جديد قصه من تاليف فنجان قهوة

[خنفروش]

لا نحن اندش ونقرا و ننتظر التكمله (( الله يرحم اربيعتج و ايصبرج و ايصبر اهلها ))

وألله ايسر لج امورج فنيان

[فنجان قهوة]

خنفروش
اشكرك على الاهتمام
تحياتي لك

[فنجان قهوة]

ادري وايد طولت عليكم

اعذروني الضروف حكمت

اتمنى انكم تستمتعون بهذا الجزء

[line]

الجزء الخامس
2007-04-07

د.عبدالرحمن في المكتب يجيك في اوراقه .. تدخل أ.منال المكتب و تيلس على الكرسي الي يم المكتب .. بس د. عبدالرحمن ما انتبه لوجودها.. رن تيلفون د.عبدالرحمن صد ع التيلفون عشان يرد عليه انتبه لوجود أ. منال
د. عبدالرحمن مبتسم لمنال: منال انتي من متى هني ما انتبهتلج؟
أ. منال: من زمان
د. عبدالرحمن مستغرب: ما انتبهت لوجودج
أ. منال: مش مشكله .. انت فيك شيء .. مو على بعضك هاليومين .. بظن ان انت عندك كلاس و ما رحت
د. عبدالرحمن يفر الاوراق الي فيده: اوف نسيت .. هاي 3 مره انسى ان عندي كلاس في هذا الوقت
أ. منال تعدل يلستها: شو بك دكتور؟
د. عبدالرحمن بوجه حزين: اه.. ما فيني شيء بس عمر متعبني .. حتى مربيته ما تبا تيلس .. تبا ترد بلادها .. ما اعرف منو بييلس مع عمر يوم اكون هب موجود .. و الصراحه حتى و انا موجود ما اقدر عليه
يندق باب المكتب كانن موزه و نور و مزون..
نور: السلام عليكم
د.عبدالرحمن و أ. منال: و عليكم السلام
نور و هي مبتسمه: ممكن ندخل ؟
أ.منال: بستاذن دكتور .. (تصد على نور) شو بيلبألك الادب
نور تلصق في أ. منال و تدلع في وقفتها و رمستها: مس منال انا بنت مؤدبه
أ.منال بسوط واطي: ولي عليكي .. الدكتور جالس
نور بسوط واطي: عادي انا خطيبه ولده
أ.منال تهز راسها و تطلع..
نور: شو حظرت الملائه و هربت الشياطين
نور تيلس على الكرسي الي يم المكتب بدون ما تستاذن .. و تحط ريل على ريل.. موزه تاشر لنور بعيونها جنها تقوللها "نشي".. و نور منطنشه موزه.. د.عبدالرحمن منتبه لحركاتهم
نور: اقول دكتور ليش ما يت ادرسنا اليوم .. نحن صح نستانس يوم الدكتور ما ايي بس انت من 1000 كلاس ما درستنا .. شو زعلان من موزوه و مزنوه .. انت خبرني اذا هم مزعلينك و لا تحاتي بسويهم شورما بالثوم
د.عبدالرحمن و هو مبتسم: ليش مب زعلان منج؟ محد غيرج يتحرطم في الكلاس و برع الكلاس
نور وهي فاجه عيونها: الحين ها يزاي اني اسولف وياك و اغير جو الركود الي في الكلاس .. اصلا بدوني الكلاس بيستوي ارقاد
د. عبدالرحمن: ليش انا ممل؟
نور: افا منو قال؟ ليكون موزوه قالت ان كلاسك ممل .. لا لا انت لا تاخذ على كلام موزوه .. هي تخرف ساعات
د. عبدالرحمن: الحين انتي يايه تتحرطمين
موزه و مزون يصدون على بعض و مرسوم على ويوهم علامة استفهام كبيره
نور و هي منحرجه: لا دكتور نحن بس بغينه نسال ليش انت ما تي ادرسنا.. خلاص عيل نستاذن
د.عبدالرحمن: عشان انتي في الكلاس ما ابا ادرسكم.. ما احب ادرس الكساله.. الي اييبون 14 من 15
نور: انزين انت الي نقصتني في الامتحان مب انا.. انا حليت الي اعرفه.. انت تتفلسف في التصحيح
د. عبدالرحمن: الحين انتي تبين تحاسبيني ع التصحيح.. انا الدكتور و انا الي احاسب الطالبه على اهمالها
نور: الحين انا مهمله
د. عبدالرحمن: ثقيلت دم بعد
نور: خلاص بروح
د. عبدالرحمن: بتريحينا
نشت نور من مكانها و اتجهت صوب الباب .. حست ان الدكتور طفران منها ..د. عبدالرحمن تم ساكت ما عرف شو يقول.. موزه و مزون استغربوا من الموقف و ما عرفوا شو استوى.. استغربوا من نور و ليش هي نشت و ليش الدكتور يرد على نور بهذا الاسلوب.. طلعت نور من المكتب متجه للدري و كانت عيونها مليانه دموع .. اتحسست من ردون د. عبدالرحمن .. وهي نازله ع الدري طلعت في ويها أ. حنان و كانن موزه و مزون ورا نور
أ. حنان: السلام عليكم
نور ما انتبهت لرمست مس حنان ..
موزه و مزون ردوا السلام .. ووقفن مع مس حنان
حنان: بلاها نور؟
موزه: ما ادريبها كنا عند الدكتور عبدالرحمن .. و تناقرت هي و ياه ما اعرف ليش؟
مزون: كل شيء صار بسرعه.. و ما فهمنا إشي
حنان وهي عاقده بحياتها: د. عبدالرحمن و نور اتناقروا.. كيف؟
موزه و مزون خبروا حنان بالسلافه.. و ترخصوا عنها و لحقوا نور.. حنان سارت عند د. عبدالرحمن ترمسه في الموضوع الي سمعته.. و كان رد الدكتور مثل ما اتوقعت حنان انه كان يسولف .. وهو استغرب من ردت فعل نور.. و طلب عبدالرحمن من حنان انها تشوف شو الي زعل نور .. و كان يحاتي ان نور تكون مضايقه من شيء و هو يه وكمل عليها.. حنان وعدته انها بتخبره عن الي بتعرفه عن السالفه
.................................................. ............................
موزه و مزون يتمشون بالتجاه w3 .. اتصلوا كمن مره في نور بس ما ردت عليهم .. طرشت موزه مسج حق افراد الشله تسال في حد يعرف شيء عن نور .. و الكل رد عليها انهم ما شافوها اليوم.. مزون و موزه ساروا الكوفي شوب عند شلتهم .. خبروا الشله بالسالفه.. و الكل استغرب من نور و تصرفها ..
امنه و هي تنزل فنجان الكبشينو: غريبه نور مب من النوع الحساس عشان تتحسس من كلام الدكتور
عفره تلعب بسماعه الايبود: هيه صدق نور عادي عندها اذا قطعت حد او حد قطعها
فاطمه تحرك عيونها و هي تشوف الشارع من زجاج الكافيه: خوفي ان نور فيها شيء .. نحن ما نعرفه.. ( تحط عينها في عين موزه) ما حسيتي ان فيها شيء اليوم
موزه سكتت شوي تمت تفكر : كانت وايد عاديه .. مثل كل يوم
غنيه: نور من النوع الي ما يبن عليه انه مضايق الى بعد فتره
فاطمه: هيه صح
امنه: الحين وين بتكون نور
موزه نشت من مكانها و شلت شنطتها على جتفها.. شنطة الكتب
امنه:وين بتسيرين؟
موزه و هي محرجه: ما اروم ايلس جي و ما اعرف نور شو بلاها
فاطمه: مواز انتي هدي اعصابج و يلسي و ان شاء الله بترد علينا الحين .. اصبري انا بتصلبها و بحاول وياها يمكن اترد علي
موزه: من متى نحن نتصل فيها و هي ما ترد علينا
امنه:يمكن ما عندها رصيد
موزه: كيف ما عندها هي اليوم مدخله 100
عفره: يمكن يكون عندها كلاس .. و لا روحت البيت .. و لا يمكن حصلت وحده من زمان ما يلست وياها و نست عمرها
موزه: كيف انا و هي عندنا نفس البريكات .. ع الاقل تقول انها بزي او أي شيء
فاطمه: يمكن سارت عند مس حنان تسولف معاها
موزه طنشت الكل و طلعت من الكافيه ادور على نور
امنه: موزه و نور ما يستغنون عن بعض
فاطمه: موزه وايد رقيقه و حساسه.. هي تحاتي نور .. و تحاتينا كلنا
مزون: اقول في حد يبا فريز ليمون
غنيه و هي مويمه: و الله مكان نور مفقود
عفره: حصوه وين ما بينت اليوم
فاطمه: رمسيتها وقالت ما بتداوم اليوم .. تقول مالها خلق
عفره: هاي حصوه مشاكل اليوم مالها خلق و البارحه ما تبا تحظر الكلاس الدكتور ممل .. باجر ما يندرا شو بتكون علثلتها
امنه: محد مادبنها غير نور..
مزون ترد اللي في حلجها لانها مب رايمه تيود عمرها من الضحك: و الله نور عامله عمايل فينا كلياتنا
عفره ترد بالكرسي على ورى: هي هي حاسبي عن توصخينا
فاطمه و هي مبتسمه و تحرك نظرها بين افراد الشله: اقول شو رايكم نسير باجر النادي .. نور طرشتلي مسج اليوم تقول بتي وياي النادي متى ما بسير
امنه: نور ما تصدق ..
مزون: ايه يالله خلونا نروح من زمان ما رحنا
عفره: لا انا مالي خلق حق النادي و بلاويه
فاطمه: بنسير بس لا تسبحين ويانا بس يلسي
عفره: اذا جي ممكن
امنه: فطوم اتصلي في موزوه شوفيها حصلت نور و لا لا .. ما عندي رصيد
فاطمه تظهر تيلفونها من شنطتها و تتصل .. اتريت وايد لين ما ردت موزه: الو موزه
موزه بسوط متقطع: نو.....ر .... س......و....ت ....
انقطع الخط
فاطمه و هي مرتبكه: الو مواز .. الو
امنه و هي زايغه: بلاها موزه
فاطمه تشوف شاشة التيلفون: ما اعرف انقطع الخط .. صوتها كان مب واضح
امنه: انزين شو قالت
فاطمه: ما اعرف قالت نور سوت .. و انقطع
غنيه تنش من مكانها و هي زايغه: شو سوت؟
فاطمه تحرك ايدها : ما اعرف!
غنيه تظهر تيلفونها بسرعه من شنطه الكتب: انا بدق لموزه بشوف شو سالفتها
تحاول الاتصال غنيه بس تيلفون موزه ما يمسك
فاطمه: تعالوا انسير صوب w5 يمكن نحصلهم
و هم طالعين من w3 بيقطعون الشارع .. انتبهوا لوجود دم على الارض .. و اثار زجاج .. و سياره مكسره على الرصيف
فاطمه و بعيون زايغه: لا لا
غنيه تصد ع فاطمه: لا تتخيلين هذا الامر
امنه: لا تفاولون.. اكيد موزه قالت شيء ثاني غير الي سمعته فاطمه لا تيلسون تتخيلون
وصلت الشله لw5 ما حصلوا حد يعرفونه دخلوا مكتب أ. حنان .. بس ما لقوها .. سالوا الي وياها في المكتب عن حنان .. قالتهم ان حنان استاذنت و روحت لامر طارئ.. حاولوا انهم يعرفون شو السالفه بس ما قدروا يحصلون أي معلومه عن الحادث و لا عن حنان .. و المصيبه ان موزه ما ترد عليهم.. بعد مرور ساعه من القلق و هم ميلسات في هول w5 يدخل د. عبدالرحمن و اول ما يشوف الشله عيونه تغرغر بالدموع .. تنش فاطمه من مكانها و تتجه للدكتور
فاطمه و هي زايغه: دكتور في شيء
د. عبدالرحمن يشوف فاطمه و مب رايم ايود دموعه
غنيه و هي تصرخ: دكتور شو مستوي شو بلاك
امنه و بصوت مبحوح: لا دكتور ليكون الحادث
د. عبدالرحمن: ادعوا لنور
فاطمه: لاااااااااااااااااااااااا ااااااااااا
غنيه تيلس ع الارض و اتصيح
امنه مب رايمه تمسك نفسها من الصياح تحاول تمسك ايادي ربعها
عفره و مزون حضنن بعض و هم يصيحون
امنه: نشن نشن بنسير عن نور .. د. عبدالرحمن هي في أي مستشفى .. لا تقول لا تقول ..هي ما بلاها شيء .. هي ما بلاها شيء . قوللنا هي وين نحن بنسيرلها
د. عبدالرحمن: استهدن بالله.. و الله يصبر اهلها
فاطمه بصريخ: كيف؟ اليوم الصبح مطرشتلي مسج اتقولي فيه بتسير النادي وياي
امنه: فاطمه بدون كيف؟ غنيه نشي من ع الارض.. بتصل في ماما تطرشلي السياره ..
فاطمه: دكتور شو استوابها
د. عبدالرحمن و هو منزل راسه : اندعمت
امنه: اصابتها وايد قويه.. اقصد كيف الحادث .. هي كانت في السياره .. حد غيرها استوابه شيء؟
د. عبدالرحمن يقطع كلام امنه: امنه استهدي بالله.. و اتماسكن .. هي محتايه الدعاء منكم .. اوقفوا يم موزه .. موزه هب متحمله الصدمه
غنيه تصيح بصوت عالي و تتبعها فاطمه و مزون و عفره بالصياح.. تنزل أ. منال من الدورالثاني و تسال شو الي استوى.. خبرها الدكتور بالسلافه .. منال ما قدرت تمسك نفسها.. كل البنات الي يعرفون نور في الهول يلسن يصيحون.. طالبات الاتحاد طلبوا من الجامعه ان يوفرولهم باص عشان يسيرون الصلاه.. و فرت الجامعه باصات عند البنات و الاولاد .. الحادث كان صعب.. نور كانت ظاهره من مكتب د. عبدالرحمن و هي مظايقه لفت بين ممرات الجامعه من w5 ل w12 و اتجهت في النهايه ل w3 و ما كانت تشوف جدامها و يوم وصلت عند المطبه الي بتوصلها للكفتيريا .. كانت احدى السيارات يايه و هي مسرعه .. فيها طالبات .. حاولوا انهم يتفادون نور و لفوا ع السياره الي يمهم الي دعمت نور .. اول من وصل عند نور كانت موزه .. موزه ما قدرت تتحمل المنظر و لا الموقف .. ركضت على نور .. نور شافت موزه بنظره حالمه اتشهدت موزه على نور بس كانت نور خلاص اتغرغرت..
