اممم ..
بالاول السلام عليكم والرحمه .. ^_^ ..

ثانيا ..
جل المعذرة على تأخري بالرد .. لكن لضغط الامتحانات .. وتونا خلصنا اليوم لول وناسه >> انزين شو تبين بالضبط ..

احم .. المهم ..
ثالثا انيي عالموضوع ..

(( لو تقدم لج شاب وافد او خليجي هل بترضين فيه كزوج؟؟ ))
بالنسبة لي ولو ان الاغلبية يعارض هالراي ..
أشوف ان ماشي أي سبب يخليني ارفض الوافد او الخليجي .. أو أيا كانت جنسيته دامه انسان عارف ربه
ويتصف بالاخلاق الطيبه اللي تمنيتها بشريك الحياة ..
وبالكفه الثانية .. احس اهني بكون ظالمه لنفسي وبنفس الوقت للطرف الثاني قبل لو الرفض كان لمجرد كونه بجنسيه معينه .. !!
وبعدين كلمه وجهها الرسول عليه الصلاة والسلام لأبناء أمته .. (( إن جاءكم من ترضون دينه وخلقه فزوجوه ))
مابقول اني بواقف عليه سيده .. أكيد بفكر بالايجابيات والسلبيات كلها ..
وبالاول والاخير الموضوع يرجع لمدى راحتي للشخص بعد الاستخاره .. واقتناعي فيه كشخص ..
سواء كان مواطن ولا غير مواطن .. !!


(( إذا هي ليش؟؟ ))
امممم .. عشان ماطول .. سبق وذكرت الاسباب بالسؤال السابق ..
ولكوني مب من النوع اللي يهتم بالمظاهر بأي شكل من الاشكال ..


(( وإذا لا بعد ليش؟؟ ))
السبب الوحيد اللي ممكن يخليني أرفض اسباب خلقية ودينية لا غير ..
أو إني ماكنت مرتاحه لسبب لا يعلم به سوى الخالق .. >> يعني سواء مواطن ولا عكسه ..
ومحد بياخذ غير نصيبه .. والمكتوب .. !!


(( لو وافقتي:
شو هي الاثار الايجابيه والسلبيه لهذا الزواج؟؟
واثار هذا الزواج على الابناء؟؟ ))
اممم .. الآثار الايجابية هي انج أخذتي واحد ارتحتي له .. ورضيتي فيه لطيب دينه وخلقه ..
وبالتالي أي مشكله بتواجهج وياه بتكون خفيفة عليكم .. وراضيين ابها ..
دام النيه سليمه والتوكل عرب العالمين موجود .. والود والتفاهم والاحترام المتبادل موجودين ..
فماعتبر ان ممكن بيكون هناك أي مشاكل ممكن يخليهم يتلومون .. >>
>> (( احسن من انها تاخذ مواطن مب مقتنعه فيه كشخص وتتلوم عليه لكثرة المشاكل الناتجه عن افتقارهم للمحبه والتفاهم .. والاحترام .. !! ))
وعن الامور السلبية اللي ممكن تواجههم .. فهي اشيا مظهرية ..
مثل كلام الناس وانتقادهم ( اذا كان يحمل جنسية معينه ) .. اممم .. وممكن
أشيا ينحرم منها ابناءهم مستقبلا ..اللي برايي انهم ما بيعدونها مشاكل ولا حتى الابناء بيحسون بشي من النقص ..
لو انهم تربوا على طيب الخلق والتفاهم السامي ..


(( ولو الدوله عدلت القانون وجنست ابناء المواطنات.هل بتوافقين على اي شاب وافد او خليجي يتقدملج بدون تفكير؟؟ ))
جوابي عـ هالسؤال موجود بإجاباتي السابقه .. ^_^ ..

:

اممم وأخيرا عندي أمثلة .. عالوافد والخليجي ..
مثلا أعرف وحده بدوية ماخذه واحد سوري .. وعيالهم كبار وعايشين بطيب .. وناسة وسلام ..
ووحده من بناتها ربيعة اختي .. يعني حياتهم فل الفل ما شاء الله ..
وعن الخليجي .. وايد تصير عدنا ان اهلنا بالكويت بناسبون من الامارات والعكس ..
وينتقل احد الطرفين للسكن بدولة الطرف الآخر .. >> وهاي ممكن يعدها البعض من اسباب الرفض ..
وانا من بينهم فقط لو حسيت اني صدق مابقدراتحمل هالمسؤولية .. وبالتالي برفض حتى ماكون ظالمه للطرف الثاني مستقبلا ..

وبالنهاية موضوع صلاح العلاقه او تدهورها يرجع عشخصية كلا الطرفين .. !!

:

وجل الشكر لج عزيزتي بنوتة جميرا على اهتمامج وتميزج بطرح المواضيع ..
وكل الود والاحترام لج من صميم الخاطر ..

والسموحه عالاطالة .. ^_^ ..