دموع الفـــــــــــــــــرح ..

**روح الحب** · 17-01-05 ||, 10:52 PM

السلام عليكم ...
وشحالك يا الراعي ... وربك إلا بخير  
أفا تنزل شي يديد ومحد يقولنا
كله من الإمتحانات إلي ما تخلي الواحد يتفجج
بس ماعليه إن شاء الله بنتابعها وبنرد عليك وبنحشرك بعد مثل قبل >> أسولف
والسموحة
أختك
روح الحب

**راع7ي** · 18-01-05 ||, 02:36 AM

هــــــــلا والله أختيه مي ..

الحمد الله الحمد الله إنها عيبتج .. ويسلم بحـــــــالج الغالية
سواف الله يهدي والله أسميــــــه ولد مأذي أمه واااايـــــــــد بعد .. هههههه
مشكوووورة على الرد الحلووووو .. مرووورج أسعدني ..

مرحبـــــــــا الســــــــاع والله بأختيه روح الحب ..

أخوج الحمد الله بخير وعافيه دامج راده على القصة ..
شفتي عاده لو إنج تحدرين على الواحات جان بتعرفين  إنيه منزل قصة..
بس هذه الامتحانات ماتخلي حد أعرف أنا .. و أفا عليج سوي إلي تبينه
وتعقيبكم وحشرتكم تسعدني وتفرحني .. ومشكووورة على الرد الطيب ..

و السمووووووحه منكم ..

**بن دبي** · 18-01-05 ||, 08:58 AM

يعني صراحة اخي راعي السبع قصة حلوة كتير

بس ليش هيك انتو بتحبو تعذبونا ......... يا اخي حطو القصة كاملة
و الله العظيم عذاب بتخلونا نتعلق بالقصة و بتتركونا و الله حرااااااااااااااااااااااا اااااااااااااااااام

بس الصراحة قصة حلوة و بدي اعرف شو تتمتها و الا بزعل.... و اصلا انا خلص قررت هاجر من يأسي من عدم تتمة القصص

خلص لا تحاولو معي بدي هاااااااااااااااااااااااا اااااجر على هنولولو
و سامحنا اخ راعي السبع

**علايه** · 18-01-05 ||, 05:06 PM

مرحب أخويه.........
            مشكور ع الجزء اليديد واتمنى
           الجزء الياي يكون أطول <img src="http://oasis.bindubai.com/emoticons/smile.gif" border="0" valign="absmiddle" alt=':)'>
           مافيه صبر أريد اعرف سواف
            شو سالفته !!؟

وتسلم يالغالي.....

**راع7ي** · 18-01-05 ||, 07:23 PM

هلا والله بأختيه المغتربه .. مشكووورة على مرووورج الطيب

لا أفا عليج لا تزعلين ولا شي ونحن ما نعذب الغاليه بس نبا نشوف ردووودكم عسب نتحفز ونزل لكم الجزء .. إن شاء الله بنزل لج القصة أول بأول وتابعيها صدقيني ما بتحسين بالملل .. ولا تزعلين إن شاء الله بنزلها لج ولا تهاجرين بعد قعدي في بيتكم ..

مسموووحه أختيه

مرحبـــــــا باجي أختيه علايه ..

العفو أختيه العفو .. بديـــــنا الجزء قصير والجزء و طويل الله كريم ..
إن شاء الله بتعرفين شو سالفة سيف لا تستعيلين وتاكلين قرصج ني ..
و مشكووورة على التعقيب أختيه علايه ,,

و السموووووحه ..

