السلام عليكم ورحمه الله وبركاته
اشحالكم؟؟؟
اليوم حبيت اطرح موضوع
وماعرف اذا حد طرح هالموضوع قبل
واكيد هو واضح من العنوان
..~الزواج من اجنبيات~..

ليش اليوم انشوف معظم شبابنا يتزوجون من اجنبيات؟؟
كيف الشباب يرضون ياخذون وحده لا هي من عاداتنا ولا تقاليدنا؟؟
هذي كيف بتربي عيالهم في المستقبل؟؟
وهل بيربون تربيه صحيحه؟؟
هذي من ناحيه
ومن ناحيه ثانيه
اللي انقهر منه
يوم اسمع واحد يبغي ياخذ اجنبيه
يوم ينسأل ليش؟؟
يقول الاجنبيه ما تطلب وايد
اما المواطنه مهرها يكسر الظهر
يعني الشاب عادي عنده يدين عسب يسافر او ياخذله احلى سياره
ولو دفع 20000 مهرها هذا بيكون وايد بالنسبه له
بس لو صرف بالآاااف حق اجنبيه عادي تراها اجنبيه

ويقولون ان الاجنبيه ما تطلب
هذا في البدايه اتبين انها بريئه وما تطلب ولا تصرف
بس عقب بطلع عينك يالمواطن
كل يوم تبا اتسافر عند هلها
وطبعا يوم اتسافر ما بتسافر جي خاليه اليدين
لازم تاخذ هدايا لهلها وطبعا تصرف بالالاف
هاي كلها مب مصاريف؟؟؟؟؟

وما شاء الله عليهم شبابنا اليوم طايحين في هالشي
واخر خبر سمعته
اكيد اتعرفون الممثله السوريه نورمان اسعد
طبعا نورمان معرسه كم من مره ومطلقه
والخبر يقول
ان رجل اعمال اماراتي من عايله مرموقه في دبي
تزوجها وبمهر قدره مليووون دولار
تصدقون والا لاء؟؟؟
يعني بدل ما ياخذ مواطنه بنت بلاده ويخفف من العنوسه
سار خذ وحده وافده مطلقه لا وبعد شوفوا كم مهرها

الحين حابه اعرف رايكم انتو في الموضوع
للشباب:
هل انت من المؤيدين للزواج من اجنبيات؟؟
اذا هي شو الاسباب؟؟
واذا لا بعد احب اعرف رايكم
وللبنوتات:
ابا تفاعلكم ورايكم في الموضوع لو سمحتن

عندي وايد افكار بس ماعرف اذا كتبتها بطريقه عدله
توني باديه اكتب فالسموحه منكم يعني

اختكم.. بنوتة جميرا ..