الدكتور عبدالرحمن يحس بتانيب الضمير و يحس ان هو السبب.. خاصتا اعيون موزه ما رحمته يوم سار المستشفى يشوف شو الي صار..
ام امنه يت تاخذهن .. و ساروا المسيد على طول .. امنه كلمت اخت موزه حمده و عرفت انهم في المسيد يغسلونها .. و صلن البنات مسيد الصحابه.. دخلوا يسلمون على نور بعد ما كفنوها.. اتيددوا و دخلوا المسيد
الشله من شافوا موزه .. يتحاوطوبها و يلسوا يصيحون .. موزه حطت راسها على ريل امنه و تمت اتصيح
امنه تمسح على راس موزه: موزه احيدج اقوى من جي
موزه وهي تصيح: اه .. يا امنه كله منا ما لحقناها على طول.. انا السبب
مزون تمسك ايد موزه: لا تقولي هيك
فاطمه توخي على موزه: موزه نور راحت بس قلبها ويانا مثل ما كانت دوم ويانا في كل دقيقه و كل ثانيه.. هي تبانا ندعيلها..
عفره وهي متسانده على اليدار و ايدها على ويها: فديتها ويها منور .. مشاء الله عليها .. يالله اجعلها من اهل الجنه يارب
غنيه تسحبلها مصحف و تيلس تقرا فيه ..
تدخل حمده اخت موزه المسيد و عيونها مليانه دموع .. تتجه لموزه بخطوات سريعه .. فاطمه خبرت موزه بوجود اختها .. رفعت راسها و حضنت اختها و يلست اتصيح .. دخلن خوات نور و امها و عماتها و بنات عماتها و خالاتها و بناهم .. ام نور اول ما شافت موزه اشرت لموزه ان تسير عندها.. موزه اركضت عند ام نور .. حبت راسها و جابلتها.. ام نور اسحبت موزه صوبها
ام نور و هي تحرك جسمها يمين و يسار: يا ريحت الغاليه .. اه .. يا موزه .. نور سارت .. و ما بترد
موزه تصيح و خوات نور اتحاوطوا بامهم لين ما بدت الصلاه .. اقاموا الصلاه و صلوا على نور .. ظهروا البنات من المسيد متجهين لبيت نور .. موزه و امنه اول ما وصلوا البيت هي و خوات نور و امها دخلوا حجرت نور .. موزه حطت راسها عى مخدت نور و يلس تصيح و تترحم عليها ..
ام نور فتحت الكبت و ازقرت بناتها : ظهروا اثيابها و حطوهن في اجياس خلي السواق يوديها هيئه الاعمال الخيريه بسرعه .. نور محتايه الاجر ..
امنه: هي نور محتايه ان نتصدق عنها ..
ام نور: ايلست على كرسي نور و يلست تمسح على الشال الي على الكرسي .. هذا الشال كان الشال المفظل لنور .. كانت دوم تتلحفبه يوم تيلس على اللابتوب .. خوات نور سحبوا امهم برع الحجره و ودوها حجرتها عشان تغتسل لانها دخلت مع الي غسلوا نور .. بعد ما خلصت ام نور من الاغتسال ظهرت الصاله و اسالت عن موزه و الشله .. تباهم يكونون جدامها .. ردوا الرياييل من المعشره .. دخل ابوا نور و اخوانها عشان يغتسلون .. ابو نور اول ما شاف ام نور و خواتها ما رام يمسك نفسه من الصياح .. اخوان نور سندوا ابوهم لين غرفته .. نور كانت شمعه البيت .. كانت وين ما تسير تظفي جو للمكان الي هي فيه ..
بعد صلاة المغرب ترخصوا البنات عشان يروحون الا موزه و امنه تمن ما رضن يروحون .. اخت موزه قالت انها بترد تاخذهم في وقت متاخر او أي وقت هم يبونه .. قبل صلاة العشاء رن تيلفون موزه و كان د. عبدالرحمن هو المتصل
موزه ترمس امنه: ها شو يبا .. له ويه يتصل و هو السبب في كل الي صار
امنه: موزه لا تقولين جي .. هاي كتب الله
موزه: و الله مب بيدي .. هب عارفه شو اسوي و كيف الحياه بتكون بدون نور
امنه بويه حزين: انزين حبيبتي ردي عليه يمكن يبا شيء
موزه تفر التيلفون على امنه: ردي انتي انا ما ابا اسمع صوته
امنه تاخذ التيلفون من موزه و ترد: الو
د.عبدالرحمن: موزه
امنه: لا انا امنه
د. عبدالرحمن يتنفس بصعوبه: اشحالج امنه؟ .. اسمحيلي .. بس موزه وين؟ ان شاء الله الحين هي احسن
امنه: الحمدلله احسن
د. عبدالرحمن: امنه انا متصل لان ابا ادل البيت.. اتصلت في حنان و تقول انها ما تندل .. و لو علي خال موزه هنه جان خليته يتصل
امنه: هب مشكله انا بدليك
دلت امنه د. عبدالرحمن البيت و سركت عنه على طول
موزه: يبا يحظر العزا
امنه تشوف موزه ببتسامه حنونه: هيه .. يبا أي
موزه: انزين محد يعرفه هناك..
امنه: بخبر حد من خوات نور.. عشان يقولون حق اخوانهن
موزه: حمده تقول انها شافت سيارته يم المسيد .. و فطوم قاتلي انه وايد كان متاثر
امنه: هيه صاح اول ما شافنا .. هو الي خبرنا بالسالفه
موزه: انا ما شفت حنان لين الحين .. نور كانت تعتبر حنان قدوتها .. كانت تشاورها في كل شيء و تخبرها عن كل صغيره و كبيره تستويلها .. رغم انشغال حنان بس كانت تعطي نور من وقتها و تيلس تسولف وياها
امنه تمسك ايد موزه: حنان كانت اخت نور الكبيره .. و هي اختنا كلنا .. نور كانت تستانس يوم اتلعوزها
تمر البشكاره و هي شاله صينت العصير و الماي: موزوه انتي مافي ريد اشرب شيء .. تريد قرين تي
موزه تكلم البشكاره: هيه قرين تي اللي في بيتكم بيخيس محد يشربه غير نوراني .. و نوراني سارت .. بسو .. هاتيلي مق مال نور
بسو: موزوه لا انتي ما في ريد ماما ابكي .. يوم فيريد انتي روح قول حق انه و انا في جيب هذا كوب .. موزوه .. نور كان في كيس كبير في داخل خديه هق اموري .. انتي في ودي هق اموري نور في استوي فرهان بعدين
موزه: فديته كانت اتموت في هالولد ..
امنه تدز بسو: بسو تبين تصحين موزه .. و انتي ادرا ان ماما كبير اذا شافت موزه اتصيح هي بعد بتصيح
بسو تهز راسها .. تسكت شوي ..: انزين انتوا ما في ريد كوفي جاي ماي .. أي شي
امنه: بسو هاتيلنا جاي موزوه ما شربت شيء من الصبح
موزه: لا انا ما ابا شيء
امنه: هب ع كيفج .. نور ما ترضى ان حد يدخل بيتها و ما يشرب شيء
موزه: انا هب غريبه .. و انا ما اشتهي اكل شيء و لا اشرب شيء (تصيح موزه مره ثانيه)
نور تطبطب عليها: موزه بتشربين غصبن عنج .. ما فينا تطيحين علينا
يرن تيلفون موزه .. حنان الي تتصل .. موزه ترد بسرعه: الو مس حنان انتي وين
حنان: انا يايه في الدرب بس دلوني البيت
موزه دلت حنان البيت .. وصلت حنان بسرعه .. اول ما دخلت و شافتها موزه .. عقت عمرها موزه على حنان و تمت اتصيح
أ.حنان: موزان صيحي ما بقولج لا تصيحين .. بس لا تنسين تدعيلها
موزه: الله يرحمها
يلست حنان مع موزه و امنه .. موزه طول الوقت ما اسكه ايد حنان
يرن تيلفون موزه: اف ها شو يبا بعد
أ.حنان: موزه عيب .. الريال اكيد يبا شيء ما بيتصل منه و الدرب
موزه تناول امنه التيلفون: امنه ردي
امنه: يا ذقلها على لسانج .. وين ايام امون
موزه: امون بلا ثقالت دم ردي عليه
امنه: انزين برد بس هاي اخر مره.. اويه بند
موزه تحرك ايدها بالامبالاه: احسن
رن تيلفون حنان .. وكان الدكتور عبدالرحمن
حنان: الو
د. عبدالرحمن: السلام عليكم
أ.حنان: و عليكم السلام
د.عبدالرحمن: حنان .. شحال موزه و ربعها
أ. حنان: الحمدلله .. كلهم بخير
د. عبدالرحمن: دقيت حق موزه بس ما ردت علي
أ.حنان تشوف موزه و تحيس بوزها: هي لاهيه تعرف العزا و الناس و الزحمه
روحت امنه و حنان .. اما موزه ما روحت ام نور ما رضت ان موزه تروح .. لزمت على ام موزه ان موزه تبات بيتهم اليوم .. ام موزه رضت لان اتعرف ان موزه ما بتتحمل تيلس في البيت .. رقدت موزه على سرير نور .. موزه ما قدرت ترقد لانها كانت تفكر في نور .. يلست تدعي لنور و تصيح طول الليل.. ام نور كانت تطمن على موزه كل شوي ..
.................................................. ..........................................
اليوم الثاني امنه و موزه و فاطمه ما داوموا .. ساروا العزاء .. و الباقي داوموا و كانوا على اتصال دايم في موزه و امنه و فاطمه .. اغلب الاساتذه و البنات حظروا العزا .. و موزه كل ما تشوف شخص تذكر موقف من المواقف الي مرت بين هذا الشخص و نور ..
فاطمه تشوف امنه و موزه: كيف بيمر علينا اليوم في الجامعه و كيف بنحضر الكلاسات بدونها
امنه تحط ايدها على شفايف فاطمه: فاطمه شو هاي الرمسه
موزه: نشن بنسير حجره نور
امنه: بدون اصياح
موزه: لا تحاتين
دخلوا البنات حجره نور حسوا باحساس غريب .. موزه شغلت لابتوب نور .. و كانت نور حاطه باسوورد للابتوب و محد يعرف الباسوورد الى موزه ..
امنه: موز شو تبين بلابتوب الحين
موزه: ابا اشوف صور نور .. و دزايناتها .. بحط نعي في المنتديات .. الابتوب هاولد نور
يرن تيلفون موزه.. أ. حنان ع الخط
موزه: هلا بالطش و الرش هلا و غلا بالحلوين هلا بمس حنان
أ.حنان: يالله من زمان ما سمعتها .. الله يرحمها
موزه: هيه .. فديتج انا بتم اقولها لانها تذكرني في الغاليه
ا.حنان تدمع عيونها: موز تعرفين منو عندي و يسال عنج
موزه بدون اهتمام: منو يعني؟
أ.حنان: خطيب نور
موزه: فديته عموري و الله .. اه فديت خطيب نور و الله
أ‌. حنان: هو عندي في المكتب .. يقول زه وين
موزه: هههه .. يقول زه اين؟ يعن موزه وين.. فديته .. عطيني اياه برمسه
موزه يلست ترمس مع عمر .. بعد صلاة العصر روحت فاطمه و ين عفره و غنيه..
موزه ضاجت من اليلسه داخل: انا بظهر بتمشه برع .. حد بي وياي
الكل اعتذر .. ما اهتمت موزه و ظهرت .. و هي تتمشى في الحديقه الخلفيه من بيت نور شافت واحد يالس على الميرحانيه يصيح .. امبين عليه عود هب صغير .. يوم ركزت في ملامحه حست انها تعرفه .. انتبه لها صد و تم يشوفها من بعيد لبعيد و موزة هب معبرتنه .. فجأه تسمعه يرمس
راشد: انتي صديقتها
موزة ترد باستغراب: هيه انا صديقه نور –الله يرحمها-
راشد يهز راسه: انا ولد عمتها راشد
موزه ( اقول شايفتنه .. مثل ما وصفته نور .. يبين انه يحبها ) سكتت شوي: انا ربيعتها موزه
راشد: موزة .. انتي موزه ؟ .. هي دوم كانت بطاريج
موزه: نور اكثر من اخت
راشد يلس يتامل ملامح موزة .. تكلم بتردد: موزة .. نور.. كانت ترمس عني
موزة باندفاع: شو هالسؤال!
راشد: لا بس كنت ابا اعرف شو كانت مشاعرها صوبي .. انا اعرف انج كاتمة اسرارها مثل ما تقول امها
موزة: لو سمحت راشد انا ما اروم ارمس وياك .. تعرف هذا شيء غلط في مجتمعنا .. و البنت ما ايوز عليها غير الرحمه
راشد .. نزل راسه: الله يرحمها
موزه: استاذن
راشد: الله وياج
.................................................. .....................
انقظت ايام العزا و ردت الايام مثل قبل بس بدون نور .. الكل مفتقدنها مفتقد اتصالاتها .. مفتقد حركاتها .. مفتقد شطانتها .. مفتقد لعبها .. مفتقد نزيعها و حبها لهم.. نور كانت دوم تنشد عنهم و مول ما تقطعهم لا بمسج و لا اتصال .. كانت حريصه ان الكل يكون موجود حوالينها .. كانت ما تشيل شيء على احد .. دوم راضيه عن الكل و الكل في عينها ناس طيبين..