**راع7ي** · 20-01-05 ||, 12:02 AM

الجزء الرابــــــع

خليفة: زين والله شخبار الأهل ..
سيف: تمام الحمد الله ماشي الحال ومن صوبك ..
خليفة: من صوبي الحمد الله ها انت وين ..
سيف: في مزرعة واحد من الربعة ..
خليفة مستغرب: شو سوي يا سيف الحين بليل ..
سيف: عادي يا أخي لمه ربع و لعب وياهم ..
خليفة: صراحة وفي هذه الوقت ما أنصح انك تظهر من البيت  ..
سيف: شسوي ملان اطلع ويا ربعي تسليه ..
خليفة: ظهرت ويا إخوانك اليوم ..
سيف: هيه ويا ريت ما ظويت وياهم طلعت روحي  ..
خليفة وهو يبتسم: ليش ؟؟
سيف: سعود أخويه يبا هذا ما يبا ذاك و لعوزني يبا يسير المول أونه ..
خليفة: فديته .. سو كل يالي يباه هذه أخوك الصغير ..
سيف: و الله مرتاح انت مب أنا الله يعيني على هذولا الأخوان ..
خليفة وإحساسه غير: لا تقول جيه يا سيف احمد ربك على هذه النعمة .. لو أنا والله بستانس على يهال في بيتنا .. عيال أخويه ولا عيال الرضيعة ما أيون إلا في الشهر مرة والبيت مول مب حلو ..
سيف: الحمد الله على كل شي .. أقول بخليك عيل الحين بدق حقك خلاف ..
خليفة: أوكيه خلاص عيل تصبح على خير .. و صكر عنه وعقب قعد سيف ويا ربعة و فيصل ربيعة ما خلاه إلا يشرب من يالي عندهم وسيف أول ما رضا  و عقب فكر إنه الشباب يا خذون عنه فكرة ويقول عنه إنه هب ريال " هذه هي مشكلتنا يا الشباب " .. محمد مب عايبنه هذه يالي يشربونه  يطلع يقعد يرمس بالتلفون برا .. و تمر الأيام وتخلص الأجازة و يرد الروتين يالي تعودو عليه عيال راشد بن سلطان ..  سعود ملعوز في أمه يبا يلعب ولا يبا يشوف تلفزيون أما ريم ومريم يضاربون وفاطمة ضايعه من بينهم كل ما قالت بذاكر لهذه تقول الثانية ذاكري حقي وهي طبعا بتموت منهن وريم تبا تغلب مريم في الدرجات لأنها تبا سيف يشتري حقها هديه في آخر السنة " تحلم حليلها "  أما سيف فرد يقعد فوق أيدار بيتهم يترصد ويشوف الناس و سوالف وايد تصير في فريجهم وخصوصا بنت يرانهم خوله ..
أم سيف تطالع ولدها وهو قاعد على أيدا: سيف تعال تعشا وبسك من المطالع الناس عيب عليك ..
سيف سمع أمه بس سوالها طاف ..
أم سيف و يهب عليها هوا خفيف وبارد : سيف عيب عليك شو بقولو عنا الناس ..
سيف و باستفزاز: ليش تخافين على نفسج ..
أم سيف: هيه نعم أخاف على نفسي على هذه البيت يالي خلاه أبوك بين أيدينا يوم راعي البيت ما مستهم منوه بيستهم يوم ما شي رياييل في هذه البيت يديرونه خلنا نحن الحريم نديره وسارت عنها لأن سعود قاعد يصيح مضارب ويا ريم .. سيف هذه الكلام ياته سهام في صدرة عيزت أمه من تجرح فيه عسب ضميره يصحا بس الظاهر انعدم الضمير في قلب سيف ..  و تمر الأيام وتسوء حاله الدراسية لسيف يالي كان مب مهتم .. على الكورنيش محمد كان يصيح وسيف مب عارف سبب صياح محمد و ليش هذه حالته ..
سيف: محمد ليش بلاك خبرني ..
محمد: ما أقدر يا سيف ما قدر يا ريتني أقدر أخبرك
سيف: أفهم إنها مشكلة عائلية ..
محمد: تقدر تقول جيه ..  
سيف: على راحتك يا حمود .. عيل أنا بسير السيارة بيب تلفوني بيك .. سار سيف لسيارته و فيه سيارة شباب واقفة حذال سيارة محمد ..
خليفة: هلا والله مرحبا كبار بسيف ..
سيف وهو عارف هذه الصوت ويوم أطالعه : هلا والله بخليفة مرحبابك ..
خليفة: تسلم ها شو تسوي هنيه ..  
سيف: ولا شي بس ياي ويا ربيعي ..
خليفة: خلاص عيل بني وياكم عادي ..
سيف: أفا عليك تفضل .. نزل خليفة ويا ربيعة هزاع و سارو عند محمد يالي يوم شاف سيف وياه عرب مسح دموعه على طول ..
هزاع: السلام عليكم ورحمه الله وبركاته ..
محمد: وعليكم السلام " و خاشمه " ..
سيف: حمود أعرفك خليفة وربيعه هزاع ..
محمد: هلا والله .. و قعدو سوالف ..
خليفة: ها سواف ما تم شي على الامتحانات شو مسوي ..
سيف يطالع محمد: والله ما بجذب عليك يا خليفة أنا في الدراسة فاشل ..
هزاع: أفــــــــأ ليش ما هجيتها منك ..
سيف: أنا مب فالح في الدراسة يمكن فالح بأشياء ثاني كل إنسان يقدر يعطي بشي بس ما يقدر يعطي بأشياء ثانية ولا انت شو رايك يا خليفة ..
خليفة مقتنع وهو يهز راسه : هيه بس هذه مب نهاية الدنيا يا سيف انت تقول أنا ما أحب هذه المادة طيب ليش ما تحفز عمرك تفاءلوا بالخير تجدوه يا سيف .. أنا كنت ما أحب الدراسة اسأل هزاع جيف نجحت بدراسة و المثابرة  حطوا الهدف جدامكم صحيح صعب وصوله بس والله بتستانس يوم بتوصله..  وحلو يوم تكون عندك شهادة ..
محمد: أنا وياك يا خليفة بس في ناس ظروفها ما تسمح إلها ..
خليفة : محمد الظروف غير انت ريال وتقدر تمشي هذه الظروف .. و بعدين أحيانًا هذه الظروف يالي تخلي الإنسان يقهرها ويكون إنسان ناجح في المجتع شوف انت التجار أصحاب الشركات الجبيرة في الدولة تتحراهم أوصلوا لهذه المرتبة بالسهولة والله كدو و جتهدو لين رفعو أسم شركتهم لفوق وانتو شباب صغار تقدرون تعطون أكثر من طاقتكم بس شوي الدلع عندكم ..
سيف وهو يفكر: أي دلع انت تتحرا حياتنا جيه ما أنواجه العقبات فيها والله يا خليفة أدري مشاكلنا بنسبالك شي صغير بس بنسبالنا والله شي جبير و فوق طاقتنا .. بيت بكبره أتحمله أنا ريال عمر 18سنه والله من يوم ما كنت صغير وأنا أفكر بهذه الشي .. ومحمد شراتي بس محمد حالته أخس عن حالتي والله يعينا ..
هزاع متفاجأ : ما شاء الله عليكم وش من الحياة تعيشون ..
سيف: والله عند شباب خيس شرب بليل الله يعزكم ..
خليفة وهو يقاطعه بالرمسه ومحرج : تشرب يا سيــــــــف ..
