بسم الله الرحمن الرحيم
نعود اليكم من جديد
تفظلوا اقربوا >>>>>>>>>>>>>>>>>> الجزء الثالث من القصه
يوم الاحد 2007-1-7
امنه تكلم موزه على المسنجر.. يلسن يرتبن جداولهن للسمستر الياي
امنه: مواز انا بسوي جدول عفروه و غنوي و مزون و انتي سوي جدول نور و فطيم ما عندي باسورداتهن
موزه:انزين بس ما بيحرجن؟
امنه: لا عادي اصلا هن يحمدن ربهن ان نحن مفتكرين فيهن ^_^
موزه: انزين انتي عندج باسوورد حصوص لان انا ما عندي :@
امنه: هيه عندي انتي بس عليج بفطيم و نور اما الباقي خليهم علي
موزه: خلاص كلهن نفس جداولنا.. بس شوفي فطيم امخلصه المتطلبات كلها يعني ما اتروم تاخذ ويانا اكدمك 3
امنه: خلاص بحطلها متطلب كليه
موزه: حرام بيكون وايد عليها
امنه: لا عادي انا باخذه وياها لان انتوا بتاخذون ماركتنق و انا مخلصتنه
بعد الانتهاء من الجداول طرشت موزه للجميع مسجات انها هي و امنه عدوا جداول السمستر الياي للجميع
نور دخلت المسنجر و كان نكها وجه حزين
موزه تكلم امنه: هكي نور دخلت.. بس بلاها زعلانه
امنه: ما ادريبها انا مب امرمستنها من زمان
موزه: بسويلها invite
امنه: انزين
سوت موزه لنور invite
موزه: hi noor blach sad
نور: elyoom m3zoomeen bit 3mooh
امنه: ههههههههه ها عوقج يعني
موزه: انزين عادي.. اكيد العزيمه عزيمة حريم هب رياييل
نور: لا هي عزيمه حق كل العايله و كلنا في هالقاثرنق بنيلس و يا بعض كالعاده
امنه: انزين عادي شو فيها و الله لو عادي في عايلتنا ما كنت بفتكر
نور: هاي انتي هب انا .. انا ابا اكون بنت كشيخه و زقرت و البس الي في الكبت من مليون سنه.. كل ما اشتري شيء ما اروم البسه لان اعرف ان اذا لبسته ما بفصخ العباه
موزه: و الله انتي الي مسويه بعمرج جي.. بيتكم عادي عنده تفصخين عباتج و انتي لابسه بدله.. و كل بنات عماتج و عمج بيكونون لابسين بدل و ما بيفتكرن
نور: هيه بس ما احب ... احس حرام
موزه: لا تلبسين شيء راص او عاري
نور: هيه ها شيء اكيد بس بعد ما اعرف ما احب و ما تعودت
امنه: الي يسمع انتي من يومج متحجبه عنهم .. لا تنسين انج بس من دخلنا الجامعه تحجبتي و لا قبل كان عادي عندج بالجنز بعد
نور: هيه هاك زمان الحين احس كبرت
موزه: انزين شو بتسوين لا زم تاقلمين عمرج
امنه: هيه صح .. و انتي دامج ما تبين تلبسين جدامهم بدل البسي مغربيات او هالجلابيات الي جنهم فساتين
نور: أي ما احب انا غير المخور ما البس
امنه: انتي ادرا بعمرج
موزه: نوار ترانا خلصنا الجدول
نور: و الله متى انا نسيت سالفته
موزه: تونه الا
نور: انزين صبرن بشوف شو مخبصات
امنه: احمدي ربج بس
نور: ليش من 8 انا ما اداوم من الصبح
موزه: عادي ليش انتي تحبين نشه الصبح
نور: هيه بس ما احب دوام الصبح .. انش اوكي بس اركب السياره و أيي الجامعه لا
امنه: خل عنج
نور: انزين ليش يوم الاثنين و الاربعه عندنا بريك طويل
موزه: عشان نسير النادي
نور: بس فطيم ما بطيع تي ويانا
امنه: قلت حق مواز بس ما عيبتها رمستي
موزه: و الله كيفها اطيع و لا لا المهم تي النادي ويانا
امنه: يعني هو بالغصب
نور: هع هع دام موزان في السالفه بتحكم عليها حكم قراقوش خخخخخ
امنه: انتي من وين تيبين هالخرابيط
موزه: ها مشكلة الي يقرون كتب تاريخيه وايد
نور: لا ها من القصص اصلا.. تدرون لو دخلت ادبي لكسرت الدنيه في التاريخ لا و كنت بدخل تاريخ في الجامعه
امنه: جان ما عرفتج طول عمري
موزه: نحن جي و مب ملحقين عليج بعد تاريخ
نور: ههههههههههههههههه انزين انزين
موزه: يالله انا اسمع الاذان سيرن صلن.. و نتلاقه سون
نور: يالله باي
امنه: باي
موزه: باي
.................................
