[ مـواقــف مـن ~ منـه ومنــاك ! ]

[قرموشة]

الســـلام عليـــكم والرحمـــه

موضوع البرمـائي خـلاني اتحمـس وأطلع شوي من اللي في خـاطري
شكـرآ يالمنـصوري

مـوقـف مـوقفيـــن ثلاث أو أكـثـر
( انزين قولي باركـنات وفكـينـا )
لا مـب جـي .. أقـصد انـه تمر علينـا مـواقــف وايـد تخــليــنــا نضحك ونشـق الحـلـج
او نصـيح والدموع أربع أربع وأحيانـا تكون أسخـف من السخـافه بس يكـون لهـا ذكـرى في حـياتنـــا

مـواقـف مـريت بهـا في حـياتــي
وكـانت لهـا بصمــه .. اخـليــكم مـعــاهـــا

في الشــارع ع درب الجـامـعه .. تمشـي ع 80 وكـله من الرادار اللي حـاطـينـه
الشارع فاضـي ومـانروم نسـرع ( ع فكره ما يحـطونـه الا على آخر الشهـر أو بدايتـه ) .. فجأه تمـر حـذالك رنــج حمـره , وتقـول يالله مـحـلاهــا
بعـد شوي مـن تتجـاوزك وتخـطف .. تلاقـي راعـيهـا المزيون الكشيـخ يرمـي الـ كلينكـس مـن الدريشـه
وتنصـدم ! عادي استووا المواطنين بعـد يسوون جي مـب بس الهنـود .. !

تذهـب لكـليـه التقنـيه .. أقـصد فرع البـنــات
تزور ربعـك وتسأل عنـهم وتنصـدم بالمظــاهـر اللي تـشوفهــا .. انطـر حلجـي مـن كـثر ما قمت أقـول
OMG هـاي وين تبــا !
عـبي بأشكـال وأنـواع .. ما برمـس عن الخـفااش ولا بات مان ولا الفراشـه أو اليعـسوبـه ان صـح القـول
برمـس عن عـبايـه
( بو الشبـــــاب )
مـفــصلتنهـا مخـصوص عند دار العـز أو الكـشخـه للخـياطـه >> للعلم بس ما دل غير هاييـل
وطبعـــا الشعـر حـدث ولا حرج مـبتـر وبالموس بعـد وفي روايـه أخرى بالمكينــه وعـلى رقـم 3 .. تمــر حـذالك وتجيسـك هاييـج الرعـشه !
تقـول واحـد من الشباب مـر من عندك مـب بنــت
ولـن أرمـس عن تقنـيه الأولاد
( فيهـا العكـس وعاد انتوا تخيلوا )

سايـريين المـووول ويا حـينـا
نـزلنــا من المـوتر بعـد ما كنـا يالسـن فوق بعـض .. ماشي مكـان سايرين ويا عـيال الخالـه ومتلصقين في السيــاره
نـدور منظـره نرتب فيهـا عمـارنـاا ويا مـقربهـا منظـره السيـاره اللي حـذالنــا .. توايـج شـوي وتعـدل الوقايـه
وتكتـشف انــه السـيــاره مسكـونـه ( آآقـصد فيهـا حــد حرمــه و ريــال ) حتــى يتكـسر ويحـترق ويهــك مـن القفطــه
وياازود القفطـه لو عدت الحركــه وطـلع في المـوتر بس ريــال ويضحـك عليــك
مـوقف ما أنسـاه فعـلا !

