هل من الممكن ان تحب شخص لم تراه في حياتك؟؟؟

[بنت الدلع]

ممكن ليش لا

من خلال افكاره
وجهات نظره
اسلوبه
طريقته في التعبير
صح ان ممكن ننخدع باشخاص
ولكن هالشي يتوقف على الشخص نفسه
هل هو يعرف يكون صداقات عبر النت ؟

ومن خلال تجربه
اتعرفت على وحده من الواحات
وسوالف في المسن والمسجات
والله راد نجتمع ونكون في نفس الكلاس
وبعد ماشفتها علاقتنا استوت قويه
والله يجمع صداقتنا بالخير ان شاء الله
ومستحيل اني انصدم فيها في يوم من الايام
وماعندي اي مانع اخبرها اسراري مع ان ماعندي اسرار
لانها انسانه محل ثقه واقولها بكل فخر

والله يبعد الحساد عن الصداقات الحلوه

[الغجرية]

ليــــش لا بالعكس....أحس اني احب انســانه عن طريق المسن او التلفون وغيره من هاي الســوالف أحسن عن احبها من شكلـــها....على الأقل بعرف هيه منوو ؟؟شو تفكيــرها ؟؟شو طبعها؟؟يعني بعرف أكثر عنها....
أما اني اجوفها ما بعرف غير اذا كانت حلوة او لأ....طويلة ولا قصيرة...يعني مافي فايدة....

وهـــا كلامــي اقــصد فيه الحب العـــادي مب حب الخربــطان مال هاي الأيـــام...


وهـــا رايي...ويسلمو على الســؤال الحـــلو..

[جنة عدن]

pour qoi pas!
ليش لا؟
الحب مو بعيب في حدود الاحترام والقلب المحب اكيد له احساس ومن الاحساس هذا
اكيد رح يوديه لقلوب طيبة انا عن نفسي مني
je suis pas cantrE
القلب الطيب عمرو مي خيب

[الثعلب الرمادي]

شكرا لاحلى رفع لاحلى موضوع أختي حلم الطفولة

و ممكن جدا ان الواحد يحب و يعشق و يغرم ببنت سواء عن طريق المنتدى او المسنجر او اي طريقة كانت بدون ما يشوفها فيها

However

هالشي ما جربته مع بنت و ما حبيت لي واحد و هذا اللي ناقص لكن تعرفت على شباب عن طريق النت يوم كنت في الإمارات و طلعت معاهم و تعرفت عليهم اكثر و كانوا ناس محترمين و عيال ناس و اهتماماتنا كانت وحدة تقريبا و ما خذت عنهم فكرة سيئة لا قبل و لا بعد

بس ها يبالنا نجرب مع بنت يوم واحد امزح

كل الود

[محد يستاهل]

من الممكن أن نصل للشخص عبر الانترنت إلى الحب إذا كان كل من الطرفين صادق
وقصدي يكون من الجنس الناعم لأن الصراحــة ما من أمــان من الجنس الخشن

الواحد مـا يعرف يمكن هالإنسـان أحسن من اللي تعاشره دووم .

[الا انا]

هيه ممكن ليش لأ ...؟؟؟



وااايد صارت وتصير ...


بس مب عند الكل ,,,,


الحين ماشي حب صادق من خاطر كله نفاق وجذب وووووووووو..... مصلحه ...""""



الله يعين بس ...

[وعد]

ايه ولا
لانه يتخيل للانسان انه يحب لكنه في واقع الامر لا
بمعني انته مثلا تحب انسان من خلال كلامه فقط واللسان يا خوي ما فيه عظم
يقولون لا تصدق كل ما تسمع ولا نصف ما تري

الحب من وجهة نظري مواقف وافعال وهالشئ ماراح تعرفه من مسنجر او راي بمنتدي
ولا تنسي يا اخوي مثل ما القلب يعشق العين تكره بعد يعني ممكن شكل الشخص الي كنت تكلمه بالمسن او خلال التلفون ما ترتاح له وبالتالي لا شعوريا تبدا تنفر منه

طبعا الكلام الي فوق اقصده فيه العلاقه بين الجنس الخشن والجنس اللطيف

بس ممكن يوجد هناك فعلا حب في الله وصداقة حلوة وجميله اذا كانت بين عيال نفس الجنس

دمت بخير عزيزي وسامحنا علي الاطالة

[بنوتة جميرا]

ليش لا
ممكن انا انحب شخص ماشفناه عبر النت كان او الفون
ووحده من ربيعاتي العزيزات ع قلبي وايد اتعرفت عليها من المسن
والحين علاقتنا وايد قويه
حتى إني اعرف خواتها ومسجات وكولات بينا
والحمدلله

