استفسـار ..

[دموع قلم]

مسـاكم الرحمـن بأنســه ..


كيـف الحــال ..؟!
عسـاكم طيبيـــن .. بكـل لحظـة .. ^_^


امممممم .. عنـدي استفسـارات >> ويـا كثـرهم .. وحليـلي ..!

الحمـدلله إنـي مخلصـة الثـانـوية العـامة هالسنـة.. وبـدش جامعـة زايـد..
تخـصص شـي من مجـال البسنـس .. سـوا المحاسبـة .. أو التسـويق ..
أو شي من هالمجـال .. بـإذن الرحمـن ..!

واستفـساري هو ..
كيـف ممكـن أقـدم على اسبـونسـر ..؟! .. ومتــى ..؟! .. وويــن ..؟!



وحبيـت استشيـركم على شي بعـد ..
هـل ممكـن إنـي اشتغـل وأدرس في نفـس الـوقت ..؟!
يعنـي يستـوي إنـي أرد من الجامعـة واشتغـل في مكـان ثـاني بعد .. ولا شرايـكم ..؟!

يعنـي تشـوفون هالشي صعب ولا سهــل ..؟!
شي أمـاكن أو شركـات بتقبلنـي ولالا ..؟!
هل هي فكـرة ناجحـة .. ولا فاشلـة ..؟!
.
.



ومشكـوريـن على كـل مـن عطـاني رأيـه .. وكلمـاته ..


المعـــــــذرة ..!

^_^

[خيال الحب]

ان شاء الله الخوات الي في جامعة زايد يفيدونج ..


ولي رجعه عسب اعقب ع كلامج انج تشتغلين وتدرسين :)..

[بنت الدلع]

كيـف ممكـن أقـدم على اسبـونسـر ..؟! .. ومتــى ..؟! .. وويــن ..؟!


ليش محتايه السبونسر !

[دموع قلم]

خيــال الحـــب ..
أشكـرك على مـرورك الطيـــب ..
وفي انتــظار عـودتـك بـأي وقـت ..


بنـت الــدلع ..
الصـراحة بيـني وبينـج .. هـيه محتـاجة له .. وبخـــاااطري آخـذه ..
امممممم ليـــش .. فـي شي .. ولا ..؟!!


^_^

[العجيبة]

سؤال بريء .. شو يعني سبونســر ؟

بخصوص تدرسين وتشتغلين ،
هالفكــرة كانــت تراودني بعـد ، بس بعدين قلت حق شو اعذب عمري دام ما في شي ناقصني !
كنـت أفكـر بالشغل على أساس إني لازم أعتمد على نفسي وأصرف على عمـري بعد الثانـوية .. ههه أتحرى أهلي بيتخلون عني .. بس بعدين قلـت لا أنا بنـت ولازم يصرفون علي ههه مكتوب عليهم يتوهقـون فيني .. وبعدين تحملووني 18 سنة ما بيقدرون يتحملوني بعد لين ما اخلص دراسة وأشتغل ؟! أكيد عادي ..

وأخــوي يقـول : اللي يشتغل بشهادة الثانـوية أو أقل لازم يحط في باله إنه بيتعــرض لإهـانـات مالها لا أول ولا تـاالي !

والله يوفقــج ...

[المنصوري]

سؤال بريء .. شو يعني سبونســر ؟

..

يعني هل كيف اقدر اوضح لج ... اممممم سبونسر يعني حد يرعااااك

ايواااا شرات راعية الشركات للبطولات

اذا شي رسوم للجامعه يدفعها عنك الـ
Sponsor
ومرات يعطيك معااااش

في دبي ما اعرف كيف النظام
بس في بوظبي احيدهم كانوا هم لحالهم يتصلون باصحاب النسب العاليـــة
وفي ناس اتروح اتقدم اوراقها (( في بوظبي عندج الديوان _ جامكو ( حق الطيران ) _ الصحة _ البلدية_ بعد اتوقع الشركات اليديدة التابعة للشيخ محمد بن زايد ((

هذا كل اللي عندي

عن شغل البنت .. انا ضده من الاساااااس

شكراً وموفقة

..

[دموع قلم]

عـزيزتـي العجيبـة ..

صحيـح كـلامج.. بس امممم تـرا أنـا ما أكتـب شي ولا أقـرر على شي .. إلا عقـب مـا أفكـر
في الموضـوع عـدل.. وإن كـنت مو محتـاجة أبـدا .. مـا كنت بفكـر في الموضـوع بالأصل ..

ومشكـورة أختي على كـلامج الطـيب .. ^_^




المنصــــوري ..

