موضوع مهم..سفر البنت لــ....؟؟؟

[بنوتة جميرا]

راعي الزعامه
شكرا ع مشاركتك

[قصايد غلا]

كـــل واحد يرقـــد على الينب اللي يريـــحــه ، وكلّن لــه رايــه

ما أعتقد الحايـــه لهالدرجــه تــحــد البنت إنها تسير تدرس برع البلاد



للــــــــعــــــــــلـــ ـــــــــم : عمر الثقافــــه ما كانت بالشهادات

ياما ناس درسوا وعندهم شهادات لا لها أول ولا تالي لكن الثقافه ما يعرفونها

ممكن يكون الإنسان مثقف بدون شهاده

ما أعتقد إنّــه من التخلّف إن الحرمه تيلس في بيتها وتجابل ريلها وعيالهـا

إذا كان هالشي من التخلّف ، عيل الثقافــه هي إنها تعق عيالها على تجلا البشاكيـــر ؟!

[صريح]

مداخله بسيطه على رد شمعه امـل
و عقب بقول رايي

أول شي وأهم شي..
الى يدرسون برع .. لهم مستقبـل! .. وشهادتهم أقوى من الشهادات الى موجوده هني
وغيـــــــر
يعني مثلا
يوم انا اتلاقى ويا ربيعاتي في جامعة زايد .. من قبل كلنا نفس الشي .. اما الحين فرق كبير بيني وبينهم! .. تعلمت وايد وايد من الجامعه المختلطه! من ناحية الجنسيـات والجنس.. تختلطون مع ناس مختلفيييين عنكم تماااماااااااااا!!!
ف يوم تسـافرون .. تتعلموون بعد اكثر .. ويكنون open-minded اكثـر ..

بالعكس مب شرط الشهاده اللي من برع تكون احسن عن الشهاده اللي من لبلاد
اغلب اللي ماسكين مناصب عليا فلبلاد متخرجين من التقنيه و جامعه الامارات
بس ما خذين الـ Masters و الـ PHD من برع لانها مش متوفره عدنا فلبلاد
يعني التأسيس من الجامعات المحليه .

و شي ثاني ، يوم اي طالب يبا يكمل دراسته برع يقدر ينقل الـ credits من التقنيه
لاغلب الجامعات المعروفه عالميا فهالشي يدل انه الدراسه بنفس المستوى.

و ثالث شي عن الاختلاط ويا الطلاب و الجنسيات الثانيه فالجامعات المخطلته
مب بالشي المهم واايد فهاي المرحله بالتحديد لانه المخ بعده ما يكون ناضج اميه بالميه
و التفكير دوم يكون سطحي و مش كامل .. الاختلاط اللي منه فايده يكون في مرحله بعد الدراسه
يعني فالشغل


-----------------------

ثاني شي
عندهم تخصصات برع موووول ماتيييي على باااااااااااااااااااالكم
يوم كنت اتصفح البوكلت عن الكورسات الموجوده في الجامعه جي استوى شكلي>>
مارمت أصدق!
يعني عندهم اشيا عجيبه وغريبه ورووووعه!

اول شي ما فيه جامعه فالعالم بتفتح فرع في لبلاد بتي بتحط لج
كل الكورسات اللي عندها فيها ، اول شي يسون دراسه شو الكورسات اللي تفيد الدوله
و بيكون عليها اقبال من الطلاب بشكل عاام و احتياج السوق و قطاع العمل بشكل خاص.
فشي اكيد ما بتلقين الكورسات العجيب الغريبه اهنه.


-----------------------

عكس هني .. طب ولا بزنس ولا ميدي ولا ايدووكيشن

هاي التخصصات اللي الدوله محتاجتنها عسب جيه تلقينها في كل الجامعات
ما بيبون تخصص يدييد و يخسرون عليه ملايين عسب كمن شخص يحبون هالتخصص
عسب جييه يفتحون معاهد خاصة ادرس تخصصات غريبه الواحد ممكن يسير يدرس عندهم

امثله بسيطه:

برع يدرسون الباليه و الرقص

لو فتحو هالتخصص اهنه منو بيدرسه بنات لبلاد ؟
و لو فرضا درسوا "شي من هالفري يسونها عادي"
وين بيشتغلون فالدسكو مثلا


برع شي كورسات الـ wine tasting

هالتخصص لو كان في جامعاتنا منوو بيدرسه ؟


غيير الكورساات الكثيره اللي موجوده برع اللي تكونelective و مش مهمه


-----------------------

والسبب الثالث
لانه البنت اهلها يبونها تسـافر برع .. وايدين من ربيعاتي من يوم هم صغار واهلهم يقولوهم انه بيدرسون برع ..
ف يوم كبرو خلاص هالشي في مخهم انهم بيدرسون برع وعادي =)

اسمحيلي ما فيه بنت عرب و اشراف اهلها بيحجزون تذكره حق بنتهم و بيقولون "الله وياج سيري ادرسي برع" ..
الاهل ما يصبروون عن عيالهم يوم كيف لو سارت عنهم شهور
كيف تقولين " لانه البنت اهلها يبونها تسـافر برع" !

