غـصّـات مـواطـن !

[هزاايم]

غصه كبيييييييييييييييييييييره تصيبني وبالأحرى تخنقني

يوم اسمع الفلاني من بلاد الفلاني"اخونا بعرووبتنا وباسلامنا"يحصل عالجنسيه ماصار لهم غير 3 سنوات...
والغير إللي من اياام الإتحااد وقبل,,بعدهم تحت فئه البدون؟!حق ليش؟!

يقولكم إللي تجنس قدم منفعه للبلاد,,والبدون
ليييش هم عطووهم مجاال ,,,
صدق صدق غصه
وخقاقييييييييييييييين

[العجيبة]

تبــون تعرفــون أمـاكن تكـدس المواطنين :

1. الديـوان .. سرت مــرة وتبـت

2. البـلــديــة

3. الجـوازات > من كثـر العماله اللي انييـبهم ( وهذ عيب من المواطنين نفسهم )
يعني كل واحد عنده خدامة أو يمكن أكثر ، وطباخ اومزارع ودريول ، واذا عنده مزرعة بعد بياديــر ..
ممكن نكون سبب مهم في زيادة أعداد الأجانب على أعداد المواطنين ..

4. سوق الاسهم > من زوووود الملاييين ..


وللأسف الغصة الأكبر إن المجلس الوطني اللي استـوي لين الحين ما شفنا شي معتبر منهم
يالسين يفكـرون في مظهر المجلس وزيادة رواتبهم .. الله يهنيهم .. بأصواتنـا وصلوا هناك .. وبأصواتنـا نغـــررررررد بأنهم ما سووا شي ..

[مــهــابه]

الغــصـة الأولــى:

- نـحن يـوم نرمس ونـقول أنـه نحـن أغـراب فـي بـلادنـا ، فـهذا كـلام مش مبـالـغ فيـه
وهـذا الكـلام نقصـد كل حـرف فـيـه
ولو بـديـنا بـإماراتــ الدولـه ككـل

بـوظبي ، دبي ، الشـارجـه

والله والله أنـي اسـتانس لـو كنـا واقفين مثـلاً عـند أشـارة وحصلـت صوبنا سيـارة فيها مواطن، ولا عـايلـه ، غير الاجانب والهـنود طبـعـاً

وخـصوصـاً يوم الجمعـة ، والله لواني مب إماراتـيه ، ولو يبتوا واحد مايعرف هالـبلاد جان قـال وبلا شك: هـو فـالهـند

نـحن بـودنـا بـلادنـا تتطور ، ولكـن !!

مب عـلى حسـاب وطنيــتنـا

يعـني فـهـالبلاد ، الـهندي والمواطـن واحد ، واحيـان

يكـون الهـندي احسن بـمليون مره من المواطـن

وبرامج البث المبـاشر واللي يـتحطى فـالجرايد أكــبر دليل


الغـصة الثـانيـة:

- أنـا كنـت أقـول المكـان اللي تنـحط فيه الحـرمـة يـخترب لووول

غـلاء الأســعـار هـذا طامه

والطامه الأكبـر ( أســتغلالـنا)

والله انـه الوافدين والهـنود يسـتغلون بـطريقـة ونحن يـاحافظ لك الله

ومـره كانوا حاطين فـالبث المباشر

واحد اتـصل بهم وقـال لـهم انـا سافرت تـايلند ويقول كنت ضاري اشتري عازه من عـندهم وبسعر معين

وآخر مره راح فيها ، زيدوا عـليه السـعر ، جان يـتخبرهم ليش؟

قـالوا لـهم في الإمارات رافـعين الرواتب بنسبـة25%


يـعني خبرنـا واصلـنهم هـناك


وزارة الاقـتصاد لاتـقول خير ولاتـقول شــر



الغصه الثـالثـه:

من زمااان وانـا أقول

خيرنـا لـغيرنا هب لـنا

وهـالمواطنـه اللي تطريـها فـيه منهـا مئــااات والله

المشكلـه واللي احسه الحين الكـل يـعمل لإماارته هب جنه احنـا فدولـة وحده

مثـلاً فالشارجه ولله الحـمد ماظن في حد مايحصل

حـتى الريال اللي يملج يحصل بيـت شعـبي ، فمابالك باللي شرات هذي ، يـعني الشيخ سلطان هب مقصر

بس

تعـال لإماراة الفجيرة مثـلا، او حتـى راس الخيمـه

والله فـرق بين الثـرى والثـريــا

يـاتـرى ليش؟!

