أهل الام والا أهل الاب

[بنوتة جميرا]

السلام عليكم ورحمه الله وبركاته
اشحااالكم؟؟
جمعه مباركه ع الجميع

اليوم حبيت اتناقش وياكم في موضوع
اللي هو
منو اتفضل..أهل الام والا أهل الاب

اللي خلاني اطرح هالموضوع هو اني حسيت مب بس انا وعايلتي انواجه هالمشكله
كثييييير من البنات اللي ويايه اتواجهم نفس المشكله
عسب جي حبيت إنا نتكلم في هالموضوع وناخذ آراء الكل

ليش اغلبنا انفضل اهل الام على أهل الاب؟؟
يعني قعداتنا وطلعاتنا وسوالفنا ليش انفضلها مع خالاتنا واخوالنا عن عماتنا واعمامنا؟؟
ليش انشوف هالبعد الكبير والقطيعه صوب اهل الاب؟؟
هل السبب منا ام منهم؟؟

يعني انا عن نفسي اهل امي امووووت عليهم
ماحب اسير غير عندهم واحب الطلعات والسفر وياهم وااااايد
بس اهل ابويه العكس
ماحب اسير لهم واذا سرت اقعد شرات الغريبه
ماحب اسولف وياهم
يمكن لاني مالاقي منهم الحب والاهتمام شرات أهل امي
عرفت ان هالشي مب بس صاير عندي انا اغلب البنات اللي اعرفهم جي

ودي اعرف ليش جي؟؟
ليش اهل الاب دومهم بعاد؟؟
هل انتو ممن يواجهون هالمشكله؟؟
وفي نظركم شو هي الاسباب؟؟

لو كان عندج عيال اخو واخت بتفرقين امبينهم؟؟
يعني بتحبين حد اكثر من غيرهم؟؟وليش؟؟

ولو كان عندك عيال اخو واخت بتفرق امبينهم؟؟
يعني بتحب حد اكثر من غيرهم؟؟وليش؟؟

اتمنى تفاعلكم وابداء اراءكم في الموضوع
لانه بالنسبه لي احسه موضوع جدا مهم
واذا حد عنده نصايح كيف نقدر نتغلب ع هالمشكله؟؟

اختكم.. بنوتة جميرا ..

[جنة عدن]

صباح الفل والياسمين و جمعة مباركة علينا وعليكم
انا بشوف اهل امي بيحبونا اكثر من اهل ابي لانو اهل ابيمايحبونا وخصوصا جدتي لانها كمان نا بتحب امي ولا اولادها لانو امي هي الوحيدة لجابت اولادو بنات ناجحين بالدراسة و اخلاقهم عالية وهذا الشيء منعدم عند اولاد عماتي و عمومي وعلى العموم خوالي يحبونا لانو احنا مشرفينهم و رافعين راسهم

[بوزايد]

تقريبا الي اعرفهم كلهم يفضلون اهل الام

الا عائله وحده عائلة خالي ما يدانون اهل امهم خخخخ من ابوهم شكله


بس ما اعرف الاسباب والله

صح شي يحير

[الدلووووعة]

موضوع حلو
وصح الاغلب جي

بس عني انا عادددييييي عندي

اهل امي واهل ابويه شرات بعض

بالعكس انا احب اسير بيت عمي وايد

احب ايلس ويا عياله ومرت عمي والله انها فن ^_^

انا اتوقع هم مايخصهم نحن نوهم عمارنا بها الشي

انا ماعاني من هاي المشكله الحمدالله

كلهم شرات بعض احبهم واستانس عليهم

[فركوشه]

اهل امي هم اهل ابوي

لانه امي وابوي عيال عم

بس في مشاكل من اهل يدتي (ام امي)

[بنوتة جميرا]

جنه عدن
يمكن الغيره من التفوق يكون سبب
ويمكن لو اهل الاب ما يحبون الام بعد ما يحبون عيالها
شكرا غاليتي ع المشاركه

[بنوتة جميرا]

بو زايد
اغلب اللي انا اعرفهم بعد يفضلون اهل الام
ونادر من اللي اشوفهم وايد كلوز ويا اهل الاب
واكيد شي يحير

شكرا اخوي ع المشاركه

[بنوتة جميرا]

الدلووعه
الله يخليكم دوم لبعض
بس انا ماحس اني اوهم عمري باني ماحبهم
تصرفاتهم هي اللي اتخليني جي
ولو قلت احبهم بكون جذابه

شكرا الغلا ع المشاركه

[بنوتة جميرا]

فركوشه
صرت اكره زواج الاهل
لانه ماييب غير المشاكل
حتى انا امي وابوي يصيرون لبعض
بس احس المشاكل اتزيد بين العايلتين
يمكن هالشي يكون سبب

شكرا غاليتي ع المشاركه

[مجموعة إنسان]

نحن عايلتنا كلها أهل ..
أهل أمي هم أهل ابوي
يعني نحن كلنا أهل
بالعكس مافي فرق بينهم ..

بس البايخ في هذا الشي ان لو صارت مشكله
يبدا الحسد (بعيد عنا ان شاء الله ) بس يعني

[فركوشه]

هواااجيس الحسد بقيااس عاد

تدري نحن خالتي تبا تبني بيت حقها.. في ناس الله يجازيهم مب راضيين

وحاولوا بكل الوسايل انهم ما يخلونها تبني اونه شو بتقطع عليهم الدرب

واخر شي قالوا ان يدي الله يرحمه مستلف من يدهم بيزات..

واونه ماتبنون الا يوم تردوون البيزات.. عاد ما اتذكروا السالفه الا الحييين

عادي نحن بنعطيهم مب مشكله الحمدلله عندنا خيير بس لا يجذبون ويطلعوون رمسة عن الامواات..

