاية يالي فيها في ثالث يوم من وفاه أبوه يسوي فيها جيه فبطل الباب ..
    أم سيف : علامك يا سيف ..
    سيف منزل راسه: ما فيني شي يا أميه بس أبي أقعد بروحي ..
    أم سيف وهي تيوده على خده وبحنان الأم على عيالها : زين حبيبي ما تبي غدا عشان خاطر أمك تعال تغدا ..
    سيف و بجفاء: ما بي غــــــدا أبي أنام وبس .. ودخل داخل غرفته و صكر الباب و رد للصياح مرة ثانية
    أم سيف هزت راسها حست إنها بتعاني مع ولدها لأن أكثر شي كان ويا أبوه و تتذكر يوم يلعب معاه كل وقته يقضيه وياه وعرفت إن سيف عرف بـ وفات أبوه و صار لازم توقف وياه لأنه تعود عليه وصعب يتعود على شي ثاني بغمضة عيـــــــن ومرة وحده ..
    فاطمة: ها أمايه وينه سيف ما يبي غدا ..
    أم سيف وهي تعبانه : لا ما يبي أكلي إنتي و خواتج أنا بسير عند سعود أخوج .. يدتج وينها عيل ..
    فاطمة: في الغرفة تصلي .. " وبحزن " ليش أمايا أنا ما بكل إلا إذا إنتي كليتي ..
    أم سيف: لا يا فاطمة جيف أكل و أخوج حاله غير اليوم ..
    مريم وبلغتها المتكسرة: ماماه غدا متى بتا تلين ؟؟؟ ..
    أم سيف وهي تبتسم غصب عنها : الحين حبيبتي قومي فاطمة أكلي خواتج ونادي يدتج بعد ..
    فاطمة: لا أمايا نحن ما بناكل إلا إذا إنتي كلتي " ونزلت راسها " كفاية أبويه مب موجود ويانا ..
    أم سيف حزت في خاطرها على بناتها كيف كانت أنانية جدام عيالها: لا أفا عليج الحين بنسير نتغدا يا الله شيلي هذه الريم يالي ما تخلص من اللعب .. ريم سمعت اسمها وقعدت تطالع أمها لأنها سمعت أسمها بس أمها ما قالت ولا شي و أذتها إلا تعرف أمها شو تبا و ليش طرت أسمها .. ويمر أسبوع على وفات أبو سيف .. يوم السبت الصبح الساعة 7 ونص كانت فاطمة تتريا خواتها عسب يسرون ويا الدر يول المدرسة وريم ومريم الروضه ..
    فاطمة وهي تفكر: أمايه شو رايج ما أسير المدرسة و أقعد أساعدج في البيت ..
    أم سيف وهي معصبه : لا تفكرين بهذه الشي يا فاطمة أنا ما بي بنتي تكون جاهلة شو ناقصنج يا فاطمة عسب ما تسيرين المدرسة وبعدين إنتي صغيرة على المسؤولية ..
    فاطمة تفاجأت من ردت فعل أمها : لا أمايا بس حبيت أساعد ..
    أم سيف بصرامة: أنا قلت لج يا فاطمة لا تفكرين بهذه الشي مرة ثانية ..
    فاطمة: إن شاء الله أمايه و أنا آسفة على الكلام يالي قلته ..
    أم سيف وهي تبتسم لبنتها : خلاص عيل يا الله قوموا تأخرتو على دواماتكم ..
    فاطمة: و سيف ما بسير المدرسة اليوم ..
    أم سيف: سيف أخوج سار ويـــــا ولد عمج ..
    فاطمة : زين يا الله الوالدة مع السلامة " وتبوس راس أمها وتقلدها مريم وريم " و سارو على دواماتهم .. ويمر الشهور وتظهر أم سيف من دينها وتزيد عليها عباله البيت وعيالها يالي كل يوم يتشكون قبل أبو سيف كان شال عنها حمل كبير وايد كبير وأمها تساعدها إذا بغت شي بس بعد ما تبي تحمل على أمها بعد عندها مسؤوليـــــات إخوانها بعدهم صغاريه ..
    أحمد: لا يا عايشه إنتي ما لازم تداومين في الشركة وأنا وين سرت يا أم سيف ..
    أم سيف " عايشه " : لا أفا عليك يا أبو خالد أنا ما بي أعذبك بشي ..
    أحمد: يا أم سيف إنتي مرت أخويه ومثل أختي قبل كل هذه بنت عمي ما بي أقصر معاج في شي وبعدي مدامني أقدر أعطي في شغل أخويه ليش لاء ..
    أم سيف: بس يا بو خالد .. وشغلك ..
    أحمد: لا أفا عليج أنا إذا ما درت بالي على عيال ولد أخويه أدير بالي على منوه .. خلاص يا عايشه أنا قررت إني أدير شركه أخويه وبربط شركتي بشركته أدري بيكون شي كبير عليه بس أنا ما بخليكم .. و بعدين عيال عمي ويايه ..
    أم سيف: تسلم يا أبو خالد .. على هذه الخدمة ما قصرت ..
    أحمد: ما بينا شكر يا بنت العم .. والحين باجر عزيمة أمج مسويتها بتسيرين ولا ما بتسيرين ..
    أم سيف: لا بسير و بعدين خل العيال يغيرون جو ما بي أحكرهم ..
    أحمد: زين تسوين يا عايشه .. يا الله عيل الحين بخليج وايد تأخرت على المحامي و أنا بيبلج الأوراق أدري ما بتعرفين بس أنا بحاول أفهمج في الشغل شوي شو .. أخليج احينه يا أم سيف .. وسار عنها أحمد يالي كان بيتهم حذا بيتهم الباب بالباب .. أم سيف ارتاحت من بعد الكلام يالي سمعته إذا ما ساعدها أحمد بساعدونها أخوان ريلها ولا أخوانها .. في العزيمة كان سيف ماله نفس اليهال يلعبون إلا هو قاعد على باب البيت ويطالع الدنيا كيف فاضيه من غير أبوه آخر مرة طاحت ريله على هذه المكان كان أبوه وياه و ميود أيده بس احينه منوه يالي بيود أيده ..
    أم سيف: سيف حبيبي قو تغدا ..
    سيف: مابا غدا ..
    أم سيف: سيف بتحرقك الشمس قوم سير اقعد تحت الشيره ..
    سيف: أمايه خليني بروحي .. وسار عنها تمت تطالعه و عقب سارت وقعدت داخل .. أما سيف فرد لهمه وحزنه يحس بعمرة مب طايق الدنيا من دون أبوه عايف الدنيا من بعد ما كانت له فيها هدف .. عقب الغدا كان سالم ولد عمته يرمس تلفون وعقب بنت خالته شيخه طلعت تتمشى في البيت ويوم شافها سالم صكر التلفون وسار عسب يرمسها .. وسيف قعد يطالعهم بس هم ما شافوه ..
    سالم بابتسامه: السلام عليج يا خطيبتي ..
    شيخه وهي تطالعه وبتكبر : وعليكم السلام نعم بغيت شي ..
    سالم: زين بلاج أنا خطيبج ليه الحق أرمسج ..
    شيخه وبتكبر: نعم يوم بتملج عليه ذيج الساع تعال رمسني ..
    سالم: أفففففف يا ربي أنا شو يالي معذبني غير تغليج عليه ..
    شيخه: جب ..
    سالم: والله حلوه فديتج والله ..
    شيخه وهي عايبنها سالم بس تتغلى مثل ما قال: و ليش واقف هنيه ليش ما تدخل عند الرياييل ..؟؟
    سالم و بثقة و بهدوء : فديتج تغارين عليه " ويغمز حقها "
    شيخه انقهرت: شووووه ما عندي سالفة شووه عن أذنك .. وسارت عنه بتكبرها .. هذه الكلام كله شهد عليه سيف صح أنه ما فهم منه وايد بس حس سالم يبا شي من شيخه و عقب سار عنهم .. و حاله سيف في الدراسة وايد متراجع بس ينجح أما فاطمة فكانت شاده حيلها وكانت تساعد أمها في كل شي في تربيه أخوانها في المذاكرة حقهم بس سيف ما يرضى أحد يذاكر حقه إنسان فاسد همه بس اللعب و ما في حد يدخل في شو يسوي و شو ما يسوي و أمه طقت جبدها منه وسارت أم سيف " عايشه " خبرت عمه أحمد ..
    أحمد: سيف لي متى انت بتقعد جيه ليش مأذي أمك هاه ..
    سيف: مب مأذنها ليش شكتلك؟؟ ..
    أحمد: يا ليت والله تشكي ليه أمك أصلن تحبك و انت تجازيها جيه .. وبعدين الأستاذ يقول عنك انك مب مهتم في الدراسة ليش ما حيدك يا سيف أحيدك شاطر وتحب الدراسة..
