هناك رسمت يوما .. بذكرياتي القديمه .. والكتكوته .. !

[أنامل قلب]

اممم ..
السلام عليكم ورحمة الله وبركاتهــ ـ

بدون لف ودوران .. وهذره زايده كالعاده لول .. ^_^ ..
من بعد موضوع أخوي المحاق المشتعل " مختارات قديمه من لوحاته " ..
مادري .. دق براسي وانجلعت مباشرة لرسمات قديمه أحتفظ بها .. من ذكريات بالنسبة لي غير شكل ..

هي رسمات .. كرتونية بالغالب .. >> وشوي شوي بديت أتطور وللحين أعتبر مبتدئة .. : )
تقريبا من ما بين الـ 10 والـ 12 .. كنت دايما أبحث عن رسمات كرتونية أنقلها لتكبيرها .. وشوي شوي بديت أطور " أونه " ..
واللي حملت معاها عبارات جدا طفولية كل ما أتذكرها وكيف كنت أكتبها عساس أذكرهم لمن أكبر ..
كنت ياهل وأفكر بطريقة طفولية .. إلى أن وصلت الآن لعمر الـ 18 .. ولازلت أعيد المرور عليها بين الفينة والأخرى ..

أحبها صدقا وإن كانت بسيطة .. مضكة .. بريئة ..
أحبها لأنها نبعت مني بيوم ما ... ... .. .

:
:
:

والحين بدخل بالجد وايد هذربت >> ماتعلم لول ..

بما إن نحن الحين بعصر المافيا .. لقيت لكم بجعبتي رسمة لص نقلتها من مجله ميكي ماوس ..
مع انها كانت صغيره كغيرها .. ^_^ ..



كنت 11 سنه .. أو بدخل الـ 12 بهذي الصور ..




والله أيام ..
..........................

وهذي بعد من الخرط اللي رسمته بيوم ما .. احليلي كنت كتكوته .. تقريبا ^_^ ..

حتى مسويتلي توقيع اسمحولي غطيته شوي .. وين العلامه الحمرا .. >> احم .. جي يعني الحين ماعندي توقيع لول .. : )



و هذي



ويا عيني عالبطل .. >> كنا نفشل .. ^_^ ..



والريال .. والعيوز كبرتهم من كتاب الانجليزي مال اختي اللي تصغرني بسنتين .. قوم الخاصه لول .. >> ماخليت شي مانقلته : )



وهاي العيوز .. شوفو شو كنت أكتب لول " هاي وحده من العبارات صورتها مع الرسمه " .. شايفه روحي ..
وإذا الخط ماكان واضح .. قولولي بنسخه لكم .. وانا شو وراي غير إني اظهر فضايح أيام الابتدائية إحم ..



امممم ..
وأيام اسبيس تون .. >> برنامج كيف ترسم الكرتون لو تعرفونه ..
هذول نقلتهم منه .. اوني طالبه مجده .. اقعد أبحلق بالتلفزيون .. ^_^ ..






:
:

تعبت لول ..
شي تكمله للمسلسل بالرد التالي .. >>> اسمحولي خرط الطفولة ما يقصر .. ^_^ ..

:
:
>>>>>

[المحاق المشتعل]

الله

كل هالفن وانتي حضرتج ساكته وامسويه عمرج ما تعرفين ترسمين

ماشالله تبارك الرحمن

أنا من اليوم ورايح بسوي لجنه يديده في واحة الرسم

لجنه لمعاقبة الفنانين وذلك بإستخدام طريقه جديده للإعدام ( الشنق بالرصاص )

الصراحه يبالج محققين مال المافيا عشان يستلمونج نفس ما استلمنا خنفروش في قروب المافيا

من زمان ههههههه

كل هالفن واتقللين من مكانتج هالكثر

والله لوحاتج جداً جداً جميله

رائعه وربي ... فنانه لو نقلتي لو شو سويتي خطوووطج فنانه



ويالله يا أعضاء شبعوها ردود لو سمحتوا

مشالله عليج والله

فنـــــــــــــــــــــــ ـــــــــــــــــــــــــ انه



كل التقدير

محاق

[أنامل قلب]

البقية >>>>>

:
:

مادري ليش كنت اموت على مولان .. ملونتنها بعد >> سمحولي الرسوم تفشل ..



...........

:

اللي اهني سويتهم لمن الطورت شوي ..
أظني مابين الـ 14 و الـ 15 >> سمحولي مب مذكره .. لأني ماكتبت عليهم العمر شرات اللي قبل .. : )

ووهذي أكثر رسمه انتقدوها .. ..






أكيد تعرفونها .. أو شفتو بطاقه تشبها شوي .. مع فارق كبيـــــــر طبعا .. >> شو هالتناقض لول تشبهها وفارق كبير ..
أحيدني أوني بسويها رمزية .. لأني ماكنت متفيجه أجابل رسم الموج اللي للحين ماجربت ارسمه .. :)

:

وووو هذي أحيدني كنت قاعده متملله .. بإجازة الصيف .. وغصب أبا أشتغل على لوحة ..
وما طلع مني غير هذي لول ..
هذي عاد مألفتنها روحي .. بس لفظ الجلالة شفته بأحد المواقع .. والأبيض اهني عبارة عن محارم لول .. >> أوني بظهر حركه .. ..