ويارييت والله الارض خالتي شاريتنها من حد .. هالارض ورث من يدي الله يرحمه

ترا والله نحن انرووم انظهرهم مب بيووتهم واااحد واااحد.. ونخليهم فالشارع..

لان كل بيت موجوود اهناااك انبنا على ارضنا.. ونحن صااخين ما قلنالهم شي..

والحين انجلبوا علينا وكبر راسهم.. صدق الفقارى ما يملى عينهم غير الطين.. بس مب كلهم

ولو تبا زياااده بضربلك امثااااااااااااااال.. مب مثل واااحد

[أنامل قلب]

اممم ..
السلام عليكم .. ^_^ ..

بالنسبة لي أهل الوالد والوالده عندي من نفس الحال ..
يعني الكل قريب من بعضه .. ويمكن يكونون أهل أبوي أقرب حتى لول ..
مادري .. يمكن لأن اهل ابوي هم اهل امي .. !

بس ماظن ان شي وحده ماداني ولا ماتحب اهل أحد الابوين .. مهما كانت العلاقه مو ذاك الزود ..
يعني ماتوصل لكلمة " ما أحبهم " .. ولا شو الراي : )

وبعدين كوجهة نظر .. أحس إن الموضوع ماله خص بأهل الأب ولا أهل الأم ..
كله يرجع لطريقة تفكير كل طرف والسن بعد له دور بأحيان كثيرة ..
وطبعا طريقة التعامل والأخذ والعطاء امببين بعض .. واهتمامهم ابـ بعض .. !

وبس .. مابتفلسف بزود .. خلني أعتزل الهذرة الزايده بالردود لول .. ^_^ ..

:

جل احترامي وودي لج اختي بنوتة جميرا ..
وتشكرين على طيب مواضيعك الملحوظة ..

السموحة ..

[طير الحب]

السلام عليكم...

بعيدا عن ذكر أيهما أفضل...فقط ونتيجة تجربة...أحاول ان أربي طفلي على حب الطرفين ويقرر بروحه اذا تضايق من اي طرف هو حر بقراراته بس ما اكون انا اي تاثير سلبي أو عاطفي عليه من هالناحية...أفضل ان يحب الطرفين.

[جنون امرأة]

ليش اهل الاب دومهم بعاد؟؟
هالشي الاهل يقررونه .. على حسب علاقة الام .. و راحتها .. مع العايله اللي هي تحس انها تتأقلم معاها و تحبها أكثر ..

هل انتو ممن يواجهون هالمشكله؟؟

هيه .. لكن .. أنا العكس .. لأني ما أحب اختلط بأهل أمي ..
و أرتاح مع أهل أبوي أكثر ..
تعودت ع هالشي من صغري ..
علاقة أمي فأهل أبوي قويه .. ف عسب جي ..
وفي نظركم شو هي الاسباب؟؟

لو كان عندج عيال اخو واخت بتفرقين امبينهم؟؟
يعني بتحبين حد اكثر من غيرهم؟؟وليش؟؟

عندي .. طبعا في فرق ..
العاطفه تلعب دور هني ..
و التعامل و الاسلوب ..
يعني ناس احيانا تحسين انهم يحبونج وايد .. ف تكونين جريبه منهم ..
و ناس تحسين انهم بس يغارون منج .. تحاولين تبتعدين عنهم ..
يعتمد ع طبيعة الانسان ..


واذا حد عنده نصايح كيف نقدر نتغلب ع هالمشكله؟؟
تحاولين .. انج ترمسين وياهم بلباقه و تحسنين التصرف ..
حتى لو انج مضايجه من اليلسه وياهم .. يعني اذا تحسين انج
مب متأقلمه وياهم وايد .. خلج عاديه لا توضحين هالشي ..

ما ادري اذا هالشي صح و لا لا .. بس انا اتكلم عن نفسي !..

[ملاك الروووح]

::

وعليكم السلام ورحمة الله وبركاته

ياهلا حبيبتي بنوووته ..

::

أنا رايي من راي أنامل قلب ..

يعنـــي العلاقة اللي تجمعنا بين أهل الأم ولا الأب ..

نحن اللي نقرر كيف طبيعتها .. وشو حدودها ..!

و حبنا لهم يعتمد على معاملتهم لنــــا .. وعلى طبيعة العلاقة اللي تربطنا ابعض ..

يعني نحن الحمدلله علاقتنا وايد قوية ويا هل أبوي ..

ربينا مع بعض .. وكبرنا مع بعض .. وعيال عمي أعتبرهم اخواني وخواتي والله ..

حتى علاقتي مع خوالي وخالاتي وايد زينه ..

وبعد هل أمي وهل أبوي علاقتهم قوية ابعض ..

ودوم مع بعض .. في الرحلات والعزايم والسفــــر ..


وبالنسبه لعيال اختي وعيال أخوي ..

للأسف للحين ما استويت عمه .. توه أخوي معرس .. والثاني توه ملج

ان شاءالله أستوي عمه جريب ..

ومستويه خاله .. 13 مره .. لووووووول

ماشاءالله يعني

وعيال اختي أحبهم وايد .. ومربيه كم فرخ منهم هع هع

وما أحس اني بفرق امبينهم

بالعكس محبتي لهم بتكون شرات بعض ..

لأنهم عيال خواتي واخواني .. وأنا ماعندي أغلى منهم !

:
أحس اني ما قدرت أوصل فكرتي الأولى بشكل صح

يمكن لأنه فيني رقاد الحين

برد باجر ان شاءالله