اختي الغالية مزايا ..

انتِ قلتيها بلسانج اختي (( في ناس )) يعني الموضوع ما نقدر نعمم فيه .. ولا حتى نربطه بجنسية ولا غيره ..

ونعم كلامج صحيح .. لازم تفكر فيه وبالملحقات اللي بتي عقب الزواج ..
وتسأل عمرها (( هل بمقدورها كشخصية تملكها تحمل ذلك .. )) ..
سبق وقلت اختي ان الامر يعتمد بشكل كبير على معدن كلا الطرفين وطريقة تفكيرهم وما يملكون من شخص ..
وأيضا الطريقة اللي يشوفون من منظورها الحياة ..

وتراها مثل ماقلت مليون مره (( بتستخير )) ..
ورب العالمين أعلم وأحكم .. وبيده الغيب فلا يعلم به سواه ..
وان ارتاحت بعد الاستخاره فرب العالمين اراد لها ذلك .. ويكون الخير بذلك .. بفضله ..
وللعلم يعني .. ياما ناس مواطنين حالتهم أردى من الوافدين .. !!
محد يقدر يضمن رزقه ولا شو مكتوب له مستقبلا ..
واذا بنفكر بالأسوأ (( كالطلاق واللي حط القانون لها ولعيالها من حقوق ))
فمحد بيقدر يمشي حاله ولا يتوفق بحياته .. اذا نظرته كانت تقتصر عالأسوأ .. !!
وبشكل عام سواء خذت وافد ولا مواطن .. اكيد فيه نقاط سوء ممكن تقع ابها الفتاة ..
اعرف وحده من الاهل تطلقت (( بعد ما وافقت اهي واهلها على مواطن بيستر عليها وبيراعيها )) ..
شوللي صار .. كانت حالته الماديه طيبة جدا .. فوق الممتازة يعني .. (( بمعنى آخر أحسن عن حالة الفتاة اللي هم وضعها جدا طيب ))
شو لقت .. لا حياة طيبة ولا ناس تعرف تحترم ولا غيره .. حتى زوجها نفسه راعي البيزنيس مب ساد لها حقوقها ولا غيره ..
بعد قريب الـ 15 سنه وبعد ما يابت منه ثلاث اولاد شو سوا .. طلقها بكل سهوله ..
وكل صبرها عليه طول هالمده ماياب لها نتيجه .. ولمن سئلته ليش .. قالها مافيج شي قاصر وماعندي سبب ..
بس أنا انسان منفتح واحب اظهر وايي على كيفي (( فاهمين قصدي طبعا )) .. وماكنت من الاساس مستعد للزواج .. وانتِ بعدج صغيره والحياة جدامج ..
ويوم قالتله انها مستعده التم بذمته ولو بغى ياخذ عليها وحده ثانيه على انها بتم بعيده بغرفه ثانيه ..
ماوافق اونه بظلمج بهالطريقة .. عبالة توه بس ظالمنها ..
وبالنهاية وين طاحت احليلها بشقه جدا متواضعه وبسيطه بغرفتين إهي وعيالها .. اونه ظروفي الماديه ما تسمح ..
والسنه اللي عقبها تزوج وخذ لزوجته فيلا يديده .. @_@ .. هذا غير الحقوق الثانيه اللي ضاعت منها ..
لا وقولو النفقه جم .. 3000 وشي يسلمهم اياه بكل شهر .. بذمتكم هذي نفقه واهو تاجر عود وضعه فوق الممتاز ..
الوافد معاشه أكثر .. >_< ..
وعلى فكره إهي قبل وبعد الزواج كانت اتيها تيلفونات من حبيبات طليقها المصون والخ من حجي أحبذ إني ماقوله .. !!

ومن اهني اختي .. ترى لا يغرج المظهر .. اذا بتكون نظرتج البعيده للأسوأ .. فهم المواطن شاطر باظهار قرونه لول ..

وأرد وأقول .. الشغله تعتمد على شخصية الرجل .. والفتاة بشكلب أخص ..
لأنها مثل ماتدرون .. بيدها تصلح وبيدها تهدم ..
كما ان اذا نيتها طيبة من الزواج .. وتوكلت من البداية عرب العالمين .. وين المشكله .. !!

:

وهم بعد نقطة الود و(( المحبه )) بين الطرفين جدا مهمه .. ومدى (( التفاهم والاحترام المتبادل )) امبينهم ..

واسمحولي .. ماقدر أصخ ..
بس صدق احليله الوافد .. ليش حاطين عليه جيه .. غامضني ..
انننزين تراني يوعانه ماتغديت والسبه هالنقاش خخخ ..