نور في بيت عمتها على العشا .. و كانت العمه مسويه باربكيو في الحوي
حوي العمه عباره عن نافوره في النص و حوالينها احواض سمج كبيره
و الاحواض على شكل سنطوانات طوليه.. من عادة العمه انهاتحط ع هاي الاحواض الفواكه و الحلويات يوم تكون امسويه عزيمه برع
كانت العمه حاطه منقل الباربكيو يم النافوره و موزعه الطاولات و الكراسي حوالين النافوره.. الطاولات كانت مستطيله و كل طاوله تكفي 15 شخص .. نور و بنات عمتها و عمها و خواتها يلسن على ابعد طاوله عن الظو .. عشان يكونون بعيد عن الدخان .. يه و لد عمة نور راشد سلم علهن ووقف يسولف وياهن .. و نور كعادتها سولفت وياه و يوم جهز الاكل .. نور نشت بتسير تاخذلها عشه.. طلب منها راشد انها تحطله مقبلات و هو بييبلها المين فود .. وافقت نور و سارت تتنقه شو بتحط حق عمرها و حق راشد بس كل ما تي بتحط له شيء تقولها بنت عمها " لا راشد ما يحب هالشي.. يحب تبوله و حمص بس" نور كانت اطنش و تحط الي يعيبها و كثرت من المتبل عشان بنت عمها قالت " كله و لا المتبل راشد ما يدانيه".. يوم يلست نور ع الطاوله يه راشد و يلس يمها و قالتله قبل ما يبدا ياكل
نور: شوف اذا ما تحب تاكل متب كيفك بتاكل عناد في بنت خالك
راشد: منو فواغي؟
نور: هيه عليك نور.. كل ما بي بحط شيء تقول ما ايعيبك .. مره ثانيه عطني المنيوا مالك قبل
راشد: لا عادي انا اكل بس يوم اسير بيتهم ما اكل الا حمص و تبوله.. لان ما احب باقي الاشياء الي تسويها بشكارتهم
نور: هيه انزين ممكن اتلز كرسي.. كبرنا و ما يستوي تيلس يمي
راشد و هو منحرج: هيه اوكي عادي
نور و هي حاسه بتانيب الضمير: راشد ابن عمتي لا تزعل دخيلك لا تزعل مني .. انا بس مممم يعني انت بتقدر روحك صح.. ممم انت فاهم قصدي
راشد وهو مبين ع ويها الاحراج: لا عادي نور لا تحطين في بالج
تمت نور طول ماهم يتعشون حاسه بتانيب الضمير.. و راشد مول ما رمس.. و حتى يوم نش ياخذ الحلو نش بدون ما يرمس مع نور و لا حتى سالها شو تبا تاكل حلو
رن تيلفون نور و هي تاكل الحلو و كانت ماخذه ايسكريم و موس
نور و خاشوقة الاسكريم في حلجها: هلا هلا هلا بموزان هلا
موزه و هي تضحك: ها شكلج في العزيمه
نور و هي منزله عيونها و رافعه راسها بمستوى الي حوالينها: هيه .. يالسه ازج و الله خوفي امتن 5 كيلو في هالاجازه
يت ام راشد و قالت حق راشد: لز ع نور خلني ايلس مكانك بسولف ويا بنات اخواني
لز راشد و نور تشوف عمتها و هي مبتسمه و ابتسمت لراشد عشان ما اتحسسه انها مضايقه .. و كانت موزه ترمس بس نور ما كانت تسمعها
موزه: هيه انتي وين سرتي .. انا ببند الحين
نور: ها لا بس كنت اكل
موزه: ها يعني في حد يمج
نور: اتخيلي شو اكل؟
موزه: يعني تبيني اخمن؟
نور: هي خمني ؟
موزه: حد من الاولاد يعني
نور: هيه اسكريم و بعد شو؟
موزه: الله اسكريم انا ابا .. اتعرفين احس انج تقصدين ولد عمتج الي دوم اتسمينه قالب ثلج
نور: هي عليج نور .. اكل ايسكريم و موس.. و مخبصتنهم ع بعض.. و الله كشخه طعمهم.. و ويهي احمر من البرد و الايسكريم
