مش هذه الحياة الي ابغيها !!

[ذنـيـنـي]

السلام عليكم

مرحلة الكثير منكم مر فيها و الحين انا امر فيها و الي هي الخوف من المستقبل
هو مش خوف بمعنى خوف، لأني و الحمدلله لله شبه مرتب اموري و عندي خطه لبناء مستقبلي سواء من الناحية الاكاديمية او من الناحيه الوظيفية
لكن الشي الي شاغل بالي هو انه لو ما صار الي في بالي،
لو ما حصلت الوظيفة الي ترضي طموحي
لو حصلت الوظيفة الي اتمناها لكن ما حصلت فرصة لأكمال دراستي
لو قدرت احصل فرصة دراسة قوية لكنها ما توافقت مع وظيفتي الي يمكن ما تتعوض

أسئلة يوم اسالها نفسي احس بخوف و توتر من المستقبل
لأنه الحياة مش سهلة مثل ما كل حد يشوفها


مش هذه هي الحياة الي ابغيها !!!

ما احس انه يرضيني اني اعيش بنص شهاده و استلم راتبي و اصرفه على اشياء ما تسوى و انسى اني ابني مستقبلي
ولا يرضيني اني خلاص اداوم و اتم مثل الشباب البطالية اسير التمشى في الضيافة و اغازل هذه و الاحق هذه
أحس اني اكبر من هذه الامور و طموحي اكبر من اني اعيش حياتي عايش على 10 الاف درهم و رنج باقساط


ابغي اكون انسان له وزنه في المجتمع
له كلمه و له هيبه و له احترامه
محبوب من بين الناس
محبوب في بيته بين اهله و عياله قبل ما يكون محبوب من قبل الناس
ما ابغي اكون مقصر في حق اهلي
ولا ابغي اقصر في يوم في حق والدتي و الي ابغي احطها في عيوني على التعب الي تعبته وياي
ما ابغي في يوم من الايام افكر اني اقصر في حقها بسبب اهتمامي بشغلي و اسرتي



الدراسة

دخلت التقنية "الزفته" الي شعارهم
"ارسب في ماده و ضيعه سنه كامله من حياتك" او اربع سنين مثل ما حصلي وياهم
احيد اول ما وصلت لفل 3 في التقنية رسبت بسبب احد المدرسين "النحسين"
و الي بكل بساطه رسبني في مادته الي كلها بروجكتات
لأنه يقدر يرسب الشخص في البروجكت والسبب هو انه ما اقتنع بالي مكتوب في البروجكت

بسبب هالمدرس الـ لا مبالي اضطريت اني انزل نفسي من برنامج الدبلوم العالي الى برنامج الدبلوم
و الحين لازم ارد اكمل دراستي في احد الجامعات الاخرى للحصول على شهادة البكلريوس

اختيار الجامعه المناسبة بروحه هم و التخصص المناسب هم ثاني و توزيع الوقت ما بين الدراسه و العمل هم ثالث



ذنيني المعرس

كل هالهموم شالنها على راسي عسب شي واحد و الي هو الهم الاكبر "الزواج"
مع انه و الحمدلله الخير موجود و اهلي مستعدين يزوجوني اليوم قبل باجر
و بيدفعون عني كل التكاليف و فوق هذا مستعدين ينزلون لي معاش
الا اني ما احس اني بحس بالمسؤولية اذا ياني كل شي زاهب و بدون تعب مني او جهد مني
و ما احس انه الريال بيحس بالمسؤولية اذا ياه كل شي زاهب مزهـّب

اكمالي للدراسة و طموحي للحصول على وظيفة مرموقة ماله سبب غير رغبتي بالاستقرار و توفير حياة كريمه للأنسانه الي بكمل وياها حياتي و للعيال الي بيحملون اسمي من عقبي
أبغي اكون اب يفخرون فيه عياله


وايد افكار و اسئلة شال همها من الحين مع انها مسائل عاديه و يمكن انا عاطنها اكبر من حقها
لكني حسيتبها مثل الهم على قلبي و حبيت افضفض و السموحه منكم