امــوفر والا امــفلس !!!

[الشوق]

السلام عليكم ورحمة الله وبركاته ..
اخواني الكرام .. اخواتي الكريمات ...

من خلال متابعتي لبرنامج الدنيا سوالف ... عجبتني حلقتهم عن صاحب القرار .. وموضوعهم كان يتناول عن (( مصـــــــــروفك الشهـــــــــــري ))

اخواني .. اخواتي .. الموظفين والمتعلمين منكم .. المتزوجين .. والعزابيه ..
وحتى اللي يدرسون منكم
أكيد كل حد فيكم يستلم راتب سواء من شغله ... او من دراسته ..او حتى ابوه او امه ....
حبـــــيت اســــالكم ...
-جد شفت نفسك امفلس من اول الشهر او نصف الشهر .. لدرجة انك فكرت انك تتسلف من امك او ابوك ؟؟؟ (( لا اتقولون انكم ما تتسلفون )) ما بصدق !!!
-اذا كنت انسان اتحب اتوفر :- شو هي الاسباب اللي اتخليك اتوفر ..؟؟
-ولو ما اتوفر ..؟؟ شو اللي ايخليك اتفلس ابسرعه ؟؟
-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟
- شو هي الطريقه اللي تتخذها ؟؟ في تنظيم مصروفك الشهري؟؟
.
.
.
خـــــلونا انــــشوف مشاركاتكـــــــــــم ...
يمكن نستفيــــــــــد من تجاربكــــــم في تنظيم مصروفاتكم
فبنعرف من خلال ردودكم اذا كنت امفلس والا ؟؟؟


لاتنسون حقوق الطبـــــع محفوظه عند الشوق
وفي واحــــــــات بن دبـــــــــــي
14-02-2007

[الملهم]

جميل موضوعكِ ..

للاسف انا ما عندي مصروف ..
بس اذا كنت محتاج اطلب من اخواني وهم يعطوني ..
يعني محد يعطيني اول الشهر ولا نص الشهر ولا اخر الشهر ..
عند الطلب احصل ..

ودي يكون عندي مصروف اول الشهر ..
بس ان مش من طبعي اني اصرف .. احب اوفر لشيء اكبر ..
يعني تقريبا على حسب كلام الناس .. 50% زطي .. ^__^

الف شكر على الموضوع ..
ومثل ما قلتي بنتعلم توفير المصروف من الاعضاء ..
ومنكم نستفيد .. ^__^

[بوزايد]

جد شفت نفسك امفلس من اول الشهر او نصف الشهر .. لدرجة انك فكرت انك تتسلف من امك او ابوك ؟؟؟ (( لا اتقولون انكم ما تتسلفون )) ما بصدق !!!

اممم هي -- البنك ما يقول لا اتقوله تبا عشره يقولك ليش تاخذ عشره خذ عشرين
-اذا كنت انسان اتحب اتوفر :- شو هي الاسباب اللي اتخليك اتوفر ..؟؟

يا ريت بس ما تحس بجيمة الفلوس الا لما تشوفهم ماشي
-ولو ما اتوفر ..؟؟ شو اللي ايخليك اتفلس ابسرعه ؟؟

مصاريف وايد
-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟

ايام ؟؟؟؟؟ احتفظ بها لنفسي بس انحلت
- شو هي الطريقه اللي تتخذها ؟؟ في تنظيم مصروفك الشهري؟؟

اي شي احتاجه اشتريه ولا بخاطري وبس ويوم يخلص تراه خلص وادبرها

تسلمين الشوق

[شوق القلوب]

الســـلام عليـــكم..

حيالله الشــــــــــوق ^_^

والله موضوعج موضوع مهم و يخرخش في جيوبنا..!

الله يسلمج.. شوق القلوب تستلم مصروف من ابــوها.. و لكــــــــــــن.. بعد يومين اتلاقيني امفلسه .. و السبب اني اصرف و امدلعه عمري ع الاخر.. ع قولتهم جنه المعاش اللي عندي معاش شغل !! و عادي الشهر كله انا في حاله اكتئاب و السبب الجيب الفاضي.. و مرات الله يفتحها علي و انحصل همـــجااااات مني و منااااك.. .. دوم يقولولي " وَفِي السَّمَاء رِزْقُكُمْ وَمَا تُوعَدُونَ (22) "

و الحمد الله .. امي ما اهون عليها يوم اتكون الحاله كسيفه.. بس احاول كثر ما اقدر اني اتحمل مصاريفي بروحي..

.
.

طبعاً موضوع التوفيـــر.. شي ملغاي في حياتي..! دومه الرصيد واقف ع الـ 50 ولو كنت اروم اسحبها.. جاااان سحبتها بعد

.
.

اوه ما جاوبنا ع الاسئله ..

اذا كنت انسان اتحب اتوفر :- شو هي الاسباب اللي اتخليك اتوفر ..؟؟
مااا اوفر أصلا...

-ولو ما اتوفر ..؟؟ شو اللي ايخليك اتفلس ابسرعه ؟؟
أكثر شي يفلسني فواتير التلفون و طلعات السوق

-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟
كـــــل يوم

- شو هي الطريقه اللي تتخذها ؟؟ في تنظيم مصروفك الشهري؟؟
أول ما استلم المصروف احاول اني ادفع كل اللي علي.. و الباجي يتم للعبان ..

[أمواج]

.
.
الســــــــــــلام عليــكم
( إصرف مافي الجيب ، يأتيك مافي الغيــب)
دوم هالمثــل على لســـاني
بس والله مايوََََكـل عيش على قولتهم (مادري منو هم )
.
.
-اذا كنت انسان اتحب اتوفر :- شو هي الاسباب اللي اتخليك اتوفر ..؟؟
اممم اذا فـ بالي مشرووع شي يعني ابغي اشتري شي ابدا بالتوفير يوم أعرف إنه
محد بيشتري لي بس قمت اتبع سيــاسه يديده واحصــل كل شي بالســـاهل لدرجه إني استويت بطراانه
.

-ولو ما اتوفر ..؟؟ شو اللي ايخليك اتفلس ابسرعه ؟؟
اممممم اول شي التلفوون ، الجامعه ومتطلبااتها من كل النوااحي ( اللي ماتخلص )
.
-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟
يووووووه الله لايعيدها من ايــــــــام
بس مخاوين شمــا مايقصروون
الله يطول بعمــار الشبيبه اللي فالبيت ، اتمسكن عليهم عشان احصل هبّـات ريح
.
- شو هي الطريقه اللي تتخذها ؟؟ في تنظيم مصروفك الشهري
للأسف ماعندي ولا طريقه
.

[حلم الطفوله]

السلام عليكم

الشوق إنتي بصراحه يالسه تضربين عالوتر الحساس وخصوصا إني الحين امفلسه رسميا

بحياتي ما خذت مصروف بأول شهر ولا بآخر شهر ....يمكن لأني ما كنت أحس بمعنى البيزات أصلا! يعني أشتري وغيري يدفع لين وصلت للجامعه وصار لي مصروف أسبوعي بزياده مستمره...
( ربي يطول بعمرهم ويدفعولي دوووم)

بس من اشتغلت ..........حدث ولا حرج ! البيزات حالفه يمين ما تيلس بالبنك ! وأحيانا ! أقصد دائما آخذ من الوالده بدون سلفيات .... ما عدنا سالفة سلفيات( عقولة إخواني الأعزاء)

يمكن أحاول أحط لي ميزانيه بالصرف ! لكن كل محاولاتي باءت بالفشل الذريع

والمشكله مرات واجهتني مناسبات احترت كيف بدبر مصاريفهن ! يعني صدق صدق أتازم واستويت أستحي أشحت ( أقصد آخذ)

الشوق ! وإنتي ما خبرتينا ! كم مشروع عندج ؟ وكم مليون بالرصيد؟

اووووه نسيت أجاوب على الأسئلة

اذا كنت انسان اتحب اتوفر :- شو هي الاسباب اللي اتخليك اتوفر ..؟؟ ما أوفر إلا قبل السفر بشهرين

-ولو ما اتوفر ..؟؟ شو اللي ايخليك اتفلس ابسرعه ؟؟ طلعات السوق وخصوصا مع لصغاريه ....

-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟ أيام المناسبات الفجائيه

- شو هي الطريقه اللي تتخذها ؟؟ في تنظيم مصروفك الشهري؟؟كل محاولاتي باءت بالفشل ....

[مــهــابه]

جد شفت نفسك امفلس من اول الشهر او نصف الشهر .. لدرجة انك فكرت انك تتسلف من امك او ابوك ؟؟؟ (( لا اتقولون انكم ما تتسلفون )) ما بصدق !!!

* هـيه لـوكنـت عاطيـه حـد بيـزات افلس بسرعـه ، امـا إذا لا فـعادي لأخر الشـهر نحاول انيود شوس

ولـواحتـجت مـافكر اخذ إلا مني امـايه< اما اخوانيه وخواتيه وابويه> اسـتحي منهم

-اذا كنت انسان اتحب اتوفر :- شو هي الاسباب اللي اتخليك اتوفر ..؟؟

* مـاعـرف اوفـر
-ولو ما اتوفر ..؟؟ شو اللي ايخليك اتفلس ابسرعه ؟؟

* اشـتري كل شي ، مـاخلي شي فخاطريـه ،اممم واغـلبهن ع بطايق التـلفون والعـزايم
-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟

فـالاجازات لاني ماحب اخذ من حد
- شو هي الطريقه اللي تتخذها ؟؟ في تنظيم مصروفك الشهري؟؟

امم ولاشي ، المصروف مقسم بين الرصيـد ، وبيـن الـعزايم

شكرا اختـيه الشوق
.

[بنت الدلع]

السالفه فيها فلوس

اولا ماعندي مصروف شهري
اي وقت ابا اخذ من بابا >> بشكل عام
اما حق الجامعه >> مجرد مصروف اسبوعي

-جد شفت نفسك امفلس من اول الشهر او نصف الشهر .. لدرجة انك فكرت انك تتسلف من امك او ابوك ؟؟؟ (( لا اتقولون انكم ما تتسلفون )) ما بصدق !!!

ما افلس دام طويل العمر موجود
وسالفة السلفه مب موجوده في بيتنا الحمدالله الا اذا كان الموضوع على 2000 وفوق

-اذا كنت انسان اتحب اتوفر :- شو هي الاسباب اللي اتخليك اتوفر ..؟؟

ماعرف كيف اوفر بس احس التوفير حلو

-ولو ما اتوفر ..؟؟ شو اللي ايخليك اتفلس ابسرعه ؟؟

همممم كل شي
اكثر شي عالاكل والعزايم
سوالف الجامعه
واكيد الـ شوبينج الي مايخلص

-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟

همممم ما كان تأزم بس كان احراج
شاشة اللابتوب انكسرت وكنت قافطه اني اشل همجه من بابا

ويوم افصل عبي حق الاعراس

- شو هي الطريقه اللي تتخذها ؟؟ في تنظيم مصروفك الشهري؟؟
ما عندي طريقه
البيزات يوم تخلص اتي غيرها

الله يعين اخاف يوم اداوم مايتم لي شي ، ماحب سالفة المصروف الشهري احس بسرعه يخلص

تسلم يمناج خيتو على هيك موضوع
ماخبرتينا عنج

[شمعة أمل]

-جد شفت نفسك امفلس من اول الشهر او نصف الشهر .. لدرجة انك فكرت انك تتسلف من امك او ابوك ؟؟؟ (( لا اتقولون انكم ما تتسلفون )) ما بصدق !!!
ولا مره في حياتي تسلفت من حد لأني مفلسـه .. بس أتسألف من حد اذا مثلا أكون ناسيه بوكي في البيت بالغلط ..
الحمدالله .. كل شهر أمي تعطيني معاشي .. وعادتا يبقى منه شي .. سيده احطه في البنك

-اذا كنت انسان اتحب اتوفر :- شو هي الاسباب اللي اتخليك اتوفر ..؟؟
لازم أوفر .. لاني ابا اشتري لامبرغيني

-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟
لا الحمدالله!

- شو هي الطريقه اللي تتخذها ؟؟ في تنظيم مصروفك الشهري؟؟
أستخدم عقلي ..
كل شي ندفعه بفلوسنـا .. الا في السفرات + أعيـاد .. اما كل شي بفلوسنا
ف .. نادرا ادفع لثيابي بفلوسي .. لاني أتأكد انه اشتري كل شي في السفرات والأعيـاد .. يعني اشتري على دفعات .. انا مب من النوعيه الى اشتري شي يديد كل اسبوع نفس اختي .. عشان جي هي مفلسه وانا لا
ف اشتري اغراضي في الوقت الصح = مب لازم أدفع

[تحفه]

احس احسن ما اقول هيهي

[مجموعة إنسان]

اول شي مشكووووره الشوووووووووق على الموضوع اللي طلع في وقت باااااايخ ..
نحن تونا طالعين من عرس اخوي العود ودفعنا وااااااااااايد
يعني من الحين انا واخوي الثاني اعلنا افلاسنا ..
انا قبل سنه كنت استلم مصروفي من ابوي وأمي والحين أستلم منحة وادرسس في الجامعه ..


جد شفت نفسك امفلس من اول الشهر او نصف الشهر .. لدرجة انك فكرت انك تتسلف من امك او ابوك ؟؟؟ (( لا اتقولون انكم ما تتسلفون )) ما بصدق !!!
وااايد وااايد شفت عمري امفلس .. وعادي اتسلف منهم عيل ليش اهلي بس يعني ما اطلب اللا اذا شفتهم رايقييييين

-اذا كنت انسان اتحب اتوفر :- شو هي الاسباب اللي اتخليك اتوفر ..؟؟
للأسف ما اوفر شي من معاشي يعني معاشي زين زين يوصل لييييين اخر الشهر
-ولو ما اتوفر ..؟؟ شو اللي ايخليك اتفلس ابسرعه ؟؟
اول شي قصد سيارة ولابتوب وفاتورة التلفون والأكل ( على فكرة ما اطلع وايد انا قصدي ما اسير السينما ومطاعم و هالعلوم وايد )-

هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟
واااااااااااايد خاصة في الأجازات يوم يوقف الراتب ...


- شو هي الطريقه اللي تتخذها ؟؟ في تنظيم مصروفك الشهري؟؟
اممممم
400 درهم في الأسبوع(وبعد ماتكفي مرات )
مرات اصرف اقل من ال400 بس الأسبوع اللي عقبه اصرف اكثر ..

[مايهزك ريح]

-اذا كنت انسان اتحب اتوفر :- شو هي الاسباب اللي اتخليك اتوفر ..؟؟

لأني ما احب اتسلف من عند حد .. فلازم اوفر .. وبعد لأني في الصيف احب اسافر وما اقر في البلاد لازم اوفر عشان اقدر ادفع مصاريفي انا واختي وامي .. لأنه السفره دايما اتكون على حسابي من تذاكر لين فنادق ..الخ

-ولو ما اتوفر ..؟؟ شو اللي ايخليك اتفلس ابسرعه ؟؟

حمدالله ما جد فلست .. لازم اخلي لو شي بسيط لين اخر الشهر ..

-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟

احيانا يوم تخترب السياره فجأه واكون موب حاسب حسابي .. بس بعد انا من النوع اللي يوفر مبلغ للأزمات العارضة .. فما عندي مشكله من هالناحية ..

- شو هي الطريقه اللي تتخذها ؟؟ في تنظيم مصروفك الشهري؟؟

اولا .. اول ما ينزل الراتب .. احط في بطاقة البترول E-Cash مبلغ 500 .. كبدايه ..
ثانيا .. احط تقريبا من 500 - 1000 للتليفون + الإنترنت .. عشان انا عندي فاتورة موب مدفوعه بس تنسحب نص الشهر فأنا احط البيزات من بداية الشهر .. ما فيه على الأزمات

ثالثا .. انا مخصص من راتبي حق الأهل راتب شهري .. ( ابويه + امي +اختي الصغيره )..

رابعا .. اسحب نص او ثلاث ارباع الراتب واحطه في حساب بعيد عن عيني كتوفير عشان ما اصرف منه ..

خامسا .. اللي يتم في الرصيد بعد الأشياء اللي ذكرتها .. هو مصروفي الشهري ..
وطبعا احاول قد ما اقدر اني ما اسحب من رصيد التوفير إلا في الأزمات

سادسا .. ما احط في بوكي ازيد من 200 درهم كاش .. واذا ابا اي شي .. اشخط بالبطاقة >> الأخ مصروق وتايب

وهاي سالفتي ..

وبعد انا ما اشتري شي إلا اذا انا مقتنع فيه .. وانا صعب اقتنع بشي .. واذا توهقت واشتريت شي موب مقتنع فيه اعقه على ولد اختي .. ما شاء الله عليه يتقبل الهدايا طول السنه ..

وبطريقتي هاي قدرت اوفر واشتري سياره كاش + رصيد حلو في البنك اقدر آخذ اللي اباه في اي وقت و ما احاتي

شو رايكم فيه

[عمة العيم]

:(

-اذا كنت انسان اتحب اتوفر :- شو هي الاسباب اللي اتخليك اتوفر ..؟؟
...عشان في مرات احتاج اصرف اكثر شرات المناسبات الاعراس...بعد سوالف البنات ماتخلص فستان روحه 2500 هالرخيص...غير الصالون و و و .... انا اقول لو اهل العرس عم يتكلفون بهالمصاريف احسن خخخخخ
-ولو ما اتوفر ..؟؟ شو اللي ايخليك اتفلس ابسرعه ؟؟
... اللي يخليني افلس اني يوم اشوف طلاب واقف يكسر خاطري بكلمتين اعطيه 100 اقول ماعليه فدا راس عيالي اللي مايبتهم :( و بعد اللي يخليني افلس ان كل شهر عالاقل لازم افصل عبايتين لان العبايه ماتعيش وايد بالكثير شهر احصلها مطروره من تحت ليش الله اعلم!! و كل عبايه لا تقل عن 400 درهم عالاقل..
-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟
... لا الحمد لله الحكومه ماتخليني اتأزم اللله يخليهم لي (^_^)
- شو هي الطريقه اللي تتخذها ؟؟ في تنظيم مصروفك الشهري؟؟
... اصرف على الاولويات فقط و اخلي الاشيا الثانيه لأجل مسمى!! ودووووم احط نص المبلغ بعيد عن عيني.......البيزات شرات الكحول من كشفت عنها تتبخررررر كييييييييف مادري؟ من جي لازم انخشهن في مكان ماينشاف هههههه





.و سلامتكم
(^_^)
...

[الاسطوري]

السلام عليكم ..

اممم أحس المصروف ممكن يكفي وممكن لأ على حسب الواحد ومصاريفه وطريقته في إدارة
المال وعني أنا في صغري كانوا يمدحون تنظيمي للشي هذا بإني
أكون حاسب حسابي لكل شي
قبل لا أسويه ولكن دوام الحال من المحال فصرت أتبع نظام (أصرف مافي الجيب يأتيك مافي
الغيب) وأكثر صرفي على البترول وعقب الفواتير يعني مرات من
50 لـ 60% على حسب يعني


-جد شفت نفسك امفلس من اول الشهر او نصف الشهر .. لدرجة انك فكرت انك تتسلف من امك او ابوك ؟؟؟

اني افلس تصير وايد لمدة كم يوم بس اتسلف
نــادرا ويكون على شي
يسوى

-اذا كنت انسان اتحب اتوفر :- شو هي الاسباب اللي اتخليك اتوفر ..؟؟

اممم مب من النوع اللي اوفر خاصه الفترة الأخيرة إلا في حالات إني حصلت مبالغ
حلـوه لأني أفضل آخـذ لي فيها شي على اني اصرفهـا
في اشياء مالها معنى

-ولو ما اتوفر ..؟؟ شو اللي ايخليك اتفلس ابسرعه ؟؟

اكيد الصرف اللي ماتتحمله
المزانيــة

-هل واجهتك ..ايام ..شفت عمرك متأزم ماديا ؟؟ (( شو هي الايام )) ؟؟

اتصير بس الحمدلله في هالحالات أتذكر إني
أقدر أطلب وأحصل وتنحل
المشكله

- شو هي الطريقه اللي تتخذها ؟؟ في تنظيم مصروفك الشهري؟؟

حاليا ماعندي تنظيـم بس يعني أول شي أسويـه أحسب كم الفواتيـر اللي علي وأخلي الفلـوس
على صوب هذا من الميزانية الشهرية وعقب الباقي يدخل في
الميزانية العامة واللي ترتوي أسبوعيا
ويوم ماأطلع تزيد ويوم أطلع مرات مايبقى منها شي بس الحمدلله بما إني آخر واحد يصرفون
عليه في البيت مرتاح وايد غير إن الباقين يساعدوني بدون
ماأطلب فـ مستوره والحمدلله


السموحه

الاســـطـــوري
أخوكم

[المزوحي]

عشان اوفر الكتابه والرد عليكم جواابي طلع نفس الاخ مايهزك ريح ...