موزه: ليش استوت مواقف و سوالف
نور: هيه طعمهم كشخه
موزه: و الله اتضحكين يوم ترمسين وياي جي احس ان نحن في المخابرات المصريه و اتخيل مسلسل رافت الهجان هههههههه
نور: اتعرفين يالسه ويا بنات عموه و عمي و عموتنا يت يلست ويانا وولد عمتنا راشد وحليله يلس ويانا
موزه: اها راشد .. اكيد يالس يمج لانج مول مب عارفه اتصاصريني حتى.. خلاص اتصليلي يوم بتوصلين و خبريني شو سالفة الايسكريم
نور: خلاص حبوبه بكلمج عقب .. باي
..........
انتهت العزيمه و كلن راح بيته.. نور تمت متلومه و قررت انها تطرش مسج حق ولد عمتها و كتبتله في المسج " راشد انا ما كنت اقصد..سوري"
كانت الساعه قريب الثلاث و راشد انتبه ع صوت التيلفون .. كان راقد..
راشد فتح نص عين و صكر الثانيه: هاي نور بلاها واعيه لين الحين..
بعد ما قرا المسج
راشد: وحليلها نور.. شو ارد عليها.. لا الاحسن اتصل
اتصل راشد ع نور و اترياها ترد عليه.. نور اتفاجأت من رقم راشد و زاغت من اتصاله في هالوقت و ما اتوقعت هو متصل عشان المسج
نور: الو
راشد صوته فيه ارقاد: نور بلاج واعيه لين الحين
نور في خاطرها " اويه ها راقد ههههههه وعيته شكلي":لا بس انا اطول لين ما ارقد .. اتعرف اجازه
راشد: هيه.. بس ارقاد النهار يتعب الجسم.. مب زين تسهرين وايد
نور: لا انا بس ايام الاجازه جي يستوي ارقادي.. اعدله و ارد اخربه
راشد: هيه.. انزين ما بتظهرون باجر
نور: و الله ما اعرف.. يمكن نطلع ما ادري
راشد: شو رايج اذا ما ظهرتوا اطلعكم و نسير سينما
نور: السينما ليش عندهم افلام ايديده حلوه
راشد: و الله ما ادري انا من اخر مره سرت وياكم ماسرت وابا اسير
نور: انا بعد ابا اسير.. انا سرت عقب ويا قوم خاليه.. بس تدري خلاص انا بخبر خواتيه و برد عليك خبر
راشد: انزين هم واعيات بتسيريلهن الحين
نور: لا ارقود باجر دوامات زي منته عارف.. الصبح برمسهن .. لا الصبح بكون راقده.. اتعرف يوم بنش
راشد: متة اتنشين؟
نور: ما اعرف انا لين الحين ما رقدت و ما اعتقد ارقد لين 4 او 5 يعني بنش 2 او 3
راشد: انتي ايام الدوام جي تسهرين
نور: هههههههه بصراحه هيه انا دوم ارقادي جي في الاجازه و غير الاجازه كله سهر في الليل و انش من اول الصبح اذا عندي شغل
راشد: يعني ايام الدوام يكفيج الوقت و اتنشين الصبح عادي
نور: هيه انا ظاريه ع جي.. حتى عادي اذا ما رقدت كمن يوم
راشد: لا هاي وايد نور .. هب زين عليج
نور: لا عادي متعودين
راشد: انزين انتي شو بتسوين الحين يوم ما بترقدين
نور: بسوي يوقا
راشد يضحك ع رد نور: هههه.. لا صدق
نور: هيه انا احب اسوي يوقا اخر الليل احس الجو هادي
راشد: احيدهم الناس يسوونها الصبح اول ما ينشون
نور: عاد انا غير الناس احب اتيوق قبل ما ارقد.. بس هو عادي اتسوي اليوقا في أي وقت.. الصبح احسن عشان المخ يكون فاضي و فرش.. بس المهم ان الواحد يكون ماكل قبل اليوقا ب 4 ساعات اذا كانت وجبه وجبه.. بس اذا كان اسناك فساعتين يكفون
راشد: انتي من زمان اتسوين يوقا؟
نور: هيه من 4 اسنين
راشد: ما شاء الله عمر.. بس كيف بديتي باليوقا