تطـلع مـن البيـــت تقضـي شغـله وترد ..
ولكـن انت واللي ويــاك تيكـم أفكـار جهنمـيـه في طـريج العوده ..
وكـان مـن الافكـــار
( شرايـكم نـصوّر السيــايير اللي تمشـي في الشــارع أونـه رادار )
طـبعـــا البقيــه هـزوا رؤووسهـم دليلا عـلى الموافقــه مـش الرفض + شـق الحـلج شبـر
ويالله شغـلوا الفــلاش وصـوروا أي سـيـاره يايـه صـوبنــا
والمضحـك في الســالفــه انـه وحـده مـن السياايير الماشـيـه خففت السرعـه بعـد ما لبـق الفلاش عليهــا ( تروع الفقيـر)

صيــف وحـر ورطـوبـه
كـابلات الكهربـا ما تتحمـل .. البـارحـه ربـع الشارجـه مـافيهـا كهربــا
وكـان مـن المنــاطـق منطقتنـا الجمـيلــه اللي تعـج بالحـفـر والكثبـان الاسمنتيــه نتيجـه مـشـروع المجـاري الجديد
ومـاكـان منــا الا بعـد ان سكـرت الكهربــا الا اللجـوء الى السطـح والاستمتـاع بمنظـر الشارع المنـير من بعـيد
شعـور جمـيـل يخـليك تتذكـر أيـام زمــان كـيف كـانوا الناس يعيشـون بلا نـور
بس التجربـه لازم تكـون أيام البرد مـب الحـين في عـز الحـر ..
فطسنـــا ونحن نتريا ردت الكهربـــا .. حتى الشمـوع ذوت وبمعنى آخر انتحـرت

مـشغول بالدراســه امتحـانــات .. كوازاات أساايمنــتـــات
بروجـكــت منــه وبروجكـت منــاك ....
الوالده تعرف انـه نحن مـشغوليـن وتسيـر ويا ااختهـا ( اللي هي بطبيعـه الحـال خـالتـي ) أوني بس أوضـح ..
وتشتري شـوي بديهــات وتناانييـر وبناطليـن حـقنــا حـق الاجـازة أو الطلعـه أو الصيـف أو العزايـم اللي بتينــا قريــب
وانت تشـوف الساايـز وتحـط في بــالك خـلاص على قيـاسك وماالـه داعـي تقيسه مـن أول ويديد
أقـولكـم مـشغولـه تقولون قيسي هـ الشي الفلانـي !!
المهم ينـفر في الكبت ليــن اليـوم المـوعود * بالاصـح يوم عزيمـه تخرج وحده مـن الاهـل
ويوم تطـلعه مـن الكبت تأتيك الصفعـه اللاسعه لتكتشف انـه ضيـج أو قصــير .. ويجـيسـك احـباط مـن جمـيع الانـواع وتقول مابا أسير ما عندي شي ألبسـه
ولكـن حـقيقـه الاحباط هذا ياي مـن زياده الوزن مب من شي ثانـي

مـواقـف كـثير تمـر علينــا وتكون لهـا أثر في حـياتنـــا ..
خبرونـي عن مـواقفــكم .. سواء السخيفـه منهــا .. أو اللي تضحـك أو الي تصيح
يعنـي عطـونــا من كـل بستان زهـرة وخلونـا نستانـس بقـرايتهــا
أحـس انـي رمـــست واايـد وااايـد .. فاعذروا هرطقاتي الكيبورديه الخارجـه من لاب توبي المجنون

وأخيرا
حـقوقـي مـحـفوظــه لي
قرمـوشـة واحـات بن دبي
16-6-2007
ترا في قرامـيش ثانيين متوزعين في كل مكـان لول

[بنت الدلع]

مواقف جميله
ولا انكر باني استمتعت بقرائتها

ومن هنا ابتدي بسرد بعض مواقفي

في الليل
البنت تبا تسير بيتهم
اختها قالت يالله انا بوصلج
رديت عليها لا ماعليج خليني بوصلها
الا هو في الفريج
قامت البنت
الا اشوف الابو شال السويج وساير بيشغل السياره
وانا بابا خلني انا بوصلها
خل عنج يالله ركبي ورا
انزين بابا في الرده انا بسوق
انتي ركبي الحين ويصير خير
على امل اني بسوق
في الرده
الاخت تقول انا اركب ورا؟
الابو لا ليش خلج يالسه
تراها بتسوق
نص الليالي وين تسوق خله تحصل الليسن بعدين