    سيف بخصوص المدرسة ما عرف شو يقول : عمي أنا ما سويت شي أنا كله في غرفتي و إذا غلطت أكيد بعترف بغلطي عن أذنك .. وسار عن عمه وخلاه قاعد بروحه يتساءل ليش صار ولد أخوه الحبوب جيه جاسي مره وحده .. و تمر السنين وصار سيف ريال و عمرة 18 سنه بس ما يعتمد عليه كله برا البيت ويرد البيت متأخر و ربعه من رفقاء السوء و أمه دوم تشتكي بس عمومته و خواله تعبو من كثر ما ينصحون فيه ..
    نزلت من السيارة وتمشي بخفيف و كانت خايفة لا حد يشوفها وهي نازله من السيارة " طالعه مع واحد من هذولا الشباب " ..
    ...... يطالعه ساعته : اليوم يايه من وقت الغالية ..
    خافت ما عرفت شو تسوي من وين ياي هذه الصوت ..
    ..... يضحك : أدورين عليه أنا هنيه فوق اليدار " جدار البيت "
    خوله جان تطالع فوق وشافته قاعد رافع ريل ومنزل الثانية تفاجأت بوجوده فوق ليش هنيه .. أما سيف فكان يطالعها باحتقار شديد من فوق لتحت ..
    سيف: لين احينه واقفة سيري بيتكم الله يستر عليج سيري ..
    خوله: سواف انت هنيه ..
    سيف وهو يأشر: لا هنـــــــــاك ..
    خوله وهي تبتسم: والله حلوه .. " تبا تغطي على عمرها "
    سيف: مع منوه يايه إنتي ..
    خوله : هاه يايه ويا بنت خالتي توني يايه من العرس ..
    سيف: يايه من العرس بروحج .. وين أمج و أبوج وينهم عنج يا الضايعه ..
    خوله الجلمه دخلت لها في الصميم : احترم نفسك يا أخي .. ما شايف نفسك شوه ..
    سيف وهو يحرك ريله وباستهزاء: أنا عـــــــــــــادي أنا ريال ما يعبني شي لكن البنت يعيبها وايد يا بنت أمج سمعتج هي يالي عندج سيري دخلي بيتكم لا تفتقدج أمج والريال إلي يايبنج أنا بتصرف معاه ..
    خوله و بوقاحة: انت ما لك شغل بريال ..
    سيف رافع حواجبه وبوقاحة : لاه زين والله زين تعرفين عاده إنتي ما ينفع معاج إلا أخوج ..
    خوله وبخوف : سيف مالك شغل انت .. دخيلك لا تسوي شي ..
    سيف وهو يبتسم بخبث : زين أنا ما بقول شي بس دخلي داخل عن حد يشوفج تراني أنا في مكاني ما أنشاف عادي أرد على روا وأدخل البيت ومحد يشوفنيه .. وسارت خوله بيتهم وهي خايفة منه كل مرة يشوفها بس يسوي لها حركه عسب بس تنتبه بأنه موجود .. خوله بنت يران قوم سيف وهو يحب يقعد فوق أيدار بيتهم لأنه موقعه استراتيجي يشوف كل شي في الفريج بس محد يشوفه لأنه شجره الليمون مغطيته ..
    سيف وهو توه داخل البيت ..
    أم سيف: وين كنت يا سيف ؟؟
    سيف و بوقاحة و محطي أيده في جيبه : كنت عند الربع في شي ..
    أم سيف: لين متى يا سيف دير بالك على دراستك انت هذه السنة آخر سنه حرام عليك يا سيف تعبتي وياك ..
    سيف يطالعها بملل: بس خلصتي رمستج أنا تعبان و مالية خلق لج عن أذنج .. وسار عنه وخلا أمه واقفة بألمها ليش ولدها يسوي فيها جذه عيزت معاه لين متى ..
    أم سيف: يا بو خالد أنا أبي أسوي صيانة للبيت البيت جديم و أنا مب عايبني ..
    أحمد: إن شاء الله ما يصير خاطرج إلا طيب .. و الحين بتقرين هذه الأوراق و عطيني رايج فيها لأن عندنا مشروع لازم نبدأ فيه نص هذه الشهر ..
    أم سيف: إن شاء الله بس لا يكون عن المشروع يالي قلته عنه البارح ..
    أحمد: هيه نعم .. إلا شخبار سيف شو مسوي في الدراسة ..
    أم سيف: يا أحمد الولد ما عاد يسمع ليه كله لابسني ويوم أبي أكلمه يقول تعبان ويتحجج ليه بحجج .. أبيك تروح المدرسة و تسأل عنه أنا شاكه الولد ما يسير المدرسة ..
    أحمد: والله شقولج الولد ما ينفعه الكلام .. و بعدين هو ريال و يعرف الصح من الغلط
    سيف وهو داخل البيت لاف الغترة على رقبته و رافع كندورته وبدون نفس: السلام عليكم ورحمه الله ..
    أم سيف وأحمد : وعليكم السلام ..
    سيف: أمايه لا تقعديني ما بي غدا ..
    أحمد : سيف تعال سلم عليه مب أنا عمك ..
    سيف ببرود: ليش شاك انك عمي يعني ..
    أحمد عصب بس ما يبي يسوي له شي : لا أفا عليك بس الرياييل تسلم ..
    سيف : البيت بيتك عمي خذ راحتك عن إذنكم .. وسار عنهم ..
    أم سيف و ويهها داير وراها مستحية مسود ويهها من هذه الولد : أنا آسفة يا بو خالد والله ما عرف شو أسوي بهذه الولد انت شفت بعينك ..
    أحمد: لا ما عليج محد ما يعرف أطباع سيف في العيله .. والحين بسير ..
    أم سيف: وين ساير أقعد بتتغدا ويانا ..
    أحمد: لا مشكورة ما تقصري خيرج عامر يا أم سيف و من الأسبوع الياي بنبدا في بالصيانة ..
    أم سيف: تسلم .. خلاص أنا بكلم الوالدة عسب تزهب لنا البيت صحيح صغير بس يا الله ..
    أحمد وهو يمشي ويا أم سيف لباب البيت : أفا عليج بيتنا عود وما فيه حد غير البنات وبعدين ليش تسيرين بعيد بتنا في مقابيل بيتكم يعني ماله لزمه تسيرين لمج وتشلين الأغراض وايد عليج يا أم سيف بيتنا مفتوح لج يا أم سيف ..
    أم سيف: أخاف إنضايجك يا ولد عمي
    أحمد: بتضايجونا كله كم من يوم و بتردون يا الله ما بي أسمع أعذار وبعدين منيرة اختج ما بتعارض ..
    أم سيف : إلي تشوفه يا بو خالد ..
    أحمد: يا الله احينه أنا بسير تبون شي ..
    أم سيف: لا مشكور ما تقصر ..
    أحمد: عيل فمان الله .. وروح عنها ركبت سيارته وظهر بها .. أما فوق أول ما ركب سيف شاف أخته فاطمة قاعدة تجلب المجلة وتلعب بشعرها ..
    سيف بدون نفس: السلام عليكم إنتي هنيه ..
    فاطمة : وعليكم السلام لا هناك خخخخخخخخخخخخ
    سيف يضحك بدون نفس : بــــــــايخه .. و ليش ما سرتي الجامعة اليوم ..
    فاطمة : يا حبيبي الجامعة مب مثل المدرسة يتمون لين الساعة 2 .. على حسب الدوامات ..
    سيف وهو يمشي لغرفته : بس إنزين بس .. ودخل غرفته .. فاطمة قعدت تطالع غرفته بأسى متحسفه إنه أبوها كان يحب هذه الولد يوم كانو صغياريه و مفضلنه عليهم على شوه .. العصر سيف منسدح على شبريته اليوم الأربعاء يعني سهرة صباحيه وهو ما يبي يسير بس شو يسوي ما يبا الشباب يقولوا عنه مب ريال وهو قد هذه الكلمة .. وشوي يرن تلفونه ..
    سيف أول ما شاف الرقم انسدت نفسه : ألووه هلا ..
    محمد: ها سواف شحالك يا ريال ..
    سيف: الحمد الله الزبده من هذه الرمسه إلي ما من وراها فايده ..
    محمد وهو متعود على أسلوب سيف الوسخ : لا ولا شي بس يعني حبيت اطمن انك بتي اليوم ..
    سيف: هيه بي في شي ثاني ما عندك شي ثاني OK باي .. و صكر عنه ربعه متعودين على أسلوبه في التلفون بس مع هذه التصرفات وايد يحبونه خصوصا محمد هذه رفيق دربه من يوم ما كانو صغاريه في نفس الصف لي ثالثة ثانوي ..