سيف: أنا أأمن فيك يا خليفة ومن جذيه خبرتك لا تتحراني إني أقولك هذه الكلام بس عسب تشفق عليه لا أنا مابي شفقه من حد بس أنا أحس براحه يوم أكلمك وما أستبعد هزاع تراه ربيعك و شراتك .. والله ندري إنهم خيس بس الواحد ينجبر لهذه الشي ..
خليفة مضايج: هيه بس ما إنك تشرب يا سيف لهذه الدرجة شو بيقولون عنك أهلك عمامك وين و خوالك وينهم عنك ما تخاف منهم ..
سيف منزل راسه: الكل لاهي في شغله .. محد عنده الوقت عسب يشوف نحن شو نبا ولا ما نبا ..
خليفة: و أم سيف تدري بهذه الشي ..
سيف منزل راسه شو بقول إنه أسلوبه خايس ويا أمه .. خليفة لحظ سكوت سيف و حاس إنه فيه شي..
هزاع : زين خلونا من هذه السالفة و بعدين بنلحق عليها  .. شو رايكم إني أذاكر حقكم ..
محمد وسيف متفاجئين: شووووووووه .. " ويطالعون بعض "
هزاع: لحظه أنا ما قلت شي غلط أنا قلت بذاكر حقكم يعني بساعدكم في الدراسة ..
محمد: أي نوه بس ..
هزاع :لا بس ولا شي الامتحانات بعد شهرين شهر بداومون فيه والشهر الثاني بذاكرون فيه صح ..
سيف: هيه نعم ..
هزاع: زين الشهر يالي بتسيرون فيه المدرسة استغلوه بأي طريقة لأن الشهر يالي بعده بذاكر حقكم و لا بتكون عندكم فرصه حتى تتنفسون فيها ..
محمد يطالع سيف : زين والله و بعدين ..
هزاع: شو بعدين خلصت السالفة بس المهم الشهر يالي نحن نمشي فيه فرغو كل طاقتكم فيه لأن الشهر الياي صج بمسككم  لا تتحروني أسولف هذه خليفة جدامكم مجرب بعد ..  
خليفة بصرامة و مضايج من الكلام يالي قاله سيف عن الشرب: هزاع لا تتحراني بسكت تراني وياك بعد .. عن هذه الصياعة إلي مالها أول ولا تالي .. وضحكو سيف ومحمد خليفة كان يفكر ليش سيف يسوي كل هذه أصلن هو معصب على سيف بس ما حب إنه يبين حقه إلا يوم بيرمسه بروحه ما يبا ينزل من مستواه جدامهم ..  و عقب يوم روح كل واحد بيته أتصل خليفة لسيف يبا يعرف كل السالفة منه ..
خليفة: انت شو تقول أنا ساكت عنك من البداية ..
سيف : والله يا خليفة مب قصدي بس الظروف ..
خليفة: أي ظروف .. تعرف عاده يا سيف من بعد هذه الرمسه يالي قلتها أنا أحتقرك ..
سيف حس بهذه الكلمة : ليش يا خليفة و الله انت ما تعرف أنا جيف عايش ..
خليفة: عذر أقبح من ذنب .. سيف لا تسوي عمرك مسكين حالك انت ريال وتحكم عقلك ما تعرف ممكن هذه المشروب يمكن يضرك لي كبرت ..
سيف ساكت ما قال شي ..
خليفة: سيف وينك ليش سكت ..
سيف: انت ما تفهمني يا خليفة .. و أنا أقول محد بفهمن غيرك ..
خليفة: أنا فاهمك بس ما انك تلجأ لشرب و انت بهذه السن الصغير ..
سيف وهو معصب: لو سمحت خليفة أنا مب صغير وعارف شو أسوي ..
خليفة: زين يوم انك عارف شو تسوي ليش عيل تشرب..
سيف: خليفة أنا ..
خليفة وهو موصل حده : دام هذه سوالفك يا سيف مابي بينك وبيني علاقة حتى لو صداقة فمان الله .. و صكر عن سيف يالي ما عارف شو يسوي ويندب على حظه الردي .. و يمر أسبوعين وسيف على حالته يتصل في خليفة بس خليفة ما يرد عليه يبا يأدبه بس بطريقته الخاصة .. الساعة 2 وربع سيف قاعد على أيدار بيتهم وخوله بنت يرانهم من الساعة 8 المغرب ظهرت ولا يت الساعة 3 نص شرفت الأخت و الأهل لا داريين فيها ولا شي .. نزلت مثل العادة تمشي شوي و تتلفت شوي ..
سيف: لا تخافين محد بشوفج غيري و أهلج راقدين ما داريين ببنتهم ..  
خوله خافت يوم سمعت الصوت بس يوم دققت بصوت عرفت انه سيف..
خوله وهي خايفه: انت شتبا مني ..
سيف: أنا ما بي منج شي ليش يعني إنتي بتعطيني شي  يا فيسج ..
خوله: احترم نفسك ..
سيف وهو ينزل من وكره وسار لها و يودها من جتفها: إنتي عاده وايد مصختيها كل يوم والثاني ظاهرت لج و يا واحد من هذولا الخيس الرغود .. سيري بيتكم لا الحين أدفنج هنيه ..
خوله وهي خايفة: سواف والله تسكت بيسمعونك و الله تسكت ..
سيف و بحقراه واستفزاز : ليش خايفة إنتي .. يوم ظهرتي من بيتكم ما خفتي يوم حد يشوفج تخافين ..
خوله كانت عيونها بتظهر من مكانها لأن صوت سيف وايد عالي ..  
سيف: مالت عليج .. تعرفين عاده إنتي لو أختي تعرفين شو بسويبج والله حرام لا أدش السجن بسبتج .. ولا شو ذنبهم أمج و أبوج تسوين فيهم جيه .. مو أمج و أبوج ربج فوق يشوف كل يالي تسوينه ما تستحين على ويهج  " الأخ ناسي نفسه ".. وشوي جان يظهر أخو خوله ذياب كان يبا يدخل السيارة للكراج بس حس في صوت حذال بيتهم ويوم أطالع صوب بيت قوم سيف .. جان يشوفه  و وياه بنت ذياب يمشي شوي شوي البنت يالي ويا سيف يعرفها نفس الطول .. وصل ذياب صوب سيف .. سيف مب منتبه ويوم اشر صوب بيت يرانهم جان يشوف ذياب واقف ورا أخته وعيونه على البنت ..
سيف وهو متفاجأ: ذياب ..  خوله من سمعت اسم ذياب فتحت عينها و لتفتت لورا جان تشوف أخوها واقف وشكله مب مصدق كانت عينه حمرا من الغيض ..
خوله وبخوف: ذياب أنا ..
ذياب وهو معصب: سيري البيت بسرعة ..
خوله و بحقارة : صدقني مب أنا سيف سبب كل شي .. سيف من سمع فتح عينه على الآخر ..
سيف: جذابة وحده ..
ذياب وهو معصب خلاص موصل حده : قلت لج سيري البيت بسرعة .. ربعت خوله لبيتهم و الدموع في عينها كانت خايفة .. و ما تدري من وين ظهرت هذه الرمسه عن سيف بس كان خوف منها ..
ذياب الدموع في عينه من الغيض: أنا ما استبعد منك هذه الشي يا الحقير ..
سيف: والله يا ذياب أختك جذابة و حياة أبويه الله يرحمه يا ذياب ..      
ذياب وهو يمسك سيف من كندورة : شو بينك وبينها عسب تتبلا عليك يا سيف .. و ينفخه بوكس على خشمه ..    
