شهـادة ICDL ..

[دموع قلم]

السـلام عليـكم ورحمـة الله وبركـاته


كيــف الحــال..؟؟
عسـاكم الا بخيــر وبعـافيـة




حبيـت استفسـر وأسـأل إذا حـد يعـرف معلـومات عـن شهـادة ICDL

اممممم إذا بغيـت آخـذ هالشهـادة من ويـن أخـذهـا.. ؟!
يعنـي قصدي ويـن أدرسهـا ووين امتحنهـا.. ؟!

وووو بغيـت أعـرف كم تكلفتهـا.. الدراسـة وامتحـانهـا.. ؟!

وووبغيـت أعـرف أهميـة هالشهـادة الحيـن..
مهمـــة ولا مـالهـا قيمــة.. ؟!



والسمـوحــة منــكم

[بنوتة جميرا]

مرحبا دموع قلم
انا خالتي خذت الشهاده من قريه المعرفه
اللي في الرويه الحين
بس احس ان مالها فايده
يتعلمون اشيا ويطبقونها ويمنحنون فيها وعقب ينسون كل شي
يعني انا ماعندي شهاده ICDL بس اعرف للكمبيوتر اكثر من خالتي اللي عندها الشهاده
وعن التكاليف وكيف الدراسه بسويلها كول وبتأكد وبرد اخبرج

[شمعة أمل]

مرحبا..

انا خذت الأي سي دي أل في قرية المعرفـه .. بس هم الحين تحولو للأكدييمك سيتي *المدينه الجامعيـه*.. *برنامج الشيخ محمد*
هم بس يوفرون للناس ال ستارتب .. الى الحكومه تطلبها .. الى بس 4 توبكس .. لكن هم أصلن 7 .. ويفضل تسوين سبع.. اذا عندج واسطه .. عادي بيخلونج تسوين لين 7 .. اذا لا بيقولوج انه مايسون لين 7 ..
انا مادفعت شي هناك .. سويته ببلاش *اظني* .. يعني مادفعت شي مادري اذا مكتب ابويه دفعلي ولا لا ..بس اظني تدفعون


ثاني مكان في دبي
بعد في قرية المعرفه
اظني اسم المعهد IT SOLUTIONS شي جيييي .. مكانه عقب تمكييـن .. ماعرف شو اسم البلوك بالضبط .. واحيد يوم سألت كان ألف وشي اذا انا مب مخرفه


بتستفيدين وايد من هالشهاده ..
أول شي اذا ماتعرفين شي في الكمبيوتر بتتعلمين
ثاني شي .. هالشهاده وايد تساعدج يوم تتقدمين للجامعات .. ف نسبة قبولج في الجامعه اكبر عن البنت الى ماعندها الشاهده
ثالث شي .. على وقتنا يوم نتخرج .. يمكن مايقبلونج تشتغلين الا لو عندج هالشهاده!

[العجيبة]

كل المعــاهـد تقريبا يدرسون الاي سي دي أل ..
بس بعضهـا اللي تمتحــن ، مب شرط في قرية المعرفة يعني ..

وسعرهـا من مكان لـ مكان يختلف بس تقريبا ألف أو ألف ومية درهم ..
تقـريبا الامتحان الواحـد بـ 100 درهم .. إذا ناوية تمتحنين بدون دراسة ..

وتفيــدج في الشغـل .. لج الأولويــة أكثـر عن اللي عندهم شهادة كمبيوتر عادية ..

مـا أدري كأني لمحــت قبل كم شهـر خبر يقول إنهم بيخلونهـا إجبـاري لعيال الثانوية العامة ،
يعني محد بيتخرج إلا والشهادة عنده .. بس لين الحين محد طرا هالشي في المدارس ..

وبالتـوفيييييـج ،

[دموع قلم]

بنـوتـة جميــرا..

هيـه عشـان جيـه حبيـت أسـألكم لأن أغلـبهم يقـولون لي ماشي فايـدة من هالشهـادة
لأنهـم ما يتعلمـون إلا في الأشيـاء الأسـاسيـة اللي أغلبنـا نعرفهـا والحمـدلله.. بــس
أبـا استفيـد منهـا من ناحيـة أهميتها في الدراسة الجامعيـة.. وسالفـة المنـح والقبـول..