نور: راشد شكلك مافيك ارقاد و لا انا طيرت الرقاد منك
راشد: ها ليش وايد سولفنا .. انا ما حسيت بالوقت.. و لا يمكن السوالف وياج حلوه و
سكت راشد.. نور تمت تتريا تكملة كلام راشد بس راشد ما رمس
نور: الو الو شو رقدت
راشد: لا انا اترياج انتي ترمسين
نور: ليش منو قالك اني حلج.. صح انا هربايه بس مب حلج
راشد: شو الفرق؟
نور: ما شيء فرق
تموا ساكتين فتره و نور تتريا راشد يرمس بس راشد ما يعرف شو يقول.. وعقب ما ملت
نور: شكله الرقاد نزل فجأه
راشد: لا لا انا مصحصح وياج.. كملي
نور: انا ما كنت ارمس عشان اكمل.. انت شكلك بديت اتخرف..راشد سير اشرب حليب و حط راسك و ارقد
راشد: تشربين حليب قبل ما ترقدين
نور: لا اشرب حليب يوم انش.. بس اشرب لبن قبل ما ارقد
راشد: عيل ليش اتقولين لي اشرب حليب
نور: اسمعهم في الافلام جي يقولون
راشد: شكلج وايد اتشوفين افلام
نور: انت ما عندك دوام باجر
راشد: ها .. هيه عندي.. هيه ما قلتيلي باجر متى بتردين علي
نور: اكيد قبل العصر.. لان تعرف قاضي القضاه الي عندنا ما يسمح لاي مخلوق يوطوط برع البيت بعد التسع.. نحن و الحمدلله نسير السينمه و لا زم نتعشه عقب و لا ما نحس ان طلعنا.. يعني التاخير في دمنا
راشد: هيه لازم عشان اتكون الطلعه طلعه
نور: انزير سير كل مع الملائه و خلني اسوي يوقتي
راشد: اكل شو؟
نور: انت ما اتشوف افلام عربي.. هم جي يقولون
راشد وهو يضحك: انزين يعني هم شو يقصدون بهذا الشيء
نور: يعني يقصدون ارقد
راشد: حشه انتي لهاي الدرجه ما تحبين تسمعين صوتي
نور اتلومت من كلام راشد و قالت في خاطرها " ها عالدقه يزعل": لا افا يا راشد.. بس انا اراعي ان انت لازم ترقد و لا ما بتسير شغلك باجر.. و اذا ما سرت شغلك بيخصمون عليك و اذا خصموا عليك ما بيعدلون وضعك و اذا ما عدلوا وضعك ما بيزيد معاشك و اذا ما زاد معاشك ما بتقدر تواكب مصاريف الحياه واذا ما قدرت اتواكب ما بتقدر تولف و اذا ما رمت اتولف ما بتيمع مهر و اذا ما يمعت مهر بطيح في جبدنا و ما بتعرس و نحن ما بنفصل حق عرسك
راشد و هو يضحك: ها كله عشان غياب يوم و انتي ما بتفصلين.. لا لتحاتين بتفصلين و اذا ما فصلتي ما بيستوي العرس من الاساس.. انتي اهم عنصر فيه
نور و هي تمزح: ليش انا العروس.. يا ريال انت لين ما اتعرس انا بيكون عندي درزن يهال
راشد و هو عاقد بحياته: ليش في حد خاطبنج و لا في حد في بالج
نور و هي مرتبكه: لا يا راشد انت لاتاخذ كل كلمه في عين الاعتبار ها بس جي رمسه.. الله يعين حرمتك على تدقيقك هذا
راشد: اذا خطبتج انتي بتوافقين و لا هاي الصفه الي فيني بتخليج ترفضين؟
كان راشد يرمس جد الي خله نور تزيغ من اسلوب كلامه
نور:ها
راشد: جاوبي قولي اذا خطبتج بتوافقين؟
نور: رشود يا ابن عمتي سير ارقد و الصباح رباح
راشد وهو معصب: بتوافقين؟
نور: بلاك راشد اتزيغ و انت ترمس جي .. جنك تخطب صدق
راشد وهو مدرك للي يقوله: ها انزين خلاص اكلمج باجر
و بندوا التيلفون.. تمت نور اتفكر في كلام راشد و انتبهت ان حوارهم خذ ساعه كامله..
