تســلميـن قرمووشـه على الموضوع الجميـل



مواقف لها بصمات في حياتي..

سنه من السنيـن كنا مسـافريــن .. وطالبين روم سرفس للـريوق.. من بين الأكل كان شي بيـض.. تعرفون هالبيض الى بعده مب مكسوور *لول ماعرف شو يسمونه* .. بس شكله بيضه .. لكن بيضه مطبوخه xD
المـهم!
أبـويه قرر يسويلنـا سحـر .. وجـان يقرر يكسر البيضه على راسي * وحليلنا ماكنا ندري انه البيضه اولريدي مطبوخه .. عبالنا بيضه عاديه*
المـهم
كســر البيضه على راسي .. وانا نسـيت سالفة البيضه لانه سمعت صوت الجرس .. ويالسه اتحرطم على خواتي عشان يتحركون ويفتحون البـاب .. بس كلهم يطالعوني بنظرات غريبه انه ليش نفتح الباب؟ .. وعاد انا مغيضه وفي خاطري بلاهم مستخفات .. يعني ليش بقوللهم يفتحون الباب!!! ترا حد دق الجرس duh
وجان اسـير وافتح البـاب .. ومحد عند الباب
وأرد عند ابويه وخواتي واتحرطم .. "يهال سخفيين يدقون الجرس ويشردون"
اختي: أي جرس؟
انا: شو اي جرس .. ليكون انتي صمخه وانا مادري
اختي: شمعه انتي بخير؟
انا: أبووويه جوفهااا .. والله اني مب متفيجه يعني شو بيستويبها لو تسيـر تفتح الباب يوم حد يدق الجرس؟
أبويه: محد دق الجرس
انا: بلاكم ماتسمعون .. يوم كسرت البيضه ع راسي حد دق الجرس

وفجأه اجوفهم كلهم يضحكون
وانا اتحرطم ..

تعرفون شو اكتشفنــا؟؟؟؟؟؟
انه الكااارتووونززز صح يوم يرسمون شخص يدعم شي ويسمع صوت العصافيير .. تراا جي استوالي .. يووم كسروو البيضه على راسي مادري كيف بس سمعت صوت جرس حليله مخي خرف





.
.
.


الموقف الياي علمني اني دوم دوم دوم لازم أجيّك رقم السـياره قبل لأدخل فيها
هالموقف صار من كم من سنه..
في هالفتره ابويه اشترالنا لكزس سوده للمدرسه .. بس هالسنه كانت سيارتنا الوحيده الى لكزس سوده يديده .. الجديمه ليتاتها كانت غير .. ف عشان جي كنت اعرف انه هاي سيارتناا.. لانها كانت الوحيده
المهم
خلصنا مدرسه وانا يالسه اتريا الدريول واسولف ويا ربيعاتي .. وهاليوم كنت صدق تعبانه ويوعانه وراسي يعورني ومالي بارض لـشي..
ف شفت اللكزس اليديده وصـلت وفي خاطري واخيرا بروح البيت .. واطنز على ربيعاتي لانهم بينطبخوون في الشمس
وجان اعبر وامشي للسيـاره وميوده الباب اني خلاص بفتح البـاب .. لكن مادري جي حسيت بإحساس غريييييييب .. جان امشي شويه على ورا .. على اساس بجوف الشخص الى يسوق السياره ... وجااان أنصعق .. الدريول مب دريولنا البكستاني .. الدريول واحد مواطن وجان امشي على ورا شويه واجوف رقم السياره .. وجااان انصعق زياده .. سيارة وحده من بنات الشيخ .. وجان اصد على ربيعاتي .. واجوفهم كلهم يضحكون عليه
وجان اتأدب وأرد لربيعاتي وحليلي متقفطه ..
وجان تي سيارة لكزس ثانيـه .. وقلت اكييييد هاااي سيارتنا .. وجان اعبر وخلاص يايه بدش السياره واسمع ربيعتي تقول ..شمعه لاااااااا .. وانا في خاطري بلاها البنت .. جان اقوللها شووو .. وجان تقولي مب سيارتكم!!! .. وجااان أرد على ورا شويه ونفس الحاله دريول مواطن والرقم رقم سيارة وحده من بنات الشيخ .. وجان أنقفط وأرد مكاني
وجااان تيي لكزس ثالثه ..عاد هالمره ماطعت اسير .. قلت اكييد مب سيارتناا .. جان ايلس في مكاني وربيعاتي يقولولي شمعه سيارتكم يت .. وأرد عليهم" مب عليييه هالرمسه .. أدريبكم تبون تقفطوني " ويلست في محلي .. واخر شي اجوف هاللكزس تيي صوبنا واختي تنزل الدريشه" وبعديين وياج .. متى ناويه ادشيين السياره" .. لول قفطه

يوم السيايير مب سييايرنا .. اسير عندهم .. ويوم السياره سيارتنا .. طااااااااااااااااااااااف

حليلي ماكنت اعرف .. ماشاءالله هاليوم الخوات الثلاث كلهم اشترو نفس السياره ف تلخبطت .. ومن عقب هاليوم حفظت كل ارقام سيايرنا عشان ماتوهق مره ثانيه فشيـله!