انتـظر عـودتـج.. ومشكـورة عالـرد أختــي ..




شمعــة أمـــل ..


هيـه أفضـل أن تكـون في دبـي.. وإن شـاء الله بسـأل عن المكـان بالضبـط ..
الحيـن أنـا في الثـانـوية العـامة يعنـي بحـاول آخـذهـا في هالفتـرة وبسـأل كيف جدول الدروس
اللي بـاخذهـا.. والله يهـدينـي ليـن الحيـن ما قـررت أدش أي تخـصص بالضبـط .. مرات أفكـر
في هندسـة.. ومـرة الطـب >> حلـم.. !!

تسلميـن أختـي.. ومشكـورة عالــرد..

[دموع قلم]

العجيبـــة ..

هيـه خبـرونـا عـنهـا بتكـون إجبـاريـة.. بـس يـوم كلمـت الـوكيلـة تقـول المدرسة
ما يـت لهـا أي قـرار ولا خبـر مؤكـد أنهـا المسؤولـة عن دراسـة الطلبـة لهـالشهـادة.. !!

هيـه الحين لقيـت إعـلان في الجـريدة عن معهـد يعطـي دروس الـ ICDL والامتحـان..
إن شـااء الله بتصـل فيـهم وبستفسـر..



بـس كيـف أعـرف أن هـالشهـادة اللي من هالمعهـد معترفـة ولالا .. ؟!!

[قصايد غلا]

الآي سي دي أل شهادتها مهمه لو مب مهمة جان ما اهتمّوا لها في الجامعات
لو عندج ايّاها تتكنسل عنج كلاسات الــIT ==> أنا باخذ الشهاده عشان افتك من الآي تي في الجامعة :)

و في نفس الوقت بوفّــر على عمري التعب لأني إجباري آخذها لو بغيت أتوظّــــف

وسعرها بـ حدود الـ1000 و شويّــه

و السموحـــه ...

[بنوتة وردية]

ما عندي اي فكرة عن هذي الشهادة

وان شاء الله باااقي الأعضاء ما يقصرون معاج

والسمووحة منج

[وحي القلم]

أنا خذت الشهاده قبل سنتين

الدوره بـ 1000 و هالسعر يشمل الامتحانات بعد

و كنت أمتحن فقرية المعرفه

الدوره وايد سهله يعطونج 6 كتب:

عن أساسيات الكمبيوتر و الورد و الباوربوينت و الاكسل و الاكسس و الانترنت

بس مادري.. عقب ما خذتها قالولي أنه ما يطلبونها فالجامعه

.
.

أعرف وحده بعد كانت تاخذ الدوره في المكتبة العامه و خذت الشهاده من عندهم

و شهادتهم معترف بها .. اتصلي اسئليهم إذا عندهم الدوره لين الحين

.
.

ولا عن سالفة شهادة الـ icdl لطلاب الثانويه

يقولون فالمدرسه أنه ما وصلتهم نشره عن هالموضوع

يعني مب أكيد.. بس بعد ما تظمنين هالوزاره

يمكن فأي وقت يطلبونها

.
.

[دموع قلم]

قصــايــد غــلا ..

هيــه أخـوي جيـه قـالي .. بينفـعني في الجامعـة وبيمسحـون مني مـادة الـ IT
تسلميـن أختـي عالـرد .. ربي يـوفقج إن شـاء الله ..




بنـوتـة ورديــة ..

مشكـورة عالمـرور أختــي ..




وحــي القلــم ..

يـزاج الله خيــر الغـاليـة عالمعلـومـات..
واسمحيلـي حشـرتـج عالمسـن.. تراني من زمان ما شفتـج داخلـة..

ربـي يـوفقـج في دراستـج إن شـاء الله.. ويحفظـج من كل شــر..

[وحي القلم]

واسمحيلـي حشـرتـج عالمسـن..

بالعكس.. أنا روحي ما صدقت على الله أحصلج

(( حاضرين فأي وقت ))



.
.

[الدلووووعة]

انا سئلت كذا وحده من بنات الميجر والجينرال عن هاي الشهاده
اذا مهمة فجامعة زايد ولالاء قالولي لا هب مهمة

وانا اصلا مابا اخذها مادري ليش ^_^
وزين يوم قالو هب مهمة ^_^