بالعكس انا ويا البنت انه تكمل دراستها و تشتغل ما فيها شي ابدا
و عن الدراسه برع لبلاد اذا كان وياها محرم عادي تسير تدرس برع و محد بيقول لا
بس بدون محرم مستحيل

و انا شاء الله فهمتي كلامي =)


شي ثاني مبروك ع اليخت و الله يعطيكم خيره ويكفيكم شره
زين ما بتشلون يخت بو سعود عنا الحين هههه


-----------------------


بمختصر المفيد

اذا البنت بغت تدرس برع و التخصص مش موجود فلبلاد
و عدنها حد يسير وياها تسافر و تدرس برع برايه

اذا ما عندها حد يسير وياها ، تدرس فلبلاد

[بنوتة جميرا]

لي عوده للبقيه
بظهر اليوم ومابرد الا بالسبت
وناااااااسه

[تحفه]

عادي كلّـه واحــد الحين

هاللي يتعلثون باسباب طبيعة البنت خل يكبرون عقلهم


ايام اول كلشي كان صعب
لكن الحين سهلت كل الامور

الشي الوحيد الي تحتاج له البنت ( او الولد ) هوا الرفقه الآمنه + تكون شخصيتهم مهيئه.


عن نفسي ماحب اسافر ونافي هالسن .. لأني ماحب اغسل ثيابي بروحي و اطبخ وانظف الحمامات واغير الشراشف etc

(قلت ما احب مب يعني ما اقدر اسوي D: )


ســــــلام.

[الـيـاه]

أكــــيد أنا ويا أن البنت ممكن تسافر وتدرس برع ..

ليش الشباب شو الزياده اللي فيهم عسب هم بس اللي يسيرون ويفكرون في مستقبلهم الدراسي والمهني !
لأنـه أكيد الدراسـه برع لها مستقبل أكــبر

كان عنـّا بنت عموه اللي أكبر عني بسنـه تدرس في جامعة باريس السوربون .. بس حمدالله فتحوها العام في بوظبي فـ ردت هني ..

وكان عــادي لانـه طبعا ً - أمها وياها - وها أهم شي عندي ( ليش بنتج ؟ XP )
أقصد يعني حق البنات بشكل عام .. أنه أوكي يسيرون يدرسون برع بس مب رواحهم

لاااااااازم يكون حد من الأهل وياهم ..
لكني مب ويا أنها تسير روحها بيرها من شعرها وبفرها اليوم الثاني على ولد عمها ( ول ) خخخخ اتمصخر

.
.
.

[مجموعة إنسان]

مع حد عادي ..
بروحها لا ...

[بريد ألكتروني]

ما زلت استــغرب .. الاخوات الفاضلات اللي وافقــن على سفــر البنت بروحها للخــارج ما زالن يغفــلن راي الدين في الموضوع :)
هل هو عناد يعني :P

مممم اذا تشوفون انه الريال شوفيه زياده عن البنت وليش يروم يسافـر وهي لا .. اوكي بعـد نقــدر نقــول الريــال شوفيه زياده يروم يتزوج اربع وهي لا .. لا فعلا لازم البنيه يكون لها نفس اللي يحق للريال ..(( يالله شو هالتخلف وين حقوق المرأة والمساواه .. ترا مافي فرق بين الريال والبنيه كلهم يتساوون هههه ))..

اذا تشوفون انه الدنيا تطورت وعدم الموافقه على سفـر البنت بروحها تخــلف فبننسى اشياء وايده بداعي التطور .. بس عشااان يقولون نحن مش متخلفين ..

[الـيـاه]

^

أنت قريت كل الرد والا لووول

[بريد ألكتروني]

اختي العزيزة الكـلام موجه للكـل بشكـل عـام .. :)

[الـيـاه]

لا بس لأنك اقتبست من كلامي عسب جي رديت عليك ..

[ولد الشحوح]

شرع الله واضح ومالي رايي غير اني احترم الشريعة واطبقها
بس حبيت اعقب على الجدال البسيط اللي صار حلو ان الحرمة تدرس وتشتغل بس اذا كان هذا على حساب ريلها وعيالها فأقول طز في الشهادة والشغل واقول انها انسانة متخلفة لو كانت تحمل شهادة دكتوراة بس انا احب الحرمة تيلس فالبيت في اعظم من تربية عيالج تربية صالحة كشغل ؟!؟

[عيون الليل]

ما فيـــه ع الصدعــــه . . . والتعليـــق . . والهذربـــان . . ياينـي صداع لـوول
عشــان جي انا اوافـق البعـــض و أخالـف البعـض الآخــــر . . .

تسـلميـن ع الموضوع . . عرفنـــا آراء الاعضاء والعضوات

[مــهــابه]

تـدرون شـو المشكلــه

احيـان تـقولـون شــرع الله وشــرع الله

الواقــع انكم تــذكرون( الله) فـالأشيــاء اللي تبونهـا ، وتنســون فالأشيــاء اللي ماتــبونها

ولـو كل ولـد وبنت طبق شــرع الله فــكل شي

كــانـت الدنيــا بخير !!..

[الارستقراطيه]

عن أبي هريرةَ رضيَ الله عنه قال: قال النبيّ صلى الله عليه وسلم: «لا يَحِلّ لامرأةٍ تُؤمنُ بالله واليومِ الاَخِرِ أن تُسافِرَ مَسِيرةَ يومٍ وليلةٍ ليس معَها حُرمةٌ». رواه البخاري

والله سبحانه وتعالى قال ( يا أيها الذين آمنوا أطيعوا الله و رسوله ولا تولوا و أنتم تسمعون )

و اختلاف الراي لا يفسد للود قضية