    نهاية الجزء الأول ,,



    إذا عيبتكم بنكمل لكم خلاف .. و إن شاء الله تعيبكم ..

    و السمووووحه أخوووكم راعي ال7 ..

    ســــوااااالــــــــــــم ..</font></font>

  2. #2
    مـراقــب الصورة الرمزية مزن هتان
    تاريخ التسجيل
    Apr 2004
    المشاركات
    5,776
    مزاجي
    Buzzed
    قوة التمثيل
    531
    <font color='#F52887'>

    هلا أخوي راعـ7ـي

    اتمنى اتكون حلوة مثل مصيرج ومصيري<IMG src="http://oasis.bindubai.com/emoticons/smile.gif" border=0>

    بعدني ما قريتها

    أختك: هــــتـــ مزن ـــان</P></font>
    أَيُها الراحِلُ عُذراً في
    شُكاتي، فـ إلى طَيْفُكَ أنْاتُ عِتَاب ...
    T

  3. #3
    عضو فعال الصورة الرمزية راع7ي
    تاريخ التسجيل
    Sep 2003
    المشاركات
    394
    قوة التمثيل
    270
    هلا والله بأختين مزن هتان ..

    إن شاء الله تكون حلووووه .. وتعيبج ..

    و إن قريتيها عطيني رايــــــــج فيها ..

    و أتريا ردج إختيه ...
    ومشكووووورة على الطـــــــــوووووفه الحوووووه ..
    أخووووج راعــ7ــــي ..

    سواااااالـــــــــم ..

  4. #4
    مـراقــب الصورة الرمزية مزن هتان
    تاريخ التسجيل
    Apr 2004
    المشاركات
    5,776
    مزاجي
    Buzzed
    قوة التمثيل
    531
    <font color='#F52887'>بداية موفقة

    الله يهدي سيف

    لا تتأخر علينا

    أختك: مزن هتان</font>
    أَيُها الراحِلُ عُذراً في
    شُكاتي، فـ إلى طَيْفُكَ أنْاتُ عِتَاب ...
    T

  5. #5
    عضو جديد الصورة الرمزية علايه
    تاريخ التسجيل
    Feb 2004
    المشاركات
    46
    قوة التمثيل
    248
    <font color='#000000'>مرحبا أخوي راعــ7ي

    &nbsp; &nbsp; &nbsp; &nbsp; &nbsp; &nbsp; البدايه حلوه يالغالي ونتريا التكمله
    &nbsp; &nbsp; &nbsp; &nbsp; &nbsp; &nbsp;

    وتسلم على القصه اليديده <img src="http://oasis.bindubai.com/emoticons/smile.gif" border="0" valign="absmiddle" alt=':)'></font>

  6. #6
    عضو فعال الصورة الرمزية راع7ي
    تاريخ التسجيل
    Sep 2003
    المشاركات
    394
    قوة التمثيل
    270
    هلا والله بأختيه مزن هتــــــــــــــان مشكووورة على المروور ..

    الحمد الله إن البدايه عيبتج ..

    و إن شاء الله بنزل لكم الجزء عقب مب متأخر عليكم وايــــــد ..

    والسموووووووحــــــــــة ..
    [b]

    مرحبتيـــــــن وغلا أختيه علايه ..

    مشكووورة على تعقبيبج و مرووورج الطيب ..

    و العفوووو و إن شاء الله مب متأخر عليــــــــكم ..




    و سواااااااااااااااااااااال ـــــــــــــم ..

  7. #7
    عضو فعال الصورة الرمزية راع7ي
    تاريخ التسجيل
    Sep 2003
    المشاركات
    394
    قوة التمثيل
    270
    <font color='#000080'>الجزء الثــــــاني
    نش سيف من فراشة وسار غسل فيسه وعقب ظهر من غرفته سار في الصالة ما شاف حد ويوم ظهر

    في الحوي جان يشوف ريم ومريم يلعبون و وياهم سعود الخدامة قاعدة تأكله كورن فلكس &nbsp;..

    سيف: ريموه أمايه وين ؟؟

    ريم وهي خايف : أميه سارت ويا فاطمة أختي بيت يدوه ..

    سيف يدري بخواته يخافون منه يبي يضحك عليهم &nbsp;: هيه و إنتي شو قاد تسوين ..

    ريم: ما شي قاعدين نلعب ..

    سيف: إنتي كبيرة شو بعد يلعبج ..

    ريم: ما أنا مريم بعد تلعب ..

    سيف يطالع مريم : مريموه عادي خلها تلعب لكن إنتي أكبر ..

    ريم تمت ساكتة تخاف تقول شي و يفاتن عليها كذا مرة فاتن عليها
    ..
    سيف: ليش ما ترمسين ..

    سعود: سيف حرام خلها حرام ..

    سيف يطالع أخوه و يبتسم : تعال انت حبيبي تعال "و يقعد حذاله" شو سويت في المدرسة اليوم ؟؟

    سعود: هاه.. هذه الأجنبية وايد تهزبني ..

    سيف: أي أجنبية يالي في المدرسة ليش فتنت عليك أكيد ما حال الواجب ..

    سعود: حليت الواجب فاطمة حلته ليه بس هيه ما عرف جيف ..

    سيف: زين عيل الحين كمل أكل ودير بالك على خواتك زين &nbsp;إذا تبون شي أنا في الصالة .. ويمسح على

    راس ريم يالي كانت منزله راسها .. يوم سار سيف ريم قعدت تسوي حركات بحلجها ..

    مريم: يوم بيج ذيج الساعة حطي للسانج في حلجج ..

    ريم : جب إنتي أنا ما كلمتج .. &nbsp;

    مريم وهي تضرب ريم : لا تقولين جب لا تقولين جب ..

    ريم: أي &nbsp;ليش تضربين والله لا ضربج وتنش وتشد شعرها ..

    سيف وهو يزعج من بعيد : بس إنتي ويـــــــــــــاها .. صخن ولا قالن شي قعدن يكملن لعبهن عسب لا

    اييهن ويضربهن .. &nbsp;سعود حط أيده في حلجه وقعد يضحك بصوت خفيف حتى الخدامة ضحكت عليه ..

    وعقب المغرب يات أم سيف من عند أمها وسيف قاعد في الصالة منسدح على الغنفه رافع ريل و الثانية

    منزلنها تحت بكسل ويجلب القنوات مل من كثر ما يجلب القنوات وأمه لين ذيج الساعة ما يت وشوي

    جان تدخل أم سيف و وياها مريم وريم وفاطمة وسعود شالين أجياس .. &nbsp;

    سيف وهو يعدل يلسته : حمد الله على السلامة يا أم سيف توها الناس ..

    أم سيف : السلام عليكم ..

    سيف: وعليكم السلام و ليش ما خبرتوني إنكم بتسيرون بيت يدوه .. و لا خلاص

    فاطمة: كنت نايم فما حبينا نأذيك ..

    سيف: أنا ريال البيت احينه ولازم تستأذنون على الداخل وطالع تسمعون ..

    أم سيف بحرقه في قلبها : يا ريت ريال البيت يعتمد عليه ..

    سيف وببرود : المهم يعتمد عليه ما يعتمد عليه المهم إني ريال البيت تسمعون .. أنا طالع .. وسار عنهن.

    ظهر سيف من البيت مر عليه محمد وسارو المزرعة يالي يلتقي فيها ويا ربعه و يقضي وقته معاهم أكثر
    من عايلته ..

    فيصل: سواف هلا والله أدق حقك يا أخي بس ما تشيله ..

    سيف: عن هذه الجذب تراك وايد جذاب يا فيصل ..

    فيصل: والله داق حقك ..

    سيف وهو يعطي التلفون حق محمد: هاك حمود يود شوف المكالمات لم يرد عليها إذا شفت أسمه قولي..

    محمد وهو يشوف : ما فيه فصول تراك جذاب ..

    فيصل: يمكن كنت راقد هههههههههههه

    سيف وهو ماله نفس: حلوه وايد بس لا تعيدها مره ثانيه ..

    فيصل يبا يحره : وتم ما بعيدها ..

    منصور: الحين أنتو يا يين تضاربون &nbsp;خلونا نشوف شغلنا يا أخي ..

    سيف: ما عليه حقك عليه يا منصور فديت خشمك أنا ..

    منصور وهو يمسح &nbsp;على خشمه: تسلملي حبيبي &nbsp;.. محمد نش ظهر برا ما يحب يقعد وياهم بس شو

    يسوي هذولا ربعه وقعد يرمس في التلفون .. &nbsp;

    فيصل: هذه حمود قبضه التلفون لين تالي الليل وهو يرمس ويا حبيبه القلب ..

    سيف وهو مستغرب : ويا حبيبه القلب ومنوه هذه بعد ما حيده يثبت على وحده هو صحيح يغازل بس

    عمرة ما حب وحده من خاطرة هذه وين والحب وين ...