يتبع..

[الاسطوري]

حرام عليج فنجان عورتي قلوبنا بالجزء هذا وخاصه إنج ذكرتي وفاة ربيعتج وماعرف إذا كنتي
رابطه الشي هذا بالقصه ولا لأ بس الله يرحمها ودام إنج قلتي إن اللي نتوقعه
مابيصير والنهايه واضحه من البدايه ترا بدت تتوضح
الأمور شويه وعلى العموم نحن
بإنتظار التكمله

[فنجان قهوة]

الاسطوري
تسلم على مرورك
اخوي لا حادث ربيعتي غير هب جي
و اصلا هالشيء انا كاتبتنه قبل ما يستوي الحادث
تحياتي

[فنجان قهوة]

الجزء السادس
2007-04-11

الساعه 4:17 مساء بتوقيت الامارات.. اذن العصر .. في بيت د. عبدالرحمن.. بالتحديد في غرفه المكتب
د. عبدالرحمن يشوف الساعه الي في يده: اووو.. ما حسيت بالوقت
يلملم اوراقه .. و ينش من مكانه .. يتوجه للمغسله الي في غرفة المكتب عشان يتيدد.. الباب يندق .. تدخل الخادمة و معها عمر .. عمر كان توه ناش من الرقاد .. و هب راضي يسكت .. عيونه انشفت و صوته مبح من الصياح .. ينتهي الدكتور من الوضوء و يظهر بسرعه من الحمام (عزكم الله) ..
د. عبدالرحمن .. و هو معصب على البشكاره: why he crying ?
اليسا: I don’t know!
د.عبدالرحمن: شقايل ما تعرفين .. (يشل عمر من بين ايد اليسا) عمر بلاك .. بابا عمر شوفيك ارمس
عمر يستمر بالصياح .. د.عبدالرحمن خذ عمر وياه المسيد .. قال يمكن يكون عمر متظايق من يلسه البيت و لا زايغ من شيء .. تم يسولف د. عبدالرحمن مع عمر .. بس عمر هب راظي يسكت .. دخلو المسيد .. و عمر بعده يصيح .. ما عرف د.عبدالرحمن يصلي .. و لا الموجودين تقبلوا الوضع .. بعد انتهاء الصلاة طلع الدكتور بسرعه عن يسمعله كلمه من منه و لا من مناك .. ركب السياره و حاول يهدي عمر .. حط ايده على جسم عمر يشوف اذا في حمه و لا لا .. جسم عمر كان عادي .. وصل الدكتور عند المحطه و نزل عمر عل و عسى يشتري حلاوه و دبدوب و يسكت .. بس عمر كان رافض كل المغريات الي جدامه .. في نهاية الامر فقد د.عبدالرحمن صبره و ركب عمر السيارة و قام يفاتن على عمر لان مب عارف كيف يسكته .. يوم شاف ويه عمر بادي يتغير من كثر الصياح وقف عند اول صديليه جدامه.. كان فرع الصيدليه في فرع من فروع جمعيه الشارقه التعاونيه .. نزل د.عبدالرحمن مع عمر الصدليه و سال الصيدلي اذا عنده جهاز اكسجين .. لان عمر بادي ويه يزرق من الصياح .. طلع الصيدلي جهاز الاكسجين .. و ركبله اياه .. و في هاي الاثناء بدأ عمر بالهدوء .. (مثل ما الكل يعرف الاكسجين في ماده مهدئه) ..
د.عبدالرحمن يكلم الصيديلي: ممكن يكون سبب صياحه نقص الاكسجين عنده
الصيدلي بعد تفكير: انت عطيته ماي اول ما بدا يصيح او بعد بفتره
د.عبدالرحمن: و الله ما اتذكر .. بس الارجح شربته .. لاني تحريته زايغ من شيء
الصيدلي: هو غالب الي ما يرومون يتنفسون تلاحظ من طريقة تنفسهم او صياحهم ان عندهم صعوبه في التنفس .. و انا ما اتوقعت ان عنده ضيق في التنفس الى من لون ويه.. هو ما اشتكه من شيء في جسمه اذنه او حنجرته
د.عبدالرحمن: لا و الله ما اذكر انه مسك اذنه او حنجرته .. و لا اشتكى من شيء .. و يوم سالته ما رد علي .. هو هب راضي يرمس من نش من النوم
الصيدلي: يمكن يكون شاف شيء يخوف في منامه .. او اتخيل شيء
د. عبدالرحمن: يمكن بس ما اعتقد لان لو كان زايغ من شيء كان بيهدأ اول ما بيشوفني او بعد فتره .. الافظل اوديه المستشفى او العياده عشان يفحصونه .. يمكن يكون فيه شيء و هو هب عارف يوصفه.
من انتهى د.عبدالرحمن من حواره مع الصيدلي .. ظهر الدكتور من الصيدليه و دخل الجمعيه .. ياخذ كريم كرمل المراعي عشان ياكله عمر .. خلص شغله الدكتور في الجمعيه و ركب السيارة .. اتجه بالسياره الى دبي مرورا بدوار ناشونال .. اتصل د.عبدالرحمن في خالت عمر د.مريم ..
د. عبدالرحمن: الو السلام عليكم
د.مريم: و عليكم السلام .. هلا عبدالرحمن
د.عبدالرحمن وهو مرتبك: انتي في دبي؟
د.مريم: هيه في دبي .. في العياده .. ليش في شيء؟
د. عبدالرحمن: ما ادري بلاه عموري .. يوم نش العصر تم يصيح و ما رضى يسكت
د. مريم: غريبه ليش؟ عموري مب من عوايده يصيح يوم اينش من الرقاد
د. عبد الرحمن: ادريبه بس اليوم مادله ليش صاح!
د. مريم: انزين اليسا وين عنه يوم صاح
د. عبدالرجمن: هي الي يابتلي اياه .. ما اعرف ليش احس انه كان يصيح بسبتها
د. مريم .. تمد براطمها ع جدام و تقول في خاطرها " ابا اعرف انت ليش حاط دوبك و دوب هاي الاليسه .. اف انت ليش كارهنها فقيره هي وايد زينه .. ادري لانها اختياري انا لو اختيار وحده من خواتك ما كنت بتقول جي" .. بعد مده من الصمت
د.عبدالرحمن: انزين انا الحين قريب العياده بنزلج عمر و برد اخذه بعد ما تفحصينه
د. مريم: انزين اترياك
وصل د.عبدالرحمن .. عمر العياده و نزل عمر و بدون ما يدخل عند خالت عمر .. عطا عمر للنيرس و ظهر ع طول .. تم يلف في الشوارع يتريا مريم تتصلبه .. وهو في دربه لستي سنتر دبي .. شاف سياره مالوفه .. يوم دقق فيها شاف الي تسوقها بنت .. ويها وايد غريب عليها .. اتوقع انها وحده من طالبات اجامعه او الموظفات في الجامعه .. بعد فتره زمنيه انتبه ان في سياره لاحقتنها من مده .. تم متابع حركة الافراد الي في السيارتين .. السياره الي تلاحق البنت فيها شابين .. بين على البنت انها مستاءه منهم و هي ما تعرفهم .. و لاحظ ان الشباب فاتحين جامة السيارة ويبين انهم يرمسون و يحاولون يسمعون البنت شو الي يقولونه رغم ان دريشتها مسكره .. تقرب د. عبدالرحمن من السيارتين اكثر لين ما دخل امبينهم .. نزل دريشته الي باتجاه البنت .. البنت من شافته عرفته .. نزلت دريشتها
حمده باستغراب: دكتور عبدالرحمن؟
د.عبدالرحمن حس ان الصوت هب غريب عليه: اسمحيلي اختي هاي السياره ملعوزتنج؟ (ياشر على السيارة)
تحرك حمده راسه بالاجابه ..
د. عبدالرحمن: كملي دربج و لا تهتمين
يرفع دريشته من صوب حمده و ينزلها من صوب الثاني .. و الشباب كانوا منزلين دريشتهم
د. عبدالرحمن: السلام عليكم
الشباب و هم مستهزئين: طيب تعال .. طيب تعال .. و مد كفك و سلم .. هعهعهعهعهع
د. عبدالرحمن و هو ما سك اعصابه: تبون شيء ..
الشباب : ابيك ابيك يا روحي اباك .. و اغار عليك من لمسة يداك ... كاااااااااااااااك
د. عبدالرحمن: رقم السياره اعرفه .. و ملامحكم و حفظناها .. و رقم الشرطه ادله .. تامروني بشيء
الشباب يشوفون بعض و هب يايزتلهم رمسه د.عبدالرحمن: خير ان شاء الله انت منو ابوها و له اخوها .. لا قول بس قول اخوها بس قول يدها لا يدها يايزلك تكون يدها
د. عبدالرحمن بتسرع و هو معصب على اسلوب الاولاد و يبغي يقطع حوار الاولاد و بدون تفكير: زوجها
حمده كانت منزله جزء من جامتها عشان تبا تسمع الحوار .. استغربت من رد د. عبدالرحمن و حمزن خدودها ..
الشباب اتلوموا و اعتذروا للدكتور و روحوا .. بس الدكتور تم حاط في باله اشكالهم ورقم السياره و ناولهم نيه سوده انه يبلغ عليهم .. وهو عنده وايد ناس في التحريات و يقدر يقدملهم البلاغ بدون ما تسير حمده وياه .. (واسطات)
حمده ما عرفت تتصرف و ما عرفت هل تشكره ولا تسكت و لا تتجدم و لا شو تسوي..
د. عبدالرحمن بدون ما يحس تم يشوف حمده و تم يتامل ملامحها..
حمده وهي محرجه: ليش اتشوفني جي؟
د.عبدالرحمن بكل هدوء: انتي اخت موزه صح؟
حمده استغربت .. كانت متوقعه ان تصرفه لانه يعرف خالها بس طلعت شهامه منه .. ما ردت عليه و ركزت في دربها ..
د.عبدالرحمن خيل من سؤاله و نظراته .. اشر لها انه مروح .. و رد لعيادة الدكتوره مريم .. خذ عمر من عند خالته و ما طلع فيه شيء .. د. عبدالرحمن تم ينغز مريم ان من اليسا .. و مريم هب راضيه عن هاي السالفه .. و قبل ما ينهي د.عبدالرحمن من حواره مع مريم قالها انه يبا يسفر اليسا و ما يبا أي مناقشه من مريم بخصوص هالموضوع .. مريم ازعلت منه و هو قالها ان ما بيهتم لزعلها هاي المره .. لان في كل مره يقولها انه ما يبا اليسا تزعل .. حست مريم بالغصه من عبدالرحمن و اتصلت بامها تشكيلها اول ما روح عن عبدالرحمن عنها و خبرتها بكل الي استوى
سلامه و هي زايغه: عمر بلاه؟ ليش كان يصيح؟
مريم: ما بلاه شيء
سلامه: عيل صدقه عبدالرحمن ها اكيد من اليسا .. اليسا ما تيلس في بيت بو عمر يوم زياده .. اليوم قبل باجر تتكنسل ويزتها .. و انا بتحول عند عبدالرحمن و بقوم به و بولدي عمر
مريم: شو تتحولين بيت عبدالرحمن ليش .. شو الي يخليج تتحولين .. الحين بتتحولين عشان تخدمين عبدالرحمن .. جيه انتي بشكاره عنده و لا شو .. و لا نحن هب رايمين نقومبج .. لا ما تتحولين .. خلي عمر ييلس وياج .. انتي امه و انتي اولا بتربيته من عبدالرحمن
سلامه و هي محرجه : عمر ولديه و عبدالرحمن ولديه بعد .. ما بحرق قلب عبدالرحمن مثل ما احترق قلبي على فراق بنتي .. و عمر هب ناقص يتم .. وهو من غير شيء يتيم الام بعد يستوي يتيم الابو لا لا .. انا اليوم بتحول بيت بو عمر
مريم: شو اتخبلتي يا اميه .. شو تتحولين .. لا محد منا بيرضى .. و كيف بتعيشين بعيد عن عيالج و بيتج و يرانج
سلامه: ما علي من رمستج .. ها بيتي و هاك بيت بنتي ..
مريم: امي شو هالرمسه
سلامه تقطع كلام مريم: في مال الله (وتبند التيلفون)
تتصل سلامه في عبدالرحمن و تطلب منه ان يمر عليها
عبدالرحمن و هو مستعيب: ليش بلاج خالوه؟
سلامه: ما بلايي شيء اباك تيني الحين
عبدالرحمن: الحين .. الحين
سلامه: هيه نعم خلص شغلك و هات عمر و تعال
عبدالرحمن: انا تحت امرج بيي .. بس الحين انا في دبي يعني بتحير عليج شوي
سلامه: برايك المهم تيني اليوم
مسافت الدرب و عبدالرحمن في حوي بيت خالته سلامه .. يحبها على راسها : شحالج خالوه؟
سلامه بدون ما ترد عليه : جيما جيما .. هاتيلي عباتي و شنطتي بسرعه
عبدالرحمن: خالوه بلاج؟
سلامه: ما بلاني شيء .. انا بي بيلس عندك كمن يوم .. عمر يحتاي من يباريه و اليسا مالها يلسه في بيتك
عبدالرحمن: كلمتج مريم
سلامه: رمستني .. جان زين من زمان مرمستني .. عشان أي وباري عمر بروحي .. (تصد على البشكاره) . يالله ديه ديه .. حطي الشنطه في السياره
تركب سلامه يم عبدالرحمن في السياره و تيلس عمر على ريلها .. و اول موضوع تفتحه هو موضوع زواج عبدالرحمن
سلامه: امي .. عليه كملت اكثر من حولين من ماتت .. و عمر يبا ام .. و انت ما عليك قصور .. ما يعيبك شيء
عبدالرحمن: خالوه الزواج هب في بالي الحين ..
سلامه: اميه انت شاب و بصحتك اذا ما عرست الحين متى بتعرس
عبدالرحمن: يصير خير
سلامه: ما شيء .. يصير خير بزواجك خلال هاي السنه .. انت لا تختار انا بختارلك و بيوزك
عبدالرحمن: خالوه انا ما ابا احط مرت ابو حق عمر
سلامه: انت بتحطله ام .. و عمر بليه خوان شقايل بيعيش وحيد .. انت لازم تفكر في باجر .. الخوان عزوه يا بو عمر
عبدالرحمن: في هاي عندج حق .. سوي الي يريحج
سلامه : انا حاطه عيني ع وحده من فتره .. بس ما يندرى بترضابها و لا لا
عبدالرحمن يضحك : الحرمه زاهبه بعد .. انتي خابزتنها و عاينتنها .. اقول خالوه المفروض اتقولين هي بترضابي و لا
سلامه تشوف عبدالرحمن بنظره: اصلا يحصللها الي بتاخذك
عبدالرحمن وهو مبتسم: انزين مني هاي الي داعيه عليها امها
سلامه و هي مغيضه: عبدالرحمن لا تقول هالرمسه .. تبه تعرف هي منو .. هيه .. انت تعرف خاله زين امازين .. هي موزه بنت اخت علي
عبدالرحمن يوقف السياره في نص الشارع من الصدمه .. و بعد ما يسمع هرن السيايير الي كانن وراه و يبلع ريجه .. و بعيونه المفججه: ها شو .. موزه .. هاي ياهل بالنسبالي .. انا ادرسها خالوه .. خالوه انتي شو اتقولين
سلامه: موزه هكي حرمه ما شاء الله عليه .. و عموري متعلق فيها وايد .. و الريال ما يعيبه عمره .. و انت انسان متعلم و مثقف هم يحصللهم يحصلون واحد شراتك حق بنتهم
عبدالرحمن: بس ادرسها
