كنت أحسب عمري الوحيدة اللي تذاكـر جدام التلفـزيون والفـوالة وآكل أكثـر وحدة عالغـدا ، حتى أتبـرع أودي صحـون الغـدا كلهـــــن إلى المطبـخ اللي يبعـد ألف كيلـو عن الصالـة ..
وحتى ما أقـدر أعيش بدون ريـوق وغـدا في أيـام الامتحـانات ، وأتابـع أمـور ملابسـي بروحي، وتهمنـي وايـد كشختـي ، ما أذاكـر إلا وأنا لابسـة أحلـى ملابســي ، ما عندي الألوان اللي يحطونها في الويـه ولا كنت بلـون ويهـي، وأقـدم خدماتـي المجـانيـة لكــل سايـر وياي، أتعنـى وأفتـح لهم البـاب العـود وأسـكـره بعد ما يظهـرون، أسـولف ويا الشغـالـة، وأستمتـع بقـراية كل أخبــار الجريــدة، حتى الملحق الاقتصادي اللي ما أعبـره عـادة، أختمه من أول إلى آخـر صفحـة...
ايي وقـت العشــاء وأتسمـر جدام أخبـار الامـارات وأنتظـر الاخبار العالمية بعـدها وأتابعها باهتمـام، جنهم بيطـلعوني أنـا بدل كوندليزا رايس خخخ ، حتى يوم ايي برنامج غيرلي حياتي أو أنت أجمل أو فيتامين أو حتى نشـوة ، كلهن أتابعـهـن ، وتهمني كل التفاصيل فيهـا ..
ايي الليـل ، افف بعـدني ما خلصت 56 صفحة ، على فكـرة أعـد الصفحات قبل ما أبـدا أذاكـر وتشوفوني أجمع وأقسم وأطـرح ، وطبعـا ما أعد الأوراق البيضا أو التقاويم ، ويخلص الوقـت بين جمع وطرح، فمـا شـي جدامي إلا أتوجه غـرفة أبـوي، متى بتـوعى باجر ؟ وعيني وياك الساعة أربع ، خخخخ وعشان أضمن إني بقـوم أضبط المنبه عنـدي اللي يرن الفجـر ويكـاد يصيح من كثر الرنين بدون محد يعبـره ..
آخـر الفلم ، أدخل الامتحـان وأنا معتمدة على شـرح الحصص، وأتلعـوز عند الأسئلة اللي كنت في يومها غايبــة أوراقـدة في الحصـة !!!
أخـرج من الامتحان بنفسية عاليـة وأكون بدون أدنى جهـد قد نسيت كل شي وبخـرت كل معلوماتي في عالم النسيان بعـد ثانية واحدة فقط من توقيعي لورقة التسليم !!!
أرجع البيـت وأعيـد نفس السيناريــو وأنا أغنـي " الحيــاة حلــوة بس نفهمهــا ، الحيــاة غنـوة ما أحلى أنغـامهــا "

آسفـة ع الاطالــة ، بس عجبـنـي الموضوع والأسلــوب ..
سلمــت الأيـادي أختي ..