    فيصل: مادري أساله يا سيف مب هو ربيعك من يوم ما كنتو صغاريه ؟؟.. سيف لبس الموضوع ما همه

    أخرته بي وبقوله عن هذه السالفة .. في البيت و على العشا سيف مثل كل عاده ما يتعشا إلى برا البيت

    وأم سيف كل مرة تترياه .. فاطمة: أمايه ما بتين تتعشين سعود يبي يرقد ..

    أم سيف حزت في خاطرها ولدها : خلاص قوموا نتعشا .. وشوي وداخل عليهم خالد و حمده أخته يايين

    يتعشون عند مرت عمهم مثل كل مرة أيون يتغدون ولا يتعشون ..

    أم سيف وهو ترحب فيها: هلا والله هلا شحالكم ..

    خالد: الحمد الله بخير وعافيه شحالج خالوه ..

    أم سيف: الحمد الله هاه حمده علومج حبيبتي ..

    حمده: الحمد الله يا الله خالوه تراني يوعانه &nbsp;أقول حق خلود بسرعة نروح بيت عمي قبل لا يخلصون

    عشاهم و نحن ما نلحق على شي ..

    أم سيف وهي تضحك :لا أفا عليج يا بنيتي &nbsp;نحن ما ناكل إلا معاكم ..

    خالد: تعالي إنتي منوه خلود هاه أنا أخوج الكبير عمري احينه 23 سنه تقولين عني خلود ..

    فاطمة يوم سمعت صوت حمده يات تربع : ها يا عيال عميه بعدكم بتضاربون يا الله نحن يو عانين ونبا

    ناكل شوفو سعود فديته جيف ينود .. &nbsp;

    خالد: أفا عليج بس هذه بنت عمج ما تشو فينها ..

    أم سيف: قومو كملو رمستكم داخل يا الله &nbsp;.. دخلو كلهم داخل غرفة الطعام إلا أم سيف تمت واقفة تطالع

    في خالد يالي كانت تتمنى ولدها يطلع مثله بار بأبوة وأمه ويتحمل المسؤولية .. الساعة أربع الصبح &nbsp;

    شرف سيف من برا البيت اليوم وايد تأخر أكثر عن العادة و أمه كل شوي تطالع غرفته جان وصل ولا

    ما وصل و تحاتيه وايد ..

    أم سيف وبصوت خفيف : وين كنت يا سيف ..

    سيف وهو مت فاجأ و كان سكران و موصل حده &nbsp;: هاااااااااااااه بعد وين كنت عند ربعي ..

    أم سيف وهي مصدمه : سيف هذه حزه الحين تي فيها .. قوم دش داخل الغرفة .. دخلت أم سيف وسيف

    الغرفة ..
    أم سيف: شو بقولو عنا الناس يا سيف .. تشرب بعد تشرب حسبي يا الله ونعمي الوكيل فيك يا سيف

    " وتصيح " أنا شو سويت فيك عسب تجازيني جيه ليش يا سيف ..

    سيف و هو &nbsp;يتمايل : بس أميه بس أنا الحين بنام باجر تعالي كلمي زين ..

    أم سيف وهي تضربه على صدرة : الله ياخذك يا ليتني ما يبتك لو كنت أعرف أن حالك بصير جيه جان

    ما يبتك .. أبوك ما كان جيه أبوك ريال والكل يتمدح فيه لين احينه وهو في ترابه الناس تذكر خيرة ..

    سيف: أمايه عاد خليني برقد خلاف تعالي كلميني &nbsp;..

    أم سيف وهي تسحبه لحمام : تعال يا الخايس والله لا خبر عليك عمك .. وتنزل راسه في الحنفية .. &nbsp; &nbsp;

    سيف وهو حاس ببرود : أميه أنا ريال و مابي عمي يدخل في شو أسوي &nbsp;وما أسوي ..

    أم سيف: الريال ما يشرب هذه يالي انت تشربه عنلاتك " وسحبته لشبريته وظهرت حقه ملابس "
    أندوك ألبس وقط عنك هذه الملابس يالي لابسنها .. &nbsp;وظهرت عنه و خلته قاعد طبعا هو ما قدر يلبس ملابسه و على طول رقد من التعب .. أم سيف دخلت غرفتها قعدت تصيح هي بعدها صغيره على هذه الشي عمرها الحين 38 سنه وإلي يشوفها يعطيها 29 وما يقول أكبر عيالها &nbsp;بنت و عمرها 20 سنه .. أم سيف ما رقدت حتى الصبح ما رقدت نشت وقعدت تسوي حق عيالها ريوق و كان سعود قاعد حذالها يلعب وهي مستانسه عليه ما تباه يظهر على أخوه فاسد و ما يهمه إلى تسليته .. و تمر الأيام و يسون الصيانة في بيت أبو سيف الله يرحمه وسارت أم سيف سكنت عند أمها ما حبت تعبل على ولد عمها كفاية شايل عنها حمل كبير حمل الشركة ... وفي نص السنة وسيف كان راسب في ماده و أم سيف ضايع عندها الأمل في نجاحه في الثانوية العامة .. أما مريم وريم فكانن شاطرات وحده طالعة التاسعة &nbsp;" هذه ريم " أما مريم فكانت طالعه الخامسة &nbsp;وسعود طالع الثاني ..

    سيف وهو يطالع شهادات خواته : ريموه ليش إنتي كسولة ليش مريموه أشطر عنج أنا بيب حق مريم هديه &nbsp;..
    ريم: ليش أنا طالع التاسعة أحسن من لاشيء ..

    سيف وهو يعصب عليها يبا يخرعها : و منوه قال أحسن و الواحد يطلع للأعلى"اسموعو منوه يرمس"
    ريم وبخوف: عيل انت جم طالع ..

    سيف: نحن ما عندنا جم طالع نحن عدنا نسبه وبعيد هذه مب محسوب ..

    مريم: جيف يعني ..

    سيف: يعني نجحت ولا رسبت عادي كله واحد ..

    مريم : وبعدين عادي تنجح ..

    سيف: لا حبيبتي آخر السنة محسوب هذه يخلين أخلص من المدرسة ..

    ريم: زين جم نسبتك .؟؟؟

    سيف وهو ما عارف جيف يجاوب: جيف أنا.. مب الحين يحطون النسبة آخر السنة يحطونها ..

    سعود: سيف أنا طالع الثاني ..

    سيف: الله وين شهادتك بشوفها ..

    سعود ربع أيب شهادته ويا: أندوك شوف ..

    سيف: الله سعودي شاطر بعطيك بوسه " ويبوس أخوه " وباجر بوديك عسب تشتري حقك هديه زين ..

    سعود وهو مستانس: الله سواف بشتري ليه هديه ..

    ريم: و أنا ما بتشتري ليه هديه ..

    سيف: إنتي بذات .. لحظه بناخذ شور سعود و مريم .. يا الله حبايبي اجتماع " وهو يصفق "

    سعود وبصوت خفيف و محطي أيده على جتف مريم: حرام خلها تي ويانا شوفها مسكينة ..

    سيف يطالع أخته : إنتي مريوم شو تقولين ..

    مريم: حرام خلها تي ويانا ..

    سيف وهو يرفع راسه : زين جاء القرار التالي .. ريموه بنت راشد بتسير ويانا بس ما بنشتري لها هديه
    عسب هي طالع التاسعة ..

    ريم: براي المهم إني أسير وياكم " مسكينة ريم " &nbsp;

    سيف: يا الله أنا الحين بسير عنكم و الأسبوع الياي قومو من وقت يالي بيتأخر ما بيسير ويانا .. وسار عنهم والكل مستانس أجازه وسيف بي مشيهم .. سار سيف &nbsp;المزرعة عند ربعه وفي نيته إنه ما يرد ويشرب تقطع قلبه يوم يشوف أمه بليل تترياه وهو يترنح لا يستحي ولا يخيل .. &nbsp;
    سيف: حمود ما تبي تلعب ..

    محمد: ما بي ألعب ..

    سيف: زين لك والله إلي يلعب ويا منصور يرتفع عليه الضغط ..

    محمد: أنا أقول جيه بعد ..

    سيف: هاه حمود منوه تكلم عيل تراني أغار عليك ..

    محمد يطالع سيف بنص عين : أونك تغار سير اقعد هناك بكلم الأهل ..

    سيف: الأهل ولا ..

    محمد: سير عني لاه وطلع برا عسب يرمس بتلفون .. سيف حس إن محمد يخبي &nbsp;عليه شي وهو كاتم أسراره ..
    سيف وهو يدق لأمه : ألووه ..

    ....: ألووه ..

    سيف استغرب من الصوت : منوه ويايه ..

    ....: انت منوه انت يالي داق ..

