السلام عليكم ورحمة الله وبركاته،،،،

الحمدلله اعتمرنا ورحنا المدينه ...وزرت قبر الرسول صلى الله وعليه وسلم ..والله سهل علينا ...في كل خطوه ،،ولا شي زحمه،ولا حسينا بتعب والحمدلله اكثر اللي شفتهم من الامارات ماشالله عليهم ،،،،وكلهم عائلات .
رحنا المدينه اول مره اشوف قبر الرسول(صلى الله وعليه وسلم)والحمدلله قالولنا صلن ركعتين هذا الروضه.وبهدها رحنا مسجد قباء وصلينا هناك ...وشفت جبل أحد ومقبرة الشهداء..والله اني اذكرت كل اللي درسته بالمدرسه عن جبل احد وغزوة احد ..ويوم خالفوا امر الرسول (صلى الله وعليه وسلم ).ورجعت لي كل معلوماتي ..وتخيلتهم جدامي ،،،الله يرحم كل الشهداء..
السايق(محمد) اللي معانا كان ماشالله مثل المرشد السياحي ،،ماخلى مكان ماودانا له ،ويخبرنا عن كل شي والاحداث المهمه اللي حصلت فيه..وعنده معلومات عن اي شي.
وان جبل أحد من جبال الجنه ..
اعتمرنا اول ماوصلنا كان الجو وااايد حلو..ولا حسينا باي تعب ...وفي موقف حصل لي هناك طريف!!
((كنت اشرب ماي زمزم وانا مجابله الكعبه ،مر عليه واحد : غطي وجهك يامره!
التفت واستغربت منه قلتله : ليش ؟؟
عصب عليه مادري ليش وشحقه!!!
قلتله مب مغطيه ويهي ماتشوفني قاعده أشرب ماي زمزم وادعي ربي وانت تقاطعني..وماتخليني؟؟
انا من زمان ماشفت الكعبه ،وجايه من الامارات وخاطري اشبع من منظر الكعبه .
كيف تباني اغطي وجهي ..؟؟ مستحيل خاطري اصلى في الصحن بس ما خليتونا .. استحى مني وراح))
احلى شي صلاة الفجر في الكعبه ...والعشاء جو شاعري ورهيب اتحس انك في عالم روحاني وديني بعيد عن كل شي ..وتنسى العالم كله..
الحمدلله ادعيت لكل اللي وصاني..
ويبت لكل هل الواحات ..شي حلو..تعرفون شوه ؟؟؟
كيمره مالت أول...للشباب
والبنات ...قلاده. فيها صورة الكعبه..
من الحين اقولكم عن الازدحام والحشره والصراخ كل واحد بعطيه اللي له ..ترا مانسيت أحد.
خنفروشووووووه وينك ؟؟؟
خل الربع يصفون عدل جدام بوابة الواحات عشان اوزع الصوغه...