سلامه : ها الشيء هب حرام و لا عيب .. انت انوي بس و الله بيسر كل شيء
عبدالرحمن بعد تفكير: بس الوقت هب مناسب للموضوع .. توها اربيعتها متوفيه .. ما صارلها اسوعين
سلامه: ما عليه انت بس وافق عليها و نحن بنتريه شهر و لا شهر و نص .. و بنخطبها .. و انت اتعرف هاي الامور اطول لين ما تم .. يعني بايخذ وقت لين ما يتشاورون و لين ما يوافقون و لين ما نحدد الملجه .. و لين ما نملج .. ها بياخذ مال سنه
عبدالرحمن: انزين عطيني فتره افكر فيها ..و برد عليج
سلامه و هي عاقده بحياتها: شو تفكر .. لا انا ادريبك اذا تركتك مع عمرك بتغير رايك .. بس انا ما صدقت اني فاتحتك في الموضوع
عبدالرحمن: انزين خليني استخير بس .. انا موافق بس بستخير
سلامه : انزين جدامك شهر لين ما نرمس في الموضوع .. استخير مره و ثنين و ثلاث .. ما في خلاف على هالشيء .. بس ترفض البنت لا .. انا اخترتها بقلبي قبل عقليي يا اميه
عبدالرحمن سكت و ما عرف شو يرد .. وصلوا البيت .. عبدالرحمن دخل غرفته .. و سلامه طرشت اليسا مع الدريول بيت مريم .. و طلبت من البشكاره تسوي العشاء .. كانت الساعه 10:46 مساء .. خذت سلامه عمر حجرته بدلتله بجامته و يلست وياه في الصاله .. كان عمر يالس في سيارته و يلعب بها في الصاله و حشر البيت بهرنات السياره و النغمات الي تطلعها السياره .. د. عبدالرحمن ظهر من الحجره و هو مستانس ان في حس في البيت ..
عبدالرحمن يكلم سلامه: تو ما نور البيت
سلامه: البيت بدون حرمه مثل الخيمه من خير وتد
عبدالرحمن يبتسم : شو تبون تتعشون .. اييبلكم مشاوي و لا شورما لا مناقيش
سلامه: لا انا قلت حق الطباخه تسوي العشاء .. الحين بيبرز العشاء
عبدالرحمن: خلاص عيل انا بسير المكتب و من يبرز العشاء ازقروني
سلامه: ان شاء الله
.................................................. .............................................
اليوم الثاني
في جامعة الشارقة.. و بالتحديد في w6 ..
موزه يالسه روحها في الهول تتريا كلاسها يبدأ.. يتها عدة افكار " هيه يوم كانت نور موجوده كنا نيلس انا و هي على هالكرسي و نسولف لين ما يبدأ الكلاس .. و مرات نطنش الكلاس عشان نيلس نسولف .. ما عندي حد ييلس وياي بعد روحتج يالغاليه" ينقطع حبال تفكير موزه بصوت وحده من البنات تقول : الكلاس بدأ يا موزه.. يالله تعالي .. بدت الدكتوره تاخذ الحضور و الغياب
موزه نشت من مكانها و شلت شنطتها مالت الكتب و دخلت الكلاس بتثاقل .. الدكاتره كانوا وايد يراعون موزه لان يعرفون حالته النفسية.. يلست موزه على اول كرسي فاضي يم الدريشه .. موزه بعد وفات نور طول الوقت تفكر و ما كانت تنتبه وايد و حتى مذاكرتها مب مثل قبل ..
في نفس الاثناء كانت حصه و عفره و غنيه ميلسات في الكافيه يشربون كابيتشينوا .. حصه لابسه سكارف وردي من ديور و شاله شنطه ديور و لابسه 4 خواتم عليها حروف كلمة ديور .. اما عفره فكانت لابسه طقم عباه و اقايه الدزاين الي عليه كله ورود بالونين البني و الزيتي و كانت لابسه خواتم كبار الماس و عليها احجار خضره غامجه .. غنيه كانت لابسه عباه ساده و اقايه ساده..
حصه و هي تنزل كوب الكابتشينو: اف ملل .. ابا اسير السينمه .. ابا اسير برجمان .. ابا اسير أي مكان ابا اسافر
عفره تحوث الشكر في الكوب: جانزين لو نقدر نظهر رواحنا و محد يقوللنا شيء .. جان كل يوم نحن في سنتر
غنيه تشوف عفره و هي فاجه حلجها
حصه: هيه هيه .. سكري ثمج عن الذباب
غنيه: يالله بسمه .. شحقه حاطه هالكثر شكر .. عشر طعشر خاشوقة شكر
عفره: ما احب الكوفي بدون شكر .. احس ما ينطعم يوم مافيه شكر
غنيه: انزين حطي شكر بس هب هالكثر..هب زين بيصيبج السكر يالله بسمه
عفره: باسم الله علي حرام عليج جيه تفاولين علي .. انا بس احب الشكر
حصه تحط اغنيه عبدالحليم قارئة الفنجان: تتذكرون هاي الاغنيه .. كانت نور ترددها دوم
غنيه: الله يرحمها .. بندي الاغنيه .. عن تنئثم و السبه نحن
حصه: بس انا ما قصدت جي .. انا حبيت الاغنيه لان نور كانت اتحبها
غنيه: انزين ما عليه بس بنديها
عفره: قلبي يعورني يوم اسمعها .. اتذكرها و الله مكانها فاضي
غنيه و هي تشوف الباب: صخن لا تجلبونها مناحه .. هكي موزه دخلت
موزه طلبتهلها كوفي و اتجهت للطاولت ربعها بعد ما خذت الاكسبرسو الي طلبته
موزه بابتسامه بريئه: مراحب
تمد ايدها و تصافح الجميع
عفره: موزوه ليش تشربين هالسم
موزه: مب دوم اشرب بس يوم اكون مصدعه
حصه: موزه مب زين حق بشرتج .. بتظهرلج حبوب
موزه تسكت شوي: any way .. فطوم و اموني ما يوا صوبكم اليوم
حصه: فطوم قالت بتروح اول ما تخلص كلاسها
موزه: فطوم سخيفه
تظهر موزه تيلفونها و تتصل في امنه.. تشرب الاكسبرسوا مالها .. ردت امنه على موزه و صوتها كان وايد واطي
موزه بصوت عالي مستغرب: شو راقده!
امنه بصوت واطي و بارد: لا انا في w5 في مكتب مس حنان
موزه: اوه مس حنان من زمان ما شفتها و لا حتى سمعت صوتها .. يمكن من عزا نور
سكتت موزه لفتره
موزه: امونه سلميلي عليها و عطيها hug بالنيابه عني
امنه: ان شاء الله من عيوني
موزه .. تبتسم و تصغر عيونه: تسلملي عيونج
حصه: هوب هوب .. شوي شوي
عفره: شو هالكلام عيب موزان عيب
موزه تسكر التيلفون عن امنه: ايه شو .. ربيعتي بعد شو
حصه: بلاج حرجتي ما قلنا شيء
موزه برطمت
غنيه : يالله عاد .. لا تزعلين دبوه
عفره: time out .. محبوب الجماهير هني
يصد الجميع ع الباب
حصه: د. عبدالرحمن .. شكله متغير اليوم
عفره: جنه متنان
غنيه: بلا مصاخه .. حرام تشوفون الريال جي عيب
موزه: هيه عيب
حصه: اويه يالس يشوفنا و يسوي بيباي
موزه: هالانسان ما اعرف كيف يفكر .. يحس الدنيه وايد كول
عفره تسويله باي و تبتسم .. ترمس و هي عاضه على السنانها: ابتسمن و سووله باي .. صدق متفيج .. كلشيء كول عنده
موزه تبتسم و تعطيه ظهرها: البنات بيرمسن عنه و السبه هو
حصه: وحليله ما سوى شيء بس باي
غنيه: اويه جنه ياي صوبنا
موزه: لا هالي ناقص
د.عبدالرحمن: السلام عليكم
الكل يسكت شوي .. غنيه بعد فتره من الصمت: و عليكم السلام
الجميع بصوت واحد: و عليكم السلام
د.عبدالرحمن: ليش ما حضرتن الكلاس؟
غنيه: ليش الساعه كم الحين؟
موزه و هي متفاجأه: خيبه كيف طاف الوقت بهاي السرعه
حصه: دكتور و الله ما انتبهنا للوقت
غنيه: خذتنا السوالف
د.عبدالرحمن: مره ثانيه انتبهن للوقت .. خلوا امنه تشرحلكن المحاضره عيل
موزه: لا دكتور نحن بنيك في Offices hour و اشرحلنا
د.عبدالرحمن و هو يشوف موزه وحيته اليسار مرتفعه: اذا بتوني المكتب بحطكن غياب و اذا امنه بتشرحلكن بتكونون حضور .. ها شو رايكن؟
موزه و هي متغصصه: لا انا باخذ انذار اذا حطيتني غياب .. خلاص بخلي امنه تشرحلي
يبتسم الدكتور و يروح عنهن.. موزه خل اتصل في ابويه عشان أي ياخذني دام خلصت كلاساتي ..
حصه: تمي شوي ويانا .. نحن عندنا كلاس عقب ساعتين .. تمي ويانا شوي
موزه: ترا لين ما أي ابوي بيلس وياكن
حصه: ما يكفي بنسولف من زمان ما سولفنا
موزه: من وفات نور ما قمت احب ايلس في الجامعه
غنيه: موزوه لا تتمصخين و تربطين كل شيء بوفات نور
تدخل امنه الكوفي شوب: هلوها
تمد ايدها و تصافح الجميع .. اما موزه فخذتها بالاحضان
امنه: هاي من مس حنان .. تقولج اتصلي اذا ما بتمرين عليها .. و لا نسيتيها
موزه: فديتها و الله من زمنان ما يلست اسولف وياها .. قبل كل يوم تقريبا نمر عليها انا و نور .. و اذا ما بنمر عليها كانت نور تتصلبها و تسولف وياها و تخبرني عقب شو قالن
امنه: هيه ع طاري نور .. لا قبل ما اقول سالفة نور.. شفت د.عبدالرحمن ظاهر من هني .. هو شافكن؟ .. يا مسودات الويوه ما حظرتن كلاسه و ما خبرتوني ما احظر
عفره: شكله ياي الكوفي بس عشان يشوفنا اذا في الجامعه و لا لا .. هو ما نشدج عنا
امنه: هو نشد .. بس انا قلتله ما رمستكم اليوم و لا شفتكم
غنيه: زين سويتي
موزه: اصلا نحن ما حسينه بالوقت
امنه تصد ع موزه: طرشتي هديه عمر حق الدكتور و لا بعدج
موزه: لا كل ما اسير بيت نور انسه اخذ الجيش .. ذكرتيني لازم اخذ لابتوب نور فيه البروجكتات كلها و انا ما عندي و لا نسخه .. بتصل في بشكارتهم بخليها تزهبلي الاغراض و طرشهم مع الدريول
غنيه: شو البشكاره .. استاذني اهلها قبل
موزه: خالوه تعرف و هي مجهزه الاغراض حقيه .. بس انا انسى اخذهم
غنيه: جان جي برايه
.................................................. .................................
بعد صلاة المغرب موزه تكلم حصه في التيلفون
حصه: انزين انتي اول مره تقوليلي عن ولد عمته الي شفتيه في الحديقه
موزه: اتعرفين كان الوقت هب مال رمسه .. و انا ما كان لي خلق من الاساس
حصه: وحليله ولد عمتها .. نور كانت وايد ويه عيال عمتها .. دوم كانت تقول انهم اخوانها.. زاده متاثر جذه
موزه في خاطرها " هو اكثر واحد متاثر لانها كانت بالنسباله اكثر من اخت .. سرج يا نور ما بقوله حتى بعد مماتج"
حصه بعد ما خلصت رمستها: الو موزوه بلاج صخيتي فجاه حلجي عورني و انا ارمس جني ريديو
موزه : هههههه انتي ريدو و بس انتي الاذاعه بكبرها
حصه: يالسخيفه ما يضحك انزين
موزه تسمع هرن عند باب بيتهم .. توايج من الدريشه تشوف سياره قوم نور : حصوه بخليج دريول نور يه .. بطرش البشكاره حقه و عقب بطرش الاغراض مع حد من اخوانيه بيت د.عبدالرحمن
حصه: ليش ما تعطينه الاغراض في الجامعه
موزه: لا ما ابا حد من البنات يشوف الجيس عنديه و عقب عند الدكتور شو بيقولون
حصه: صح نحن هب ناقصين رمسه
موزه: يالله عيل بخليج
حصه: في امان الله
موزه: باي
موزه تتجه للصاله و هي تزقر ع البشكاره.. خذت البشكاره الجيس من الدريول و عطته موزه .. موزه راحت عند اخوها حمدان عشان اذا بيسير وياها لين بيت الدكتور .. و خبرته انها شاورت ابوها قبل و ابوها وافق بشرط انها تنزل الغراض عند الباب وتعطيه أي حد بيظهر عند الباب.. وافق حمدان .. وساروا يودون الاغراض.. لاحضت موزه ان مافي جرس عند باب دروازت البيت .. و الفله وايد بعيده عن باب الحوي .. دخلوا بالسياره لداخل الفله .. تصددت هي و اخوها تاملا بانهم يشوفون حد في الحوي و شاءت الصدفه ان ام الدكتور في بيت عبدالرحمن كانت في المطبخ الخارجي و انتبهت لدخول السياره و يوم شافت موزه عرفتها و كانن هي و سلامه يرمسون في سالفة موزه قبل ما تدخل السياره .. ام الدكتور سارتلهم عند السياره قبل ما يدقون هرن.. و سلامه تلحقها
موزه نزلت من السياره قبل ما توصل ام عبدالرحمن عند السياره: هلا خالوه اشحالج؟
سلامه: هلا و غلا بموزه .. حياج جيه يالسين في السياره اقربوا
موزه و هي متلومه: لا خالوه اخوي في السياره و انا بس يابه اغراض من نور الله يرحمها حق عمر
ام عبدالرحمن: الله يرحمها .. اغراض الشو
موزه: ما شيء هديه كانت مزهبتنها نور لعمر قبل ما تتوفى حق عيدميلاده
ام عبدالرحمن: هي الله يرحها
موزه: خلاص خالوه اترخص
ام عبدالرحمن تمسك موزه من ذراعها: لا اميه لازم تتعشين عندنا .. و خوج هب غريب البيت بيته
موزه: لا خالوه ما اروم عندي وايد اشغال ..و انا ما قلتلهم في البيت اني بتحير.. و الوالد بيغيض علي اذا عرف اني تحيرت ع البيت
ام عبدالرحمن: اذا عرف ان انا الي اصريت عليج ما بيقول شيء.. و عن اخوج انا برمسه
موزه: لا و الله خالوه ما اروم .. جد لازم اروح و الله عندي شغل حق باجر
ام عبدالرحمن: ما بكلف عليج .. برايج بس المره اليايه لازم بتيلسين وياي .. ها اميه
موزه: ان شالله من عيوني .. يالله في امان الله
تركب السياره و تتصل في امها ع طول و اتخبرها بالموقف .. ردت موزه البيت .. و اول شيء سوته شغلت لابتوب نور .. يلست تشتغل على الابتوب و تظهر البروجكتات منه .. و بنون ما تنتبه دخل المسنج .. كانت نور مخلتنه اوتوماتك يسوي sign in ..