    سيف وهو يفتن عليها : زين زين بلاج والله سوري غلطانين .. صكر عنها استغرب ليش كل ما دق حق أمه تطلع له هذه البنت ..

    منال: عنلاته و الله لا خبر خليفة خله يتصرف وياه ..

    فطيم: خله يولي عنج &nbsp;هذولا الشباب دوم جيه ..

    منال: لا وبعد يفتن انت يالي داق مب أنا ..

    فطيم وهي تضحك: حركات والله ..

    منال: والله الحين بسير لخليفة بقوله يا أخي أذاني .. نشت منال وسارت صوب غرفت أخوها خليفة يالي كانت تحت الوحيد يالي يسكن في الطابق الأرضي وله جناح كامل كبير أكبر جناح في البيت وشكله وايد حلو مرتبنه وهو يعرف بهذه السوالف في الديكورات .. منال وهي أدق باب الجناح بس محد رد عليها وترد مره ثاني أدقه &nbsp;..

    خليفة وهو يبطل الباب وفي أيده فوطه : هلا منال بلاج يا أختي.. يمسح على راسه بالفوطة ينشف شعرة

    منال: انت كنت تسبح والله سوري يا أخوي ..

    خليفة: ليش واقفة برا تعالي داخل .. &nbsp;

    منال: تسلم خليفة .. وتدخل داخل ..

    خليفة : هلا اليوم عدنا عيل .

    منال: كل يوم عندك بس انت الله يهداك ما تنشاف ..

    خليفة : الله بعد الظروف المهم بغيتي شي ..

    منال: هيه في واحد يدق حقي مأذني من يوم ظهرت ليه التلفون ..

    خليفة والدم عنده يفور: و منوه هذه بعد ..

    منال: و الله مادري بس كله يدق حقي ..

    خليفة: خلاص إنتي خلي التلفون عندي و أنا بتصرف أي رقم احينه يالي يدق لج .. راوته منال الرقم يالي يدق لها وقال لها خليفة إنه بيتصرف معاه بعدين وقعدت تسولف ويا خليفة أخوها لين الساعة 11 ونص وسارت عقب غرفتها ..

    خليفة: ألووه السلام عليكم

    سيف مستغرب من الصوت: و عليكم السلام و الرحمة .. &nbsp;

    خليفة: من ويايه ..

    سيف: ليش انت يالي متصل ..

    خليفة: زين أنا ريال يعني عادي قول اسمك ..

    سيف: خلاص دامك مصر أنا سيف بن راشد ..

    خليفة: و النعم عاشت الاسامي .. &nbsp;

    سيف: ينعم بحالك .. من ويايه يعني إذا حاب تقول ..

    خليفة: خليفة بن سلطان ..

    سيف: و النعم هلا بخليفة بغيت شي الشيخ ..

    خليفة: هيه نعم لو سمحت يا سيف لا أدق على هذه الرقم ..

    سيف بوقاحة : ليش إن شاء الله ..

    خليفة وهو مستغرب : شو ليش هذه سؤال .. أفهمها يا أخي ..

    سيف: زين لمنوه هذه الرقم ؟؟ ..

    خليفة محرج: اسمع يا سيف أنا قلت لك لا أدق على هذه الرقم باي .. و صكر عنه بس سيف ما سوى سالفة كل شوي و داق على هذه الرقم مستغرب ليش رقم أمه تغير .. ويوم سأل أمه عطته نفس الرقم بس في رقم هو كاتبنه غلط فعدل الرقم وقعد يضحك على نفسه ..

    سيف ببرود : زين بلاك معصب يا أخي أنا غلطت زين مغلط في رقم الوالدة والحين صلحناها الغلطة ونحن عاده نبا نعتذر إذا تتقبل اعتذارنا ..

    خليفة وهو مب مصدق : مقبول منك الاعتذار و الحين ممكن لا تتصل على هذه الرقم ..

    سيف وبمصداقية : والله مب داق على هذه الرقم .. بس ممكن أطلب منك طلب ..

    خليفة نشف ريجه : زين اطلب بسرعة عنديه شغل ..

    سيف بهداوه وبرود: الله لا شغلك .. ممكن تعطيني رقم تلفونك ..

    خليفة مستغرب: ليش عاده تبا الرقم ..

    سيف: لا تخاف ما بسوي فيه شي بس بتصل بك وبرمسك ..

    خليفة : متأكد ..

    سيف: ليش شاك يعني .. أوعدك وعد رياييل ..

    خليفة مب مقتنع: زين أخذ الرقم بس أتمنى إني ما أشوف منك المشاكل ..

    سيف: أفا عليك ما بتشوف مني إلا كل خير .. وتم نقول وتم ..

    خليفة: خلاص خذ الرقم .. و عطاه الرقم و سيف حيل مستانس أول مرة يخطي خطوه مثل هذه و حس هذه أول مغامرة له ..

    سيف من أخذ رقم خليفة كل شوي يدق حقه و يرمس وياه و يوم يرمس وياه يحس بشعور ثاني .. أما خليفة يحس أنه سيف شي وراه يحس إنه ناوي على شي بس هو ما يعرف ..
    &nbsp;
    سيف: أدري الحين تقول هذه &nbsp;ما وراه إلا المشاكل صح ..

    خليفة وهو مستغرب: ليش يعني ..

    سيف: لا بس انت ما تعرفني زين وجيه و ترمسني ما قلت في خاطرك جيه ..

    خليفة: بلا قلتها ..

    سيف: أنا يا خليفة بس أبي أتعرف عليك و من صوتك ريال تعرف الصح ..

    خليفة: الحمد الله ..

    سيف: خليفة ما يصير نرمس بالتلفون طول حياتنا ..

    خليفة: المطلوب &nbsp;من هذه الرمسه ..

    سيف: يعني أبي أشوفك ..

    خليفة وهو يضحك: حليلي جني أنا البنت و انت الريال ..

    سيف وهو يضحك: لا قلت بدال ما نرمس في التلفون كل شوي داق حقك أكيد مأذنك فقلت خلني أشوفك و أرمسك فيس تو فيس مثل ما يقولون شو رايك ..

    خليفة: الصراحة أنا ما عندي مانع وين أشوفك ..

    سيف: بليل الساعة 10 أوكيه ..

    خليفة: ليش مب العصر ولا الصبح ..

    سيف: لا العصر بودي أخواني يتمشون ويلعبون و بشتري حقهم هدايا ..

    خليفة &nbsp;مستغرب: لاه زين عيل عادي خلني أشوفك العصر و منها بتعرف على إخوانك هم صغاريه صح

    سيف: هيه يمكن الوالدة تسير ويايه ما أقدر .. زين ما تحب بليل خلها الصبح ..

    خليفة: خلاص الصبح أحلا ..

    سيف: شكلك مب واثق مني يا خليفة ..

    خليفة: لا مو شرط ثقة مب ثقة بس أنا إنسان ما أحب أتأخر بليل ..

    سيف: خلاص إلي يعجبك قولي متى تبيني أشوفك ..

    خليفة: باجر الساعة 10 ونص أوكيه جيه ..

    سيف وهو مستانس: خلاص أنا موافق .. عيل نلتقي باجر أخليك عيل احينه .. و يصكر عن خليفة يالي كان مستغرب من تصرفه سيف وحماسه للموضوع .. أما سيف كان شي حلو بنسبالة و حتى رد البيت بسرعة عسب لا يتأخر باجر عن &nbsp;الريال..

    سيف داخل ويغني " تدل حبيبي و تامر أمر أروح الصحاري وروح القمر .. "

    أم سيف وهي مستغربه من ولدها هذه صوته ويغني بعد وتطالع ساعتها : عيل اليوم بسرعة ياي ..
    سيف أول ما شاف أمه سكت و انسدت نفسه : يعني أروح أطلع ماي يعني ..

    أم سيف وبسعادة : لا بس مو من عوايدك ..

    سيف: لا تخافين بس اليوم .. وسار عنها تمت أم سيف تبتسم و تدعي ربها أنه يتم جيه دوم ..

    سيف وهو راد لأمه : أقول أمايا باجر كشخي ريموه مريوم وسعودي عسب بوديهم كشته باجر ..

    أم سيف: إن شاء الله بغيت شي ثاني ..

    سيف: قعديني &nbsp;9 ونص ..

    أم سيف وبحماس: ليش ..

    سيف: ولا شي بس إنتي قعديني .. و سار غرفته و أم سيف مستانسه إنه ولدها تغير مرة وحد .. &nbsp;
    نهاية الجزء الثاني



    و السمووووووحــــــــه ..

    ســـــــــوالم ..</font>

  8. #8
    عضو جديد الصورة الرمزية مي دبي
    تاريخ التسجيل
    Apr 2004
    المشاركات
    40
    قوة التمثيل
    245
    <font color='#000000'>مرحباااااا

    شحالك اخوي راعي 7 .. يا اخي انته من وين تيييب هالقصص عجيييبة ...
    القصة عجيييبة وماعليها كلام .....