اما هذي .. فشفتها بأحد المجلات .. " يمكن تكون اللي راسمتها اهني معانا بالمنتدى " ..
كنت وقتها حابة أرسم شي من الخاطر .. ورسمتها " مع كثره الاخطاء " من الخاطر ..
احليلي ماكنت أفكر بالأسس اللي لازم أستند عليهم بالرسم .. ولازلت حتى الآن كذلك ..
وكل همي الرسم .. ثم الرسم وحسب ..
وكنت " أظني " .. بالـ 15 .. اعذروني مب متأكده .. >> وكل ما شوفها أحس إني راسمتها البارحه وأنسى ..
لكثرة رسمي للزهور .. اللي الحمدلله صرت أألفها من خيالي البسيـــــــــــــط ..

]



:
:

وتم بحمد الله اخيرا ..

:

والمعذرة على الاطالة في طرح بعض رسيمات الله يعينكم عليها .. وعلى أيام الطفولة اللي لازلنا نشتاق لها بين الحين والآخر دائما ..

^_^ ..

وإذا صار بالطرح شرات الموضوع اللي قبله وماظهرت الرسوم لكم ..
بنسخهم مره ثانية بسرعه .. كما تعودت ..

وربي يسلم كل من بيمر بساحتي الكتكوته ..
و يعينكم عليه .. ^_^ ..

............................................:: احترامي وودي الدائمين لكم ..
وعساكم دوم طيبين .. وممن قربهم ربي إليه .. برحمته ..

والسموحة ..
إختكم أنامل قلب ..

[المحاق المشتعل]

يا سلااااااااااااااااام

أحييييييييييييينه بشدد العقوبه على الفنانه انامل

كل هالفن خاشتنه عنا ........ صدق زعلت

ماشالله تلوينج وافكارج وابداعج والله والله رهيب

الصراحه المجموعه الثانيه بعد احلى وأحلى وفيها التلوين جداً جميل

والأفكار ابداً ما عليها كلام

وعن لوحة لفظ الجلاله الصراحه ................. ابداع ما بعده ابداع تبارك الله سبحانه

ماشالله عليج والله عيني عليج بارده

ورسمة مولان جنااااااااااااااااان .... ورسمة السفينه ألوانها كم تسوى بس

والورده جذااااااااااااااااااااابه جداً جداً

الله يسامحج فنانتنا

كل هذا تملكينه .. وتخفينه عنا

كل هالفن كان فيج وأحينه تتغلين علينا ... ما اقول إلا الله يسامحج

عمة العيم لحقي

شوفي ربيعتج شو اتسوي

شوفي شغلج وياها اشويه ( غسال المافيا )

...

اكيد في سبب يخليج ما تشاركين دوم

سببها الذكريات الحلوة الحزينه إلي خلتج

توقفين وما ترسمين مثل السابق

بس تبغين رايي

هالفن لازم ما يتم في اوراق الدفاتر

لازم يطلع وانشوفه ويشوفه العالم كله

يمكن هاي الذكريات بتتبدد بعرض تلك اللوحات يوماً ما

تقديري وثنائي الشديد لكل هذا الإبداع الرائع

ربي يعطيج ألف عافيه على هالفن كله

آسف على أول رد

داش بين موضوعين ( كيفي مراقب ههههههههه )



دمتي نجمة ً في سماء الإبداع

محاق

[دموع قلم]

مســـاااء البسمــة ..

كيـف لا يكـون مسـاءنـا منثـور بـأوراق البسمـة .. وشـذى النسمـة اللطيـفة..
ونحن نستمتـع بـرؤيـة هـذه الرسـومات البريئـة.. المبـدعـة.. ؟!!

.
.


الرسـومات الكرتـونيـة.. بيـنت لنـا أن فعـلا هالقلـم بيكـون له مستقبـل بـاهـر.. ناجـح.. في مجـال الرسـم..
رغـم أنهـا رسومـات بسيطـة.. إلا أنهـا لطيفـة ببـراءتهـا.. بخطوطـا المضحكـة.. !


رسمـة القـارب.. بأمـواجهـا المتـلاطمـة.. صـدق صـدق عيبتنـي.. يمكـن لأنـه شي يتعـلق بالبحـر..
أو يمكـن جـذبتنـي الخطـوط البنيـة اللي بـالقـارب.. المهـم انـها عيبتنـي.. مـا شـاء الله.. !


ولـوحـة لفـظ الجـلالـة.. بعـد ووااااايــد.. واااايــد عيبتنــي..
امممممم يمكـن لـروعـة الأشكـال الهنـدسيـة اللي بخـلف اسـم لفـظ الجـلالة..
مع فكـرة المحـارم.. بشكـل مرتـب جـدااا .. ورائـع .. ومبــدع.. تبـارك الرحمـن.. !

.
.


غاليتـي.. أنـامـل قلبيــ ـ ..