يتبع....

[الاسطوري]

إستمتعت وايد بالجزء هذا وحسيت الأحداث بدت تتطور شويه ،، وشكرا
على هالمجهود الطيب وننتظر منج التكمله في
الوقت اللي يناسبج

[فنجان قهوة]

الاسطوري شكرا على هالكلمات التشجيعيه
تحياتي

[خنفروش]

متابعين


و ننتظر

[فنجان قهوة]

السموحه على التاخير
.........................

الجزء السابع

يوم الاثنين .. 2007\4\9 .. موزه ناشه الساعه 4:00 الفجر تراجع الكميه الداخله في الامتحان .. يرن تيلفونها
موزه و هي مستغربه : بسم الله الرحمن الرحيم .. منو متصل هالحزه؟
تتجه للسرير لان المبايل كان ع السرير .. تشوف الرقم ..
موزه: غنوي عساج بريل ان شاء الله .. زيغتيني من فير الله متصله
غنيه تصيح
موزه تفر الاوراق الي في يده على المكتب : غنوي بلاج ؟ شو مستوي ؟ زايغه من الامتحان ؟ و لا ما ذاكرتي لين الحين ؟ غنوي ارمسي بتجلطيني
غنيه تحاول تمسك دموعها: ما اروم امتحن اليوم
موزه: جيه ما ترومين . شو مستوي؟
غنيه: بابا في المستشفى .. بابا في المستشفى تعبان تعبان
موزه تفتح عيونها: ها .. من متى .. من متى هالرمسه ؟ ما سمعت ماما طرت السالفه و لا بابا
غنيه: اليوم ع الساعه 3:00 تعب .. و وديناه المستشفى .. و الحين انا في المستشفى .. و ما اروم اداوم لين ما اطمن عليه
موزه: انزين هو بلاه .. شو الي متعبنه .. اقصد شو قالولكم الدخاتر؟
غنيه و هي تمسح دموعها .. و تتنفس بصعوبه: بابا طاح علينا فجأه .. و يوم يه المستشفى قالوا ان عنده جلطه متحركه من مكانها .. تحيدين قبل سنتين يوم يت بابا الجلطه في الريل .. هي نفسها متحركه وواصله الدماغ .. يقول الدكتور .. احتمال تكون الجلطه مأثره على حركته
موزه: الله يقومه بالسلامه .. الحين هو يرمس و لا راقد و لا شو؟؟؟
غنيه: هو في غيبوبه الحين .. الله يقومه بالسلامه
موزه: انتوا في أي مستشفى الحين؟
غنيه: الحين نحن في مستشفى ام القيوين .. و باجر الصبح بينقلونه مستشفى خليفه الي في ابوظبي
موزه تظهر من غرفتها .. تيلس في الصاله الي بين الغرف: انزين انتي هدي اعصابج .. و انا برمس الدكتور اليوم عن الي استوى
يظهر ابو موزه من غرفته لان حس بحركه في الصاله: موزه .. ترمسين منو؟
موزه تشوف ابوها بنظره حزن .. تاشرله بانه يتريه شوي: غنيه حبيبتي .. انا بخليج الحين .. اليوم عقب ما اخلص اكلاساتي بمر عليج
غنيه: اوكي .. يالله مع السلامه
موزه تشوف ابوها: بابا ريل خالوه في المستشفى
ابو موزه عقد بحياته .. و الصدمه مبينه على ويه: من متى ؟ و ليش؟ بلاه؟
موزه: غنيه تقول ان الجلطه الي كانت عنده في الريل تحركت ووصلت المخ .. و الحين هو في غيبهبه
ابو موزه يصفق بيده : لا حول و لا قوة الا بالله .. انزين بابا هو في أي مستشفى الحين
موزه: في مستشفة أم القيوين
ابوموزه يدخل الغرفه .. و ما يطول وايد .. يظهر من الغرفه وهو لابس كندورته و ظاهر .. تظهر وراه ام موزه لابسه عباتها
موزه: ماما بابا بتسيرون عند قوم خالوه الحين
ام موزه: هيه ماما الحين بنسير .. وعي اخوانج حق الدوام .. ردي مع الدريول ماما يمكن ما نلحق ني لين الظهر
موزه: هيه غنيه تقول اليوم بينقلونه مستشفى خليفه
أم موزه: ان شاء الله خير .. الله يصبرج يا اختيه
موزه تسمع الاذان .. تدخل الغرفه و اتصلي الفجر بعد ما صلت ركعتين سنه
.................................................. .................................................. ......
في الجامعه .. د. عبدالرحمن مع عدد من الطالبات
د. عبدالرحمن: انتوا لا تشتتون عماركم بهاي الاسئله .. ركزوا ع اللي قلتلكم عليه .. و لا تعبون عماركم باشياء زياده
حصه: دكتور الامتحان سهل صح .. اذا سهل بدعيلك
د. عبدالرحمن يضحك : و اذا صعب بتدعين علي
عفره تشوف حصه و تحرك راسها : لا دكتور .. ما عاش من دعاء عليك .. الامتحان يوم سهل بندعيلك على كل سؤال .. و اذا صعب .. لا حول و لا قوه الا باله .. شو انسوي بندعي مره وحده بان الله يحرق الاوراق قبل ما تصلحهم
د. عبدالرحمن يضحك بصوت عالي و بطريقه غريبه: هاااااااااااااااااااااااا ااااااااااااااااااااااااا اااااااااااااااه .. خالطه دمج بماي .. تنكتين بعد
الكل يستغرب من الدكتور
عفره ترمس حصه بصوت واطي: بلاه استخف
حصه تسحب عبات عفره: ما ادريبه يمكن شارب شيء ع الصبح
موزه تنتبه ان الدكتور انتبه لمصاصر حصه و عفره .. تصد على الدكتور و ترمس بصوت عالي عن يسمع الدكتور كلام عفره و حصه: اقول دكتور غنيه ما بتمتحن اليوم
د. عبدالرحمن: خير ان شاء الله ليش ما بتمتحن؟
موزه : ابوها في المستشفى تعبان
د. عبدالرحمن: خير ان شاء الله بلاه
موزه: في غيبوبه
د. عبدالرحمن: يالله المستعان .. ابرايه متى ما تبا تمتحن عادي
امنه: اويه صدق غنيه ما داومت اليوم .. وحليلها .. الله يعينهم
عفره: اقول نمر عليها في المستشفى؟
حصه: ياللي ما تخيلين .. شو تمرين عليها .. ابوها المنوم هب امها .. يعني كله رياييل
عفره: اويه ما افتكرت
حصه تمرر عيونها بين ربعها و تصد على الدكتور: خلاص بنترخص نحن
عفره : اف .. الحين وين بتسيرون في هالحر
حصه : بنسير نتريق
امنه: بتصل في فطوم عسب تي تاخذنا
موزه: ليش اليوم هي يايه روحها
امنه: هيه امها رخصتها تسوق لين الجامعه
موزه: يا حيها .. زين زين
د. عبدالرحمن: عاد همكن في الاكل
حصه: لا هو هب الاكل بالضبط .. بس تعرف البنات يحبون يلسه الكفتيريا
د. عبدالرحمن: بالعافيه
عفره: الحين الدكتور يقول في خاطره ما يعزمون
د. عبدالرحمن يبتسم
حصه: اذا يبنا في الامتحان درجات عدله .. بنعزمه على غوزي و لا يهمه
يظهرن البنات من المكتب .. يتصل الدكتور لام زوجته سلامه
د. عبدالرحمن: الو .. السلام عليكم
سلامه: و عليكم السلام .. هلا ابوي
د. عبدالرحمن: شحال عموري الحين .. شو الحمه؟
سلامه: الحمدلله الحين اشوه
د. عبدالرحمن: اذا بغيتوا شيء اتصليبي
سلامه: الحين لو عندك حرمه .. بالك بيرتاح و هي الي بتحط بالها على عمر
د. عبدالرحمن: اقول خالوه انا عندي امتحان عقب شوي بسير اصور الاوراق
سلامه: الله يوفقك يا اميه
بعد انتهاء المكالمه .. عبدالرحمن يقف بالقرب من الدريشه الي في المكتب .. و هاي الدريشه تطل على الكفتيريا .. و المساحه الي بين الكفتيريا و المبنى الي فيه مكتب الدكتور عبدالرحمن كلها حشيش و نخل .. و فيه شارع يم الكفتيريا ع طول .. ها الشارع الي سوت عليه نور الحادث.. تخيل د. عبدالرحمن .. حادث نور .. و تخيل كيف جرت الاحداث في يوم الحادث .. دمعت عينه .. دخلت المكتب أ. حنان
أ‌. حنان : السلام عليكم
د. عبدالرحمن يمسح دموعه: و عليكم السلام
أ. حنان و هي مستغربه: دكتور في شيء؟
د. عبدالرحمن: هيه يا حنان .. تذكرت نور .. تذكرت مرحها و لعبها و حركاتها .. تذكرت ايميلاتها .. تذكرت شكثر عمر كان يحبها
أ. حنان غمضت عيونها لوهله: شو يابها على بالك .. منو كان يتخيل انه بيمر عليه اليوم بدون ما يسمع صوتها او يوصله مسج منها .. ولا ايميل
د. عبدالرحمن: هي الي خلتني اعز شلتها وايد .. هي الي قربتني من هاي الشله .. و لا انا مالي دخل بالطالبات و ما ارمس معاهم في شيء بعيد عن الدراسه .. هي الي خلتني احب اكتشف عالم الطالبات و حياتهم
أ. حنان: الله يرحمها ..
د. عبدالرحمن: هديتها لعمر لين الحين مكانها في غرفت عمر .. ما رمت افتحها .. مرحها و لعبها و حب عمر لها و الحادث الي صارلها خلاني اتذكر المرحومه .. الله يرحمهم (يمسح دموعه و يصد ببتسامه حزينه للأستاذه حنان ) هيه صدق انتي شو بغيتي ؟
أ . حنان و هي مبتسمه : اتصدق نسيت .. هيه تذكرت .. اظن عندنا اجتماع انا و انت و منال بخصوص حفلة التخرج
د. عبدالرحمن: هيه صدق .. عيل منال وينها؟
أ. منال توايج من ورا الباب: نحن هنا
يبدأ الاجتماع
.................................................. .................................................. ..
د. عبدالرحمن على البحر مع صديقه ابو سالم
ابو سالم: يعني بعدك هب رايم على مواجهة الموقف .. انا احيدك اقوى من جي يا بو عمر
عبد الرحمن: اه .. عقلي ينشل كل ما افكر بان وحده بتسكن بيت عليه
ابو سالم: عبدالرحمن انت مؤمن .. و المفروض ان هذا الامر يكون انتهى .. و عليه ما تبا منك غير انك تربي ولدها دربيه صالحه
عبدالرحمن: و انا احاول
ابو سالم: تحاول .. انت هب قادر تدخل البيت .. لاحظ من يت ام عليه البيت .. و انت ما تتحير على البيت .. تظهر و تدخل و انت مطمن ان في حد مع عمر في البيت .. عبدالرحمن خالوه سلامه ما اتروم تترك بيتها وايد .. و انت تعرف ان مردها وبترد بيتها عرست و لا ما عرست بترد .. و بترجع الحياه مثل ما كانت بدون حياه مستقره
عبدالرحمن: بس انا ما ابا اخذ وحده .. تكون مرت ابو