>> وانا راكبه السياره بسرعه بسرعه ولابسه نعال اخويا الاسود ويايه ليش ؟ <<


===

الكل معزم يسير السينما ويشوف شريك
منها يتونس ويونس اليهال ومنها تغيير جو في الويك اند
هاه فلانه بتين ويانا
طبعا فلانه ميهوده وصار لها يومين طايحه في الفراش اليوم بس بطلت عيونها
لا شكرا بروحي تعبانه ماروم عالطلعه
الجماعه سارو
بعد نص ساعه الأخو اتصلي السينما واسئليهم متى يعرضون اوشنز ثيرتين
طوط طوط رمست وخلصت
العرض الساعه 9 ونص ، خلاص سيري اتلبسي واتصلي في فلانه وفلانه عسب يجهزون
الساعه 10 نحن هناك
السيتات الي ورا كلها ماخذينها
بس الي جدام فاضيات
والفلم بادي من نص ساعه !
وقفنا وسولفنا وردينا
على اساس بنسير سينما ثانيه عالساعه 12
الكل تكيسل ويته النوده ونحن ميلّسات بعبينا


===


طالعين من العرس
وسايرين صوب سيايير اخوانا
مافييييي حد ابدا غيرهم وكمن واحد من الاهل هاكي الصوب
واحد من الاخو واقف يرمّس ولد الخال
الاخو عرفنا although كنا متغشيات
مجرد دعابه لا اكثر
قام ورقم اختي
وطبعا ماي كزن انـ ـ ـنـ ــ ـته !!! .. وتلعثم المسكين ماعرف شو يقول

نقطه

وللحديث بقيه

[قرموشة]

آآه كــم تحطمــت لـرؤيتـي تـلك المـشاهـــدات
وهـذا العـدد مـن الردود .. ( تسمـونـه عـدد !) لول

بنــت الدلـــع
شكـرآ لــج مــن صـمـيم القلـــب عـلى مآزرتـي هـذه
مـواقـــف جمـيـــلـه وبسيـطـه ولكـن لهــا ذكـرى مرسومـه في أعـماق الذاكـره
سلمتــي عزيزتـي

منــاجـــاه لأصحـاب الاقـلام الذهبيـه والفضيـه ولا مانع من وجـود البرونزيه
عبـروني شـوي ههه

[العجيبة]

مرحبا



إحــراااااااااج وغـبـاء ..

يقولكم مرة من المرات العجيبــة من كثر الايميلات اللي في ماسنجـرها
ولأن الكبــر شين ، دشـت وحدة ايميلهـا عبارة عن اسم بنـت ..

هالاسـم هو نفسه اسم ربيعتي ، وتميـت أسولف ويا البنيـة على أساس انها ربيعتي اللي أعرفها واللي وياي في الصف أصلا ..
ودق سواااالف وما ادري شوو ..
حتى كنـت أتكلم وياهـا وأتمصخـر على سالفة الـ ( لاه ) مالتهم في الشارجة ، وهي أصلا وايد ترددها ..
وبعد من بين السوالف إني قلتلها : أطرشلـج صورتج وانتي تاكلين الايس كريم ( عندي صورتها صدق )
جان تقول : لا لا ما أبــاها وتضحـك ..
استغربت شوويه لانها دووم تطالبني بصورهـا وأنا أقولها أوكي أوكي بييبهن !
المهم ما وقفـت عند هالاستغراب وايــد .. كملت سوااااااالف سواااااااااالف
وعاد عجوووب يوم تبدا سواااااالف دورولهــا حاجة تسكتها خخخخ

فجأة سألتها : وين انتي .. أكيييييد في الشارجة لاه > أسأل وبروحي أجاوب خخ <
جـان تقول بكل براءة : لا أصلا أنا من دبـــا

ويهي استوى اخضر أحمر أزرق ! أي دبــا !!!
رحـت أنبش الايميل ، فاكتشـفت إن ربيعتي أصلا إيميلها مب على اسمهـا وماله خص في اسمها أصلا

هيهيهيهيهي

وبعدين اعتذرت لهـا ..
بس فجأة نطت في بالي فكـرة ..
أصلا هذي شو يابها إيميلي ! أنا من وين أعرف ناس في دبا !!
طلعـت الأخـت يالسة على إيميل ما يخصهـا ، وتتحسبني من ربع راعيية الايميل



هذا شي من أشياءات ..

