انتــــــه وفضولك .؟؟؟ اللي يذبح

[الشوق]

الـــــسلام عليكم ورحمة الله وبركـــــــــاته ....

كيف هي حياتك وانت عايش بين ناس اتحبهم وتحترمهم .. واييك احساس انك تهتم بأناس عندهم مشاكل
لكن احساسك الداخلي يقولك (( خلك قوي ورز بويهك وحل هذي الازمه )) شارك معاه حتى اذا لم يطلب منك ذلك ..
لكن اذا انجلب هالفضول لحد (( التدخل اللاشعوري)) من طرفك .. والتصرف بالامور من غير ما يطلب منك ..
وساعات هالاحساس ممكن يصيبك .. ويخليك اتفكر واتحاتي .. وتزعل يوم يكون في موقف صاير .. وهالموقف كبر وانته فاتك .. وما لحقت عليه ..
تيلس تبحث وتسال واتدور. .. وين انا كنت .. وشو اللي صار .. وشو مستوي ... وليش صار ومحد خبرني عنه ...
.
.
.
وهذا اللي يصير من بيننا في حياتنا اليوميه .... وسوف اضرب امثله لبعض انواع الفضول ,,,

مثــــــــــال اســــــري ,,,,::
لما اتكون هناك مكالمه بين الزوجه وصديقتها .. واتكون الزوجه مندمجه في تفاصيل هذه المكالمه .. ما ان تهم الزوجه على الاغلاق ..
- الزوج :- من اتكلمين
- الزوجه:- صديقتي فلانه .
- الزوج :- وش قالت...؟؟ وش تبى ؟؟ وليش سالتج عن ( كذا وكذا وكذا ..... )
حتى وان كان هذا الزوج لا علاقة له بالموضوع فهو يدخل عصه في شي ما يخصه ؟؟؟
.
.
.
وهناك لمثــــــــال من الحياه ؟؟؟
صار حادث في وسط الشارع...
واتيمعوا الناس .... واتلموا ع الشخص اللي اندعم وبدل ما يتصلون ويحاولون ينقذون الموقف
اتحصلونهم متيمعين حوالين الشخص اللي اندعم حتى النفس حابسينه من تجمعهم ..
ولا بعد غير اللي اتجمعوا على الشقق ويطالعون السالفه من شققهم ..
اتقولون يالسين في الهند مب في البلاد ..
.
.
.
فلنظربمثـــــال واحـــــــاتي
عضو من الواحات يعاتب شخص عزيز عليه ... وزعلان منه في احد المواضيع
وفجأه اتحصل كل اللي حدر الموضوع دخل .. ومنهم من يحاول يشد من ازره ..ومنهم من يفول الشخص على المعتوب ..
ومنهم من يبحث عن الشخص المقصود من هالعتب ..
ومتناسين المثل الدارج بينا يقول (( الفضول ذبح القطوة أو الفضول قتل العيوز ))

.
.
.
اذا هناك الكثير من الامور التي قد تحدث وتصير أحيانا وقد يقال انه من باب الفضول ..
والبعض يرى انه نوع من الاهتمام ..حين يرغبون باكتشاف اسرار الناس ويفرحون لمعرفة ما يدور ويحصل ؟؟؟حتى وان لم يكونوا هم العامل المساعد في حل هذه المشكله ؟ وهناك من الفئات التي تنطبق عليهم المثل القائل (( رزة الفيس من طبايع التيس )) وانتوا اب كرامه .. بمعنى يدخاون عصهم في الشي اللي يخصهم او اللي ما يخصهم ... ويحبون يتلصصون لاخبار الناس ويترقبون اي مصيبه او اي شي بس علشان يعرفون شو اللي يدور لهالشخص او وين راح وكلم من ورابع من ويتعامل مع من ؟؟
وكل هذي الانواع اسمــــــــيه (( الفضــــــــول ))
.
.
.
اخواني الكرام .. اعضاء واحات بن دبي
شو هو الفضول من وجهة نظرك ...
جد حد قالك انك انسان فضولي ..واذا كنت من النوع الفضولي .. كيف تتعامل مع الناس ؟؟
وانت كيف اتعامل الانسان الفضولي (( من خلال تجاربك مع الاخرين )) ؟
شو هو احساسك يوم اتحس ان هناك من يتدخل في حياتك وحاب يكشف اسرارك ..حتى لو لم تعطيه التصريح بذلك؟
.
.

هالموضوع حطيته علشان خاطر بنوتاتي الحلوات ... هم عارفين عمارهم بس صدق طلعن فضوليات
واكيد سمعن بالاغنيه اللي اتقول:-
(( وانا الست حشوره.. بحشر حالي في كل شي ..
وين ما بسمع خبريه بركض اول شي ..
بحب اعرف شو صار .. شو اللي عم بيصير
وانا الست حشوره .. بحشر حالي في كل شي ))
.
.
وحقوق الطبع محفوظه وفقط في واحات بن دبي
تحياتي :- اختكم/ الشوق
11-06-2007