معـقولة الدولـة ماتقدر تـوفر لـهم؟!

يقـدرون

ولكـن !!

وين اللي يوصل للحاكم ، ووين اللي يطلـع ويشوف حال المواطن



أسهر معـي ليلـه:
هـذي غصـااات
وماخفي كـان أعـظم


الله يـعينا

وشكراً ع الطــرح

[زمان أول]

السلام عليكم

مرحبا اخوي اسهر معي ليله

بسنا مشاريع صدق بسنا مشاريع اوكي تعرفون ان الي يشترون وشغالين هنود وايرانيه والله ما تتخيلون اقامه 99 سنه يعني هذا حاله من حالك يا مواطن.. بعده هذا اشوي اتريو خمس سنين جدام اتريو يا مواطنين ..

الزياده الزياده مب باقي الا انزيد يا مواطينين تعدادنا ولا شي ولا والقهر نحن اشوي وماشي شغل كم من باب طرق للشغل لا مجيب اغيثونا ياعالم ؟؟ بلادنا العالم اييونه من برع عشان يشتغلون ونحن ما نحصل شغل؟؟؟!!!

اخوي انته سمعت تبا بيت شعبي انا سمعت وحده تقول ابا حجره بس مب بيت حجره الحين هيه فايجار والمستجر يقولها طلعي حرام مشاريعنا بالمليارات ونحن ماعندنا مسكن يأوينا.. امس واحد يقول اليوم اعلنو عن مشروع قيمته ما اعرف كم يقول بسنا ما نبا .. الحياه غاليه ورواتبنا ما تسد بس خلهم يعطونا يتكرمون علينا

الله يرحمك يا ابونا زايد الله يرحمك اول ما سمعت خبر وفاته سويت حادث يومها ما انسى ذاك اليوم ... الله يرحمه ...

كم غصه فقلوبنا .... انا غريب فبلادي

[بهجة الروح]

... من دخلت الواحـــات وأنــا أشـوف العنـــوان وأحس باكتئاب وحزن ،

عشان جيه كنت أتهرب من أنـي أطالعه، لانـــي عارفه عن شوه بتتكلم ،

..غصات مواطن ، غصات المواطنين، البلاد صارت مب بلادنا الوافدين صار لهم الأولويه في كل شي،

أمس كنت أقلب الجريده ، وشفت جهة حكوميه ( الله يستر عليها) تكرم موظفينها ومنوه طبعاً

هالموظفين كلهم أجانب واللي يكرمهم مواطن ضربتني غصه ،

خلاص البلاد ما فيها خير إلا للأجانب، لوحد منهم قال ناقصني شي قامت البلاد له وتبرعوله ،

ولو المواطن اشتكى قالوا هذا يدلع ،

[ملاك الروووح]

::

وعليكــــم السلام ورحمة الله وبركاته ..

:

أول شي اسمح لي أشكرك أخويه .. لتسليطك الضوء على هالمواضيع الحساسه ..

وثاني شي .. أبي أوجه تحيه لكل من أبدى وجهة نظره .. وطرح رايه في الموضوع ..

::

بالنسبــــه لأول غصه ..

اتفاجأت بنسبة المواطنين في الدوله .. واللي ما يتعدى الــ 25% من إجمالي السكان ..!!

ماشاءالله الهنـــود والوافدين تارسين البلاد ..

صج صرنا جنه غرب في بلادنـــا !!

الأجنبي والوافد .. صاروا يستلمون جناسي الدوله .. بكل سهوله ..

ويقولون لنا خلل في التركيبه السكانيه ..!

واللي عايش على أرض هالوطن من كمن سنه .. وأحق منهم في الحصول عالجنسيه ..

يتريه ويخيس سنين وسنين .. لين يحصلها ..!!

:

حلو انه نشوف الدوله ف تطور .. ونمو وازدهار ..

لكن مش على حسابنا ..!

عندنا كفاءات .. عندنا شباب متخرجين .. وقادرين انهم يتحملون مسؤوليات ..