شكرا قراميشوو عالموضوع الخفيـف

[قرموشة]

صحـفيــه الواحــــاات [ العجييبــه ]
راجـعـه لــج ولــردج .. وبحـط كـذا مـوقــف
بسـير أتغــدى وأرد * غدا هـ الوقت متـى صارت
.
.

[قرموشة]

العجـيبــــه
هههههههههههههه
عــاد تخـيلـــي لو كــنـتي مطـرشـه الصـوره لول
أسمـيهــا الا ســـالفــه حـلوة ..
تسلـمـين عزيزتـــي ..


ذكـرت سالفــه صـارت لــي بس عـلى التيلفـون
بس الحمدللــه انهـا كـانت مـكــالمــه قصـيره والا



مـستــانـسه جـدا .. أبــا أسـير بيــت خـالتـي واللي مـن زمـان ما شفتهــا
أتصـل على رقمهــا مـن تيـلفون الوالــده ..واذا بشخـص يرد عـلي ..
لم ألق السلام ولا شي عـلى طـول قلــت مـن دون ما أسـمع صـوت الشخـص في الطــرف الآخـر
( ألـوووه خـالــووه جمـييييييييله ؟! )
واذا بـي أنصعـق لأجـد أن مـن يرد علــي ذكـر خـشن الصـوت لا يمـد لي بِصــلـه ويقــول
( صـح انـي حـلو بس اسمـي مـب جمـيـله )
أصبت برعـشه غير طبيعــه وأذا بي اتمتم
آآ .. آآآ .. الرقم غلط بااااااااي
الحمدلله طـلع انسان طيب ومارد يتصـل




مـوقــف آخــر صار لــي سخيـف وايـد بس صدق ضحكت عـلى عمـري ضحـك

اتصـــل على تيـلفون الوالــــد وأعــرف انــه في الجمـعيــه ويــا الوالده
واذا بحـد يرد عـلي .. لــم انتبه لـفرق الصــوت أبــد * مـن الحـشره اللي في الصــالــه
قلـــت لــه ( بـــابـــااا هـات لي شامبــو !! أبــا الشامبو الفلانــي مـب تيـب لي هـاذااك ماباا ما أحـب ريحتـه مــوول ) * انزين اتصـلي في امـج وخبريهـا لازم أبوج لول
فـ رد عـلي الشخـص وقال .. ان شاء الله بــابــا .. ما تبين شــي ثانـي ؟!
قلــت لاا بس شكـرآ !
فلمـا وصـلوا البيــت .. قلـت لـه أبويـه وينــه ؟!
قالـي شـوه !؟
قـلت الشامـبو الفلاني .. فـرد علي بانـي لــم اتـصـل فيـــه بالمـــره ولم أطـلب منــه شي وحـلف

ويهـي تكـسر واحترق وتصـلخ بعــد
برايـه هـذاك وحليــله ياب لبنـته شامبو

.
.

[قصايد غلا]

أغبى وأسخف موقف أتذكره أحينه

هو : مرة كنت ويا بنت عموتي العوده ، كانت تبا تفصل عبي

المهم دخلنا المحل و فصلت ، يوم يينا بنظهر جان تقول لـ صاحبة المحل ، شو اسمج ؟

أنــــــا أعرف إن الحرمه أسمها "نجمة" :)

لكن بنت عموه ما تعرفه ، و في هاييج الحزة بنت عمّوه امظهره بوكها وقابظتنه في إيدها و مرسومة عليه نجمة لكن ماركته : لُـــوِِي :

عاد الحرمة "راعية المحل" تبا تتفنن و تسوّي جو

جان تقول اسمي على ماركة بوكج ===> حليلها تقصد إن أسمها نجمة على النجمة المرسومة

لكن بنت عموه فهمت إن أسمها على الماركه ، جان تقول لها بصوت هاااااادي اسمج لوي :$؟!

