موضوع مهم وحساس جدا..أرجوا المشاركه..

[بنوتة جميرا]

السلام عليكم ورحمه الله وبركاته
اشحالكم؟؟؟
انشالله مرتاحين
اليوم حبيت اطرح عليكم موضوع جدا حساس
بالنسبه لي وكل البنات طبعا ويمكن الشباب
وهالشي بيمر ع كل البنات وودي اعرف راي كل وحده وشو بتسوي؟؟؟
الموضوع هو
هل لو انخطبتي بترمسين خطيبج ع التليفون والا لاء؟؟؟؟
ويوم بتكلمينه هل بيكون هالشي بينكم يعني من دون ما اهلج يدرون والا بتكلمينه مع علمهم؟؟؟؟
وهل تظنين ان اهلج بيوافقون انج تكلمينه؟؟؟؟
واذا كلمتيه شو من المواضيع بتتكلمون فيها؟؟؟؟
وهل بتكونين جريئه معاه؟؟؟؟

وللشباب:
انت شو بيكون موقفك؟؟؟هل بترمس خطيبتك؟؟؟
وشو من المواضيع بتتكلمون فيها؟؟؟
ولو كلمتها في فتره الخطوبه بعد الزواج هل بيي يوم واتقولها مثل ما رمستيني يمكن اترمسين غيري؟؟؟
وانتي شو بيكون موقفج لو في يوم قالج هالرمسه؟؟؟؟

اتمنى الصراحه والتفاعل من الجميع

اختكم.. بنوتة جميرا ..

[نور الإيمان]

دام انه الأهل ما يبون او ما يرضون بهالشي ف ليش من اساسه اكلمه!!
و ان هو - الريال - يبا يكلم خطيبته ليش يمشي بالعكس و يدش من الدريشة!!
يعني ليش ما يستأذن من أولياء امورها - اخوانها او ابوها - عن الموضوع و يكون في الsafe side بدل هاللف و الدوران ...
اما من ناحية المواضيع .. ترى هذا ما يباله تساؤلات او تفكير او ما ادري شو .. كل المواضيع ممكن تتكلمون عنها ... عن كاس الخليج عن اي شي ...

بس شو المقصد انه بكون جريئة

المهم هذا رايي .. و good luck

[بنوتة جميرا]

نور الايمان
هالموضوع قمت الاحظه وايد في مجتمعنا
عسب جي حبيت اطرحه اليوم واعرف رايكم فيه

وانشالله لي عوده عسب اكتب رايي انا في هالموضوع

شكرا ع المشاركه اختي

[بنوتة وردية]

مكشورة اختي ع الموضوع

عن نفسي ما فكرت في هاي السالفة

بس نحن عايلتنا عادي البنت تكلم خطيبها

وانا ما اعرف اصلا هم عن شو بالضبط لازم يتكلمون

عشان اقول لج عن شو بتكلم

الصراااحة ما عندي خلفية عن هالموضوع

وانا لين الحين صغير ما افكر ب هالسوالف

واكيد لازم تكون البنت جريئة في انها تقول الحق

وما تخش شي عشان ما يستوي مشاكل بعد الزواج

واتمنى من الأعضاء يتفاعلون مع موضوع

لان بصراااحة موضوع مميز

والسمووووحة منج

[بنوتة جميرا]

بنوته ورديه
مشكوره الغلا ع المشاركه
وهذي وجهه نظر ان في بعض العوايل عادي البنت اترمس خطيبها
ترا مش كل العوايل ترضى بهالشي

اتمنى من الجميع المشاركه عسب انشوف اراء الكل

[شمعة أمل]

أرمس خطيبي عالتليفون؟ مسـتحيـل لول

بصراحه
خاطري .. يوم انخطب .. أيلس ويا خطيبي كم من مره *مب على التليفون بس انه ايي بيتنا وجي* .. عشـان أعرفه .. واذاماعيبني أقدر أكنسل السالفه ..

