غـصّـات مـواطـن !

[إسهر معي ليله]

بتعبــه وشقــاه

مب عشان سواد عيونه عاطينه هالامتيازات

على عيني وراسي،، بس أنا قلت هالكلام رد على انهم يحسدونا

يعني في بلادهم ما يحصلون اللي محصلينه هني وبعد حاسدينا
وحاقدين عالمواطنين... فهمتي

[ملاك الروووح]

::

[ اسهر معـــي ليله .. ]

عشره على عشره يا عمــــي




والله مافي شي ابلاش الحين .. والمواطن ما بيستثنونه للأسف من أي شي ..

حاله حال غيره .. ويمكن أردى !!

:

اسمحوا لي أتدخل في الحوار اللي يدور بينك وبين مزايا

اذا ع سالفة الهنود .. ترى مش الكل .. يحصل اللي حصله بتعبه وشقاه يا مزايا ..

وأكبر دليل الهنديه اللي توظفت ف ديوا .. وسوت الضجه الكبيره ..

اترقت ف سنه وحده 6 مرات ..!!!

وراتبها من عقب ما كان 6 آلا درهم تقريباً صك ال ثلاثين يمكن !!

وهالشي كان سبب في استقالة وايد موظفين من ديوا ..

لأنهم كانوا أجدر بالترقيات .. والامتيازات اللي حصلتها هي ..

وشهادتهم تعادل شهادتها .. هذا اذا استثنينا عامل الخبره بعد من الموضوع ..!



لكن وين اللي يقدر .. !!

::

وبالنسبه للاجانب أنا مع اسهر معي ليله في اللي قاله ..!

أحس البلاد الحين مش أمان شرات قبل ..

والواحد صار يخاف على عمره وعلى عياله من اللي قاعد يستوي ..!

وأنا اللي يقهرني .. الامتيازات والبدلات اللي يحصلها الأجنبي في بلادنا ..

أحسن سكن .. وأحسن سياره .. وأحسن مستشفيات يتعالج فيها .. وأحسن مدارس وأحسن جامعات

يدرسون فيها عياله .. والمواطن وين راح ؟!

ليش ما يقدمون هالأشيا كلها للمواطنين ؟!

مع العلم انه شهادتهم شرات شهادة الأجنبي .. لكن اللي يفرق هو الجنسيه اللي شايلنها !!

يعني يبون الناس يهاجرون أمريكا ولا كندا ( شرات ما قاعد يصير الحين ) عشان ياخذون الجنسيه

ويضمنون حقوقهم !! ويتنكرون للدوله اللي عاشوا وتربوا فيها ..!!

::

واذا ع سالفة الزواج ..

وين بتحصلين وحده ترضى بانه ريلها ياخذ عليها 3 !!

ييبي لي 10 من هالحريم .. وأنا بحل لج الخلل في التركيبه السكانيه !!

:

وبعدين شرات ما قال اسهر .. مع غلاء المعيشه هذي .. وغلاء المهور ..

الواحد وين بيلحق .. يفتح بدل البيت 4 .. ويصرف عليهم .. ويتكفل بمصاريفهم ..

الواحد يالله يالله قادر انه يعرس .. ويفتح له بيت ..!

وفوق هذا راص على عمره رص ..

وانتي تبينه ياخذ أربع !!

جان زين لو السالفه كانت جيه هينه ..

كنا بنحل على الأقل أزمة العنوسه عندنا ..!

::

ما نقول غير الله المستعان ..

والله يستر من الأيام اليايه ..!

[الارستقراطيه]

اسهر معي ليله،،

جرب وروح بلدية بوظبي ،، بتحس انك داخل بلدية الخرطوم في السودان او مقديشو في الصومال ، من كثر ما هالجنسيتين محتلين البلدية،،
اتذكر اني داومت في البلدية شهرين تقريبا (في الصيف ) ، واحد قال لي انه الشاب في السوادن قبل لا يتخرج من الجامعة تكون وظيفته محجوزة في بلدية بوظبي
ويقول لك اذا عرف السبب بطل العجب
((بدون ما ادخل في التفاصيل واهل بوظبي اكيد عارفين ليش ))
ونحن المواطينن يوم نسير نقدم يقولون عندنا اكتفاء !!
ووزارة التربية وحده من ربيعاتي سايرة تقدم عندهم تخيل شو قالوا لها
(( اونه نحن الحين ما نستقبل طلبات المواطنين ، الحين نسوي مقابلات حق الوافدين ))

وعن غلاء الاسعار ،، يقول لك البترول ناوين يسوون الجلن ب11 درهم ،،
(( اخر شي ببيع سيارتي وبشتري مخمة وبطير عليها))
بصراحة بتنفعني بخم فيها البيت وبطير عليها
المشكلة انه التجار كلهم من هوامير الدولة ، يعني ارتفع عليهم السعر ان شاء الله خمسين مره ما بيأثر لان عندهم خير ، ونسوا انه عدنا ذوي الدخل المتوسط ، الي لين نص الشهر ياخذون على الحساب من الدكان ، والله العظيم في ناس ما يسيرون الجمعيات التعاونية ويتعاملون مع الدكاكين لانه في الجمعية بيضطرون يدفعون كاش اما راعي الدكان ممكن يتريا لين اول الشهر !!

احس لو بتم اتكلم لين باجر بعد ما بخلص ،، وفي اشياء ابغي اكتبها بس متلخبطه شويه
متابعين للموضوع ويزاك الله خير ،،