. . البطالــــة . .

[شمعة أمل]

عيل ليش حاطينه نائب مدير ؟؟!!!
لو ماينفع جان ودوه دبارتمنت ثاني من البداية !!
عيل لين الحين حاطينه نائب مدير ...
اللي إيده في النار مو مثل اللي ايده في الماي !!

لان لو تشوفون الظلم اللي يتعرضون له العمال الصغار (قصدي المواطنين لان انا اشتغل معاهم )
تعرفين شو يقولولي ؟؟
قالوا اذا مسكت مسؤول ارجوك فكر بالناس اللي يشتغلون تحت الشمس الساعه 2 الظهر ..(ادري هذي شغلتهم بس شو بتسوون لو حد اتفلسف عليكم وقال لازم انشغل التورباين سرنا شغلناه تحت الشمس ودرجة حرارة الماي 100 درجة .. ماكملنا نص ساعه اللا قالوا سوو شوتداون لان في ليك .. مع ان قالوهم الريال لا تشغلونه لان في ليك .. بس شو بتقولين !!

(الله لا يراويكم السرقه اللي صايره .. كل شي دبلين سعره )

ماعرف ليش مشغلينه نائب مدير ومب مدير؟ ومب من حقي أيـلس واتحرطم واقول ترا هالشخص هو الى يستاهل يكون المدير .. قلتلك من قبل .. الشركه الى انت تشتغل فيه عندها مخططات .. وعندها criteria يمكن هال*نائب مدير* ماعنده الكرايتيريا الى منصب المدير يحتاجه .. يمكن عشان جي مارقوووه .. المهم انه الشركه وكيفهااا واذا هالنائب مدير يبا يكون مدير لازم يجتهد وان شاء الله بيترقى

وعن ثاني شي .. شو بقول .. بقوللهم بطريقه طيبه وبدون attitude ترا قلنالكم انه فيه لييك .. وبس انتهى الموضوع

[شمعة أمل]

وحي القلم
الهااردز كانت تبع الحكومه لكن هو اشتراها منهم ..
وشو الى بيضركم بالضبط من وجود هالأجنبي؟ لو هالأجنبي صدق يضركم .. ف في رايي يفيدكم مليون مره اكثر من انه يضركم.. ولا انتي شو رايج؟

تبادل الخبرات .. ترا بعد في شي انا قلته انتي مافهمتيه .. مب كلحد يقدر يكون مثل هالأجنبي .. مادري كيف اشرحلج .. يعني مب كل مواطن عنده مخ مدير .. او مخ مدرس .. او مخ ميكانيكي .. *ما أقصد غبي أو أقصد خبره أقصد مخه وشخصيته وذكائه وتفكيره والfar sightness *
وطبعا ال far sight/ vision أهم شي في المدير .. بس هذا واااااااااااااااااااايد صعب تحصلونه في اي شخص .. سواء مواطن او اجنبي! من ردود الاعضاء هني اقدر اقولج منو هني ينفع يكون مدير ومنو لاء .. كلها عباره عن شخصية الشخص وتفكيره وشغله
ولاتخلبطين open minded بـ far sighted .. شي فرق كبير..

انتو تحسون انه كل شخص يقدر يكون مدير .. بس هذا غلط .. وهاللي أحاول أفهمكم إياااااااااااااااااه

وتبين الصراحه
نحن مانروم نعيـش بدون هالأجانب ..مانروم!

[نور الإيمان]

سلام عليكم :)

شمعة امل راح تكون لي رجعة ان شاء الله قريبا ..

و ما له داعي تمنين علينا كلنا عباد الله ..

[بنوتة جميرا]

شمعه امل
مابا اضحك ع الرمسه اللي تقولينها
شرات ما هاي بلادج تراها بلادي
بس في امور ما تعيبنا فيها وبنرمس
واللي مب عايبنه يشرب من البحر

وليش يعني ما في حد يعرف للواسطه كثرج ؟؟!!
ليش الحبيبه شو شغلتها؟؟!!
وانا رمستي كلها بأدله
ما يبت شي من عندي وحطيته

السموحه

[مجموعة إنسان]

قلتها قبل
اللي إيده في النار مو مثل اللي إيده في الماي ..

[نور الإيمان]

قلتها قبل
اللي إيده في النار مو مثل اللي إيده في الماي ..

صدقت هواجيس صدقت

[المقاتل]

. . عدنـــــا والعــــود أحمــــد . .

طبعـــا مثل ما شفنـــا الموضوع تفرع جدا لعـــدة قضايا بعضها يرتبط بالمحور الرئيسي والبعض الآخر خرج عن نطاق الموضوع . طبعا ماشاء الله الردود كثيره . . والبعض أبدا رايه بدراسه والبعض أبدا رأيه الشخصي .