قادرين انهم يستلمون مشاريع كبيره .. وينجحون فيها ..!

ليش نستقدم العماله الوافده ..

ليش ما نعطي الشباب فرصه .. في انهم يثبتون وجودهم .. وانهم يتميزون ..

ويردون الجميل للوطن ..!!


:

بالنسبه للزحمــــه

والله اني عفت طلعة البيت ..

صدقهم .. المشوار اللي كنا نقضيه ف ربع ساعه ..

صار ياخذ منا ساعات وساعات ..

الناس قامت تطلع قبل وقت الدوام بكمن ساعه عسب ما يعلقون في الزحمه ..!


دبي قامت توسع ف الشوارع .. وتبني جسور ..

ويزاهم الله خير ..!

لكن المشكله انه في المقابل .. قاعدين نشوف زياده في المركبات ..!

وخططهم ف سبيل تقليل الازدحام .. بتكون على حسابنا بعد ..

سعر التعرفه في بعض الشوارع .. واللي تبلغ 4 دراهم ..

صح انها راح اتخفف من الازدحام لكن في المقابل .. صرنا ندفع ضرايب ..!

ولازم نحط ميزانيه من الحين .. حق مشاويرنا .. وطلعاتنا ويياتنا ..

وانخصص جزء من الراتب حق هالشي !!

بنتريه مشروع المترو .. واللي ان شاءالله راح يشكل حل طيب .. لمشكلة المرور والازدحام !:boxed

::

الغصه الثانيــــه !

من يسمعون عن زياده في الراتب .. التجار يضربون أسعارهم ..!

والمتضرر الوحيد هو المواطن ..

لانه الأجنبي والوافد في بلادنا بيقدر يتحمل هالتكاليف .. وهالزيادات!

عنبوه ما تسوى علينا هالكمن بيزه .. خلونا نتهنى فيهم انزين


ماشي خطط ولا اهتمام من وزارة الاقتصاد ..

وايد عليهم هال 5 دراهم اللي نزلوها من سعر التذاكر !

وايد وفروا علينا بصراحه ..!


::


ثالث غصّه !


ياكثرهــــم ياخوي .. أمثال هالحرمه ..

عد وغلــــط !!



خيرهم سابق و واصل آخر الدنيا ..

وشي محتايين وايد في البلاد .. ساكنين في بيوت ايجار ..

وماعندهم لقمه تسد يوعهــــم ..

يادوب تكفيهم مصاريفهم على غلاء المعيشه ..

لكن محد يقدر يلومهم .. العتب على هالبطانه الفاسده .. اللي حولهم ..

والله شيوخنا ما بيقصرون .. لو حد وصل لهم هالمواضيع ..

الحمدلله الخير وايد .. والله يزيد النعمه ..

لكن شو الفايده ..

نبني بيوت ومدن برع .. وبيوت اتطيح ع روس المواطنين هنيه ..!

نتبرع بملاييـــن حق غيرنا .. والمواطنين غرقانين في ديونهم ..!

نعطي الأجانب بيوت .. وبدلات توصل حق كمن ألف .. والمواطن يكرف ويتعب ..

ومايلاقي حتى كلمة شكر !!

::

خلها على الله ياخوي ..

ولا تقلب المواجــــع !!

ياكثرها الغصات .. وياكثر همومنـــا ومشاكلنا ..

واللي مش لاقيه لها اهتمام .. ولا حلول ..!

:

الله المستعان بس ..

:

السموحه عالاطاله ..

وتحياتي لك ياخوي ..

[إسهر معي ليله]

وحي القلم

أوافقج الراي،، العرب مرات يمصخونها أكثر من الأجانــــب
في رمضان فيه من الأجانب يحترمون مشاعرنا ويتحشمون
عشان ما يفطرونا.. بس فيه عرب يسوون العكس !!