ابو سالم : انت ما تبى الي خالوه سلامه تباها .. انت اختار حد تحس انه بيكون قريب منك و من ولدك
عبدالرحمن يشوف الساعه: يالله يالله تحرك بسرعه
ابو سالم: بلاك؟
عبدالرحمن: ابا اسير مكتبت الجامعه .. يالله بسرعه قبل ما تبند المكتبه
ابو سالم و عبدالرحمن شالين نعلانهم في ايدهم .. و يمشون حافين لين السياره .. يفتح عبدالرحمن الباب الخلفي و يظهر دبه ماي لترين .. يفرها على ابو سالم .. اغسل ريلك
ابو سالم يغسل ريله بسرعه : اف حار .. شو ها ماي مغلي
عبدالرحمن: لا تتحرطم .. ها الموجود
ابو سالم يشغل المسجل في نفس الاثناء عبدالرحمن شغل السياره و يتحرك متجه للمدينه الجامعيه
.................................................. ..........................................
موزه ردت البيت تعبانه .. اتصلت في اختها حمده و طلبت منها انها توعيها اول ما بتوصل البيت .. عشان اتسير عند غنيه
.................................................. ...........................................
د. عبدالرحمن و ابو سالم وصلوا مكتبه الجامعه .. بعد ما دخلوا المكتبه انفصلوا و كل واحد راح باتجاه .. ما حصل د. عبدالرحمن الكتاب الي يباه .. راح عند الموظفة يسألها
د. عبدالرحمن: السلام عليكم
الموظفة: و عليكم السلام .. بشو اقدر أساعدك؟
د. عبدالرحمن يظهر ورقه فيها رقم الكتاب الي يباه مع الاسم و يطاوله للموظفة: بغيت هالكتاب .. اذا موجود .. دورت عليه في الرف بس ما حصلته؟
الموظفة: قبل شوي وحده يت وخذته
د. عبدالرحمن: استعارته يعني؟
الموظفة: لا هي موجوده هني في المكتبه .. ما اعرف اذا بتستعيره و لا لأ .. بس اذا تباه ظروري تقدر تسالها .. لان النشخه الاصليه في الترميم .. و ما عندنا غير نسخة الاستعاره
د. عبدالرحمن: طيب وين الاخت عشان استاذنها باني ابغي الكتاب
الموظفة تمرر عيونها بين الموجودين في المكتبه : اظن هاي الي هناك .. الي يالسه ع اخر طاوله على اليمين .. الي يالسه تكتب
د.عبدالرحمن: نعم .. شفتها .. خلاص شكرا
الموظفة: تباني ارمسها؟
د. عبدالرحمن: لا عادي انا بسيرلها
يتجه د.عبدارحمن الا البنت : السلام عليكم
البنت ترفع راسها بهدوء: و عليكم السلام
د. عبدالرحمن يحس ان الويه مالوف .. يقف بصمت
البنت في خاطرها " ها هب دكتور عبدالرحمن .. بلاه شو يبه ليش ياي صوبي"
د. عبدالرحمن يحاول يتذكر الويه بس مب رايم يعرف منوا صاحبه هذا الوجه
البنت بعد انتظار : خير دكتور في شيء
د. عبدالرحمن في خاطره " هاي طالبه عندي .. لا لا انا ما جد شفتها في الجامعه .. لا ما اظن في الجامعه .. بعدين ملامحها اكبر من سن الطالبات .. منو هاي يا ترى" تكلم و عيونه كلها تساؤل منوا هاي؟ : ااااا .. اختي اسمحلي بغيت اسالج انتي تبين الكتاب هذا ( يطاول الكتاب من على الطاوله)
البنت بعد تفكير: ممم .. الصراحه انا باخذ منه شويت اشياء .. اذا بغيته ممكن تاذه و تردلي اياه بعد ما تخلص انا بعدني يالسه
د. عبدالرحمن : لا انا ابا استعيره .. لاني محتاجنه ظروري
البنت: انزين عيل ممكن تتريا لين ما اخذ منه الي اباه
د. عبدالرحمن: اترياج يعني؟
البنت: اذا مستعيل انا ممكن استعيرلك اياه و اطرشه مع موزه باجر الجامعه
د. عبدالرحمن: اوه .. انتي اخت موزه
حمده بستغراب: هيه نعم اخت موزه
د. عبدالرحمن : خلاص عيل طرشيلي الكتاب باجر مع موزه
حمده: ان شاء الله
عبدالرحمن اتذكر موقف الشباب الي كانوا يلاحقونها "ما شاء الله عليها .. جمال و اخلاق .. ليش ما؟! .. لا لا مستحيل" .. يظهر عبدالرحمن من المكتبه و يتجه للباركنات .. وهو في الدرب رن تيلفونه ..
عبدالرحمن: هلا ابو سالم
ابو سالم : انت وين؟
عبدالرحمن: ظاهر من المكتبه العامه ليش؟
ابو سالم : يا حبيبي .. روحت و لا بعدك؟
عبدالرحمن: توني واصل السياره
ابو سالم يهز راسه: لا تنسى اني ياي وياه المكتبه
عبدالرحمن يظرب راسه: اوف .. نسيتك
ابو سالم: الي ما خذ عقلك
عبدالرحمن بدون تركيز: يمكن تكون..
ابو سالم يقطع على عبدالرحمن: يمكن شو ؟
عبدالرحمن ينتبه لنفسه: ها .. لا ما شيء .. انت خلصت و لا بعدك .. بترياك عند الباب الامامي
ابو سالم: ها شو أي باب امامي .. عند الدري يعني؟ .. لا اترياني في الباركنات ياينك .. يباني انزل ع الدري .. لا لا انا ياي الحين اترياني بس
.................................................. .................................................. .
نشت موزه من الرقاد .. و كعادتها .. سوتلها كوب جاي اخضر و يلست على لابتوب نور .. دخل المسنجر .. موزه و هي مندمجه في تصميم .. تظهر شاشه المسنجرو عليها
راشد: السلام عليكم 
موزه: و عليكم السلام
راشد: شحالج موزه ^_^؟
موزه: الحمدلله
راشد: كل ما تدخلي من مسنجر نور .. احس نور الي داخله ><
موزه: روحه يدخل مب انا الي ادخل
راشد يتنهد: الي اعرفه ان انتي عندج لابتوب .. انتي ماخذه الابتوب مع نور في نفس الفتره .. ليش دوم تستخدمين لابتوب نور
موزه: غريب السؤال؟
راشد: اذا يزعج لا تردين
موزه: لا عادي.. انا استخدم الابتوب اذا ابا اسوي تصميم لاني احب استخدم برشات نور .. الله يرحمها
راشد: موزه .. بقولج شيء .. بس لا تظايقين
موزه : خير ان شاء الله
راشد : ممكن رقم تيلفونج
موزه تقره تعليق راشد كمن مره : انت شو اتقول ؟ .. انتبه لكلامك .. انت تتحراني من البنات الي يرمسون الشباب و يتعرفون عليهم عبر التيلفون .. انا الغلطانه الي عطيتك ويه ورمستك
راشد: لا لا موزه .. انا ما اصد جي .. بس احسبج مثل نور .. يعني انا اعتبرج نور .. لا تتوقعين اني في يوم ظنيت فيج ظن سوء .. و الله و الله في سماه .. انتي مثل نور
موزه: انا مثل نور .. بس مب بنت خالك عشان تكلمني .. اسمحلي بظهر الحين
راشد: لا تتظايقين مني .. ارجوج ادخلي المسنجر بين فتره و فتره .. انا ارتاح يوم اشوف الايميل
موزه: ان شاء الله خير .. يالله استاذن .. مع السلامه
راشد : مع السلامه
تدخل حمده غرفه موزه .. حمده : نشيتي؟
موزه: هيه .. ما عرفت ارقد عدل .. ابا اسير عند غنيه
حمده تظع الكتاب على مكتب موزه: انزين غنيه في البيت ولا في ابوظبي
موزه: في بوظبي
حمده: شقايل بتسيريلها عيل .. ظني سمعت ماما تقول حق خالوه تخلي غنيه تبات عندنا .. عسب الجامعه
موزه: صدق ؟ .. بتصل في غنوي بتخبرها
حمده: قبل ما انسى ودي هالكتاب حق د. عبدالرحمن باجر
موزه تفتح عيونها: شــــــــــــــــــــــــ ـــــــــــــــــــــــــ ــــــــــــــــــو؟
حمده: بلاج اتصرخين؟
موزه: ما سمعت عدل .. اوديه عند منــــــــــــــو
حمده: د. عبدالرحمن
موزه: حمده انتي عاقله و لا عاقله .. بلاج ها ريال انتي منوين اتعرفينه
حمده تبتسم: موزوه .. شفته في المكتبه اليوم .. و كان يبا هالكتاب .. كنت ماخذتنه قبله و يوم يه .. يه يستاذني انه يبا الكتاب .. قلتله بطرشه مع موزه الجامعه
موزه: كيف عرفتيه؟
حمده: شايفتنه كمن مره .. كيف كيف عرفته بعد؟
موزه: وهو عرفج؟
حمده: هو ما عرفني اول البادي .. بس يوم قلتله بطرشه مع موزه عرفني .. اعتقد كان مشبه قبل
موزه: هيه .. عاد انا سار تفكيري بعيد .. قلت يمكن
حمده: موزوه لا تتمصخين انزين.. هالمره بطوفها بس عقب لا
موزه: حمدوتي انا امزح بس .. فديت الي يحرجون و الله
يرن تيلفون موزه: الو
أ‌. حنان: السلام عليكم
موزه: و عليكم السلام و رحمة الله و بركاته .. هلا بالطش و الرش .. هلا بماي الورد بالغراش
أ‌. حنان: موزان .. شحالج حبيبتي؟
موزه: الحمدلله بخير .. شحال الحلوين؟
أ‌. حنان: الحمدلله بخير .. اقول موزان بلاه ابو غنيه؟
موزه: تعبان في العنايه الحين
أ‌. حنان: د. عبدالرحمن قالي انه في غيبوبه صدق
موزه: ما شاء الله عليه ها مشخله
أ‌. حنان : علمتوه
موزة تضحك : اويه ها هب وقت ضحك .. هيه هو في غيبوبه .. بس يقولون ان من البارحه لليوم في تطور .. صح تعب يوم نقلوه .. بس بسرعه جسمه تكيف على تغيير المكان .. الحمدلله
أ‌. حنان: الله يقومه بالسلامه
موزه: امين
أ‌. حنان: من زمان ما مريتوني المكتب
موزه: نتغلى
أ‌. حنان: من تغلى تخلى
موزه: لا ها كلام كبير .. ذكرتيني بنور يوم اتقولها
أ‌. حنان: موزوه لا تقلبيلي مناحه انا هب ناقصه .. اليوم في الجامعه د. عبدالرحمن سوالي مناحه
موزه: ليش؟
خبرت أ. حنان موزه موقفها مع د. عبدالرحمن .. سولفوا عن الجامعه و احوالها .. و عن اخبار البنات و سوالفهم
بعد ما بندت موزه عن أ. حنان .. اتصلت في غنيه تتطمن على ابوها و على اخبارهم
غنيه: هيه انا عقب شوي برد ام القيوين .. بزهب اغراضي و بي بيتكم .. سويلي مكان
موزه: افا عليج مكان بس امان بعد .. ان شاء الله خلال هاي الفتره ينعجب فيج واحد من خواني .. و ياخذج