بغض النظر عن بعض الردود الخارجه عن محور " البطـــاله " مثل " الواسطه و خير لبلاد والبطره والكسل " هذا كله في صوب .. وإلي مقدم على الوظيفه ومحصل شهاده عاليه مثل الباجيلور أو الماستر أو الانجاز أو الثانويه سواء المواطن أو الأجبني فصوب لا يرتبط عن ما ذكرتهم .

حبيت أسأل أسئله : هل إنتاج المواطـــن مثل إنتاج الأجنبـــي ؟؟
هل هــدف المواطن في العمل مثل هــدف الأجنبي في العمل ؟؟

أنا دائما ودوما سأجعــل المواطن في المرتبه الأولــى لأن الأحقيه هنا في دولة الإمارات يجب أن تكون من نصيب المواطنين وليس من صالح الأجنبي .

" لي عوده إن شاء الله "

[شمعة أمل]

مافييه أخرب مودي والسبب موضوع مايسوى
انتو تظنون انه المواطن مظلوم وانا أظن العكس
وأرد وأعيد انا مب ضد المواطن انا ضد المواطن الكسول الى مايقدر ولا شي


وأنا ماسمع قصص من ناس وايلس واكتبهم .. هم ناس أعرفهم واجوف هالشي جدام عيني

أو صح

تراني ماشوف 100 ألف ك مبلغ بسيط


تصبحون على خير

[ذنـيـنـي]

وأرد وأعيد انا مب ضد المواطن انا ضد المواطن الكسول الى مايقدر ولا شي

هذا الي فهمته من كلامج يا شمعه امل و تستاهلين صفقه

يا جماعه لا تاخذون كل كلمه و تحللونها حرفيا
شوفوا المعنى العام للكلام الي تبغي توصله لكم

بصراحه كلامها صحيح و ايضا كلامكم صحيح و انا عايشت عدة اماكن و فعلا يوجد بعض الاماكن الي تظلم المواطن بسبب التحيز و التكتل الي يسوونه الاجانب ضد الموظف المواطن لأنه يخلون في بالهم انه هالشخص بياخذ مكانهم فـ تحصلونهم يسوون اي شي عسب يبعدونه و هالشي منتشر بشكل كبيييييير في مجال البنوك بالذات

و في نفس الوقت لكل مجتهد نصيب مثل ما تقول شمعة امل الي بيبدع في شغله و بيحاول يطور نفسه بيوصل
و الي بيتم "يلعلع" و ما بيطور نفسه و بينتظر انه الدولة اتطوره بيتم مكانه
المواطن لازم يشتغل و يتعلم من الاجنبي و ياخذ من خبرته و يثبت انه افظل من الاجنبي عسب ياخذ مكانه




بعطيكم مثال على ولد عمي

كان جندي في القوات البحريه و راتبه 6500 درهم لأنه ما عنده ثانوية
و يوم تزوج حس بانه الراتب هذا ما يكفيه و ما بيعيشه العيشه الي هو يطمح لها
قام و درس و ياب الثانوية البريطانيه عن طريق الجيش و عقب استقال و اشتغل في الاتصالات براتب 7000 درهم و درس في التقنية بدون مبالغه من يوم دخل الين ما تخرج وللللللااااااا درجه وحده من درجاته نزلت عن الـ A+ تعرفون ليش !! لأنه عنده طموح و يبغي يطور من نفسه و ما قال ليش الدوله ما تعطيني راتب 20 الف و ليش ما عطتني بيت,, ترك كل هالامور على صوب و ركز على شي واحد و الي هو تطوير نفسه بنفسه

طافت الايام و ما شاء الله عليه تخرج بالمتياز مع مرتبة الشرف و بأعلى GPA على مستوى التقنيات

ترقى في الاتصالات و استوى مدير القسم الي كان يشتغل فيه لأنه كان موظف مثالي و ما يغيب ابداااااااااا عن شغله حتى و هو مرييييييض و 3 مرات خذ شهاده الموظف المثالي على مستوى الاتصالات

عقب شهرين من تسلمه لادارة القسم ياه عرض من بريد الامارات و خلوه يمسك قسم المبيعات الآجلة Cridit sales maneger و عقب شهرين بالضبببببببط رقوه و صار الـ Sales Director في البريد بسبب شغله و تفانيه في العمل و اصراره على تطوير نفسه و تطوير بيئة العمل الي يشتغل فيها و الحين يضربون فيه المثل في الانضباط و الطموح "على مستوى العايلة"


كل انسان ممكن يكون مثل هالشخص
اشتغل و اصبر و طور من مهاراتك بتحصل الي تباه و اكثر
اشتغل و تم يالس و حاط ايدك على خدك في انتظار زيادات الدولة و تنتظر المنصب الي بينزل عليك من السماء ، قر مكانك و تم في وظيفتك 20 سنه بدون ترقيات

[المقاتل]

نصوركـــا .. منور يا ريال .. شحالك .. (( خشمك )) .. ماشاء الله عليك روحك المعنويه عاليه !!