حتى ناس منا وفينا.. في رمضان المنكر واليور يزيد
في السناتر.. وكلهن مواطنات

وخلهم يتطنزون ويضحكون،، اونهم يعني قوم Open Mind
المخ المفتوح.. خله ينفعهم يوم يحابلون ربهم

::
::

شرجاوي

لبنى القاسمي،، كذا مره يتصلون البث المباشر وينتقدونها !
سمعنا وايد أيام التعيين وقلنا الحمد لله حالنا بيكون احســن
بس مادري.. ماشوف شي تغيّر

البيوت والأراضي،، لما تشغل واحد عشان اسمه ولا واسطته
ولا انه متثقف ولا متعلم.. يتصرف في مال الحكومه على كيفه
ويظلم وايد ناس محتاجين

::
::

هزاايم

سمعت رمسه.. مادري اذا صدق ولا جذب
انه فيه ناس من دولة عربيه،، يوم عطوهم
جوازات قاموا يتمشون في الفريج وجوازاتهم
في جيوبهم.. وبدوا يسوون مشاكل .. اونه يعني
مواطنيـــــــن !

::
::

العجيبة

المجلس الوطني،، احسّه مجرد اسم وشكل للنــــاس
نقولهم انه احنا عندنا مجلس وطني.. مجرد احساس
فيني،، انه ما بنشوف منهم شي !

بس كلنا أمل انهم يسوون شي في يوم من الأيام

::
::

مهابه

مشكوره عالرد.. والكل في هالبلاد مستغلنا
حتى الحلاليق.. المواطن يحلقه بـ 10 والهندي بـ 5 !

والناس عبالهم المواطنين طايحين على كنز

::
::

البدوي

الله يرحمك يا زايد.. حتى اجازة 29 رمضان شلوها عنّا !
حتى في هاليوم ما تبون المواطن يستانس شوي؟

يا خوفي ايي اليوم اللي نكون بدون صندوق زواج وبدون
مشروع الإسكان .. الله يستر

::
::

بهجة الروح

ترى فيه من المسؤولين المواطنين يشوفون الأجنبي
شي ومسوينه ملاك وكأنه هوه الفاهم والناس كلهــم
أغبيا !

سبحان الله.. مع انه هالأجانب يوم تتعاملون معاهم
تلقونهم أكثر ناس يتصرفون بغباء وعبط !

يخبرنا واحد يداوم في مكان حكومــي،،
ويايبين خبير اجنبي.. وطبعاً كل اللـــــي
يسويه ويشتريه.. يكون على حسابهـــم
فـ يقول انه مره يايب فاتوره بـ درهمين
سعر بطاريه اشتراها ويباهم يردونهــم
له !!.. ما يدفعون شي من جيوبهــــم ..
ياكلون بيزات الحكومه ويردون بلادهم
واحنا فرحانين فيهم.. ويوم نشوفهـــــم
نضحك ونبتسم وياهم.. اما المواطــــن
نورم في ويهه !!

::
::

ملاك الروووح

مشكورة عالرد الحلو..

بالنسبة للتسعيره واللي هيه 4 دراهم،، اتمنــى
انهم يعيدون النظر فيها ويتم استثناء المواطنين
منها !.. انا مواطن وادفع ضريبه؟

يا خوفي هالضرايب تزيد.. ويستوي الهدف منها
الربح بس

خصوصاُ آخر مره قريت انهم ناوين يرفعون قيمة تجديد
الرخصه ! .. اونه يعني الناس عقب ما بيسوقون !

رغم انه اساس المشكله يوم يعطون الليسن
حق اي واحد.. وصار الليسن مصخره عندنا
وخصوصاً من سمحوا للرياييل قير اتماتيك

الهندي في بلاده ما يسوق سيكل.. ايي هني
يطلع ليسن وياخذ له احسن سياره !!

::
::

مشكورين ع تواصلكم

[مزايا]

أوّل غصّه

تعداد الدولة 4 ملايين.. واحنا نسبتنا أقل من الربع
80% وافدين .. وما فيه أي خطط حكومية لتعديـل
التركيبة السكانية !

لا في حل عشــان نعدل التركيبــه الســكانيه
إنه المواطــن ياخذ له اربع حريــم وكل وحده تشد حيلها وتورينا شطارتها (مونيليكس) وتترس البيت عيـال
وبـ جيه بـ ننافس حتى مصر بعدد السـكان

ثاني غصّه
التجار من يسمعون انه فيه زيادة في الرواتـب
يرفعون أسعارهم قبل الرواتب.. ليش هالطمع؟
وليش احنا اللي متضررين دوم؟ وما لنا ظهر؟

كل واحد يدوّر مصــلحته
انا مش وياهم فهالشي بس لو كنت إنته تاجر كبير مابتسوي شراتهم ؟!
لاتقول لا ..

