كــل من تغلا وراااح

[دانة حتا]

السلام عليكم شعب واحاتي

ان شاء الله كلكم بخير وعافيه

اليوم بس بعد ما راحت خلاص الحره اللي فيني حبيت اقول

ليش تتعرفون على ناس اذا كنتو ناوين تتركوهم
ليش تتعرفون على ناس واتعلقونهم اذا انتو تبونهم مصلحه

هل يرضيكم انه حد يتعرف عليكم واتحبونه وعقب يسويلكم طاف ولا حتى
يقولكم انا بتركك لانك جذا وجذا

انا وللاسف انه صارلي هالشي ولا هب بس مره مرااات ومن عدة اشخاص يعرفون عمارهم
وبنفس الوقت ....حزنت وحاولت بس خلاص...(عزة نفسي.. ما تسمحلي)

تعبت من كثر ما افكر واحاتي وانا مب من طبيعي هالشي وبصراحه انا من قبل اقول

BE EASY

بس شي حبيت اقوله لكم
احذروا ترا هالنوع وايد منه الحين
واللي يحس عمره جذا من الحين اما يتم بعيد عن الناس او يعدل من عمره

[مــهــابه]

دانـه حـتا:
هـدي اعـصـابج يـاختـيه
نحـن فـهالحيـاه ، نشوف أشكال وانـواع ، اشخاص نـحبهم ونـتعود عليـهم ، وبـعد نتـعلق فيـهم يمكـن يـهدونا بـأسباب ، ويمكـن نهـدهم بأسبـاب ، مـاحد يـعرف شو اللي مكـتوب لـه بظهر الـغيب


لكـن عـلاقـة المصلحـه !!

فـهذي وايد منـها ، ناس يـتقربـون منـج ، بأي حـال من الأحوال ، لـغرض مـا في نفـسهم وبـعد مايحصلـون اللي فـخاطرهـم تــشوفـيهم يخلـونج

بـس مثل مايقولون

الدنيـا دواره

يـوم لـهم ويوم عليهم

ومثـل ماتـركوج وخلـوج ، بيدور بـهم الزمـن

والأهـم انج تــتعلمين من اللي يسـتوي بـج ، وتـقوين عـمرج !!


والله يبـعد هالناس عـنا وعـنج

[شمعة أمل]

محد بيودرج بدون سبب
صح شي ربع مصالح وجي .. بس اذا هم مصلحه المفروض انتي الى تودرينهم من البدايه ..
لكن اذا البنت كانت اوكي ومرابعتنج وفجأه هدتج اكيد شي سبب.. محد بيهدج بس جي .. كلحد عنده سبب.. يمكن فيج شي هم ماعيبهم ولا شي جي .. فكري وبتعرفين..

[طير الحب]

أنا من النوع الي صعبه اثق بحد بسرعه حتى في اختيار الصديقات جدا حذرة

وسبحان الله الشخص ينعرف من البداية شو معدنه...وفي اشخاص المواقف تبين لج معدنهم..

ربي يحفظج

[المزوحي]

احب أقول شي للأخت شمعة أمل .. حتى لو فيها شي على سبيل المثال .. كلنا فينا شي ما يعجب

الطرف الثاني .. لكن إذا سبب قوي هذا كلام آخر ...

دانة حتا ... يوم بتتعرفين على ناس .. وحسيتي من البداية ببتعلقين بهم ... سيطري على الوضع ..

يعني .. أقلمي عمرج بإنه ممكن يبتعدون .. خاصه في نوعيه .. إذا سألتي عنها واهتميتي يهملونج ..

طير الحب .. استويت مثلج .. لأنه ربيعي ينشد يوم يبغي شي ... وبديت اعرف الناس ..

[همس الدماني]

هدي اعصابج الغلا

ترى الدنيا ما سوى

ومن باعني برخيص بعته بتراب

واللي ما يبانا مانباه ... مليون مثله في البشر ان غابت غيرك لي ظهر

وانا كمن مره استوت معاي هالمواقف بس من منو من اقرب الناس لك
هذيك الساعه تحس حرقه في صدرك ماي الدنيا كلها ما تطفيها
والحين استويت ما اثق في احد بسهوله

::كل من تغلا ::

كل من تغلا وراح
هالوطر ما ادريبه
دايم حزن وجراح
لا احساس ولا طيبه
اهل الوفا راحوا
زمن وفا ذله
سارو بليا قلب
خلا يبيع خله
شفت البشر اجناس
وسط الغدر غرقوا
شفت بعيون الناس
بعد الوفا افترقوا
لالا تظن يا صاح
وطر السعد يرجع
ما اشوف احد مرتاح
والعين دووم تدمع
شفت القلوب الوان
اسود سوااد الليل
شيبه وصغير شقيان
كل يذووق الول
انسى زمان راح
واتذكر احبابك
هالوطر كله جراح
ما ندري شو اسبابه ...


ما اقول إلا الله يسامحهم
والله ما يظرب بعصا...

[شمعة أمل]

المزوحي
كلنا فينا عيوب .. لكن في اشيا .. حتى تكون تافهه .. في ناس مايرومون يتحملونها ..
مثلا بعطيك مثال
اشتغلت ويا وحده في الصيف .. هالحرمه .. ماتطيع تشتغل ويا اي حد .. لين ماتشوف ريولهم!! .. لو حبت ريولكم .. يعني عادي ترومون تشتغلون وياها .. اذا ماحبت شكل ريولكم .. مع السلامه ممنوع تشتغلون وياها!
في اشيا بسيطه ..
كل شخص وtheir prefrences ..

يمكن البنت قالت شي لربيعاتها وهالشي وايد عاااااااادي .. لكن هالربيعه ماحبته ف ودرتها ..
ولا مثلا ستايل هالبنت غير عن هالبنت ف theyre not meant to be

في وايد واااااااايد اشياء تنهي الصداقات .. لكن تكون بسيـــطه وسخيفه .. لكن هالحيـاه .. ويا دانة حتا حطي في بالج .. يمكن خسرتي كم من بنت ... لكن ربج بيعوضج بغيرهم.. واحسن عنهم

[الملهم]

نصيحة دوم اخوي ينصحني ..

لا تتعلق باي انسان بشكل كبير ..
لانه لازم في يوم بتضارب او بتفارق ..
وهذيج الساعه بتندمون ..

والحمد لله مش من طبعي اني اتعلق باي انسان تعلق قوي ..

اعانكِ الله اختي ..
وصبركِ على بلاوي الناس ومخاوفهم ..

[دانة حتا]

وجهات نظر وايد وانا احترمها
بس للي يقولون انه يمكن يكون انا السبب
انا بقرب لكم انا شو كنت اقصد
انا اقول اذا كمنو عايشين مع هالانسان سنين ويعرف كل عيوبكم وجسناتكم واتعرفونه
ويوم قرر يتخلى اتخلى بدون ما يبرر السبب لانه اصلا هب موجود
ويطلع اعذار من السما
انا هالنا اللي اقصدهم
بس اذا كمن انا الغلطانه صح انا معاكم الشخص اللي ما ترتاحون معاه لا
اتعيشون معاه ابد احسن لانه محد بيرتاح