بعد ما اقرا كلامـــك ياخي وأشوف كلامي ويــــن وكلامك وين !! (( أخجلتني يا ريال )) لوولز . وولد عمك يمكن من الفئـه النادره إلي عندها شرات هالطمـــوح وإلا ؟؟ إلي عنده مثل هاي السوالف ينورنا عشان نحتذي حذوهم .

وبعـــدين لازلت وأقول إن ولــد عمــك ربط ظهره وما أعتمـد ع شهادته إلي عنده وبس بالعكس صارت عنده خبره في مجال العمل و شهاده علميه . . لكــن ع مدار كم سنــه ؟؟ وأظن أتكسرت مياديفه عسب يوصل للمستوى إلي ربي أراد له إنه يوصل !! ويمكـــن بعـــد كل شي مشى بالطريقه الصحيحه والمُرضيه !! بس هالحاله يمكن 00.1 % .

هوه صحيح لـكل مجتهـــد نصيب !! لكـن هل فعلا ما نراه في الجرايـد (( الكاريكاتير بخصوص الشهاده بأنها مجرد لوحه معلقه بالجدار ومن غير الحصول على وظيفه ؟؟ )) بلا سبب ؟؟ . . و إلي نسمعه يوميـا في جهاز المذياع !! وأيضا المقالات التي تتحــدث عن قضية التوطيــن . . كل هذا ما جعلني أعبر وأستفسر وأبحث عن هذا الموضوع . . حتى وإن كان لن يصــل إلى نتيجــه . . ولكــن وهل يضر التعبير مافي النفوس ؟؟ . . كما أن سبب كتابتي بالدرجه الأولى هي نسب حصول المواطنين على الوظائف .

ترا . . هل يمكن في يوم من الأيام منح كل المواطنين أصحاب الشهادات الحصول على الوظيفه !! (( من يشارك ويقول رايه ؟؟ ))

يحيى الوطن !!

[نور الإيمان]

مافييه أخرب مودي والسبب موضوع مايسوى
انتو تظنون انه المواطن مظلوم وانا أظن العكس
وأرد وأعيد انا مب ضد المواطن انا ضد المواطن الكسول الى مايقدر ولا شي


وأنا ماسمع قصص من ناس وايلس واكتبهم .. هم ناس أعرفهم واجوف هالشي جدام عيني

أو صح

تراني ماشوف 100 ألف ك مبلغ بسيط


تصبحون على خير

يكفي رد المقاتل و ما له داعي للفلسفة .. بس صدق اتمنى ان تعيشين عيشة ثانية عقبها يمكن بتحسين شوي ...

السموحة اخوي المقاتل .. كان نقاشي ردا على اسألتها و احيانا استفزازها الغير منطقي ..

اما من ناحية تحليل لكل كلمة هذا خارج عن معترك كلامي!!! كل ما في الموضوع انني لا اظهر المواطن و بشكل سيء و بأنه كسول!!

نعم هناك اناس كسولين و لا يفكرون بشيء و لكن هذا الموضوع اصبح نادرا جدا الآن بسبب صعوبة العيش لا اقل او اكثر ...

كان تعقيبا ردا عليها فقط ..

شكرا

[المقاتل]

أختي نور الإيمان . . أهلا وسهلا بج . . .. الله حيّــه !!

أعـــود وأقول الإختلاف في الرأي لا يفسد من الود قضيـــه . . وكما إن نقاشج هنا جميل ويعبر عن الجدّيـــه . . وبالطبع " أنا نفسي لا أقبل أن أقول عن المواطن بأنه كسول أو بطران لأن اولا وأخيرا هالشي يعبر عن نفسي كمواطن وأنا مش كسول ولا بطران ولا أخوي نصور ولا أعتقد بقية الأعضاء أولاد الإمارات بأنهم كسولين . . فـ يكفي مقولة الشيخ محمد بن راشد آل مكتوم الله يطول في عمره : أنا وشعبي لا نقبل إلا المركز الأول . . وشو يعني هذا (( شعبي ؟؟ )) يعني إماراتي . . !! وكمـا أن النقاش مفتــــوح للجميع للتعبير عن آرائهم والموضوع لم ينتهي عند حد لإن القضيه جاريه ولم تنتهي بعـــد . . إنما أردت التوجيه للمسار السليم لأن مضمون الموضوع يتحدث عن البطاله .

شكرا على مرورج أختج . . دمتي بخير .

[شمعة أمل]

المقاتل
ماشفت ردك ..