أيـوا أنـا أدرس بـدبي .. بـس حـابـة آخـذ سبـونسـر بـبوظبي .. والشركـات اللي أنت ذكـرتهم أنا سألت
عنـهم وكنت أفكـر أقدم عنـدهم .. بس سـؤالي يعنـي كيـف أقـدم .. ومتـى ..؟!.. يعني أسيـرلهم وأقــدم
أوراقي ولا كيــف..؟!

لأن أخوي يقـول أولا.. يمكن ما تقـدرين تـاخذين سبـونسر إلا بعـد ما تبدئيـن في الفـونديشن عالأقل ..
وثـانيا .. يقـول يـوم بتقـدميـن تسيريـن القسم المختص بالسبـونسر في الجامعة اللي تـدرسين فيهـا ..
تخبرينهم أنج تبيـن تاخذيـن سبـونسر وهم بيعطـوني أسماء الشركات اللي تعطي سبونسر.. وأختار ..
وأعطيـهم أوراقـي .. والجامعة بتوصل أوراقي لهالشركة .. والســــــلام ..!

وع فكرة أخـوي المنصـوري .. أنـا مو ضـد شغـل البنـت .. بـس أنـا من ناحيتـي .. ما أحبــذ هالفكـرة
لنفـسي.. يعني أبرك لي وأريح لي يلسة البيـت .. يعني مو من الفئة اللي يحبـون يشتغـلون ويظهـرون
ووووو.. بـس ترا الـواحد اللي يبـا يعيـش بالراحة هني .. لازم يتعـب ويبـذل جهده .. وطبعا باسـتثنـاء
اللـي ياخـذون مصـروفهـم من أهلـهم بدون أي تعـب ..!


مشكـورين ع ردودكـم الطيبـة ..



وعلـى فكـرة .. مو قصـدي يعنـي سبـونسـر .. قصـدي كـان scholarship ..!
وأظنـي الاثنيـن نفـس المعنـى .. تقريبـــا ..!


والمعـذرة ..!

^_^

[وحي القلم]

دموع قلم

لقيت في كتيب هيئة التنمية

انه بنك دبي الاسلامي عندهم منح للى يبون يدرسون محاسبه و تسويق .. الخ

من غير المعاش اللى يعطونج اياه 2000 فالشهر

و الله و نفعني هالكتاب

تدرين.. كنت بـَفره عقب الامتحانات.. بس مادري ليش خليته.. يمكن عشانج

حظج حلو ما شا الله

[دموع قلم]

مسـاج الرحمـن بالخيـر ..
غاليتــي وحــي القـلم ..


شحـالج ..؟!
وشو الإجــازة ..؟!


اممممم حلـو طيــب .. بس يعنـي شـو شـروطـهم ..؟! يعنـي اشتغـل عنـدهم بعـد دراستـي ..؟!
ولـكم سنـة..؟! وكم النسبـة المطلـوبة .. وووكيــف؟! .. وإذا اشتغــل .. يستـوي ببوظبي ولا ..؟!


ومشكــووورة عـزيزتـي على الرد الطيـب .. ^_^

[العجيبة]

ايواااااه .. شكرا يالمنصوري

اقـولج دموع قلم ، لا تعتمـدي كلام أخـوج اللي مب متأكد منه خاصة يوم يقول ( يمكن ما تقـدرين تـاخذين سبـونسر إلا بعـد ما تبدئيـن في الفـونديشن عالأقل ) ، وبعدين مب كل الشركات أظني تعتمد النقطة الثانية من كلام أخوج ..

أنا أقول إذا تبين سبـونسـر صدق ، اتصـلي بكل الشركات وشوفي شو المميزات اللي عندهم وقارني واختاريلج الانسب وقدمي في أكثر من مكان ، وبعدين لا تتأخري زيــادة لان بعض الشركات حاطين فترة ما بيقبلون بعدها أوراق حد ..

وإذا انتي تبين أبوظبي ، ليش ما تقدمي في المعهد البترولي ، دراستهم قوية وأعتقد يعطون مكافآت شهرية للمتميزين وأظن هالمكافآت بتغطي متطلباتـج وحاجتج وساعتها ما بتحتاجين الشغل ..


أو تقـدرين تشتغلين في الشرطة أو أي مكان ثاني ، وطبعــا هالشيء لازم يكون بوااااسطة قوية ، خاصة لو كنتي تبين شغلج يكون مدني مب عسكري ، وعقـب خذيلج تفريغ للدراسة ، بتدرسين وتاخذيين راتب وبعد ما تخلصين دراسة بيكون الشغل هو اللي يتريا رجعتج له ..