سيف وهو طايح على الأرض ويمسح الدم يالي طلع من خشمه: معلوم ما بتعرف عن أختك .. تعرف عاده " ويود عمرة سيف عن لا يفلت ما يبا بنت الناس أطيح في مشكلة بس هو ما سكت عن ذياب نش وقعد يضارب هو وياه  و ترافسو الشبيبة ".. وعقب ولد عم سيف خالد شافهم لأنه كان ساير يصلي الصبح و وياه أبوه أحمد  سارو عندهم  .. أما  ذياب ما سكت إلا يشتكي عليه في مركز الشرطة وسار كلهم الشرطة عسب يعرفون السبب.
سيف وهو متبهدل الدم على كندورته ونفس الشي ذياب ..
الملازم يابر: ها ممكن أعرف شو السبب ..
سيف و ذياب ساكتين ولا قالو شي ..  
الملازم يابر : زين يعني الحين ما بترمسون هاه خلاص بتنحجز انت وياه لمده يومين ..  
أبو خالد: بس يا حظره الملازم  الولد عنده امتحانات ..      
الملازم يابر: نحن ما عرفنا سبب هذه الضرابه يا بو خالد .. ولا واحد منهم يبي يعترف .. مع إنك ياي تشتكي يا ذياب .. ذياب سكت أبو خالد سكت هو الثاني ما قال شي بس هو بيتصرف ولازم يتصرف ويعرف سبب هذه المشكلة وإذا خلا الولد أمه بتسال عنه و كفاية يالي فيها من مشاكل ..
خالد: شسالفه يا سيف الريال ما بتعدا عليك جيه ..  
سيف وهو معصب: خلود الله يخليك أنا مب فايج حقك .. ترها واصله ليه لين هنيه " يأشر على طرف خشمه" ..
خالد : سيف شسالفه قول أحسن لك ..
سيف: سير أسأل ولد فريجكم .. خالد هز راسه بأسى يعرف ولد عمه ما بقوله له شي حتى لو شوه .. الساعة 11 الضحى دخل أبو خالد وخالد وسيف و كان أبو خالد معصب و مفول من تصرف سيف و ما رضا يقول شو سبب الضرابه ..
أحمد: دش الله ياخذك من ولد .. سيف دخل ولا قال ولا شي ..
أم سيف وهي يايه صوبهم: شسالفه يا بو خالد ..
أحمد: ولدج فشلنا قمنا ندخل مراكز الشرطة بسبته ..
أم سيف وهي مب مصدقة : مركز الشرطة ليش يا بو خالد ..
أحمد وهو يفتن عليها: اسألي ولدج .. الله ياخذك ويا خذ مشاكلك وياك .. وسار عنهم بيته ..
أم سيف وهي تلتفت لخالد: شسالفه يا خالد ..
خالد: والله ما عرف أول ما ظهرت من البيت ساير لصلاة شفت سيف مدافن ويا ذياب ولد اليران ..
أم سيف وهي تسير حق سيف: ليش يا سيف شو السبب ..
سيف يطالع أمه بحنان : ما سويت شي يا أميه
أم سيف مثل الأطرش في الزفة: عيل ليش الريال ضاربنك ..
سيف: أوووووه يا أميه خلينيه بروحيه ..
أم سيف : جيف أخليك بروحك و انت يايني بهذه المنظر الدم كله على ويهك و ملابسك  ..
سيف: أنا بسير فوق .. وسار عنها أم سيف حاسة في سالفة بينه وبين ذياب ولا ما بيضربه منيه و درب.
خالد: هدي شوي يا خالوه ..
أم سيف وهي منفعلة : أي أهدي يا خالد أشوف ولدي تنهدم حياته جدامي وأنا ساكتة .. ليش يا سيف سويت فيني جيه ليش ..  
خالد: أكيد في سالفة يا خالوه ..
أم سيف و الدمعة في عينها: الله يهديك بس يا سيف الله يهديك .. خالد حضن خالته لأنه حس إنها تبا تصيح و فيها دموع كثيرة و كله بسبه سيف .. في غرفة سيف كان سيف معصب و الدموع في عينه لأن الناس فهمته غلط وإنه الحق وياه .. وعقب دخل الحمام يسبح ..  العصر سارت أم سيف لبيت يرانهم لأنهم عرفو بالسالفة و هي تبا تعرف شو السالفة .. سارت و سألت أخت خوله لأنه أمها مب موجودة في البيت وسألتها عن كل السالفة وعرفت إنه السالفة ويا ولدها لأنه خوله خبرت أختها بكل السالفة و استحت أخت خوله إنها اجذب على أم سيف .. وردت أم سيف و كانت البسمة هي يالي أخذتها من بيت يرانهم وعرفت إن ولدها معاه حق وإنه ما غلط في حق حد مثل ما كانت تتوقع ..
أم سيف وهي أدق على سيف الباب: سيف يا سيف بطل الباب أنا أمك ..
سيف قعد من رقاده و فتح حقها الباب و شافت أم سيف عيون ولدها حمر وعرفت إنه كان يصيح ..
أم سيف: ما تبا أكل حبيبي ..
سيف ببرود: لا مابا أبا أرقد ..
أم سيف: لي متى سير ذاكر الامتحانات ما باجي عليها شي ..
سيف: أووووهوووه أميه دخيلج تراني مصدع مب فايج ..
أم سيف تبتسم لولدها : خلاص عيل سير أغسل ويهك أنا احينه بيك .. ما عطته فرصة حتى يتكلم سار تسبح ويوم ظهر شاف أمه قاعد ترتب فراشة ..
أم سيف وهي تعطيه ملابسة لأنه كانت عليه بس الفوطة : أندوك ..
سيف ياخذ من أمه الملابس من دون نفس: مشكورة  
أم سيف من بعد ما لبس سيف ملابسة يابت علبه الإسعافات الأولية وقعدت تضمد له جروحه ..
سيف بألم: أي شوي شوي يعور ..  
أم سيف تبتسم: خلاص شوي شوي .. و جان تلزج له جروحه وتسحي له شعرة لأنه يوم شافته يسحيه شافت فيه جرح في راسه .. ظهرت أم سيف من غرفة ولدها وسيف يطالع الباب يالي ظهرت منه و حاس بذنب دوم جيه يحس بالذنب بس ما من وراه فايده ..  
خليفة: و ليش ما خبرتني يا سيف عن السالفة ..
سيف وهو ماله نفس لخليفة: دخيلك يا خليفة أنا مب فايج ..
خليفة: شو صار يا سيف خبرني ..
سيف منسدح على الشبريه و ميود على راسه: ما صار شي يا خليفة ما صار شي   ..
خليفة: شو ما صار شي محمد قال انك مضارب ويا واحد أنا لازم أعرف السالفة ..
سيف: خلاص دامك مصر يا خليفة .. و خبرة بكل السالفة من يوم ما قعد على اليدار لين ما يا ويا عمه::
خليفة: ليش سويت كل هذه يا سيف .. انت عاقل و بعدين خل البنت تسوي ما تسوي انت مالك شغل فيها هذه المرة سويتها ويبت لعمرك المشاكل .. وعمك زعلان منك ..
سيف: براية أنا ما يهمني عمي ..
خليفة: كله مني أنا المفروض ما خليك بهذه الظروف .. أوني أبا أعاقبك و شوف عقابي لك ..
سيف: لا تلوم عمرك يا خليفة كل مني أنا .. أنا راعي مشاكل ليش ما أموت أحسن ..
خليفة وهو معصب: سيف لا يتمنى أحدكم الموت .. و انت ريال مب ناقصك شي عسب تتمنى الموت ..
سيف: خليفة أنا مب فايج برقد احينه عقب بدق حقك ..
خليفة: يصير خير عيل فمان الله .. و صكر عنه ..