خذت السؤالين الى سألتهم في البزنس .. ومايستوي أي حد يجاوب عليه ويكون اجابته صحيحه .. لأنه كل شخص غير ومايستوي تقولون انه انتاج هالجنسيه احسن من هذا .. لانه العمل يرد للشخص وجهده مب جنسيته =)

[المقاتل]

اختي شمعة أمل مع أحترامي لوجهـة نظرج بشأن الموضوع ما يسوى " الإختلاف في الرأي لا يفسد من الود قضيه " . . لكــن هذا لا يعنــي إن لم يتم موافقة البعض على رأيج إن الموضوع ما يسوى . . بالعكس يسوى حتى نناقش القضيه مع ناس سلبيين ( مع الأجنبي ) مثل ما وضحتي في ردودج في رأيي ومثل ما وضحوا الأخوان . . مع أحترامي لج الموضوع لم ينتهي عنــد هذا الحـــد . . كما إن آرائج من غير إي دراسه ولا يكفي الإشاره إنج قمتي بقراءة أربع جرائد لا نعلم أسمائها أو أسامي الكتّاب هل هم أجانب أم إماراتيين فقد تكون الأفكار ضد التوطيــن . . !! ومن ثم إن الجهـــــد الإماراتي ليس له مثيــــل فالجهـــود الإماراتيه أثمرت بأنها قامت تصل لـ مواصيل لم تصـــل لها الدول الغنيه والمتقــدمه !!!!!!! فــمن هو صاحب فكرة جزيرة النخلـــه ؟؟ ومن هو صاحب فكرة جزر العالم ؟؟ وغيره والكثير . . !!



كل الود .. (( ولي عوده لإكمال النقاش )) .

[ذنـيـنـي]

حسووونكا

صدقني لو نحن نسوي شرات ما سوى ولد عمي بنوصل للي وصله و زياده
بس نحن نحب نلعب، نشرد من الكلاسات، و اذا داومنا نتأخر على الدوام و ما نصدق يخلص الوقت عسب نطلع. بالمختصر نحن شعب وايد مغرور و وايد اتكاليين و مب قادرين نستوعب بأنه ايام الدلع خلاص راحت و انه الحين لازم نشتغل و نتعب عسب نوصل للي نباه

و ثانيا شو قصدك بـ لازلت وأقول إن ولــد عمــك ربط ظهره وما أعتمـد ع شهادته إلي عنده وبس بالعكس صارت عنده خبره في مجال العمل و شهاده علميه . . لكــن ع مدار كم سنــه ؟؟وأظن أتكسرت مياديفه عسب يوصل للمستوى إلي ربي أراد له إنه يوصل !!

اولا
ما يخصها السنين،، الخبرة موجوده لكن الاهم هو تطوير الذات!!
ممكن انته تتعلم الشي "مع الايام و مع الممارسه اليوميه" و ممكن "تسعى لتكتسب هالخبرة و هالمهارات عسب اتطور نفسك بنفسك"
على سبيل المثال
ممكن تتعلم استخدام المايكروسوفت وورد في الدوام و كل يوم يعلمك حد حركه فيه و ممكن انك تروح تاخذ دوره مدتها اقل من شهر و تتعلم كلللللللل شي في الوورد،،، في هالحاله انته بتكون سعيت لتطوير ذاتك و قررت انك تعلم نفسك شي تستفيد منه بدون ما تتريا انه حد يعلمك اياه


ترا شمعة امل قالت، في ناس يصعدون الدري خطوة بخطوة عسب يوصلون للقمة و في ناس يتريون اللفت يوصلهم و ما يهمهم شكثر بيتريون الين ما يوصل اللفت او شكثر بياخذ، المهم انهم ما يتعبون اعمارهم !!
لا تيلس في المكتب و تشرب جاي و تنتظر ترقيتك، بروحك اسعى وراها و اتعب عسب تحصل الشي الي تباه
يعني لا تتوقع انك تتخرج بشهادة القانون من جامعه الشارجة و تحصل كرسي القاضي يترياك او يحطونك مدير المحاكم اول شي بيحطونك كاتب عدل و عقب وكيل نيابه و عقب ما ادري شو و عقب قاضي و عقب مسؤول عن القضاة و انته صاعد
لازم تصعد الدري خطوة بخطوة و اكتسب المهارات الي تأهلك للوصول لهدفك بنفسك بدون ما تنتظرهم يعلمونك اياها

و ثانيا
انه يوصل لرتبه Director و هو في هالعمر يعتبر انجاز لأنه يعتبر اصغر دايركتر في بريد الامارات،، يعني الي سواه مب شوي و يعتمد بنسبة 90% على الي سواه في آخر اربع سنوات من عمره

و مثل ما قلت حالة ولد عمي نادره تعرف ليش،، لأنه بكل صراحه 99% من ربعنا في الجامعه و في الدوام مستهترين و عندهم نوع من الـ لا مبالاة، غيابات و اهمال و دومهم مب فايجين و و و و و

و هالشي الي بينكره تراه قاص على عمره