نور: اوه كلمته ها كله.. بس هو ليش استوه وايد جد اخر المكاله و الله انه.. تحفه.. بسير اسوي يوقا و يصير خير لين باجر.. خل اضبط الالارم ع 2 عشان الحق اشاور و اتصله
.........................................
في صباح اليوم الثاني نشت نور من الرقاد ع الساعه 10.. شافت الساعه و ردت تتجلب تحاول ترقد مره ثانيه.. رن تيلفونها كانت موزه المتصله ..
نور و هي تعتدل في رقدتها و تشوف التيلفون: موزوه ليش متصله من الصبح شو عندها؟
تربعت نور على السرير.. ردت على موزه: الو
موزه: صباحك اشطه
نور: هع صباح الفل يا فوووووووول
موزه: هيه جنج سبيتيني
نور: لا بس غلطت عليج خخخخ
موزه: نوروه نشيء و صحصحي معاي
نور: انا معاكي حول مدير ششش الشرطه نور ششش يسمعك
موزه: مدير الجيش وشوش يتكلم حول وشوش
نور: ههههههه انزين شو تبين متصله من الصبح و موعتني من الرقاد
موزه: انتي هب راقده مئه بالمئه .. صوتج ايبين انزين
نور: لا انا بس انتبهت و كنت ابا ارقد و اكمل بس انتي اتصلتي
موزه: انزين.. اقول مب جني اترييتج البارحه تتصلين و ما اتصلتي
نور وهي تحك راسها: موز نسيت.. اتعرفين ها كله من راشد رمسته البارحه من 3 لين 4
موزه: خيبه من 3 لين 4 شو تقولون .. مسودة الويه
نور: خخخخخخخخخخخخخ .. لا تحاتي ما رمسنه في شيء جي و لا جي
موزه:انزين شوا قلتوا بالتفصيل الممل و شو سويتي البارحه في بيت عمتج بعد بالتفصيل الممل
نور: خيبه كل ها فظول.. انزين بنش و بتريق و بدقلج
موزه: بتقين اتريا و الا ارد ادق
نور: لا افا بدق
بندت نور عن موزه.. تغسلت و سارت غرفة الطعام تتريق
نور و هي تاكل يرن تيلفونها: هع هاي ام الفظول اتصلت
تشوف الرقم تنتبه ان ها رقم الجامعه
نور: اويه الجامعه متصله ليش؟ ما احيد عندي انذر!