[إسهر معي ليله]

مشكورة عـ الرد مزايا << مادري ليش يذكرني في مزايا سنتر

لا في حل عشــان نعدل التركيبــه الســكانيه
إنه المواطــن ياخذ له اربع حريــم وكل وحده تشد حيلها وتورينا شطارتها (مونيليكس) وتترس البيت عيـال
وبـ جيه بـ ننافس حتى مصر بعدد السـكان

هذا حل،، بس//

انتي او اي وحده ثانيه بترضون تكونون مونيليكس؟؟

اول شي فيه وايد بنات طالعات من بيوتهم ما يعرفون يسوون شي
او انها تشتغل وما تفكر في الحمال و الخ،، من سوالف المرأة المعاصره

ثاني شي فيه وايداااات بعد ما يرضون انه الريال ياخذ وحده ثانيه،، فـ ما بالج بـ 4

ثالث شي في زمن البلوتوث و الواير لس .. والموجات المغناطيسيه وهالخرابيط..
ما ملاحظين انه الخصوبه عند الرياييل قلّت !؟

رابع شي منو هـ اللي يقدر يدفع حق 4 حريم،، اذا الوحده فيهم ديون عرسها اتم
وياه لين ما اييبون عاشر ولد !

كل واحد يدوّر مصــلحته
انا مش وياهم فهالشي بس لو كنت إنته تاجر كبير مابتسوي شراتهم ؟!
لاتقول لا ..

أنا احين اتكلم على لسان واحد مستهلك لـ بضاعة هالتجار

لكن اذا في المستقبل استويت تاجر.. اعتقد بكون عشت واقع
وحياة هالمستهلكين وحاس فيهم،، فـ ان شالله بـ راعي هالشي
واذا انا مشيت في تجارتي على حلال وحرام،، ومراعاة شروط
الدين ان شالله ما بظلم حد

بس اللي عندنا احين مستغلين وايد اشياء ويزيدون بدون مبررات
وكله طمع في الربح الزايد.. وهذا طبع الإنسان

و بس ،، ما قلت لا

[مزايا]

مشكورة عـ الرد مزايا << مادري ليش يذكرني في مزايا سنتر

وانا بعد

اول شي فيه وايد بنات طالعات من بيوتهم ما يعرفون يسوون شي
او انها تشتغل وما تفكر في الحمال و الخ،، من سوالف المرأة المعاصره
ثاني شي فيه وايداااات بعد ما يرضون انه الريال ياخذ وحده ثانيه،، فـ ما بالج بـ 4
ثالث شي في زمن البلوتوث و الواير لس .. والموجات المغناطيسيه وهالخرابيط..
ما ملاحظين انه الخصوبه عند الرياييل قلّت !؟
رابع شي منو هـ اللي يقدر يدفع حق 4 حريم،، اذا الوحده فيهم ديون عرسها اتم
وياه لين ما اييبون عاشر ولد

إذا كل واحد يفكر مثل ماتفكر
عز الله مازادت التركيبه السكانيه ولا حتى نسمه واحده
خلاص دام جيه
لاتغصصون بعماركم وايد عشان سالفة الســكان
خلوا كل شي على ماهو عليه

لكن اذا في المستقبل استويت تاجر.. اعتقد بكون عشت واقع
وحياة هالمستهلكين وحاس فيهم،، فـ ان شالله بـ راعي هالشي

بس إنته اذا بتكون غير عن الباجين فبتــكون إنته الخســران الوحيد
يعني غيرك يضرب بالاسعــار ويستربح وإنت مرخص بالاسعار وخســران
ترا النــاس الحين مادور إلا الغــالي عبــالها هو الزين

[إسهر معي ليله]

إذا كل واحد يفكر مثل ماتفكر
عز الله مازادت التركيبه السكانيه ولا حتى نسمه واحده
خلاص دام جيه
لاتغصصون بعماركم وايد عشان سالفة الســكان
خلوا كل شي على ماهو عليه

لا حشى ،، لا تفهميني غلط

انا معاج واوافقج الراي،، بس عطيتج أشياء توقف ضد هالحل

ومثل ما نفكّر كيف نزيد نسبتنا.. لازم نفكّر كيف نقلل من هالوافدين
اذا كانوا عرب راضين.. لكن الأهم هالأجانب اللي موصخين الدنيا