نهاية الجزء الرابع

وكل عــــــــام وإنتوووو بخيــــــــــــر

سواااالــــــــــم ..

**احساس قلب** · 21-01-05 ||, 03:05 AM

تسلم اخويه راع7ي عالبارت الجنااااان ..

نتريااااك لا تبطي علينا <IMG src="http://oasis.bindubai.com/emoticons/cool.gif" border=0>

اختك
احساس قلب

**راع7ي** · 21-01-05 ||, 03:46 AM

مشكووورة أختيه احساس قلب على هذه المرووور الطيب
و إن شاء الله مب باطي عليكم ..

أخوج راعي7

**مي دبي** · 22-01-05 ||, 02:16 AM

وانته بخير اخوي راعي7 .. وعسااك من عوادة العيد ..

تسلم عالجزء الحلو ... ونتريا اللي بعده بفارغ الصبر ...

مي دبي

**راع7ي** · 24-01-05 ||, 12:38 AM

هلا والله بأختيه مي دبي

ينعاد علينا وعليج بالخير

الله يسلم بحالج و مشكوووورة ..

و السموووحه

**روح الحب** · 24-01-05 ||, 02:46 AM

مشكور أخويه على الجزء وتسلم يمناك على الجزء الحلو

أختك
روح الحب ...

**احساس قلب** · 24-01-05 ||, 11:24 PM

مرحبا اخويه راع7ي <A title="" href="http://oasis.bindubai.com/cgi-bin/oasis.cgi?act=Search;CODE=01;keywords=راع7ي;ty pe=name;forums=all;search_in=all;prune="></A>..

كل عام وانته بخير وصحه ..

متى ناوي تكمل القصه <IMG src="http://oasis.bindubai.com/emoticons/tounge.gif" border=0>

احساس قلب

**راع7ي** · 24-01-05 ||, 11:29 PM

يسلم بحالج ومغليج أختيه روح الحب ..

ولا عدمتج ولا من ردوووودج الطيبه

مرحبتين كبــــــــار والله هلا بأختيه احساس ..

و إنتي بخير وصحة وسلامه ..

تراني أحينة قاعد أضبطه بلاج مستعيله..

سوااااااااالـــــــــــــ ــم ..

**راع7ي** · 24-01-05 ||, 11:46 PM

الجـــــــــــــز ء الخــــــــــــــــــامس

برا في حوي البيت كانت فاطمة قاعدة ويا سعود أخوها هي فوق على الكراسي وهو يلعب تحت .. خالد

كان ياي يطمن على ولد عمه وشاف فاطمة قاعدة..

خالد: السلام عليكم ورحمه الله وبركاته ..

فاطمة: هلا خالد وعليكم السلام شحالك عساك بخير ..

خالد: أنا لا الحمد الله يعجبج ويسرج حالي .. عيل سواف وينه ..

فاطمة و بحزن: بعده في غرفته اليوم ما ظهر مثل العادة ..

خالد: ما عرفتو شو السالفة ..

فاطمة: بلا بس دخيلك خالد أنا أأمن فيك لا تخبر حد ..

خالد : أ فا عليج يا بنت عمي أنا عمري ما خنت ثقتج فيني وهذه وسام على صدري ..

فاطمة: تسلم يا خالد .. و تقوله كل السالفة و إنه سببها خوله ..

خالد: و الله إنها حقيرة ..

فاطمة: خالد خوله كانت ما بتخبر بس غصب عنها ..

خالد: فديت ولد عمي والله ريال و الكل فهمه غلط ..

فاطمة: شفت عاده أنظلم  ..  

خالد: عيل أنا بسير حقه ..

فاطمة: خالد لا تعب عمرك تراه ما ببطل حقك الباب ما يبا يشوف حد ..

خالد: الله يعينك على بلواك " ويطالع صوب غرفته " سعودوه شو سوي ..

سعود: ما شي ألعب تبا تلعب ويايه ..

خالد: لا فديتك هذه السوالف ودرناها .. عيل الحين بخليج يا فاطمة سلمي على خالوه  ..

فاطمة: يوصل إن شاء الله ..
طلع خالد من بيت عمه وهو حازه في خاطره على ولد عمه .. و تمر الأيام ويمر الشهر يالي عطاه هزاع حق محمد وسيف يسوون فيه كل يالي يبونه ..  وبدا الجد في ميلس قوم هزاع تبدا المذاكرة من الساعة 3 الظهر لين الساعة 9 بليل  سبع ساعات في اليوم وهذه من غير ما يذاكرون بروحهم في البيت و المعاهد يالي يسيرونها  ..

محمد مب عارف الجواب : والله ما عرف الجواب ..

هزاع: زين انت ذاكر لين ما سير أييب الفواله و أي .. " الصوب الثـــــــــاني "

سيف: أييييييييي خليفة والله صح شوف انت .. " خليفة ضاربنه على راسه "

خليفة: وين صح شوف أنا طالب منك هذه الناتج .. هذه المسألة يالي مساعه
 
سيف و بعبط: هييييييييييييه قول انت نحن انتقلنا لدرس ثاني  ..

خليفة: انتقلنا هاه حل بشوف حل اليوم أستاذ المعهد شو عطاكم ..

سيف: اليوم مب رياضيات اليوم إنجليزي ..

هزاع وهو يضحك: شوي شوي عليه يا خليفة ما ترزا عليك ..

خليفة: تراه يرفه بالضغط عنلاته .. و تمر أيام الدراسة سيف مول من غرفته ما يظهر و محمد بالحسرة يدق حقه و أمه مستانسه إن ولدها قاعد يذاكر صحيح مب مبين إنه يذاكر بس هيه حاسة بولدها ..

فاطمة: عيل سواف وينه ..

سعود: في غرفته ..

أم سيف: الله يحفظك يا سيف ..

مريم: حليلك يا سيف وراه امتحانات ..  

فاطمة: الصراحة ما أتوقع منه شي سواف .. لا نسبه ولا شغل ..

أم سيف وهو محرجه من كلام بنتها فاطمة: شو قصدج يا فاطمة إن شاء الله بيب نسبه أعلى عن نسبتج وبكسر راسج ..  

فاطمة: زين بنشوف نحن ما ورانا شي .. و الله ليه الفخر يكون هذه الفاسد أعلى عن نسبتي ..

مريم معصبه : سواف بيب نسبه أعلى عن نسبتج و بتشوفين بعد ..

فاطمة: روحي دخيلج إنتي الثاني روحي ..

أم سيف معصبه بس ما حبت تبين لبنتها: سعود حبيبي قوم تسبح تعال أمك بتسبحك يا الله  ..

سعود: أمايه باجر مب اليوم ..

أم سيف وهي تمسح على راسه: يا الله قوم يا يبتلك كافي قوم يا الله ..

سعود فاتح عينه: حلفي أميه ..

أم سيف: هيه يا الله..

سعود: أول حلفي ما بقوم إلا لين تحلفي ..

أم سيف وهي تضحك: و الله يا الله قوم تسبح أحسن عن خواتك إلي ريحتهن خايسه  ..  

سعود وهو يضحك: هههههههههههه وييييييو ماماه سبتهم .. و سارت أم سيف تسبح و لدها سعود ..