    نتريا الجزء الثالث .. لا تبطي عليناااااا ...

    <IMG src="http://oasis.bindubai.com/emoticons/cool.gif" border=0><IMG src="http://oasis.bindubai.com/emoticons/cool.gif" border=0>

    مي دبي</font>

  9. #9
    عضو فعال الصورة الرمزية راع7ي
    تاريخ التسجيل
    Sep 2003
    المشاركات
    394
    قوة التمثيل
    270
    هلا والله بأختيه مي دبي علوووومج أختيه عساج طيبه

    أخوج راعي7 الحمد الله بخير وعافيه .. &nbsp;دام شاف ردج و مشكورة عليه ..
    من وين أيب قصصي أألفهـــــــا بعد من وين أييبها من مخزوني الفكري من عقلي ..

    و إن شاء الله مب متأخر عليـــــــكم .. و أهم شي إن القصه عيبتج ..

    و ســــــوالـــــــــــــم ..

  10. #10
    مـراقــب الصورة الرمزية مزن هتان
    تاريخ التسجيل
    Apr 2004
    المشاركات
    5,776
    مزاجي
    Buzzed
    قوة التمثيل
    531
    هلاااااااااااااا

    مشكور عالجزء

    ننتظر الجزء اللي عقبه
    أَيُها الراحِلُ عُذراً في
    شُكاتي، فـ إلى طَيْفُكَ أنْاتُ عِتَاب ...
    T

  11. #11
    عضو جديد الصورة الرمزية علايه
    تاريخ التسجيل
    Feb 2004
    المشاركات
    46
    قوة التمثيل
    248
    <font color='#000000'>مرحبا أخوي ...
    &nbsp; &nbsp; &nbsp; &nbsp;الصراحه تحمست للقصة أريد
    &nbsp; &nbsp; &nbsp; &nbsp;اعرف شو سالفت سيف ...&#33;&#33;؟

    لا تتحير علينا راعـ7ي <img src="http://oasis.bindubai.com/emoticons/smile.gif" border="0" valign="absmiddle" alt=':)'>

    الله يحفظك ..</font>

  12. #12
    عضو فعال الصورة الرمزية راع7ي
    تاريخ التسجيل
    Sep 2003
    المشاركات
    394
    قوة التمثيل
    270
    أهلين أختيه مزن

    مشكووورة على المرووووور ..


    مرحبتين أختيه علايه مشكووورة على المرووور ..

    إن شاء الله جريــــــب بتعرفيـــــــن سالف سيــــــف ..

    ومب متأخر عليــــــكم ..

  13. #13
    عضو جديد الصورة الرمزية مي دبي
    تاريخ التسجيل
    Apr 2004
    المشاركات
    40
    قوة التمثيل
    245
    نترياااااك أخوي راع7ي ولا تبطي علينااااا ...




    مي دبي
    <P align=center><BR></P><BR>
    <TABLE style="FILTER: dropshadow(color=&#39;#ff6699&#39;)">
    <TBODY></TBODY></TABLE><BR>
    <TABLE style="FILTER: shadow(color=&#39;#ff6699&#39;)" align=center><IMG alt="مي دبي" hspace=0 src="http://alamuae.org/upload/alam8/MaI-dxd.jpg" align=middle border=0>
    <TBODY></TBODY></TABLE>

  14. #14
    عضو فعال الصورة الرمزية راع7ي
    تاريخ التسجيل
    Sep 2003
    المشاركات
    394
    قوة التمثيل
    270
    <font color='#000080'>هلا فيـــــــج إختيه مي دبي وهذه هو الجــــــزء ..





    الجــــــــــزء الثـــــــــــالث ..



    أم سيف سارت غرفه بنتها فـــــــــاطمة وهي مستانسه تحس إن الدنيا حلوه ..

    فاطمة: هلا أمايه بلاج عيل مستانسه ..

    أم سيف وهي تقعد على شبريه بنتها فاطمة : ا بتصدقين يا فاطمة ...

    أم سيف: ما بصدق شو يا أمايه ..

    أم سيف: سيف خوج في البيت ..

    فاطمة: وعلى بالي شي بعد خمس دقايق بيظهر و بتشوفين ..

    أم سيف: لا يا فاطمة قالي أقعده من الرقاد الساعة 9 الصبح هذه يعني احينه بسير و بيرقد ..

    فاطمة وهي مب مصدقة : سواف إنتي متأكدة &#33;&#33;&#33;&#33;&#33;&#33;

    أم سيف: شفتي حتى إنتي مب مصدقة .. وشوي جان يسمعون صوت باب ينفتح برا الصالة ..

    فاطمة رافعه حاجب: ما قلت لج بي ظهر احينه .. برا في الصالة سعود كان يحاتي الطلعة باجر ما رقد و ما رقد خواته وياه ..

    ريم: تعدوني " دلع سعود " وين بتسير هذه أصلن سواف ما بي ودينا كل كلام بس ..
    مريم: لا هو قال لنا باجر بودينا أكيد ..

    ريم مب مصدقه : كل يوم يقول هذه الرمسه ..

    سعود: أنا بسير له تونيه سمعت صوته .. وسار سعود يدق على باب سيف يالي كان يرمس ويا محمد ربيعه وشوي جان يسمع بابه يندق ..

    سيف: حمود بدق حقك عقب خمس دقايق أوجيييج ..

    محمد: خلاص عيل فمان الله .. و صكر عن ربيعة وسار يفتح الباب ..

    سيف وهو يفتح الباب: سعودي بلاك ..

    سعود ببراءة : انت باجر بتودينا نشتري هديه ..

    سيف وهو يقعد على رجبته عسب يساوي طول سعود: هيه باجر العصر بوديك والله &nbsp;بوديك ..

    سعود: ريم تقول انك ما بتودينا ..

    سيف: وينها ريموه .. &nbsp;

    سعود وهو يأشر: هناك في غرفتها ..

    سيف: طوف جدامي .. &nbsp;وجان يسر غرفه خواته ..

    سيف: ريموه إنتي باجر عقابًا لج ما بتسيرين ويانا لو تتجلبين جدامي تسمعين ..

    ريم: براي مب سايره أصلن باجر انت ما بتوديهم ..

    سيف: زين من شوف منوه يالي مب سايره يا الصياحه .. ويطلع عنها عسب يقهرها وهي طبعا من بعد هذه الكلام يالي قاله تأكدت أنه بوديهم وتمت تحاتي ما رقدت الليل حتى ..

    أم سيف: شفتي رد يرقد هذه سعود يالي موعيه ..

    فاطمة: شو عندهم ..

    أم سيف: ما دري والله

    فاطمة : إنتي ما تخافين سعود يطلع على سواف ؟؟

    أم سيف وهي تحاتي : والله خوفاتي يا فاطمة .. بس هذه أخوهم وين بسيرون عنه ..

    فاطمة: خلاص عيل الحين يا أم فاطمة بترقدين عندي في غرفتي ..

    أم سيف: لا حبيبتي أنا أم سيف و إنتي صحيح بنتي بس الأم ولا الأبو يتسمون على ولدهم ..

    فاطمة: الحين شو قلتي بترقدين عنديه ..

    أم سيف: لا بسير غرفتيه ما أقدر استغنى عنها .. تصبحين على خير

    فاطمة: و إنتي من أهل الخير .. على كيفج .. و باست أمها وعقب سارت غرفتها عسب ترقد بس هيه من حطت راسها على المخدة ما ياها رقاد تذكرت الأيام يالي قضتها ويا أبو سيف و استغربت من نفسها شو ذكرها فيه من بعد هذه السنين الطويلة .. يمكن ضحكه سيف يالي شافتها على ويهه ذكرتها بريلها يالي كان طبق الأصل من سيف ومريم .. &nbsp;تذكرت يوم كان يكلمها بعيد عن أهلها وهي خايفة لا حد يشوفهم وتذكرت يوم خطوبتها منه جيف كانت بتموت إلا تشوفه بس أبوها مصر ما يشوفها حتى في ملجتها ما رضا أبوها تشوفه إلا ليله العرس و في لليله العرس كانت عرس زمان و هي كانت صغيرة حتى دراسة ما كملتها كانت ثالث عدادي &nbsp;.. ابتسمت أم سيف وهي تذكر يوم يابت فاطمة كيف كان أبو سيف مستانس لأنه صار أبو ولكن غير يوم يابت سيف حست انه فرح أكثر من ما فرح يوم يابت فاطمة &nbsp;لأنه ولد و بشيل اسمه يوم بيكبر .. تذكرت سيف يوم كان صغير كيف كان ويا أبوه دوم حتى يوم يبا يسير الشغل كان يبا يخلي مدرسته بس عسب يسير ويا أبوه ..