اللـي عنـدج مو مجـرد موهبـة.. ولا إبـداع.. بسيـط.. كمـا تظنينـه.. !
ولكنـكِ غـدوت جـزء من هـذا الفـن الكبيـر.. بـل أنـكِ غـدوتِ هـذا الفـن بعـالمه كلـه..
إن استمريتـي وصـورتـي كـل مـا يخـالجـه خـاطرتـكِ.. بتـلك الخطـوط المميزة.. بحــق.. !
لا تستهيـن بموهبـتـكِ وإبـداعـكِ هـذي.. فـ بأي فكـرة كـانت.. يمكننـا أن تخدميـن أمتنـا الإسلاميـة بهـا..



كـانت أروع هـدية قـدمتـيها للـواحـات وأعضـاءهــا..
يـزاج الرحمن الخيـر والسعـادة بـالداريـن.. إن شـاء الله.. ^_^


والمعـذرة علـى الرد الطـويل العـريض.. ! << طالعـة عليـج ^_*

[شهوووودة الأمورة]

حرااااااااااااااااام ليييييييييش مب ظااهره عندي الرسومااااات )": بصييح )":

[أنامل قلب]

خيتو شهودة .. أشوف النحاسة انتقلت لول ..
أسولف والله ..

بس غريبة الصور ظاهرين عندي .. اممم ..
انزين برد أدخل باجر وأجيك عالروابط .. >>> كم من شهوده عدنا .. ^_^ ..

....

أخوي المحاق المشتعل ..
يزاك الرحمن كل خير على مرورك الطيب .. وبرد أعقب على ردك باجر ..
لأن مثل ماقلت تعبانه بسير أنام لول مب راقده العصر @_@ ..

وفي أمان الرحمن ..

[شهوووودة الأمورة]

هييه حبوبه جيكي عليهن مره 2 .. حرااااااام ما يستوي لااااااازم أشووفهن عسب اتشجع وأرد أرسم شراات قبل ..


افففف يالنحاااسه )":

[تنينه]

صباح الإبداع والذكريات القديمه والكتاكيت

مـاشاء الله عليج عزيزتي أنامل قلب ؛؛ رسومات صدق حلواه وتلمح فيها الموهبه والاتقان في الرسم ؛؛ وماشااء الله من صـغرج متقنه لـه ؛؛

واايـد حبييت الرسوم المتحركه والعيوز كتكوته صدق ورسمة السفينه متقنه وألوانها متدرجه بتناسق ورسمة الورده بعد روعه ؛؛

ماشااء الله علييج يالغلاا موفـقه ان شااء الله ومن افضل لأفضل

[عمة العيم]

قلبووووووه

الصراحت راحت

الحيييييينه كل هالفن و الابداع عندج

و رافعه خشمج و مسويه عمرج ماتعرفين شي؟؟؟

المحاق....آآآمرك كونك مراقب تطرد انامل قلب من الواحات لو مانزلت لنا دوم رسوماتها خخخخخخخ

الصراحه

انعجبت في رسمة السفينه و الامواج

قلبوووه انتي ناضلي خخخخ

و واصلي

و حاولي

و اصقلي الموهبه

و ابغيج تتحدين المحاق

اليكِ نصيحتي النصوحه.... فلتستـــــــــــمري...


(^_^)
...

[الجنيه]

ماشاء الله ع الموهبه الحلوه *_* كشخه رسمج ماشاء الله ...

احلى شي الورده

[عديم الشوق]

ما شاء الله فناااااانه !!!

من وييييين يبتي هاي الأفكار الغاويه

احلى ما عيبني في الرسومات العيوز خخخخخخخخ ( اسولف )


ارسمي بعد نبغي انشوف يديدج



_تحياتي_

[مايهزك ريح]

ما شاء الله عليج اختي انامل قلب .. رسوماتج حلوه .. وفيها ابداع ..
اتمنى انج تستمرين في الرسم ..

[طير الحب]

ما شاء الله تبارك الرحمن...تسلم هالانامل الرقيقة

الصراحه قبل لا أكمل بقية الصور كتبت الرد ووووايد رسوماتج حلوة...حتى الملونه التظليل واختيار الالوان وايد حلو ومتناسق...ولازم ما تقللين من ابداعج...بالعكس رسماتج تدعو للفخر والسرور وتنم عن موهبه رائعة ...ربي يبارك لج في موهبتج,,,ونشوفج رسامة في مجلة ماجد لأني احبها


أنامل...يوم ان شاء الله بيخلص بيتنا أبا نفس صورة لفظ الجلالة ببروزها وبحطها في الصاله...وايد حبيتها...ما تفكريم تشاركين بمعارض او تعرضين لوحاتج الي بها لفظ الجلالة للبيع وايد حبيتها وايد راقية وفي متذوقين وايد يحلون يقتنون اللوحات .

[العجيبة]

ما شاااااء الله عليييييج ...

ذكرتيني بمـولان .. والله أيـــااام .. كنت ما أمل من فلمها .. عيدواااا وعيدوووا ..

رسوماتج كلها حلوووة ما شاء الله ..


واصـلــي .. والله يوفقج ،