نحن عطـونـا كتيب ويا الشهايــد للجهـات اللي تمنـح منح وبعثـات ، وبعض هالشركات تتكفل بدراستج مع راتب .. ما ادري اذا عطوكم هالكتيـب ، شوفيه يمكن تحصلي فيه شركات ما يـت في بالــج ..


هيه صح ، قبل فترة شفـت إعلان لهيئة الأوقاف ، يدرسـونــج شي من التخصصات الاسلامية في الخارج ، ويعطونج راتب 9000 درهم ، ليش ما تشوفينهم بعد ، شوفي وقوليلهم إنج تبين تدرسين هالتخصص في الدولة مع هالراتب ، يمكن يوافقــون ..


وبس .. الله يوفقــج ..،

[وحي القلم]

هم حاطين ثلاث شروط:

1- لا يقل المعدل الدراسي عن تقدير جيد جدا
2- المثابره و الجد على التفوق الدراسي
3- التدريب في البنك خلال فترة الصيف

+

بعد التخرج يوفر البنك فرصة العمل في أقسام البنك المختلفة

ومنح الدراسه في الدولة

.
.

و بس.. هذا اللى مكتوب

اتصلي بهم أحسن عشان تعرفين باجي التفاصيل

[وحي القلم]

و التخصصات المطلوبه :

- إدارة الأعمال
- التسويق
- التجارة الالكترونية
- المحاسبة
- تمويل المصارف
- هندسة الشبكات

[بنت الدلع]

اذا تقصدين السكولار شب
شي في الشارجه عندج دائرة الكهربا والمياه
يعطون منح
بس اذا جوازج دبي انسي السالفه
شوفي يمكن في دبي عندهم

والسبونسر الي في جامعة زايد
هممم ما اظن فيه
بس فيه مساعدات
يعني اذا الوحده ماتروم تشتري اللابتوب على ما اظن تملي على طلب
واذا هم شافو الحاله تستاهل بيساعدون البنت
وبيكون اللابتوب على حسابهم
بس مايعطون راتب شهري
انتي اتصلي واسئلي احسن

وانا واايد أؤيد كلام العجيبه
ليش ماتقدمين على المعهد البترولي
مستقبله مظمون
بس ماعندهم سكن للطالبات
اذا عندج حد ساكن هناك
لاتضيعين الفرصه

[خيال الحب]

مممممم عندج بنك راس الخيمه .. فاتح فروعه بكل امارات الدوله..

يعطونج 2000 درهم بالشهر بدون ما تداومين عندهم.. وعقب ما تخلصين يمكن تشتغلين عندهم سنه وخلاص..

هالي سمعته من الشباب..

واحس حلوو انج تشتغلين وتدرسين نفس الوقت..

وبعد بالشعل ما بيعطونج دوام كامل.. احيد يوم كنت اتدرب كانو وياي اثنين من التقنيه يدامون من 7 لين 12 وعقب يطلعونهم.. ويروحون التقنيه

ويوم عندهم امتحانات يعطونهم اجازه اسبوعين حق الامتحانات

بالمولات بتحصلين كاونترات لمشروع رعاية الكوادر الوطنيه

سمعت انه حلوو

لو تبيني اسالج شو مميزاتهم فالج الطيب ^___^

ولو بغيتي اي نصيحه نحن حاضرين وفي الخدمه

[ايه احبك]

تبين رايي تشتغلين او تدرسين احسها صعبه خاصه اذا بدشين جامعة زايد
لنه زايد ما عندهم مسائي ولا صباحي ولي هو متوافر في الكليه
ثاني شي بتتعبين حبيبتي انتي توج مخلصه ثانويه يعني ما تهيأتي حق دوامات قوم باربع او خمس
انا اول ما دخلت الكليه دخلت فوندشين فقلت بعد هالسنه بدرس وبشتغل جي يعني عسب اترس السي في مالي حق التخرج لكن اكتشفت انه كل سنه اصعب عن الثانيه وانا تخصصي جنرال بزنس وانشالله السنه اليايه بتخصص تسويق ..فبقولج دراست الجنرال روحه يبالها راس وااااايد تعب فا انصحج انج ما تشغلين وتدرسين لنه في شركات ما ترحم بعد لكن اذا بغيتي تترسين السي في مالج شراتي اشتغلي صيفي لو لمدة شهر واكتبي في سي في شرات ما انا مسويه
بس لا تسرعين وتشتغلين في اي دوام جزئي قبل ما تتأقلمين مع دواام الجامعه والله يوفقج انشالله

باي ذا وي ..ما توقعت انج مب متخرجه من جامعه او كليه لنه ما شالله اسلوبج خليني اتحراج وحده عوده ^_^