أنا عاااااااااده تمنيت الأرض تنشق وتبلعني ، لأني بصراحه ما أتحمل أشوف أو أسمع شي يضحك

وهلـــــــــــــكت من الضحك على بنت عموه وعيني كلها دمووووع من الضحك

جان يحترق ويه راعية المحل ومن القفطة قالت لاااااااااء نجمة

[فركوشه]

مره ونحن سايرين بوظبي

كنا فالسياره انا واخوي واختي..

وقفتنا الاشاره اللي صوب اسواق الاماراات

وواحد زلمة بطل باب السياره..وانا على طوول جوفوا الرياال بطل الباب

وكلنا بصووت وااحد.. ياااااااااااااااااااع.. الريال تفل فاالارض..

.

فاالكلييه.. كنت ارمس بناات الكلااس وانا كنت اميووده حبل السكريين مالت الداتا شو

واول ما فجيت ايدي.. نقعت الشاشه وطااحت.. ودخل السير..

جان يقوول.. فكلية الشباب ما استوا جي

.


يسلموو عالموضوووووع

^^

[ملاك الروووح]

::

وعليكم السلام ورحمة الله وبركــــاته

:

لووووووووووووووول

قرموشتي ..

أسميج سوالف ..!



عيبتني حركة الرادار وايد .. يبالي أسويها تصدقين !


::


مواقفكم كلها تضحك .. لوووووول

ما أتخيل عمري انحط فيها !!

:

سايـريين المـووول ويا حـينـا
نـزلنــا من المـوتر بعـد ما كنـا يالسـن فوق بعـض .. ماشي مكـان سايرين ويا عـيال الخالـه ومتلصقين في السيــاره
نـدور منظـره نرتب فيهـا عمـارنـاا ويا مـقربهـا منظـره السيـاره اللي حـذالنــا .. توايـج شـوي وتعـدل الوقايـه
وتكتـشف انــه السـيــاره مسكـونـه ( آآقـصد فيهـا حــد حرمــه و ريــال ) حتــى يتكـسر ويحـترق ويهــك مـن القفطــه
وياازود القفطـه لو عدت الحركــه وطـلع في المـوتر بس ريــال ويضحـك عليــك
مـوقف ما أنسـاه فعـلا !


احم احم

نفس الموقف استوى لي .. بس كنت في المدرسه ..

أيام الثانويه العامه .. وكنا متأخرين في المنهج .. ف داومنا يوم الخميس الصبح ..

وأنا أتريه ابويه .. رحت اعدل شيلتي ف جامة أبلتنا .. أونه عاكس يعني ..

وعقب ما عدلتها .. وأنا خاطفه مع ربيعتي .. ليش ما يهرن راعي الموووتر ..!

وطبعاً ما يحتاي أكمل وأقولج شعوري أو موقفي !!


:

بقولكم موقف يا ف بالي الحين ..

وبكمل باجر ان شاء الله باجي المواقف .. وياكثرها طبعاً


يقووولكم كنا رايحين الستي أنا واختي .. وشفنا المطرب يوسف العماني ..

خطف حذالنا ..

المهم ردينا البيت .. وقلت حق أخوووي .. قووول شفنا منو اليوم في الستي ؟!

قالي منو ؟

قلت له يوسف العماني ..

جان يقولي : زين والله .. وقولي نحن شفنا منو بعد اليوم ؟

قلت له : منووووووو .. ( وأنا مستانسه اوني أبي أعرف شاف منو ) !