وتمر الأيام وتبدا امتحانات الثانوية العامة أم سيف ومثل كل أم تدعي حق ولدها بتوفيق و النجاح و يرفع راسها و يخذلهم كلهم لأنهم ظنوا فيه السوء .. سيف يسير بيت هزاع بعد صلاه العصر وأم سيف تحاتيه وايد لأنه ما يذاكر في البيت .. و في يوم خبرته وتشاتم هو وياها عسب هذه السالفة بس هو ما قال حقها لأنه ما يبي يخرب سمعته بأنه ولد ما من وراه فايده " عايبته هذه الشخصية " و تخلص الامتحانات و يخلص هم المذاكرة و يبدا هم المحاتاه حق النتيجة سيف وايد خايف إنه ما يب نسبه لو إنه ايب 60 يحمد ربه ويشكره على هذه النسبة  ..

خليفة: موووووول ما شي تفاؤل ..

سيف: عيل شو تتحرا المهم أخلص من الثانوية و أنجح و لا أعيد سنه ولا دور ثاني أنا ما صدقت أذاكر.

خليفة: لا انت و محمد إن شاء الله بتيبون نسبه مشرفة .. و أم سيف بتفرح عشانك ..    

سيف: يا ليت والله ..

خليفة: زين عقب الثانوية ما فكرت وين بتشتغل ..  

سيف: خليفة والله ما ليه خلق أقفل الموضوع ..

خليفة ما سوى سالفة : سيف انت ريال البيت و مثل ما قلت لي إنه أبوك الله يرحمه عنده شركه و عمك يديرها .. ليش ..

سيف: خليفة دخيلك قلتلك اقفل الموضوع ..

خليفة: سيف جيه ولا جيه لازم تفكر في حلالكم أنا ما أوزك على عمك بس لين متى بتم الريال يكرف عشانكم ..
 
سيف: و الله هو بروحه عرض خدماته على الوالدة و من يوم نحن يهال و هو يدير الشركة يعني عادي متعود ..

خليفة: سيف حان الوقت عسب أدير حلالك انت كبير و الحين ريال البيت .. أنا ما أقولك صير المدير لا اشتغل عند عمك و أبدا من الصفر و مشوار الألف ميل يبدا بخطوه مثل ما يقولون .. و تتعلم الشغل وشوي شوي ...

سيف: أنا عمي ما أبلعه ..

خليفة متفاجأ: عيب تقول عن عمك جيه ..

سيف يبا يغير الموضوع : خليفة انت شو تشتغل ..

خليفة: أنا مهندس بترول .. ليش ؟؟؟؟؟؟

سيف: بس سؤال أنا عمري ما سألتك شي شخصي ..

خليفة: إلي تباه أسأله يا سيف والله ما أردك ..

سيف: زين ليش ما عرست لين الحين ؟؟؟ ..

خليفة يضحك: ظروفي ما تسمح ..

سيف مستغرب: ظروف شو من الظروف يا خليفة انت ريال كبير و فاهم ..  

خليفة: لا تعال بعد اضربني أسميك يا سيف سوالف ..

سيف: ليش تتهرب يا خليفة هذه الرمسه مب عليه أنا ..

خليفة: ما شاء الله عليك يا سيف انت ريال فاهم وتلقطها وهي طايره ..

سيف: خليفة مب مسألة ألقطها وهي طايره انت ما تشوف عمرك أنا بعرس و انت بعدك ما فكرت بالزواج ..

خليفة سكت شوي وعقب: ما بتصكر الموضوع  ..

سيف: برايك أنا مرتاح في بيتنا  ...

خليفة: حد قالك انك مب مرتاح والله .. الحين وين بتسير عيل ؟؟..

سيف: ما  ليه خلق أسير مكان برقد حتى حمود ما بيظهر مكان ..

خليفة : زين لك سير اقرأ لك جم من آية و عقب ارقد ..

سيف: تعال أنا ما عندي قرآن في غرفتي عند أميه واحد في غرف خوانيه بعد إلا أنا ..

خليفة وهو مب عايبنه : ليش يا سيف انت ما تقرا قرآن ..

سيف تم ساكت هذه ما عنده قرآن محرج عيل إذا عرف إنه ما يصلي شو بيسوي : لا ما أقرا قرآن ..

خليفة وهو مفول : ليش يا سيف عمرك ختمته انت ..

سيف: لا ولا أديسه بعد ..

خليفة وهو معصب على هذه الكلام : وبعد تقولها أشكره يا سيف عيب عليك يا سيف عمرك ما ختمته شو من الحياة تعيشها يا سيف .. لا قرايه قرآن عيل انت ما تصلي يا سيف ..

سيف تم ساكت ما عرف شو يرد على خليفة كلامه صح وسؤاله ما عرف يجاوب له ..

خليفة: سيف انت شووو من البشر ..

سيف: لا أنا أصلي بس قرآن ما أقرا ..

خليفة: لييييييش؟؟؟؟

سيف: خليفة انت تعرف بعد القرآن في " مد و أخفــــاء " و من هذه أحسبه صعب و أنا ما أحب أألف في كتاب الله ..

خليفة: ليش ما علموكم في المدرسة الإقلاب والإدغام .. زين خلنا من هذه انت ما تعرف لغة عربية ما أعتقد انه القرآن بالغة الهندية ..

سيف مضايج : أهووووووه يا خليفة بتفتحلنا محضر ..

خليفة خلا معصب : عيب عليك انت لو واحد غيرك جان ما فتح ثمة و تنطق بكلمه .. الظاهر انت ما ينأخذ منك لا حق ولا باطـــــل تصبح على خير ..  

سيف: خليفة والله ما عصبت خليفة تعرف إني مالي غيرك ..

خليفة باستفزاز : دام هذه كلامك ليش تباني أرمسك .. انت تعرف ربك يا سيف ؟؟ .. انت مسلم بس في الجواااااااز أشك فيك الصرااااحه  ..

سيف معصب: خليـــفة لو سمحت لا تغلط ..

خليفة: الله يعين أهلك عليك الصراحة .. أشفق عليهم وعليك دام هذه سوالفك لا تعرف ربك ولا تعرف شو مكتوب في القرآن من جيه بطيح في الغلط يا سيف .. لو إنك تقرا شوي القرآن جان بعدت عن هذولا يالي ترابعهم وعن يالي تشربونه ..

سيف دمعت عينه و لأول مره في حياته من القهر يالي داخله من بعد ما سمع هذه الكلام ما عرف شو يرد على خليفة يالي قاعد يتكلم ..

سيف و العبرة خانقته : خليفة انت بدال ما تساعدين تأنبني .. أنا و عيت على هذه الدنيا و كان معايه أبويه و فجأة ما لقيت له وجود تأثرت شو تبا من واحد أبوه يرحل عنه بغمضة عين بدون ما يعرف شو تبا منه إنه يكون فاهم وعارف شو فيها هذه الدنيــــا ..