غنيه: بلا سخافه موزوه انزين
موزه: انتي تعالي و انا بتساخف على راحتي
بعد انتهاء موزه من مكالمتها لغنيه .. يلست ترتب غرفتها
.................................................. ...............................................
10\4\2007 – يوم الثلاثاء
يرن المنبه تظهر موزة ايدها من تحت البرنوص .. تدور المنبه على الكوميدينو .. تعق تيلفونها ع الارض
موزة تقفز من مكانها: وابوييه .. تيلفوني طاح
غنيه تشيل البرنوص عن ويها : بلاج حشرتينا انتي و منبهج
موزه تتثاوب: نشي يالله .. الساعه 7:30
غنيه تيلس على السرير تتمدد (stretching ) : بعده وقت ع 9:00 ..
موزة: ادري بس ابا اودي كتاب حق دكتور عبدالرحمن .. و مافيني امشي لين w5 .. كلاساتي كلها في w10 .. بخلي الدريول ينزلنا و يتريانا بودي الكتاب و عقب ينزلنا صوب w10
غنيه: الي يسمع درب بين w5 و w10 كلهم في نفس المكان.. الله بسمه الدريول وين بينزلج عند w4 و عقب بيتجدم لين w9 لا وايد بعيد .. بتمشين في كل الحالات
موزه ترفع حياتها : هيه صدق .. لا انا كنت اطري ان الصبح الجو احسن من عقب .. الساعه المكتبيه مالته 8:00 لين 9:00 .. يعني اكيد بحصله في المكتب
غنيه: انزين اقتنعت .. بالمره بساله متى بيمتحني
موزه: قلنالج قال في أي وقت تبين
غنيه: يالله بسمه .. بعد من الذوق انشده متى؟
موزه: هيه صدق .. نسيت انج ام الذوق
غنيه اتفر المخده على موزة: لا تتساخفين
موزة تركض بتجاه الحمام: ههههههه .. ويه راسج امدحج
تلبسن موزه و غنيه .. سارن غرفة الطعام يتريقون .. و كانت حمده يالسه تتريق
غنيه: صباح الورد
حمده: هلا هلا .. صباح النور .. رقدتي عدل و لا رفستج موزوه
موزه: الحين انا ارفس .. جيه قالولج حمار
غنيه: يالله بسمه .. تعرفين عمرج
موزه تشل جيك الماي تبا تصب الماي على غنيه .. غنيه تتحامه بحمده
حمده: موزوه .. شو رايج اوصلكم اليوم
موزه: بشرط .. نسير بسيارة بابا البنتلي
حمده: طرار و يتشرط .. اذا بابا وافق عادي
موزه: افا عليج الحين بتصلبه .. بس ادعوا ان يكون ظاهر بالرنج
حمده: لا بابا ماخذ سيارتي .. يعني الرنج و البنتلي في القراج
موزه: و ليش ماخذ سيارتج
حمده: لان بسير ع طول بوظبي عقب ما يخلص شغله .. و على حد علمي بابا ما يسوق الرنج خطوط .. فخذ سيارتي لانها خفيفه .. عقولته
موزه: ليش ما خذ سيارت الدريول
حمده: عاد كدلك حق الدرب وهو نفرواحد .. تعب يسوقها .. بابا يبا شيء خفيف و مريح
موزه: ايوه يا عم منو قدج صاحب الجلاله يسوق سيارتج
حمده: فديته و الله
موزه: صه .. اتصلت
موزه تتريا ابوها يرد على الموبايل: افا بو الشباب ما يرد .. بتصلبه على المكتب
تتصل موزه على مكتب ابوها .. في هالاثناء امهم تدخل غرفة الطعام
ام موزه: صباح الخير
غنيه تنش من مكانها تسلم على خالتها .. حمده تحب امها على راسها .. موزه تطرش fly kiss حق امها
ام موزه: ترمسين منو من صباح الله خير
موزه: اتصل في باباتي ما يرد علي
ام موزه: شو تبين منه
موزه: نبا حمده توصلنا الجامعه بالبنتلي
ام موزه: برايه خذوا السياره
موزه: يس .. عاشت السلطات العليا ( تنش موزه من مكانها وتحضن امها)
ام موزه: هيه الحين تحضنيني و قبل شوي من بعيد لبعيد
الجميع يضحك على موزه
موزه و هي منحرجه : انا بسير البس عباتي و اشل قشاري و بنزل .. حمده يالله استعيلي بسج اكل
غنيه تنش من مكانها و في ايدها كوب الجاي: اترييني بي وياج
ام موزه تكلم حمده بعد ما راحوا البنات غرفة موزه: موزه استوت نسخه طبق الاصل من نور
حمده: لاحظت هالشيء يا اميه .. مرحها طريقت كلامها .. حركاتها .. كلها بكبرها استوت نور
ام موزه: و الله احاتي هاي البنت من بعد وفات نور
حمده: لا ماما لا تحاتين.. موزه تعدت صدمت وفات نور .. بس مثل ما انتي عارفه هم كانن اكثر من الخوات .. لازم بيكون في اثر .. و تصرفات موزه بنفس اسلوب نور دليل على ان موزه تحاول انها تعوض فقدها لنور باحساسها ان نور موجوده فيها .. و ها شيء زين و لصالح موزه .. عشان تظهر من حالة الحزن الي كانت عايشه فيها
ام موزه: الحمدلله على كل حال .. انزين ماما خلصي ريوقج ووصليهن عن يتاخرون
حمده تنش من مكانها : انا مخلصه .. بسير البس عباتي
أم موزه: بحفظ الرحمن
حمده تحب امها ع راسها و تروح عنها .. الام تصب لعمرها جاي .. وهي تفكر في موزه و حمده "حمده انتي جنه البيت .. ما اروم اتخيلج بعيد عن عيني .. ابغي اشوف عيالج .. ابغي اشوفج عروس .. هيه يا حمده رفظج المستمر للي يونج يتعبني .. يعور قلبي يا اميه "
.................................................. .............................................
موزه و حمده و غنيه في السياره
حمده: اربطوا الحزام
موزه: شدوا الاحزمه .. انتظروا العد التنازلي للانطلاق .. 3 > 2 > 1 .. انطلق
حمده : منو قالج راكبه باغيتي
موزه: عاد انا اتحلم يا حرمه
غنيه : اقول حمده .. انتي كملتي الماستر و لا بعدج
يلف عليهم واحد بدون ما يضرب اشاير و لا شيء
موزه: بلاه ما يشوف
غنيه : لا لابس نظاره
موزه: سخيفه يالدبه
غنيه : لا اتسيخف
حمده: انتوا من وين يايين؟
موزه: شاربين جاي الصبح
حمده: ليش الجاي بلاه؟
موزه: تراه بحليب
حمده: انزين!
غنيه: و فيه شكر
حمده: يعني؟!
غنيه: في كوب
حمده: خبلتوبي .. هدو شوي .. خلوني اعرف اسوق
موزه تصرخ: عموري (تنزل موزه الدريشه و تاش بديها للسياره الي يمهم و هي سياره د. عبدالرحمن .. نزل الدكتور الجامه الي ورا .. لان عمر يالس ورا مع البشكاره) عموري حبيبي
عمريسوي بيباي لموزه و هو مندهش مب فاهم شو السالفه
موزه تصد على حمده : الله يخليج وقفي ع اليمين بنشل عموري (تصد على د. عبدالرحمن) وقف في المحطه بناخذ عمر
يضحك د. عبدالرحمن على حركات موزه و يهز راسه بالاجابه.. بركن في المحطه و بركنت يمه حمده .. نزل و نزل عمر .. نزلت موزه من السياره .. تقدم د. عبدالرحمن الى دريشه حمده .. حمده نزلت الدريشه و ابتسمت للدكتور تناولت عمر منه ..
موزه: انا شحقه نزلت عيل
د. عبدالرحمن: السلام عليكم
حمده: و عليكم السلام
د. عبدالرحمن يسكت شوي : اتمنى ما تكونين نسيتي الكتاب
حمده تلتفت حوالينها و تطاول الكتاب من السيت الي يمها .. و تناوله للدكتور: وعدالحر دين .. و انا وعدتك دكتور
د. عبدالرحمن يبتسم لحمده .. بعد فتره .. يصد على غنيه: شحالج غنيه ؟ و اشحال الوالد؟
غنيه ترمس بصوت واطي: تو الناس (تعلي صوتها) الحمدلله بخير .. الوالد الله يقومه بالسلامه يا رب.. دكتور متى بتمتحني؟
د. عبدالرحمن: لا تحاتين الامتحان .. متى ما تلاقين عمرج مستعده تعاليلي و الامتحان جاهز
غنيه: عاد لا تصعبه علي الامتحان
د. عبدالرحمن: بترومين تحلينه لا تحاتين
حمده: نترخص بيتحيرن على كلاساتهن
د. عبدالرحمن: في امان الله .. برد الكتاب بعد ما انتهي منه .. عندج مانع اذا ما خلصت خلال الاسبوعين تتصلين و تمددين المده .. و لا اقول انا بسير استعيره باسمي .. شكرا على العموم
حمده: مب مشكله
ترفع حمده الدريشه و تظهر من الباركن و تتحرك بتجاه الشارع العام .. د. عبدالرحمن تم واقف مكانه يشوفهم لين ما اختفت السياره بين السيايير
البشكاره: دكتور نهنه مافي سير
د. عبدالرحمن: ويه نسيت سالفتج .. صبري بتصل في درايفر بشوفه بعيد و لا قريب .. عسب يمر عليج ..(اتصل بالدريول بس ما رد عليه) يالله بنسير الجامعه و بخليه يمر عليج هناك
ركب الدكتور السياره .. و تحرك باتجاه الجامعه
.................................................. .................................................. ..
موزه و غنيه خذوا عمر وياهم الكلاس .. استاذنوا الدكتور انه بييلس وياهم في الكلاس .. يلسوا عمر يمهم و عطوه اقلام ملونه و اوراق عشان يشخبط .. بين فتره و فتره يرمس عمر .. و الدكتور يصد عليهن و في عيونه نظره "سكتوه" .. بعد مرور ثلاث ارباع الساعه .. الدتور ظهرهم
موزه تنزل الدري مع غنيه و عمر : اول مره يسويها .. الله يطول بعمرك يا عمر .. فديتك ويهك خير ( تبوس عمر و تحضنه بقوه .. لين ما بده يدلع بالصياح ) يا دلوع .. احبك احبك احبك .. ما يستوي اتزوجه
غنيه تضحك على موزه .. و من كثر الضحك تمت واقفه مكانها
موزه تصد فوق على غنيه .. طرطرت عيونها : اويه .. انت ليش ورانا في كل مكان
د. عبدالرحمن : اطمن على ولدي
غنيه تصد و تشهق
د. عبدالرحمن : بلاج .. انا ابو عمر هب يني
غنيه تبتسم و يحمر ويها
موزه: تبا عمر ؟ كم تدفع
د. عبدالرحمن: حلال عليج خلي عندج لين باجر جان تبين
موزه: افا دكتور ما توقعت ان عمر رخيص لهاي الدرجه .. تروم تتخلى عن عمر يوم كامل
د. عبدالرحمن: ها كلام .. يعني مب اعنيها صدق