قالي : شفتج انتي واختج بروحكم تتمشون في الستي ..


صادوووووه !!

::

بقولكم موقف ثاني استوى لي في العمـــره ..

لوووووووووول

اسمحوا لي والله بس كل ما أتذكر السالفه .. أموت من الضحك على عمري !!


المهم

كنا رايحين نصلي في المسيد النبوي .. في المدينه ..

ويوم رحنا هناك .. نسمعهم يقولون الروضه والروضه .. وبنروح نصلي في الروضه

ونحن ما ندري شو السالفه .. رايحين نشوف قبر الرسول صلى الله عليه وسلم ونسلم عليه ..

وطبعاً أول ما شلوا الحواجز .. الناس والحشووود قامت تربع .. ونحن معاهم

وماندري أصلا شو السالفه لووووول .. وفعصونا الحريم .. يدزوووون دز ..

واختي تزاعج وتقولي بمووووت .. بختنق .. وأنا مادري أضحك عليها .. ولا أصيح على حالنا

المهم .. الحشود وصلونا صوب قبر الرسول .. ورحنا نسلم عليه ..

وهناك شفنا اختي .. قالت لنا هاه صليتوا في الروضه ؟

نقولها أي روضه ؟ تقولنا عالفرش الأخضر ؟ نقولها أي فرش أخضر !! لوووول

المهم

اليوم الثاني عقب ما عرفنا شو السالفه .. رحنا عسب نصلي ..

وأنا يالسه أصلي .. في الركعه الثانيه خلاص يالسه أقرا التشهد ..

شوي الا اتيني ضربة بالقب على راسي .. .. وأسمع وحده تقول يالله يا حجه اخلصي

( هاي وحده من المسؤولين هناك )

وأنا تحت تأثير الصدمه والضربه .. ما كملت الصلوات الابراهيميه ..

قطعت صلاتي .. سلمت على طول .. ونشيت .. لوووووول ..

انزين بكمل صلاتي يالهبله

::

جني وايد طولت عليكم هع هع

شكراً لكل من وصل لهنيه لووووول

[قرموشة]

قصــايــد غـلا
مـاقصـرتـي فدييتــج .. مـوقف حـلو وممتــع ..


.
.


أيــام الثانويــه العــامـــه وبدايـه الاجــازه 2-5-2005
يـوم مـيلادي ويــوم حفله تخـرجــي ..
انتقــلت للمـيـلس وحـطيت كـل كتبي وأوراقـي هنــاك أونـي أغيـر جــو
كـانت امــي وايــد تحـاتينـي مـثـل باقـي الامـهــات بس أحـس انهـا كـانت بزيــاده * يمكن لاني البجر واول مـره تمر بها التجربـه ..
كـل يــوم كــنت أحصـل غــدا أوعـشا مـن بــرع .. * يعني اطلب وتمنــى اللي تبــاه وتحصله يدامــك
وغـيره مـن الاشيــاء المـاديـه اللي مـن أأشر عليهــا ألاقيهــا يداامــي
النـــاس في هـ الفتــره تضعــف أقـل شي 5 كيــلو .. بس قرمـوشـه الرب حـافظنـهـا زادت 5 كـيلـو جـان ما يكونون أكـثر
والحمدلله .. الدلــع هـذا ياب نتيــجــه والا جـان دفنونـي مـن زمــان
وليـن الحـين اعتبـر يــوم تخـرجـي واحـد مـن أحـلى أيــام حـيـــاتــي .. وحتـى أذكـر انـه مــن أعلـنوا النتــايـج .. تيـلفـون بيتنــا * ماكـان عندي مبايـل مـاسكـت أسـبوع مـن التبريكـات وغيره ..
فتره مـن أحـلى فترات حياتــي


.
.
.