خليفة وبصمود: هيه بس هذه الشي يا سيف ما يخليك تهجر ربك انت ريال يا سيف وريال البيت بعد شو تبا أمك يالي تشيل كل شي فوق راسها هذه حرمه مع احترامي الشديد لك تبا حد يعاونها ويساعدها مو يزيدها انت عارف شو في قلب أمك لا طبعا وين بتعرف و انت ربعك هذولا الكجره يالي مسمنهم أصدقاء ..

سيف بحزن شديد: هذولا وقفو معايه لين احينه ..

خليفة: زين يا سيف الحين الكلام ما ينفع بتلفون إن شاء الله باجر أشو فك ..
سيف مارد على خليفة مغمض عينه و الدمع تنزل على خده بحرارة .. صكر خليفة عن سيف و هو محترق من بروده أعصاب سيف وكيف انه هادي من هذه السالفة بس عقب قعد يفكر بآخر المكالمة كيف انه كان حزين و صوته هدا ما مثل أول المكالمة كان يسولف .. خليفة: أنا كيف قلت له هذه الكلام صح أنا المفروض أوقف معاه مو أهزبه وهد عليه جيف و هو معتبر ني مثل أخوه العود .. و شوي طرش له مسج عسب بس يرضيه مو يتسامح منه لأنه سيف يبا من يوجهه و أمه حرمه ما تقدر عليه .. و تمر الأيام و أي يوم يالي في الثانوية أطيح قلوبهم في بطونهم سيف مول ما رقد و أم سيف ليل ونهار تدعي حق ولدها عسب بس يرفع راسها من بعد ما نزله ..

سيف: و الله حمود بطني يعورني يايني مغص ..

محمد وهو يضحك: لا تقول  ..   ههههههههههههههاي " رجولية هذه الضحكة "  

سيف : والله ما عندك سالفة يا حمود بس 60 مابا شي غيرها أحمد ربي علها ..

محمد: ليش أملك ضعيف لهذه الدرجة .. قول إن شاء الله و يميع بنيب نسبه تشرف وبسير اشتغل في أدنوك .. يــــــــا رب ..

سيف: والله أنا مب طماع هذه النسبة تليق عليه ..

محمد: زين ما عليه أقول أنا اليوم أبا أسير أتمشى ممكن نظهر اليوم ..

سيف: طاع انت هذه أنا أقوله النسبة وهو بيظهر ..

محمد: سواف لا تسوي عمرك بنية إلا هيه نسبه و جان على الستين بتيبها .. وشوي سمع السماعة متصكره متعود على هذه الحركة من سيف إذا ما عيبته الرمسه يصكر .. خالد توه داخل بيت عمه ويتكلم بالتلفون ..

خالد: زين بلاج زعلانه والله كنت واااايد مشغوووول .. ههههههههاي شوه زين فالج طيب حبي بيب لج إلي تبينه مني أفا أنا جم عويش عندي ..

فاطمة كانت تطالع في خالد يوم انه داخل البيت و تضحك يوم سمعته يقول  " حبي " حست بعمرها غير عصبت ما عرفت ليش .. خالد وهو يرمس جان يطالع صوب فاطمة يالي كانت قاعد في حوي بيتهم العود يالي نصه مربعات فيه زراعه فيها حشيش و بحركة حلوه و صوب باب البيت كان سعود يشل ألعابه بصعوبة مطلعنهن من الصالة .. فاطمة قاعدة عند الكراسي و الجو كان حلو الشمس توها بتغيب فاطمة حطت عينها في كتابها عن يلاحظها خالد ..

خالد وهو يلتفت صوب فاطمة : عويش الغالية بصكر عنج الحين أوكيه بباي بعدييييييين بدق حقج "
وهو مصكر على أسنانه عن تسمعه فاطمة " .. و صكر عنها و سيده يا صوبها ..

خالد وهو مبتسم: السلام عليكم ورحمه الله وبركاته ..

فاطمة وعينها في المجلة : وعليكم السلام  ..

خالد: شو تقرين يا فاطمة ..

فاطمة و بجفاء : يعني ما تشوف مجله ..

خالد تفاجأ من ردها له و بهذه الأسلوب: بلاج يا فاطمة .. وشوي جان تسمع صوت سعود ..

سعود: فطوم تعالي شيلي الألعاب ما أقدر .. نشت فاطمة .. لكن خالد يود أيد فاطمة وسار ياب سعود و ألعابه ..
   
سعود: منيه خلهم ..

خالد: يعني انت ما تقدر تلعب إلا بألعاب ثجيله ..    

سعيد: نوه ما قدر ..

خالد: طاع النوه انت ما لتك .. ويصد صوب فاطمة .. شفيج يا فطيم ..

فاطمة: سلامتك ما فيني شي .. وردت تقرا في المجلة ..

خالد وهو قاعد مجابيلها: عيل ليش ما عاطتني فيس ..

فاطمة وهي تبتسم بصعوبة: لا شو تباني أسويلك يعني ..

خالد: زين بلاج تكلميني بهذه الأسلوب .. أكلمج بأدب أنا ..

فاطمة: زين وبعدين شتبا ..  

خالد سكت شوي: لا مابا شي وين خالوه ..

فاطمة رافعه حاجب : محد سارت بيت يدتي ..

خالد يطالع صوب غرفه سيف وعينه مصغره من الشمس: زين سيف و ينه ..

فاطمة: في غرفته .....

خالد: عن اذنج يا بنت عمي ..
وسار عنها .. وقف عند باب البيت ودق حق سيف و عسب ينزله .. نزل سيف ودخل ولد عمه الميلس و قعدو يسولفون وعقب ظهر خالد من بيت عمه بس يوم ألتفت ما شاف فاطمة قاعدة في مكانها ولا سعود يالي كان يلعب حذاها .. فاطمة معصبه مفوله من خالد ..

مريم: فطوم أميه قالت بتي احينه

فاطمة : بس إنزين عرفنا ..  

مريم: زين إنتي قلتي ليه اتصل بها ..

فاطمة معصبه : مريامي بس عاد صدعتي ليه راسي

ريم: زين ليش تهدي عليها هذه يزاتها بعد ..

فاطمة: جب إنتي الثانية ما كلمتج .. مريم تمت ساكتة ما تبا تدخل وهي من النوع الهادي ..

فاطمة مضايجة : أفففففففففففف وينها أمايه ..

مريم: الحين بتي اتصل بها ..
فاطمة ما قالت ولا شي لبستها وسوت لها طاف .. سعود يلعب بعيد شوي وشي جان يكسر المزهرية يالي كانت على صوب .. مريم نشت وسارت له ..

