يمكن أكون متعقد من السالفة بالكامل لدرجة المرض و هالشي من حقي لأني عشت الأجواء في الواقع

الوالد من الإمارات و الوالدة من قطر و مثل ما تعرفون في اختلاف في اللهجة و طريقة اللبس لكن التقاليد احس انها وحدة لكن المشكلة بالفعل كانت في اللهجة و لين يومكم هذا مستحيل اتكلم شرات المواطنين العاديين و كان الحل السهل بالنسبة لي هو combination بين اللهجتين بدون ما اكون مائع و اكون رسمي و كلامي واضح على الاقل لاقصى درجة ممكنة.

عشت سنوات حياتي الاولى فقطر لان الوالدة رفضت تترك بلادها مهما كان و كانت سنوات قليلة كنت البس فيها اللبس القطري و لهجتي قطرية و كنت اسير البحر كل عصرية لين المغرب و كانت الحياة حلوة و لين الحين اذكرها لين وصلت الامارات و بدأت كل المصايب

مع الوقت و الحياة كنت مجبر إني اغير اسلوبي في الكلام لكني رفضت هذي الفكرة لان عندي كبرياء و كان حلي الوحيد هو دمج اللهجتين في لهجة وحدة و لين الحين الكلمات المميزة في اللهجتين الاماراتيه و القطريه مستحيل استخدمها ابدا و لو استخدمتها فبحس كاني اقول كلمة اجنبية مالها معنى و هذا طبعا غير عن المشاكل اللي صادفتني فلبس الوزار

و طبعا اللي ينطبق علي ما ينطبق على اخواني لان حياتهم كلها كانت في الامارات و ساعات يعلقون على طريقتي في الكلام لكن انا اخوهم الكبير و اذا احتاجوا انهم يكلموني فلازم يتكلمون بنفس اسلوبي بس اللي يضايقني يوم واحد منهم يندمج مع اللهجة الاماراتيه احس اني اكلم لي انسان غريب علي مب اخوي فارجع و اقوله لا تسويلي فيها مواطن ارجع و تكلم عادي

لكن بعد كل هالسنوات اللي عاشتها الوالدة في الامارات لهجتها ما تغيرت ابدا ... يوم كنا صغار كنا نتكلم انا و اخواني بطريقة وحدة تقريبا و مع الوقت بدا الاختلاف يظهر

و اللي اعرفه انه شي وافدين زلمات و حتى باكستانيين يتكلمون اللهجة احسن مني لكن الفرق اللي بيني و بينهم مب الجواز لا لكن الوطنية و الولاء للدولة قبل كل شي هذا هو الفرق بين المواطنين و الوافدين اللي لو كان عندهم ذرة ولاء ما تركوا بلدهم عشان شوية فلوس من الشغل فدولة خليجية.

و الحمد لله مب متعقد من المسألة بشكل كبير لاني مب انسان فاشل و عندي اهداف كبيرة في الحياة لكن لو تخيلت نفسي ولد لوافد من مواطنة في الامارات و حتى لو كنت اتكلم اللهجة اكيد بتعقد اكثر بس الشي اللي لاحظته من خلال مشاركتي في هذا الموضوع هو ...

الأخت بنوتة جميرا المسألة مفتوحة بالنسبة لها و ما تفرق اذا خذت وافد او مواطن و ماعندها اي تحفظات من هالناحية و قلبها بارد مثل العسل و الله يوفقها

و الاخت انامل قلب ... احس انها بنت ردها بالكامل على حادثة مأساوية صارت لأحدى المواطنات بسبب زواجها من مواطن و تعتقد ان الوفد بيكون الحل و ما بيسوي اللي سواه المواطن or something like that.

في مثل يقول لو علمنا الغيب لاخترنا الواقع و من خلال تجربتي في الحياة اقدر اقول ان الامور حتى لو وصلت للطلاق يكفي ان الاولاد عندهم الجنسية و يتكلمون اللهجة حتى يقدرون في المستقبل يعيشون حياتهم بدون عقد و بدون مشاكل ...

و في ختام ردي اقدر اقول و بكل صراحة ان مثل هذا الموضوع انطرح في منتدى و تجاوزت عدد الصفحات الخمس صفحات و كانوا فيه وافدين يردون على المواطنين و يناقشونهم من هالناحية لكن مافي احد من المواطنين وقف مع الوافدين

كلي فخر بالوالد و الوالدة حتى لو اختلفت اللهجات

و دمتم بود