التعــصب بحــدود

[بريد ألكتروني]

اليــوم وآخ من اليــوم .. كــان طـويل وايد حيث اني انش من الصبــح عالساعه خمــس وابدا مذاكرتيه فمكتبة الجامعة وكانت عندي كلاسات متأخرة لين الساعه ثلاث الظـهر .. فخــلصت دواميه وانا هلــكــان ومنتهي وكـــــــــان تفكيــري كـله يتمحور حــول اني اوصــل البيــت واخلي صديقي العزيز محمد يسويلنا ( جـاي كــرك ) من اللي يفــر الراس ويعدل المــزاج وطبــعا الى جـانب يلستنا المعتادة انا والشباب بعــد صلاة العصــر .

المهم عيـنا من الله خيــر وشـربنا جــاي وبدو الشباب بالوصــول لبرزتهم اليومية ( اللي هي بيتنا ) وبدت السوالف والضحك والوناسه والامور اللي تفرح الخاطر . واثنينه من الربع شغــلو البلاي ستيشن عشان يلعبون كـورة .. واثناء اللعب حد من الاخوان طــرا مبــاراة العين والوصـل لنهــائي كــأس صاحب السمو رئيس الدولة اللي بتجري اليوم بعد ساعه بالظبط ، والأخ كــان وصلاوي فبدا يتكــلم بكــل حماس عن فــريقه وطبــعا ف برزتنا شــباب من كل امارات الدولة من بوظبي لين الفجيرة ، فما كمــل دقيقتين يرمس الا وواحد من الشباب العيــناوية يقاطع رمسته ويتكلــم عن العين ويذم الوصــل طبــعا عن طريق المزح . وانا بمــا اني وحداوي ومتعصب وما لي لا نــاقة ولا جمــل في البطولة ومقهــــــــــــــــور دخــلت بعد في الموضوع وقمــت اتكلم عن الفريقين واحاول اقهرهم وارفع لهم الظغط بما اني مقهووور اساسا .


اخوانيه مثــل ما قلتلكم اليــلسة كــانت تضم شباب من كـل امارات الدولة .. وصحيح انه النقاش بدا من بعض الشباب المتحمسين لأنديتهم وهذا شي طبيعي .. لكــن اللي حز في خــاطريه انه النقاش تــطور وصــار مقــارنة بيــن الامارات وسب وذم .. فمــثلا في شباب وصلو فالموضوع انهم يغلطون على دبي وهلها بما انه الوصل من دبي وفي شباب غلطو على العين وبوظبي .. واستوى الموضوع مثل ما كلكم تعرفون ( انتو يمنيه وانتو عيم ) وأنا تميــت يــالس ومبهــت وخاطريه اصفعهم واحد واحد لانهم خربو احلى وقت بالنسبة لي اللي اعتبره وقت راحتيه

انا اعــرف طــولت عليكم بالمقدمة والتفاصيــل ..

اخوانيه التعصــب شي مطلوب وجميــل و التشجيع والوفاء لنادي معين شي جميل بعد بس مب لهالدرجة .. كــل شي له حدود .. ما نبا نوصل لدرجة التفرقة بيــن اماراتنا الجميلة وهلها لمجرد مبــاراة وافرقة .
انا مش ضد انه الواحد يكون متعصب لناديه .. بس ضــد انه الواحد يكون متحيز ومتعصــب لمجرد انه النادي يتــبع اماراته !! يعني انا مثــلا فريقي اللي هو الوحدة خســر بشجع الجزيرة لمجرد انه تابع لبوظبي ولمجرد العناد انه ولا واحد من اندية دبي او الشارجة او غيرهم ياخذ البطولة والعكس صحيح .. شو هالعقلية المريضة !؟؟ .. تــرا كل هالاندية تتــبع بلادنا الجميلة اللي هي الامارات وكلــنا عيــال عم واخوان وانساب وجرايب .

