السلام عليكم
تذكرهم وابتسم للحياة
ذكريات سكنت الذاكره ! مواقف ما زالت تعلن بضوئها الأحمر عبارة ممنوع النسيان
بعضها مفرح والآخر تخيم علينا سحابة الحزن كلما تذكرنا تفاصيلها
سأدعكم مع بعضها.....
أم قفه !
أو بعباره أصح ..... أم كشه !
معروفه بكشتها .... ويمكن سر حلاها من كشتها ! قلت يمكن !
كبرت أم كشه ....وتعدلت واحلوت وصارت مزيونة المزايين!
بس ! بعدها بنظر البعض ................أم قفه!بس والله قفتها كانت حلوه :)
حمود بو الدواويح !
معروف ومشهور بالأوساط الفريجيه !
ما يعرف العربي من الإنجليزي بذاك الوقت !
لانه وبكل بساطه دومه راقد في الصف ! ومستحيل يذاكر!
أذكر مره كان ناسي كتبه على يدار بيتهم من رد البيت!
وطاح المطر ذيج الليله ! ويحليلهم الكتب ! ساح الحبر والورق اتجسف!
الحين (حمد) كبير ....وناجح بشغله ! بس سالفة بو الدواويح مستحيل أنساها!
أستاز أمين ! ( بالزاي لو سمحتوا)
حتى الزاي متوارثه بكل الروايات
عصبي ويا ويله ويا سواد ليله لو طاح بحد يغش!
حصته ...حصة مقدسه ! والله هالعباره دوم أسمعها علسانهم!
تلاميذه كبروا ... وصار عدهم عيال ...ودخلوهم مدارس
وبتالي الليل قصة أستاز أمين هي رمز الكفاح والنضال ( علينا عاد)!
الله يذكرك بالخير ....صدق خلفت رجال يخافون من طاريك (طاري العصا)
قيس بن الملوح !
هاي حكاية ليلى العامريه .... مع ولد عمها !
حب انولد من يومهم صغار .... وكبر وياهم
بس الكل يعرف .... ليلى لأحمد ! ويا حبنا لاحراجها !
مات أحمد بحادث بيوم الملجه .... وللحين أذكر نقش الحنا بإيدها!
مات أحمد .... ومرت السنوات وتزوجت ليلى
لكن .... عقلنا الباطني يردد بكل لحظه نشوف فيها ليلى
الله يرحمك يا قيس!
حرامي السياكل
هذا عاد مستحيل أنساه !
لأني من بين ضحاياه إلي استولى على سياكلهم بلحظة طيش المراهقه
يعفد الحوي بعز الظهر .... ويستولي على السيكل ويظهر من الباب الرئيسي!
لكنه طيب .... يرد السيكل ثاني يوم .... بس بحاله يرثى لها !
زخوه عيال الفريج..... وضربوه ضرب وشاتوه !
صار ريال ما شاء الله عليه .... وكل ما أشوفه أقول :
هكوه حرامي السياكل !
اكتب هنا .... مواقف لا تنساها ذاكرتك .... بدون ذكر الأسماء والألقاب ...
اكتب مواقفهم معك ... مواقفك معهم ... واذكرهم بالخير
السبب الرئيسي لكاتبة هذا الموضوع( موقف ذنيني مع كلكلوش) ربي يحفظهم
ملاحظه صغيرونه : ما عرفت وين أحط الموضوع ! فالأمر راجع لكم
رد مع اقتباس
مواقع النشر (المفضلة)