يات فاطمة معصبه من زود ما هي معصبه : انت أية ليش تكسرها..

سعود وهو يضحك: بروحها طاحت أنا مالية شغل ..

فاطمة جان تضربه على راسه بقو .. سعود تم من صدم من أخته أول مرة تسويها له ..

مريم: حرام عليج ليش ضربتيه ما سوالج شي ليش .. سعود قعد يصيح بصوت عالي ..

فاطمة وهي تهد عليها : جب إنتي طلع لج لسان بعد .. أنا اختج العودة ..

مريم: زين بس ليش تضربينه مب لج هذه المزهرية يوم بتي أميه هي لها حق ترمس ..
سيف قاعد في مقره السري يتريا أمه اليوم وايد تأخرت .. وشوي جان يسمع صوت فاطمة وهي تهد على أخوانها وسعود يصيح  .. وعلى طول نزل وسار الصالة ..  شاف فاطمة ميوده مريم من جتفها حس الدم كله تيمع في ويهه كله ولا مريم أخته دلوعته و حبيبته ..

سيف وهو معصب: أية إنتي بلاج عليهم ..

فاطمة لفت صوب سيف وباحتقار : نعم بغيت شي ..

سيف: ميود سعود أخوه .. بلاك حبيبي ليش تصيح .. تعالي مريامي هنيه ..

فاطمة: بعد طلع الأخ الحنون ..

سيف: إنتي ما تستحين على ويهج تحطين عقلج بعقل ياهل ..

فاطمة: ليش انت تعرف عنهم شي يعني ..

سيف معصب: فطوم ..

فاطمة باستفزاز : نعم خير خرعتني ..

سيف من العصبية ما قدر يتمالك نفسه سار لأخته فاطمة و يودها من شعرها يالي كانت لافتنه : يوم برمسون الرياييل لا تقعدين تردين عليهم تسمعين   ..

فاطمة تزاعج  : هد شعري يا الخايس ..

سيف : أنا براويج هذه الخــــايس شو يسوي ..
سعود ساكت ما عارف شو يسوي مريم قعدت تصيح أما ريم فتمت تطالع و عايبنها الوضع لأنها كانت منقهرة من فاطمة أختها .. وشوي جان تدخل عليم أم سيف وكانت يايه بسرعة لأنها سمعت صوت سيف و صوته كان عالي ..

أم سيف وهي تشوف سيف ميود فاطمة : سيف أمايه بلاك على أختك هدها ..

سيف: خوزي خليني بربيها ..

فاطمة وهي تصيح و تزاعج: أنا مربايه أحسن منك .. شوف نفسك يا الجلب ..  

سيف يشد على شعرها : منوه طالعيني عيدي يالي قلتيه ..

أم سيف تود أيد سيف : سيف دخيلك هد أختك شو سوت ؟؟؟!!!

سيف و الشرار في عينه  : لا بنتج ما سوت شي .. بس أنا بربيها ..

أم سيف وهي معصبه: سيف هد أختك قلتلك مب انت يالي بتربيها أنا مربيتها أحسن تربيه .. و أحسن عنك .. هدها ..

سيف وهو يهدها و يدزها على أمه : هاج بنتج بس من اليوم و رايح كلمتي هي يالي راح تمشي في البيت .. ســــامعه

أم سيف : ليش توك فطنت عمرك انك ريالي البيت ...  و من زمان وينك عيل عنا ها ..

فاطمة كانت تصيح و تزاعج  : كان في  الصياعه ما لته

أم سيف: جب إنتي سيري غرفتج بشوف ..

سيف: لا كبريها خلي راسها يكبر هي الثانية ..

أم سيف: جب أنا أقوووولك .. و الله ثنيناتكم ما تستحون على ويهكم أنا أمكم واقفة جدامكم لا حيا ولا مستحى .. حشموني على الأقل ..

سيف بنفس خايسه : خلصيني وين كنتي من وين يايه ..

أم سيف: منوه أنااااااا؟؟؟؟؟!!!!&# 33;!!

سيف: لا أنا شو رايج ..
و ما يحس بعمره إلا كف على ويهه و جدام منوه جدام كل أخوانه يالي يخافو منه ومن بعد هذه الكف ما أعتقد حد بيحترمه ..
سيف محطي أيده على خده  ويتنفس بسرعة متفاجأ من طراق أمه له ليش .. و عيونه شوي بتدمع بس هو ما يبا يظهرهن و عينه توسعت و بانت لونها ..
أم سيف: بعد طول لسانك يا سيف هـــــــاه .. أشوفك تسألني وين سايره و وين يايه هذه إلي قاصر ..
سيف بعده ساكت ما قال شي بس عينه في عين أمه و الشرار يظهر منها ..

أم سيف: انت قليل أدب و أنا ساكتة عنك وايد يا سيف أنا قلت اليوم بيعتدل .. باجر بيصير زين .. و بيغدي ريال يعتمد عليه مثل باجي النـــاس و بشيل أسم أبوه الظاهر انت بتم عوي يا سيف بظل الناس تعايرني فيك لين ما أموت .. سعود يوم سمع طاري الموت زاد صياحه و سار عند أمه وقعد يصيح ..

أم سيف من فجرة : لين متى هاه أنا صبرت وايد عليك .. جان هذه سوالفك يا سواف أطلع برا البيت " تأشر على الباب " ولا عاد أشوف رقعه ويهك في البيت لين ما تصير ريال و قد المسؤولية ..

سيف معصب و يهد على أمه و خده أحمر: يعني الحين أنا إلي طلعت الغلطان .. إنتي قاعدة تحوطين و تهومين من الظهر و الحين يايه و تقولين أنا الغلطان ..

أم سيف: جب يا قليل الأدب ..

سيف يجرب من أمه : لا تقولين قليل أدب   ..

أم سيف خايفه منه " و باستفزاز " : و الله ما تستحي يا سيف ..

سار سيف و دفر أمه على فاطمة أخته يالي كانت ميوده شعرها و تسمع الكلام و الدموع تصب من عيونها " كله بسببي " سيف هنيه يوم إنه دفر أمه حس بثقل في صدره و راسه عوره من يالي سواه .. أم سيف طاحت على فاطمة أول شي ما استوعبت عقب يوم شافت عمرها في الأرض و وياها فاطمة حست إنه ولدها مد أيده عليها .. سيف سالت دموعه على خده و ربع برا ما عارف وين يسير .. الوحيدة يالي شافت دموع سيف ريم كانت أدقق في ملامحه و هو معصب كرهته بس يوم نزلن دموعه حست إن أخوها مظلوم ..

نهــــــــــــــــاة الجـــــزء الخــــــــــــــــامس

تـــــــــرقبووووو البـــــــــــــــاجي