الرياضة بشكــل عام وجدت للمتعة والتسلية .. وحـاليا المباريات اللي تشوفونها موجودة لغــرض امتاع الجماهير .. فليش نخــلي شي انوجد لسعادتنا يكــون سبب للتعاسة والفتن امبينا ؟؟

الموضوع جدامكم ياخوانيه .. واتمنى اشوف تعليقاتكم الطيبه

انا شفت اني لازم احــط الموضوع لانه غالبا ما تكثــر المهاترات ف هالمواضيع قبــل مباريات القمة

[مــهــابه]

مـاشـاء الله صيـت مباراة الكأس واصـل عـندكم

أخـويـه عـنوان الموضوع لـفتني


ولكـن دام أنه السـالفـة فيها مبـاراة ماظن يــكون بـحدود

يـعني مثـلاً كأس رئيس الدولة هالسنة بيكون بين دبي وبوظبي وبالظبط العـين

فـ تحصل اللي كل حد متحيز لإماراته وللفريق اللي يشجعه

تـعال مثلاً

لو لعـبوا العين والوحده ورغم انهم نادين من إمارة وحد ولكـن يوصل التعصب امبينهم للامعـقول

والدليل ع هذا الضرايب اللي تستوي عقب المباراة ، وتكسير السياير ( يغمضوني والله )

هالتـعصب حلو ويعطي نكهه ولكن مثل ماتفضلت بحدوود


وانـت ياخوك ذكـرك موقف عن التـعصب ، اللي هو المباراة

ولكن بـرغم انه نحن شـعب واحد

وحاكمنا واحد

ولكن تـشوف التعصب والتحيز فينا بأشيـا كثيرة

أمسات كنت أتناقش انا واربيـعاتي فـسالفة الجرايد اللي تصدر من الإمارات يـعني لـوشفـنا جريدة البيـان أخبارها اولاً واخيرها لـدبي ، صحيح تحط مواضيع بشكل عام ولكل امارات الدولة ولكـن لـ دبي يكوون أكثـر

ولوكان الموضوع يتكلم مثلاً عن اماراة الشارجة وشفـته فجريدة البيان بتحصلهم محطينه فصفحة وصغير ولكـن تعـال شوفـه فجريدة الخليج بـتحصل له صفحة الروحه وعاطينه يمكن اكبر عن حجمه

والعكس صحيح فبـاجي الجرايد

كل حد يتحيز لإماراتـه

وحتى فـيلستنا نحن ، نتحيز للإمارة اللي نعيشها ، هل بوظبي بصووب والشارجة بصووب وراك بصوووب ، وكل حد يشوف الزين عنده وبس ويتناسوون انه نحن نعيش ف دولـة وحده

وعـاد المعـاير لاتيي صوبه ، وااايد منه

فالتـعصب موجود

وفي اشيـا كثيرة !!

[هزاايم]

السلام عليكم ورحمة الله وبركاته

الحمااااس وما يفعل
والتعصب لهذا العمل

بطبيعتنا لو حبينا شي,,اكيد رااح نداافع عنه,,ونذكر محااسنه ونخبي عيووبه
لكن اي شي زاد عن حده انقلب ضده

لكن توصل إني اشجع ناادي الفلاني لأنه تاابع اماراتي
بقول اكيد هالإنسان ماله خلفيه عن الأنديه,,ان دل على شي راح يدل على جهله بالريااضيه
يعني مثال انا
اشجع الوصل من بعد مباراتهم ضد الأهلي
لأنهم اثبتوا قوتهم ,,وشوفوا الحارس كيف يراقب,,وشوفوا المهااجهم كيف يقتنص الفرصه,,شوفوا التخطيط من بين اللعيبه لغايه وحده وهي الهدف"القول",,يعني على اقل اقدر اربط وهب شرط احفظ اساااميهم"عييييييييييب "
لكن اشجعه لأنه تابع لدبي
ماافكرت بها اصلا

وإللي يفكر بهالطريجه
يمكن يتحرى كل اماراه دوله بحالها,,
مايعرف حنا سبع وكلنا تحت ظل المتحده

عجبني موضوعك ويمكن ردي مش الرد المناسب لكن انا يايه اقول لك
لاهنت يا اخوي
وعسااك اكثر
ونتمنى لك الرقي ورؤية ابداعاتك اكثر

[الاسطوري]

السلام عليكم ..