    أبو سيف: بس حبيبي لا تصيح الأسبوع الياي بوديك البر .. و بعلمك الصقاره

    أم سيف: أي بر و صقاره يا راشد الولد صغير وبعده على هذه السوالف ..

    سيف وهو يمسح دموعه: لا أميه بسير البر أنا مب صغير أنا ريال صح أبويه ..

    أبو سيف: هيه نعم ولدي ريال وبشيل البيت من بعد عين &nbsp;..

    أم سيف ما عيبتها رمسه أبو سيف: الله لا يخلينا منك يا بو سيف &nbsp;يومنا قبل يومك ..

    أبو سيف: الموت حق يا أم سيف ..

    سيف: أمايا يا الله بسير المدرسة نادي فطوم .. &nbsp;
    &nbsp;
    أبو سيف: وابوي عليك أنا تقول لأمك تنادي أختك سير انت ونادها اربع .. ربع سيف ينادي أخته من بعد ما استحى من الرمسه يالي قطها &nbsp;..

    أم سيف: فديته والله .. الله يخليكم ..

    أبو سيف: الله يخليكم ليه يا أم سيف من بعد عينكم أنا مالية دنيا ..

    أم سيف: لا تقول هذه الرمسه يا أبو سيف غير الموضوع ..

    سيف وهو يسحب فاطمة يالي كانت دبه و كانت تاكل : أمايا شو في بنتج قاعدة تزط ..

    أبو سيف: أنا هذه الولد ما دري من وين ايب هذه الرمسه عيب يا بوك .. و ودعتهم أم سيف بضحكه وبسمة وسيف يودع أمه بأيده ويا أخته فاطمة وأبو سيف مستانس عليهم .. نشت أم سيف من ذكرياتها على أذان الفجر يالي استغربت هيه من نفسها مر الوقت بسرعة وهي تتذكر هذه الأيام الحلوة يالي مالها رجعة من بعد عين الغالي سارت " عزكم الله " الحمام و تمسحت وعقب صلت وقعدت بنتها فاطمة وريم ومريم عسب يصلون الفجر ودقت على سيف الباب بس ما عطاها جواب .. وعقب سارت غرفتها وقرت شويه من آيات القرآن الكريم وعقب حطت راسها على المخدة رقدت بسكون أول ليله ترقد فيها بسكون &nbsp;وبراحه بال .. الصبح الساعة 10 وربع سيف يزاعج على أمه ..

    سيف معصب قاعد من رقاد لابس وزار و فانيله &nbsp;: أنا ما قلت لج توعيني الساعة تسع ونص ..

    أم سيف وهي معصبه : بلاك انت جذيه تكلم أمك ..

    سيف: عيل جيف تبيني أرمس و أنا متأخر على الموعد ..

    أم سيف: أنا قعدتك بس انت ما عطيتني جواب و بعدين إلي يبي الصلاة ما تفوته تسمع ..

    سيف وهو يربع أيده : جيف يعني ؟؟؟

    أم سيف: جان ضبطت موبايلك على الساعة تسع .. ولا شو فايدته بس ترمس فيه " تنغزه "

    سيف وهو يركب فوق حس إنه ما من وراها فايده هذه المناحة : &nbsp;سيري عني إنتي الثانية بعد ..

    أم سيف تنفست بعمق و غمضت عينها و كانت تبي تصيح بس فاطمة ما خلتها كانت توها يايه من المطبخ هي و ميري .. سيف تسبح وتلبس بسرعة بسرعة وعقب ظهر ويا محمد ربيعه و سارو المول عسب يا لاقون خليفة ..

    محمد: سواف جيف احينه بتعرف الريال هاه ..

    سيف: والله ما عرف بس انت تعال خلنا نمشي .. و سارو و قعدو في واحد من الكوفهات يشربون كابتشينو ..

    محمد: سواف أنا بسير أتمشى وبيك ..

    سيف: وين وين بتخليني بروحي لا ما تسير تقعد ..

    محمد يضحك: لا تخاف الريال ما بياكلك .. ولا مواعد وحده من البنيات ..

    سيف ويأشر على ويهه: هذه شكل بنيات بالله عليك أقعد بس اقعد ..

    محمد: لا حبيبي خلني أسير أشوف شغلي شويه أترزق .. وسار عن سيف يالي كان يطالع يمين ويسار وشوي جان يتصل به خليفة ..

    سيف: ها وينك يا أخي

    خليفة: هذه انت يالي جداميه ..

    سيف: جدامك .. وينك انت &nbsp;

    خليفة: صد ورا و بتشوفنيه مقابيلك .. سيف يوم أطالع ورا شاف ريال لابس نظاره سوده ومرجع ظهره على ورا وشكله ريال كبير ما مال خرابيط و يرمس بالتلفون و يأشر حق سيف ..

    سيف وهو يبتسم: هذه انت يعني ..

    خليفة: ليش يعني مب مصدق تعال و شوف .. نش سيف وسار لخليفة وخليفة أول ما شاف سيف عجبه شكله صغير ومرتب وريحه عطرة شاله البقعة جنه مواعد بنت مب ريال نش خليفة يوايه سيف ..

    خليفة: مرحبا الساع أقرب ..

    سيف: ملاين ولا يسدن .. تسلم يا خليفة .. ويقعد ..

    خليفة: ها شوف و شفتنيه شتبي بعد .. &nbsp;

    سيف: خليفة انت ما تبينا نكون ربع يعني ربع عادي والله ما بسويلك شي بس أنا من رمستك حسيت براحه اتجاهك والله ما في غير هذه لا يسير فكرك لبعيد .. و انت من هيأتك ريال كبير تفهم في الدنيا ..

    خليفة وهو هادي : سيف جم عمرك انت ؟؟

    سيف: أنا عمري 18 سنة ..

    خليفة: أنا عمري 36 سنه يعني في فرق كبير بيني وبينك من ناحية التفكير وكل شي .. &nbsp;

    سيف ما استغرب: خليفة أنا ما يهمني فرق السن في ناس كبيرة في السن بس عقولهم صغير وفي ناس بعدهم عمرهم ما عدا الخمس تعش وعقلهم يوزن بلد على قولتهم ..

    خليفة: و انت من أي نوع يا سيف ..

    سيف وهو يبتسم: أنا أعوذ بالله من كلمه أنا من النوع الثاني ولا تقول إني خقاق ولا شي بس أنا أشوف عمري جيه &nbsp;..

    خليفة وهو مقتنع من الرمسه : من رمستك الصراحة اقدر أخذ وعطي معاك بالرمسه ..

    سيف: يعني أقدر أقول انك راضي عليه ..

    خليفة ويطلع أسنانه وتبين حلاته : خلاص مثل ما تبي الصراحة دشيت خاطري يا سيف و جرأتك و أسلوبك في الكلام وكل شي فيك &nbsp;عيبني ..

    سيف وهو يمسك فروخته: تسلم يا خليفة لا تمدحني زود أخق بعدين .. و قعدو الشبيبة يرمسون و يسولفون عن سوالف الدنيا وخليفة مستانس على سيف و من رمسته وياه حس انه ريال عاقل و مثل ما قال إنه ريال عقله يوزن بلد .. وعلى الغدا مثل العادة سيف مايا و الكل كان عند أم سيف عسب يتغدون..

    خالد: خالوه نحن ما نبي بسنا والله زدت عشرة كيلو ..

    حمده: اسمع .. &nbsp;يا ويهك أونه زاد عشره كيلو ..

    أم سيف وهي تصب الجاي لهم: &nbsp;لا تضاربون انت كله وياها تضاربون ..

    خالد يطالع الصالة: خالوه والله بيتكم من عقب الصيانة صاير شي الصراحة كل شي فيه شي ..

    أم سيف: هيه هذه اختيار فاطمة في الديكور ..

    خالد وهو يبتسم: عاشت بنت العم والله اختيار ولا أحلا ..

    فاطمة: تسلم يا خالد ما تقصر ..

    حمده: أتصدق عمرها تراها .. ها يجذب عليج تراه ..

    خالد: زين يا حمدوه بتشوفين يا الدبه .. &nbsp;

    سعيد ولد عمهم عبدالله: انتو إيه ما فضحتونا هاه &nbsp;قوم خلنا نسير عند الرياييل ..

    عبيد: والله فشيله .. الكل ضحك و عقب سارت أم سيف عند بنات عمها يالي هم أم عبدالله و أختها أم خالد و أم عبيد .. كل أربعه أيون عندهم و يرمسون و يسولفون و كل يمعه يسيرون بيتهم العود تجتع كل العيله هناك .. بس سيف ما يحظر هذه الاجتماعات كله مطيح عند المصبنة بس اليوم كان معزوم عند خليفة وعقب رد الساعة 3 شاف أهله بعدهم في البيت و حس انه ما بيسلم من رمستهم خواله وعمامة ..
    سعود كان يلعب ويا عيال عمه برا في الحوي كان الجو حلو مغيم وهو عيبته السالفة يبا يغلس عليهم شوي وسار عندهم تحت الشجرة ..