نور اترد ع التيلفون و تمت ساكته
الي متصلتلها مسجلة ادارة الاعمال ساره
ساره: السلام عليكم و رحمة الله و بركاته
نور: و عليكم السلام و رحمة الله و بركاته
ساره: الاخت نور
نور: معاج نور
ساره: انا ساره مسجلة ادارة الاعمال .. من جامعة الشارجه.. اختي نور قبل شوي واصلني ايميل من الماليه بيقولوا انك ما دفعتي رسوم السمستر الجاي كامله
نور في خاطرها " اويه نسيت السالفه انا كنت دافعه زياده العام عشان جي فتحلي السستم" : انزين و المطلوب
ساره: بتعرفي انتي ان السستم المفروض ما يفتح لك بس بظن هم زاكرين ان انتي دافعه السمستر الي فات اكتر من الرسوم المطلوبه لزالك ظل المبلغ موجود في رصيدك و لهذا السبب فتح السستم عندك .. ما بعرف كيف.. بس هم بدهن ياكي تجي و تكملي دفع الرسوم .. هم بدهم جيك واحد منك بس لان انتي دافعه اكتر من ثلاث ارباع المبلغ
نور: انزين كم يبون في الجيك عشان اخلي بابا يكتب في الجيك
ساره: و الله ما بعرف
نور: انزين انا ما اروم أي و سير .. ممكن تسئليلي
ساره: ايه ممكن انا راح اتصل فيهم و انتي ارجعي و احكي معي بعد شوي
نور: خلاص تم
بندت نور و سارت عند ابوها عشان اتخبره عن السالفه.. بس ما حصلته في البيت.. اتصلتله و خبرته بالسالفه .. و قالها تاخذ من امها كاش و تخلص دفع الرسوم.. نور اتاكدت من ساره عن المبلغ المطلوب و خذته من امها.. سارت نور تتلبس عشان اتسير الجامعه و تدفع المبلغ قبل ما تنزحم الماليه.. نور تذكرت موزه و اتذكرت انها ما اتصلت ابها
نور تتصل في موزه و في نفس الوقت تتصل في الدريول من تيلفون البيت.. ردت موزه و رد الدريول في نفس الوقت
نور: موزه صبري.. الو ربدمان يالله بسرعه شغل السياره و تعال عند الباب في سير uni now
موزه: ها شو ربدمانه؟
نور بندت عن الدريول و هي تضحك: مب انتي كنت ارمس دريولنا ربدمانوه
موزه: هيه ربدمان انا اقول اعرف هذا الاسم .. شو تبيبه و ليش بتسيرين الجامعه؟
نور: ماشيء مليت و قلت بسير اتمشا في الجامعه و اغير جو
موزه: في الجامعه ما عندج سالفه .. لا صدق اشحقه
نور: و الله تبين الصدق يعني انتي اربيعتي و صديقتي و شيء اكيد ان انتي بتسترين علي
موزه: بسم الله بلاج يالمستخفه شو بتهببين
نور: الصراحه و الواقع.. انا مواعده خطيبي عمر في الجامعه و بسير اشوفه
موزه و هي مب رايمه تيود عمرها من الضحك على اسلوب نور في الكلام و الجديه الي اكانت فيها: هههههههههههه ويه راسج .. اتصديقين كنت بصدق انج مواعده بس عمر ها في سابع المستحيلات
نور: ليش يعني مب تارس عينج عمر.. و الله لو كان عندي رقم ابوه جان اتصلت و قلتله ايبه بيتنا
موزه: بدون حلفان بصدقج ههههههههه.. اربيعتي و اعرفج خبله من يومج
نور: خبال في عينج انزين
موزه: انزين قولي ليش بتسيرين الجامعه؟
نور: ما شيء بعد شو تبا الجامعه منا غير نقي في هالبيزات و بس
موزه: ليش انتي هب دافعه الرسوم