بس إنته اذا بتكون غير عن الباجين فبتــكون إنته الخســران الوحيد
يعني غيرك يضرب بالاسعــار ويستربح وإنت مرخص بالاسعار وخســران
ترا النــاس الحين مادور إلا الغــالي عبــالها هو الزين

هاللي يدورون الغالي مافيهم مخ،، صح انه دايماً
هوه الأحسن.. بس فيه سوالف غاليه ما تتشاهــد
شرات ماركات الثياب.. بس اسم.. و الشكل ما يدل
على أي ذووووق

وبعدين التجاره شطاره،، وانا يوم بسوي بزنس
بسويه عقب دراسه،، واكون متأكد انه 100%
بينجح،،، عاد ان شالله ايي اليوم اللي نسوي فيه
بزنس .. دعواتك يا حجه

[مزايا]

ومثل ما نفكّر كيف نزيد نسبتنا.. لازم نفكّر كيف نقلل من هالوافدين

نسبــة الوافدين اللي عدنا مستحيل تقل
الايد الوحده ماتصفق

الكل يشتكي من الوافدين إنه نسبتهم وايده فالبلااد
بس لو تشــوف هم اللي قايمين بها
يعني مستحيل تلقى مواااطن مكان وافد ومايتحرطم
دوم ترا يقوول انا اشتغل هالشــغله ؟! عيل شو فايدة الوافدين

اذا كانوا العرب راضين.. لكن الأهم هالأجانب اللي موصخين الدنيا

كيف موصخين الدنيا أبغي اعرف

[مزايا]

الهندي في بلاده ما يسوق سيكل.. ايي هني
يطلع ليسن وياخذ له احسن سياره !!

بتعبــه وشقــاه

مب عشان سواد عيونه عاطينه هالامتيازات

[إسهر معي ليله]

نسبــة الوافدين اللي عدنا مستحيل تقل
الايد الوحده ماتصفق

الكل يشتكي من الوافدين إنه نسبتهم وايده فالبلااد
بس لو تشــوف هم اللي قايمين بها
يعني مستحيل تلقى مواااطن مكان وافد ومايتحرطم
دوم ترا يقوول انا اشتغل هالشــغله ؟! عيل شو فايدة الوافدين

في هاي صدقتي،، الوافدين قايمين بوايد أشيا،، بس ليش عددهم يزيد؟؟

اول شي المشاريع اللي تستوي تجذب الناس اييون يعيشون ويشتغلون عندنا

وثاني شي هالمشاريع تطلب شركات أكثر وأكثر وبالتالي تزيد العماله عندنا

فـ عشان جيه كنت أقول بسنا مشاريع.. نكتفي باللي عندنا

كيف موصخين الدنيا أبغي اعرف

أول شي أنا قلت ( اذا كانوا عرب راضين ) ،، يحني احنا راضين اذا كانوا عرب
أبلة عطيات مستويه

بقولج كيف موصخين الدنيا ،،

جرايم قمنا نشوفها وغريبه وايد علينا،، والسبب هالأجانب

على أيام قبل كان الأجنبي يوم ايي يخبرونه شو في هالبــلاد
وشو لازم يسوي وكيف يحترم عادات أهل هالبلد،، اما احين
مافيه هالشي وصارت الدنيا فوضى.. مفاصيـخ وسكــارى في
الشوارع،، واحضان وبوس جدام الكل وما محشمين حد

واستغرب منهم !.. ما تعرفون شو الحرام،، فـ ليش مستعيلين
وتسوون جدام الناس .. روحوا بيوتكم وسووا اللي تبونه

شوفي الوصخ والبلاوي اللي تستوي في سكن العزابيّه،،

الدنيا وايد تغيّرت،، مب شرات قبل والله
والله يستر من اللي ياي عقب . . .

[إسهر معي ليله]

بتعبــه وشقــاه

مب عشان سواد عيونه عاطينه هالامتيازات

على عيني وراسي،، بس أنا قلت هالكلام رد على انهم يحسدونا

يعني في بلادهم ما يحصلون اللي محصلينه هني وبعد حاسدينا
وحاقدين عالمواطنين... فهمتي