    سيف وبصوت عالي: يا السبلان شو قاعدين تسون ..

    سلطان: خيبه خرعتنا بلاك انت ..

    سيف: والله كيفي بتنا ..

    حميد: سيف انت وين رحت يسالون عنك ..

    سيف: برايهم خل يسالون عنيه أحسن ..

    سلطان: وين كنت ..

    سيف: مالك شغل انت .. سعود أول ما شاف سيف يا وربع و لزق فيه &nbsp;..

    سيف: بلاك انت والله بوديك ..

    سعود: الحين العصر لاه ..

    سيف: هيه تلبس و تزهب وقول حق ريم ومريم بعد ..

    سعود: انت قلت ريم ما بتسير ويانا ..

    سيف: هيه والله لا تقول حقها يوم بتقول وين بتسيرون قول لها إنه سيف ما بوديها زين حبيبي .. سعود وهز راسه ..

    سلطان: وين بتسيرون ..

    سيف: كشته بتسير ويانا حميد

    سلطان: أنا أنا بسير ..

    سيف: لا ممنوع اصطحاب الكبار .. &nbsp;

    سلطان : لا أنا صغير ..

    سيف: انت اقعد ويا ريم تلعبون ويا بعض ..

    سلطان وشي و بصيح : لا أنا ما أحب البنات بسير وياكم ..

    سيف: بفكر عقب برد عليك زين بباي ..
    سلطان تم معصب إلا يسير وياهم &nbsp;هو أكبر عن سعود بسنه ليش ما يوديه .. أما حميد وسعود مستانسين بسيرون كشته ويا سيف ويلعبون على الريحات .. &nbsp;

    سيف كان ما يبي احد يشوفه داخل من الباب يالي ورا لأنه تحت الدري بمكانه يركب و محد يشوفه صلات بيتهم بعيده عن الدري و من جذي محد يشوفه .. &nbsp;المهم سار سيف فتح الباب ومشى شوي شوي بس بطريقه محد يكشفه انه يبي يتهرب منهم .. شافته بنت عمته عنود وهو يدخل بس حست انه يتهرب فحبت إنها تسكت أحسن من لا تيب حقه المشاكل .. دخل سعود هو وعيال عمومته ..

    سعود: أمايه أمايه أمايه شو سلطان يبا يضربني ..

    أم سعيد وتفتن عليه : وينه سلطان تعال بشوف ..

    سلطان: جذاب والله جذاب أنا مابا أضربه ..

    سعود وهو واقف حذال أمه: أمايا يبا يضربني

    أم سيف: ليش يبا يضربك ..

    سعود: سواف قال انه بوديني اشتري هديه وقال له سيف ما بوديك و الحين يبا يضربني ..

    أم سيف وهي مستغربه : و وينه سيف الحين .. متى قالك هذه الكلام ..

    سعود: سواف في غرفته راقد ..

    أم سيف وهي مستغربه: راقد ..

    أم خالد: قومي قعديه يا أم سيف ..

    أم سيف وهي خايفه: بسير أشوف ولديه هو طلع من الصبح وما شفته يوم وصل .. وسارت طلعت فوق ودقت عليه باب غرفته بس ما شي جواب قعدت في الصالة وعقب 10 دقايق ردت أدق عليه الباب وعقب بطل لها الباب ..

    سيف بنفس خايسه: نعم بغيتي شي ..

    أم سيف: سيف متى ييت

    سيف: تونيه ياي ما كملت ساعة أمايه أنا ما ليه خلق للمفاتن أنا أبا أرقد ممكن يعني ..

    أم سيف: والله ما تستحي يا سيف سودت ويهي جدام أهلك هذولا عمامك و خوالك تحت تبا ني أجابل الرياييل يا ولد راشد..

    سيف وبدا يعصب:أمايه أنا تعبان وأبا أرقد ليش من البارح ما قلتي لي إنهم بيون ها الحين يايه تذكريني.
    &nbsp;
    أم سيف و بصرامة: سيف ألبس كندورتك و انزل تحت سلم عليهم وجابلهم بسرعة ولا لا تشوف مني شي ما يسرك .. فضحتي من بين أهلك فضحتني ..

    وسارت عنه وكانت الدموع في عينها ونبرة صوتها تبين إنها فيها الصيحة بس سيف ما لاحظ سارت أم سيف غرفتها قعدت تصيح وكان صياحها غير هذه المرة حست بروحها تظهر من جسمها من كثر الصياح .. أما سيف فكان معصب ما يدري ليش يوم تكلمه أمه يعصب يحس إنها هي سبب موت أبوه يالي كان يحبه وحياته والعيون يالي يشوف فيها و الضوء يالي ينور له طريقة .. قاعد على شبريته الخضرا ومعصب ما يبا يسير بس غصبن عنه نش ولبس كندورته وتعصم وتعطر ونزل تحت .. منزل راسه وسلم على حريم عماته و خالاته مب متعود يوقف في وسط حريم وبنات .. الحريم مستغربات منه شكله مب الكلام يالي يسمعون عنه هادي و حليو طالع على أبوه ومحترم منزل راسه .. و البنيات كل وحد تطالع الثانية و مستغربات منه &nbsp;فاطمة استانست وايد على الأقل بيجابل الرياييل .. &nbsp;أما سيف على طول طلع للميلس وفيه الكل مستغرب سيف بن راشد بن سلطان ياي يسلم عليهم زين يوم نزل لمستواهم و سلم عليهم ..

    سيف: السلام عليكم ورحمه الله وبركاته ..

    الكل : وعليكم السلام ورحمه الله وبركاته ..
    سيف وايه كل يالي في الميلس وقعد حذال خالد ولد عمه لأنه وياه من يوم ما كانو صغار لين ما خلص خالد ثانوية عامة وعقب سيف رابع شلته الخايسه يالي في المدرسة ..

    خالد: شحالك سيف ..

    سيف بدون نفس معصب : بخير حمد الله ..

    خالد: خيبة بلاك ما سوينا بك شي ..
    &nbsp;
    سف: خالد أسكت عني لا أدفنك احينه ..
    &nbsp;
    خالد: ول ول ول ول زين خلنا ساكتين.. بس الله يخليك خلك عادي شوف عمامي و خوالي يا ولد خالوه يطالعونك ما أبيهم يخذون عنك فكرة زود ما هم ما خذين .. &nbsp;

    " خالد ولد عم سيف وولد خالته في نفس الوقت " .. سيف هز راسه و عقب خمس دقايق إستفيج حق خالد وقعد يكلمه .. و العصر ظهر سيف ويا خواته وسعود أخوه يمشيهم في البلاد وأول كان ما يبا يودي ريم شافها مسكينة قاعدة بروحها من بعد ما روحو عيال عمه وخاله عنها بإصرار من مريم وسعود خذوها وكل ساعة يذكرها إنه لو لا سعود مريم لا ما ركبت وياهم وهي ما تقدر تتكلم عن ينزلها في نص الطريق " يسويها "

    نهاية الجزء الثالث


    سوااااااالــــــــــــــم </font>

  15. #15
    عضو جديد الصورة الرمزية مي دبي
    تاريخ التسجيل
    Apr 2004
    المشاركات
    40
    قوة التمثيل
    245
    <font color='#3BB9FF'>رووووووووعة تسلم اخوي راعي 7 عالجزء

    الله يهدي سيفوووو ليش يعامل امه جذيه .. <IMG src="http://oasis.bindubai.com/emoticons/mad.gif" border=0><IMG src="http://oasis.bindubai.com/emoticons/mad.gif" border=0>

    بصراااحة قصة ما عليهاا كلام ....<IMG src="http://oasis.bindubai.com/emoticons/shutup.gif" border=0>

    ونتريا الجزء الرابع ......<IMG src="http://oasis.bindubai.com/emoticons/laugh.gif" border=0><IMG src="http://oasis.bindubai.com/emoticons/laugh.gif" border=0>

    مي دبي




    مي دبي</font>
    <P align=center><BR></P><BR>
    <TABLE style="FILTER: dropshadow(color=&#39;#ff6699&#39;)">
    <TBODY></TBODY></TABLE><BR>
    <TABLE style="FILTER: shadow(color=&#39;#ff6699&#39;)" align=center><IMG alt="مي دبي" hspace=0 src="http://alamuae.org/upload/alam8/MaI-dxd.jpg" align=middle border=0>
    <TBODY></TBODY></TABLE>

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •