عين تحكي @_! ..وعين تبكي @_!

[نور الإيمان]

متابعون

[الاسطوري]

السلام عليكم ..

"سفير الخيال"

مجتمعنا وأقولها بكل أسـف يعيش إنفتاح سريـع جدا في الفترة الأخيـرة وتكمن خطورة هالشـي في إن
جلينا غير عن الجيل اللي راح والجيل الياي غير عنا والمشكلة إن التغير
هذا للأسوء بدخول تشوهات كثيرة على
العادات والتقاليد
والطامة إن أشياء كثيرة مسـت الدين والناس قامت تخلـط بين الحلال والحـرام وتمشي ويوم بعد يوم
الوضع يتأزم وتلاقي الياهل بدل مايحفظ له آيات من القرآن يحفظ الأغاني
والتفاهات اللي تطلع كل يوم والأهل ولا على
بالهم جنه عادي بيكبر
وبيتعلـم مايدرون إن التعليـم في الصغر مثل النقـش على الحجر فما بتكون نتيجـة هذا إلا اللي نشوفه
اليوم من محاولة لمواكبة العصر بالموضه والتقليد الأعمى للغرب من
بنات بلادنا وكل يوم نشوف شي يديد الريال
يستحي يسويه والبنت
تسويه وترضى على نفسها وأهلها وتقول أنا حره هاي حياتي وانتوا ماتفهون وغيره يعني إنعدام حتى
في المبادئ والأخلاق اللي بدت تنزل للإنحطاط وماتصور إن ظهور المرأة
إعلاميا أخذ مجراه الصحيح خاصة في السنوات
الأخيرة بل كأن شخص
محـروم من شـي ولما لقاه بالـغ فيه بشكل كبيـر وماتوقـع في شي يقـدر يوقف هالسيـل العـارم جدام
هالفضائيات اللي تبث السموم إبتداءا من الصغير في الرسوم وصولا
للكبير في الأفلام وغيره والانترنت اللي من
خلاله يتدفق لنا كل
مالذ وطاب ولكل الأذواق وطبعا شبابنا وشاباتنا يعرفون يميـزون بين الصح والغلط والمفيـد والضـار
وبكل تأكيد دام غابت التربية الصحيحة بيختارون الغلط والضار وبيتأثرون
بشكل كبير بمعتقدات وفكر وأخلاق وقيم ومبادئ
الغرب اللي بدت تنتشر
بالعولمة والأمركة وإذا ماكان اليوم يبين هالشي ترا باجر بيظهر عليهم وبوضوح تام بعد والبنات اليوم
صار كل تفكيرهم في الجمال والتحدي بين بعضهن البعض وكل وحده تبى
تكون هي ملكة الجمال جدام غيرها وتعال
شوف التسابق هذا
وين يوصلهن في بعض الأحيـان وحتى لو بنرمس في سالفة الترقيـم سمعت مره إن البنـات يتكشخون
وكل وحده تتحدى الثانيـة منو بيحصل أرقام أكثر خـلال مدة معينـه يعني
صارت الحياة سبهلله وكل شي عادي بس لمتى
بيتمون جيه لمتى البنت
بتركض ورا جمال الجسد اللي مايكون له نكهه بدون جمال الروح اللي بدوره يخلي العاديه ملكة جمال
عند زوجها بخلقها ودينها بس وين هالشي تلاقيه اليوم وين والله حسافه
هالزمن في من التطور قد ماتتخيل وأكثر بس
شو فايدة هالتطور إذا
الناس بتكون جيه ومادري هل فكروا في يوم كيف بيجابلون ربهم باللي يسوونه وهل يرضون هالشي
لعيالهم ، بصراحه القلب يتقطع لما نذكر هالأشياء اللي نحاول نتناساها بمشاغلنا
وغيرها وهالفئة صح بدت تكبر بس أملنا كبير بمن
هم محافظين في إنهم
يطلعون أجيال وأجيال تحمل نفس صفاتهم والله يستر عليهم ويثبتهم على المحافظه والتمسكه بالدين
والعادات والقيم الحميدة ولكن صمودهم بيهتز في يوم من قوة التيار الجارف
لكل مانملك في داخلنا إذا ماوقت أو قدرنا نصد منه
قدر المستطاع وأتمنى
اللي نتوقعه مايصير مع إحترامي للفئة الباقية بس الواقع يفرض نفسه وكلامي من اللي نشوفه في كل
مكان سواء في البلاد او خارجها من أهل البلاد ومن الأموال الطائله اللي تنصرف
على أدوات التجميل وأمور مالها لزمه في مقابل فقر وجوع
وألم وإنكسار بحاجه لدراهم معدوده ولكن
لا حياة لمن تنادي

السموحه على خروجي عن نطاق الموضوع شويه
ولكن حرقة القلب صعبه

الاســـطـــوري
أخوكم