[الثعلب الرمادي]

قبل سنوات و بين الفلل الجميلة كان الثعلب الرمادي يخبأ علبة سجائره المارلبورو الحمراء و معها الولاعة تحت مجموعة من الصخور بشكل لا يوحي أبدا بوجود أي شيء تحتها و في بعض الأحيان كان يدفنها تحت الرمال في مكان يتذكره جيدا و لم يكن يشعر بالراحة على الإطلاق خلال اليوم إلا عندما يقضي بعض الوقت في ذلك المكان الهادىء و الجميل و الذي لا يمر به أي أحد على الإطلاق و كان سيميه وكر الذئب و لكن خلال وجود الثعلب الرمادي حصلت حوادث كثيرة و لكنني سأسرد أهمها ...

حادثة سقوط قلب الثعلب الرمادي ...

كان الثعلب الرمادي بين الفلل الجميلة و كان الجو جميلا و كان في حالة إنتشاء خاصة و كان غائصا إلى العمق في افكاره الخاصة و هو يدخن طبعا إلى أن سمع صوت ارتطام حجر بجواره فادار رأسه إلي الجهة التي اتى منها الحجر فإذا به شاب و قد تلثم بغترته و طمست ملامح وجهه بشكل كامل و لم يتعرف عليه الثعلب الرمادي و لكن الخوف العميق كان قد قضى على كل افكار الثعلب الرمادي و في النهاية انتبه إلى أن موقعه السري قد تم كشفه و قد يفتضح أمره قريبا و يقع في مشاكل كبيرة لا نهاية لها و لكن الشاب و رفيقه كانوا قد اختفيا. و بدأ شعوري بالتوتر يتزايد و يتزايد إلى أن اتوا و رأيت وجوههم و تعرفت عليهم و كانوا اثنان من الرفاق و قال أحدهم مازحا موجها كلامه للثاني: لقد أخبرتك أن تصوبها إلي رأس الثعلب الرمادي مباشرة حتى يعتدل مزاجه بشكل كامل، كيف لك أن تخطأه؟ و بدأنا بالضحك و جلسنا هناك و و اعطيتهم بعض السجائر و دخنا و كان الجو رائعا في ذلك المكان الهادىء و كان لحديثنا وقع خاص لازلت اذكره إلى الآن و كان ذلك اليوم للأسف هو آخر يوم رأيتهم فيه حيث فصلتنا الحياة بعد ذلك، أعلم انهم ارادوا ممازحتي و لكن ذلك الموقف كان أثقل مزحة تعرضت لها في حياتي و أسوء موقف على الإطلاق ....

[هزاايم]

..............

[أنامل قلب]

موضوع حلو .. بمواقف أحلى .. بأعضاء أحلى وأحلى .. ^_^ ..

:

وجان تذكرت شي بحطه لول ..

[الدلووووعة]

كشششششششخة مواقفكم انا بقولكم موقف استوى من فتره ^_^


يقولكم انا وابويه اختيه سايرين هوم ار اس
ندور غرف نوم وجي المهم انا اصلا سرت وياهم وكنت مسطله وتوني راده من الجامعة بس كنت ابا اظهر فسرت وياهم المهم دخلنا وجي وشفنا اللي نباه

والحينه خلاص بنرد البيت ونحن نشمي بنسير صوب الباركنات خخخخخخخخخ ابويه واختيه سارو جدامي
وانا وراهم المهم وانا منزله راسي وامشي وهب منتبه للسياره اللي يايه وزين ماكفخني راعي السياره يوم يود البريك جان انتبه خخخخخخخخ
صدق كنت مسطله ولا بعد يوم رفعت راسي انتبهت انهم 2 فالسياره ويظحكون علي خخخخخخخ عاد انا من الفقطه ركض عند ابويه واختيه وابويه وجان اقولهم زين مامت خخخخخخخخخخخخ

بس صدق موقف يخوف وينقع من الظحك خخخخخخخ

وبتيكم المواقف اليايه خخخخخ

[قرموشة]

فركـــوشـــه

يااهــي مـوااقــف لول
تسـلم يمنــاج حبوبــه ع الرد ونتريــا مـواقــفـج اليــايــه