بس ماظني هالشي بيكون عادي بعد.. لكن اتمنى انه يكون عادي


المشكله الكبيره والى تخوفني
لو مثلا
ملجنـا .. وماعيبني الريال؟ شو أسوي؟ .. مصيييييييييييييبه

[بنوتة وردية]

صبر صبر

شكلي فهمت الموضوع غلط

شو تقصدين بان خطيبها

يعني ريلها بس ما سووا عرس (يعني بس ملج عليها)

ولا خطيبها يعني قالوا ان هذا حق هاي بدون ما يملجون

[بنوتة جميرا]

شمعه امل
انا معاج صعبه انج اترمسينه عالفون
بس دام انه خطبج من حقج انج تقعدين معاه
طبعا في وجود المحارم يعني مايكون في خلوه
عسب ترمسون عن بعض
كل واحد يعرف الثاني اكثر
وهالشي من حق كل بنت وشاب

ودام انج بتقعدين وياه في فتره الخطوبه بتعرفينه عدل تقريبا
فأكيد ما بتندمين بعد الملجه
لان هذا اختيارج وانتي اللي قررتي مصيرج
بعد اكيد ما كلمتيه وارتحتي له

اتمنى التوفيق لكل البنات

[الـيـاه]

لااااا ..
إذا كان من الأهل ممكن أجوفه كمن مره .. بس لو ما كان من الأهل مستحيل جد غريب يدخل كمن مره بيتنا قبل الملجه ! لانه لو ما استوى نصيب قبل الملجه يكون غلط انه ياي وداش بيتنا وايد

بس اصلن أنا متأكده إني ما باخذ حد من برع العايله so الحمدالله بقدر اجوفه كمن مره لكن مب ارمسه فالتلفون .. ألا عقب الملجه ..

[همس الدماني]

والله نحن في عايلتنا عادي البنت ترمس خطيبها

بس انا عن نفسي ما اعتقد


يمكن عقب الملجه هيه

ولو رمسته اكيد بتكون السوالف صطحيه

لأني بكون مستحيه منه وهب متعوده عليه

واصلا حق شوه اتفلسف في هالسوالف وانا بعدني صغيره

هههههههههههههههههههه

اختي شمعة امل ترى يوم بتنخطبين المفرووض انه يشوفج وتشوفينه شوفه شرعيه

وطبعا اكيد بترمسين معاه

وتسلمين على الموضوع...

[بنوتة جميرا]

بنوتة ورديه
خطيبها يعني قالوا فلان حق فلانه
بس بدون ملجه
الفتره اللي قبل الملجه يعني

[الملهم]

احم احم ..
مب جني انا اللي كتبت ها الموضوع .. ^__^

الموهيم ..
بالنسبة لي ورأيي الشخصي ..
افضل اني اكلم خطيبتي واتعرف عليها ..
طبعا الافضل بدراية الاهل .. عشان اعرفها زين ..
واذا اتوافقنا خير وبركة .. واذا ما صار توافق نفسخ الخطوبة ..
فايش الافضل ؟؟
ان تكون البنت فسخت خطوبتها .. ولا طلقت ؟؟
فكلمة الفسخ اهون بكثير من كلمة الطلاق ..

هذا رأيي الشخصي .. ^__^

[بنوتة جميرا]

الياه
طبعا هذا رايي
انا ضد الزواج من الاهل
يعني مستحيل اخذ واحد من اهلي..طبعا هذا خارج موضوعنا..
وبعدين انا ماشوف ان فيها شي لو واحد غريب خطبج انه ايي ويشوفج
وين المشكله فيها؟؟؟
وحتى لو ماصار نصيب انتي ماسويتي شي غلط
والريال دخل من الباب
يعني عادي
انا عن نفسي ماشوف ان فيها شي

ثانكس الغلا ع المشاركه

[بنوتة جميرا]

همس الدماني
الله يوفقج ياربي
وثانكس ع المشاركه

[الملهم]

نسيت اقول ان شرعا ممكن الخطيب يشوف شعر الخطيبة لمرة واحدة فقط ..