بس في نفس الوقت ممكن ننخدع في الشخص
فلازم انكون حذرين شوي

[بدويه متحضره]

وعليكم السلام ورحمة الله وبركاته

أنا بصراحه من وجهت نظري أنه حب النت مستحيل يكون حب صادق
حتى الي يرمسون في التيلفون بعد مستحيل يكون حبهم صادق
لأنه أي واحد أو حده بيكلم شخص في النت بيراويه أحسن صفاته والصفات السيئه تكون مخفيه


مع اني أعرف ناس تزوجو عن طرق النت وناس تزوجو عن طرق التيلفون
بس مب مرتاحين

بس أنا ما أئمن بها لسوالف
أصلا ما اتجرأ أني أكلم شخص ما اعرفه
لأنه أخلاقي ما تسمح لي

بصراحه هالأجيال محتاجه حملات تثقيفيه حول هالموضوع
بسبب إنتشار الوسائل الي تساعد على هالعلاقات


تسلم أخوي عالموضوع

[دكتور الحب]

دموع قلم....

مشكورة على الرد...وحليلها ربيعتج...الله يعنها....

وسوري على اللخبطة.....

أيامي حزينة....
كلامج صح....و مثل ما قلت هاذا الشي يمكن يستوي واحد في المليون......
والثقة بتكون وااايد ظئيلة...هاذا أذا ما كانت معدومة....

[دكتور الحب]

محد يستاهل.....
صح كلامج...العلاقة بين جنسن مختلفين خارج إطار الزواج ما أأمن فيها...خصوصا لو كانت عن طريق النت أو التيليفون...تكون لعبان وكلام فاظي.....

بنت الدلع....
مشكورة على طرح وجهة نظرتج...
بس مثل ما قلتي العلاقة أتطورت بعد ما شفتو بعض...بس مب قبل ما تقابلينها......


الدافية....
الدينا بعدها بخير..والحب بعدة موجود...بس نادر.....


وعد...
أأيدج في كل ألي قلتيه 100%.....
و شكراً على التعقيب.....


بنوتة جميرا....
مشكورة على الرد....بس مثل ما قلتي الحذر واجب..ومرة تصيب وعشر تخيب.....


بدويه متحضره ....
مشكورة على الرد....
صح كلامج..البنت المحترمة ما بتسمحلها تربيتها تكلم واحد على التليفون أو المسن.....
و ما أعتقد أن في واحد بيتزوج وحدة أتعرف عليها عن طريق التليفون...لأن مثل ما رمسته بتكون مرمسة 10 غيرة......فكيف بيثق فيها....


بس بغيت أقول شي..ليش معظم ألي ردو على الموضوع بنات..... وين الشباب...ليش ما يشاركون؟




والسمووحة

[تحفه]

من رايي ان اذا كلشي كان رسمي و واضح و جدام الاهل احسن وابرك ابوايد من المخشوش و الي بالغصب والي فيها كسرة رمسة الاهل و ثقتهم

وبعدين مافي حد يستاهل اتضحون علشانه بالثقه الي عاطينا اهلنا

احس شباب ماينعطون ويه .... يصدقون عمارهم

[الملهم]

اذا قصدك على حب اخوي وفي الله ..
ممكن ليش لا ؟؟ .. مثلا العضو بحر المودة ..
لين الحين ما شفته .. بس ارمسه على التلفون والمسن ..
واكيد احبه في الله .. ما شاء الله عليه صديق طيب ..

اما اذا قصدك على الحب اللي هو الحب بين الشاب والفتاة ..
فما اظن ها الشيء بيصير .. يمكن اعجاب بس حب لا ..
واذا صار حب اعتبره حب يهال .. ^__^

تسلملي على مواضيعك الغاوية .. ^__^

[دكتور الحب]

تحفة....
مشكورة على الرد...صح كلامج ثقة الأهل فوق كلشي....



الملهم....
حلو أنك تكون علاقات صداقة وجي....لكن مثل ما قلت يمكن يوم تشوف الشخص وتعرفة أكثر....تتغير مشاعرك تجاهه...

مشكور أخوي على الإطراء....

[الملهم]

دكتور الحب ..

اكيد انه بتتغير مشاعري تجاهه ..
لان مهما تميت وياه في المسن والتلفون ..
لازم في اللقاء يكون شخصية ثانيه ..

تسلم مرة ثانيه على موضوعك .. ^__^