نور: دافعه ثلاث اربعا الرسوم بس باقي 3000 درهم و الحين بسير ادفعهم
موزه: انزين الا هي 3000 تريي لين اول السمستر
نور: ليش هم يصبرون ع بيزاتهم .. سوتلي ساره المسجله و قالت الماليه مكلمتنها عشان تتصلي
موزه: يخيبهم الى هي 3000 و انتي دافعه بحوات 15000
نور: حبيبتي هم اذا ما يفقرونه ما بيسكتون.. قد ما يرومون بشفطون عيال اللذينه
موزه: صدق زايدين الرسوم عليكم
نور: هيه تقريبا 1000
موزه: و السمستر الي طاف بعد تقريبا 1000
نور: و السمستر الياي بعد.. حبيبتي هم ما بيصخون لين ما توصل الرسوم لك مليون.. ندفع رسوم و بعد الكتب علينا.. و غير ها كله ندفع حق الانشطه الطلابيه الي مب الكل يحظرها و ندفع رسوم طبيه ما اعرف صحيه حق العياده المفلعه مالهم.. لا بعد ندفع حق الاستكر
موزه: لا حتى الي عندهم منح بعد يدفعونهم حق الانشطه و حق العياده
نور: لا و فوق ها كله يوم بنات النوادي الطلابيه و الجمعيات و الاتحاد يطلبون بيزات يقولولهم ماعنده ميزانيه و يعطونهم قولي ربع الملغ الي ياخذونه من البنات
موزه: ياكلون الباقي.. و الله كيف يرقدون و في بطنهم فلوس حرام
نور: و الله الشيخ سلطان مب امقصر يعطيهم فلوس حق الجامعه و يصرف عليها عدل.. بس هم يشفطون و يدورون اردا الاشياء و يعطونه اياها الحين في جامعه تستخدم كبيوترات تجميع.. لا و لا الطابعات بدون اوراق .. حتى الدورات الي تسويها الجامعه كلها قوم بو عبود ما تسوي دورات عدله الواحد ياخذ منها شهادة مشاركه و يحطها في ملفه ان هو حظر دوره تخص تخصصه
موزه: لا فوق ها كله المواطن الي في الجامعه مهضوم الحقوق.. يعني الحين قله المواطين الي عندهم دكتوراه عشان يكون عميد الكليه وافد.. لا وراتبه ضعف راتب المواطن.. كله و لا منح البحوث و الدراسات العليا يعطونها الدكاتره الوافدين و يخلون المواطم في الويتنق لست
نور: هاي مب غلطه الدوله .. هاي من الي ماسكين المناصب من هالزلمات و يالسين يشفطون شفط
موزه: صدقج.. تدرين انا سمعت ان الدوله تعطي منح حق طلاب من خارج الدوله.. مب المواطن اولا بهاي المنح
نور:و الله ما اعرف.. بس اتعرفين لازم يعطون الدول الثانيه عشان سمعة الجامعه برع .. بعد ها بزنس و لازم نحنا نرضا عنه عشان تطور الدوله.. اتعرفين ها يدخل للدوله وايد.. يعني ها نوع من انواع الدعايه و تبادل المصلحه
موزه: ما قلنا شيء.. بس الحين انتي مواطنه من الدوله و من امارة الشارجه .. بس ما عندج منحه
نور: هع اطاع منو الي يرمس .. صخي صخي مب جنه انتي يابه 98% و ما طلعتلج منحه الى عقب سنتين دراسه على حسابج .. لا و الي دفعتيه قبل ما ردولج اياه
موزه: هيه و الله
نور: خلينه من هاي السالفه .. شو رايج تين وياي الجامعه.. بدفع الرسوم و عقب بعزمج على باسكن روبن و بنرد البيت
موزه: تدرين ابا اطلع بس ما اعتقد ان بابا بيطيع
نور: رمسيه لعل و عسى
موزه: و الله هو جد خلاني أي وياج فيمكن يخليني لان بنسير الجامعه.. بتصله و برد عليج..