"بريد الكتروني"

أخوي السالفه اللي صارت لك تصيـر في كل مكان وبين كل النـاس سواء على مستـوى الدول أو على
مستوى الأنديه في الدوله الوحده يعني بعطيك مثال صار لي يوم مباراة إفتتاح
كاس الخليج اللي كانت بين الامارات وعمان
وطبعا الامارات خسرت
وكنا في عمان لو تشوف شو سووا فينا بصراحه كرهونا في الشعب العماني يعني وين مانروح يحطون
علينا وكلونا حتى عند وحده من الاشاير كانوا متيمعين قروب يوم شافوا رقم
دبي إلتموا على الموتر يعني لو أقولك 15 واحد
بعد يمكن أكثر شويه
وبياكلونا ولا الافارقه اليواعه بس بصراحه ماقصروا رحنا تعشينا في الطازج وعطونا خصم 50%
عشان عمان فايزه ومن وفائنا للوطن قبلنا العرض انزين نرجع للموضوع انا
عن نفسي ماشجع ولا أهتم في هالمواضيع وإذا
كان شي يهمني ممكن
أشوف المباراة وإذا ماقدرت أكتفي بالنتيجة ومرات يكون فيني حماس بس مب لدرجة إني أسوي مثـل
مايسوون يعني السالفه ماتسوى إلا هي كورة يركضون وراها ليش كل
هذا في أمور أهم المفروض أهتم فيها
وأعصب عشانها
وكل اللي يسوون جيه ويتضاربون على هالأمور أقولهم إسمحولي ماعندكم سالفه النادي اللي حارق
أعصابك عليه وبتييك جلطه وبتموت عشانه مثل هاك السعودي الله يرحمه
مابيفيدك يوم بتجابل ربك وخاصه اللي
يتركون صلواتهم
عشان مبـاراه وتراهم نسبـه في نظري تتعـدى 60 او 70 % من اللي يتواجـدون في الملاعـب أو
حتى في المقاهي واللي مب عايبنه كلامي ويبى يكسر موتري عناد فيني
يروح يدوره طايح مادري في أي جاراج
والسموحــه


الاســـطـــوري
أخوكم

[الدلووووعة]

والله ياخويه التعصب في كل شي هب بس فالمباريات

بس الاغلب فالمباريات
يعني يوم المباره كنا فالكلاس ونرمس عن المباره
وانا الوحديه من الشله وحداويه

جان يقولون يله كلكهم شجعو العين ترا ه تابعه لبوظبي
انا قلت مستحيل اشجع العين وبعدين احلمو تاخذون الكاس لنه
شوفو لعبكم بتعرفون جان ترد عليه وحده انت يمن بوظبي
ليش تشجعين مال دبي قلتلها ترا حتى انتي صح عيناويه وصدقيني لو كانت المباره بين الوحده والوصل
كنتي بتسيرين للوصل عاد شو ردت قالت اونه اكيد شو اشجع مال وحده هيل الخوال ماشي شغل
قلتلها عيل الخوال اللي هب عايبينج لعبهم احسن عن لعب لعيبتكم المهم تمينا على جي واخر شي قلتلها عيل حصلتو الكاس وظهرنا

يعني يوم تعضبون يدخلون كل شي فالسالفه الجبايل الاماره يمنيه عيم كل شي
ها كله بس عسب مباره

والله يستر من المباره اليايه دام انها بين العين والوحده يعني بتكون في وايد اكشنات خخخ


وتسلم عالموضوع وادري اني رحت شرق وغرب بس ماعليه اسمحلنا ^^