نور: انزين بترياج.. بس بسرعه الدريول مشغل السياره من متى
موزه: اوكي
شاورت موزه ابوها .. و مرت نور على موزه و ساروا الجامعه يدفعون الرسوم.. و طبعا استغلوا الدرب في السيره انهم يرمسون عن سالفه نور مع ولد عمتها و المواقف الي استوت حق نور في بيت عمتها.. عقب ما خلصوا دفع الرسوم شافوا سيارة أ.حنان في القراج
موزه: اندوج مس حنان مداومه.. تعالي بنسير نسولف وياها لين ما أي الدريول
نور: يالله طوفي
سارن الهنتين عند أ. حنان يوم شافتهم وايد استانست و يلست اتخبرهم عن الاجازه و كيف مرت عليها و ان هي مب امداومه دوام رسمي اليوم لانها بعدها في اجازه بس هي يايه تخلص شغلها و بتروح
نور: تصدقين مس حنان ضعفانه
موزه: هي صدق وايد بعد مب اشوي
أ.حنان و هي تبتسم: و الله زين .. الاجازه اتضعف
نور: لا صدق شو اتسوين رجيم و لا رياضه
أ.حنان: انا مواضبه ع الرياضه منزمان
نور: عيل شو اليديد
أ.حنان: و الله ما ادري.. يمكن لاني ما اكل حلويات وايد.. ايام الجامعه وايد كنت اكل
موزه: هاي صدق حتى انا ما اكل وايد الحين.. يوم في الجامعه طول الوقت و انا اكل الا سنكر و لا توكس من هاي الثلاجه
أ.حنان: هيه انا مثلج بعد
موزه: من اليوع شو انسوي
نور: ما خبرتكم مستجدات الساحه الفنيه
قبل ما تكمل نور كلامها يندق باب المكتب .. و كان الدكتور عبدالرحمن و معاه ولده عمر
نور اول ما شافت عمر صدت ع موزه و غمزتلها.. موزه ضحكت على نور
د.عبدالرحمن: السلام عليكم
أ.حنان و البنات: و عليكم السلام
د.عبدالرحمن و هو يشوف البنات: ما شاء الله مداومات؟
نور: هيه النشاط زاد عندنا
د.عبدالرحمن يبتسم لنور و يشوف أ.حنان: حنان انتي مب بعدج في اجازه
أ.حنان: هيه بس يايه اخلص اوراق
د.عبدالرحمن: هيه اقول انا احيد اجازتج تخلص عقب اجازتي
أ.حنان: اليوم اول يوم دوام لك د.عبدالرحمن
د.عبدالرحمن يهز راسه
عمر يتحرك باتجاه موزه و نور بخطوات بطيئه كانه يحسسهم بوجوده
نور انتبهت لحركت عمر: عموري تعال عندي
عمر شاف ابوه .. تحرك باتجاه نور .. شلته نور و حضنته بكل قوتها لين ما بدا عمر يصيح من ضغط نور عليه
موزه: بس جتلتي الولد
نور: حبيبي وايد احبه لو يستوي اشتريه جان اشتريته
أ.حنان: هاي مشكلة الي ما عمدهم يهال في البيت
نور: هيه و الله .. د.عبدالرحمن شو رايك تيبه بيتنا كل يوم الصبح انته عندك دوام و ما تبا تيبه كل يوم وياك حتى عمر هكوه يقولي انا ما احب أيي ويا بابا كل يوم الجامعه لان نور مب موجوده
أ.حنان تبتسم: نور انا ما سمعته متى قالج
نور: انتي ما اتعرفين هو قال
يرن تيلفون نور رنه
موزه: اكيد الدريول
نور: هيه هو محد غيره يدق رنه.. اقول د.عبدالرحمن شو رايك ناخذ عمر ويانا بنسير باسكن روبن .. و عقب تعال خذه من بيتنا .. و الله دكتور لا تردني
د.عبدالرحمن: اسكريم في هذا الجو حرام عليكن.. بتمرضون
نور: لا عادي و الله كشخه احلى طعم الايسكريم في الشته من الصيف.. انزين بناكله دونات.. لا تخاف نحن بناخذ بارسل و بنسير ناكل في البيت فمابيعرف نحن شو طالبين بناكل وياه دونات.. دكتور لا تردني انا اول مره اطلب منك طلب
د.عبدالرحمن: يمكن ايصيح و لا شيء
نور: افا عليك البيبي سيتر نور موجوده و انا عندي خبره مع اليهال
أ.حنان: من وين يتج هاي الخبره
نور تغمز حق مس حنان: الله يهداج انتي هدي شوي خليه يوافق و بييبلج باسكن روبن
ضحك الجميع ووافق الدكتور عبدالرحمن بس طلب منهم ان يسيرون بيت موزه اذا في مجادل عشان هو يندل بيتهم.. وافقوا نور و موزه ع الفكره و خذن شنطه اغراض عمر من ابوه و ساروا باسكن روبن و عقب ساروا بيت موزه.. استغربت ام موزه وجود الياهل وياهم و عقب موزه خبرتها ان ها ولد الدكتور و ان ها الدكتور اربيع خالها علي
مع تحياتي
رد مع اقتباس
ماكرو على ~ ا ل غ ل ا ~
مواقع النشر (المفضلة)