موزه: لا لا انا صدقت .. بمر بيتكم و باخذ ثياب عمر حق الليله
د. عبدالرحمن: ههههههه .. ادري اتسوينها .. بس مب انا الي ما اروم استغنه عنه .. يدته ما بتبات عندي بدونه
موزه: وحليلها خالوا
غنيه: دكتور سلم عليها
د. عبدالرحمن: يوصل
موزه: دكتور نحن بنروح الحين عادي ناخذه ويانا
د. عبدالرحمن: ممممممم .. عادي .. تعود عليكم .. بس تعالي خذي شنطته من السياره
موزه: وين السياره
د. عبدالرحمن: في باركنات w6
موزه: خيبه .. لا لا بعيد
غنيه : الدريول برع خليه ينزلنا هناك
موزه: هيه صدق
د. عبدالرحمن: اترياكن عند السياره
موزه: شو تتريانا نحن اللي بنترياك .. تعال ويانا
د. عبدالرحمن: لا عادي انا بمشي .. احب المشي
موزه: كيفك .. خله تيك ضربت شمس ما يخصني
غنيه: انزين شو رايك تعطينه السويج و نحن بناخذ الشنطه و بنيبلك السويج وين ما بتكون؟
د. عبدالرحمن: خلاص افتحوه بالرقم السري
موزه: الرقم الي يم الجامه
د. عبدالرحمن : هيه
موزه: شو الرقم
د. عبدالرحمن: خليني اكتبلج اياه لان صعب شوي
موزه: اندوك تيلفوني اكتبه عليه
يكتب الدكتور الرقم على التيلفون .. و يطاوله موزه ..
د. عبدالرحمن: بمر عليه العصر .. و لا تقوليلي لا .. لان يدته بتحرج علي
موزه: مممممممم بفكر لين العصر
د. عبدالرحمن: فكري عدل
موزه: ان شاء الله .. يالله مع السلامه
د. عبدالرحمن: مع السلامه
موزه و غنيه يكملون نزولهم على الدري و يوصلون للهول الي تحت في w10
موزه تصد على غنيه: كيوت شكل الدكتور بالقفل
غنيه: يالله بسمه .. ما تخلين تشوفين لحيه الدكتور .. انا ما لاحظت .. انتي شقايل لاحظتي
موزه: ما اعرف انتبهت و خلاص
غنيه: الله يستر من هالانتباه
موزه: يالله الدريول دق رنه يعني هو واقف برع
غنيه: يالله
موزه و غنيه يركبن السياره .. يلست موزه عمر بينها و بين غنيه
موزه: غنوي شو رايج انسير بيبي شوب و لا صحارى و لا الميقا
غنيه: ليش شو تبين تشترين؟
موزه: بناخذ العاب حق عموري .. و بنلعبه .. و بنتغدى و بنرد البيت
غنيه: صبري بفكر (تسكت فتره) اوكي .. اتصلي بامج و شوفيها شو بتقول
موزه تتصل بامها: ماما بنسير انا و غنوي صحارى
ام موزه: الحين
موزه: هيه .. و يانا عمر
ام موزه: برايكم .. بس لا تتحيرون
بندت موزه عن امها .. و رن تيلفونها ع طول كانت امنه
امنه: موزوه وينكم؟
موزه: في الطريق الى صحرى
امنه: قولي و الله .. انا و فطوم ملانين ما يستوي اتمرون علينا
موزه : عادي نحن بعدنا في المدينه الجامعيه
امنه: بنتصل بامهاتنا و بنشوف
موزه: بسرعه .. انا بخليه يلف
امنه: هيه خليه .. فطوم يالسه ترمس امها و احس انها بتوافق .. و ماما اذا قلتلها كلنا بطيع .. خاصتا هالوقت
موزه: يالله بابو لف و سير الجامعه
بابو: اوكي
موزه: انتو وين؟
امنه: في w6
موزه: تمو مكانكم
امنه: يالله باي خليني اتصل باميه
موزه: انزين
تبند موزه عن امنه .. و ترمس الدريول: سير w6
غنيه: يس يس .. امون بتي ويانا
موزه: امون و فطيم
غنيه: انزين تعالي بنتصل حق حصوه و عفروه
موزه: اوكيك اتصلي في عفره و انا بتصل في حصه
تصلن في الهنتين .. و الهنتين عليهن كلاسات و ما يرومون يسيرون وياهن
موزه تكلم غنيه: يالله المرات اليايه
وصلن عند w6 اتصلت موزه في امنه
موزه: الو اموني
امنه: هلا موزان .. انتوا برع؟
موزه: هيه عند w6
امنه: يالله ظاهرين
موزه و غنيه في السياره يتريون امنه و فاطمه .. موزه لمحت أ. حنان من بعيد .. نزلت من السياره و خطفت على امنه و فاطمه و ما انتبهتلهم لانها مركزه بنظرها على أ. حنان .. و يوم وصلت موزه يم أ. حنان وقفت وراها و حطت ايديها على عيون حنان .. حنان اول ما حطت موزه ايدها على عيونها ..
أ . حنان بدون ما تحس .. ابتسمت ابتسامه عريضه: نور ما تيوزين عن حركاتج
موزه نزلت ايدينها .. تمت واقفه بدون ما تنطق باي حرف .. تمت اتشوف أ . حنان بنظره استغراب .. حنان بعد ما صدت على موزه .. سكتت فتره مع ابتسامتها الطفوليه الناعمه تتريا موزه ترمس .. دقايق و باقي الشله التمن حوالينهن ..
امنه و هي مبتسمه: السلام عليكم.. اشحالج مس حنان تولهنا عليج وايد
أ‌. حنان بنبرة استنكار: اتولهتن علي .. تبيني اصدق !
فاطمة تحط ايدها على جتف أ . حنان : و الله والله اتولهنا عليج
غنيه بنبرة خبث: لا تصدقينهم يتمصلحون
أ . حنان تضحك بصوت عالي .. انتبهت لوجود عمر وياهم .. ثنت ركبتها عشان تستوي قريبه من عمر: عموري حبيبي اشحالج ( مدت ايدها .. عمر اتجدم و مد ايده .. شلته و يلست تسولف وياها .. عقب نزلته و صدت على البنات ) شو يسوي عمر وياكم
غنيه: بي ويانا صحارى
أ‌. حنان: يا سلام صحارى .. منو بيسير منكم
أمنه: انا و موزه و غنيه و فاطمه و عموري طبعا
أ . حنان : هيه بيسيرون صحارى كلهن و ما يعزمن حد
فاطمه: افا.. هو نادر .. يالله عزمي و تعالي ويانا
أ‌. حنان : عاد الحين تقولون و انتوا مروحين .. جان خبرتوني قبل
امنه: لا نحن توه معزمين .. جي كل شيء استوه بسرعه بسرعه .. حتى قوم ماما من دقايق مشاورينهم
أ . حنان سوت عمرها زعلانه: عاد الحين ما اروم عندي اجتماع .. يالله المره اليايه
فاطمه: ان شاء الله
غنيه: حتى لو عندج اجتماع بتين
امنه: هيه صدق هب ع كيفج المره اليايه .. و بتكون عزيمه صدقيه على حساب غنيه
غنيه: جي ابويه منو قالج يالسه على بنك
فاطمه: لا انا سمعت انج صاطيه على بنك انتي و عفروه
غنيه: لا تحشين في البنت و هي محد
فاطمه: انزين ما قلت شيء
غنيه: بعد تبين اتقولين ازيد من اللي قلتيه
امنه: يالله ها كله عسب عزيمه .. خلاص انا بعزمكن على غده و السينمه جان تبون
أ‌. حنان: هيه هالبنات
فاطمه تدق صدرها: و العشه علي .. ووو القهوه على موزوه ههههه
أ . حنان تصد على موزه و تشوفه بنظره بريئه .. موزه تبادل حنان نفس النظره
امنه: موزوه بلاج ماكله سد الحنك
موزه: سد الحنك مره وحده .. صدق لها اثر كبير (كانت تقصد موزه نور)
شلت موزه عمر و سارة السياره
امنه: بلاها موزان؟
غنيه: ما ادري توه في السياره ما بلاها شيء
أ‌. حنان: تذكرت نور
فاطمه: اه .. موزه وايد مستويه حساسه بعد وفات نور .. ما اعرف متى بتتاقلم على الوضع .. رغم اني الاحض ان حالتها تحسنت
غنيه: تحسنت .. و استوت فوتوكوبي نور – الله يرحمها-
امنه: هيه صدق .. استوت ترمس شرات نور و تعلق بتعليقات نور و تاكل الاكل الي تحبه نور و تلبس بنفس طريقة نور
غنيه: حتى الجاي الاخضر و اليوقا استوو من اهتمامات موزان
أ‌. حنان: تموا حوالينها و لا تخلونها بروحها
فاطمه: ان شاء الله
امنه: يالله فزن .. موزوه بتروح عنا اذا اتاخرنا اكثر
غنيه: هيه و اغراضيه في السياره
فاطمه: مع السلامه مس حنان
الكل يسلم على حنان .. ركبن السياره .. ساد الصمت على الموجودين .. بعد فتره
موزه: وحليله رقد عموري
امنه: فديته .. عدلي ارقبته موزان
موزه: خلاص بنرد البيت .. عموري رقد
فاطمه: موزوه .. حرام عليج .. الحين لين ما نوصل بينش
غنيه: هيه صدق
موزه مسويه عمرها مبوزه: لا بنسير البيت
امنه: موزه حرام عليج ليش هالحكم
موزه: كيفي سيارتنا
فاطمه تمت تتامل موزه و تفكر و البنات يسولفون و يستهبلون على بعض " على قوة علاقتي بموزه .. بس ما قدرت اظهرها من الي هي فيه .. لازم موزه اتفكر في ان الحياة حيات و ممات .. ليش هي مب متخيله وفات نور.. لا هي متخيله بس مب امصدقه .. لا هي مصدومه .. اوهوه انا ليش افكر جي .. اذا انا لين اليوم مصدومه و هب قادره اصدق اني ما بشوف نور خلاص و ما بسولف وياها و مابسير النادي وياها .. هي قالت بتعلمني السباحه .. الحين منو بيعلمني .. قالت بتعطيني كلاسات يوقا .. الحين منو بيعطيني "
ينقطع تفكير فاطمه بصوط صرخه من غنيه
الكل يصد على غنيه و يسال: بلاج
موزه بصوت خايف: بلاج شو مستوي .. ارمسي انطقي
غنيه ساكته ماترد .. عينها جاحظه
موزه انقزت من مكانها و يلست على ريل غنيه و مسكت جتوفها بقوه: غنوي بلاج
غنيه تنتبه .. تحرك غنيه عينها بين الموجودين .. و تتنفس بالراحه : الدريول
موزه تصد على الدريول و ترد تشوف غنيه: بلاه
غنيه: هو
موزه: هو بلاه
غنيه: قاتل
موزه وهي عاقده حياتها: شو!؟
غنيه: دعم قطوه
الكل ينقهر من غنيه .. و موزه من غصتها عضت غنيه على خدها .. و علمت العضه على خد غنيه .. و الكل علق على غنيه و على ويها و كيف بتنزل صحارى
وصلوا صحارى .. تحجبت غنيه بحيث تخش نص العضه بؤقايتها .. موزه شلت عمر .. دخلوا صحارى من الباب الرئيسي .. موزه اتجهت لستار بكس عشان اتوعي عمر و تشربه شيء يشبعه حق اللعب
موزه: عموري ماماتي يالله قوم
عمر يصيح صياح دلع و ما يفتح عينه:نننننننننننننننننننن� �نننننننننننننننننننننننن� �نننن
موزه: ماماتي يالله .. اسويلك مساج
عمر: ننننننننن
موزه: امونه حبيبتي اطلبي شيء فيه حليب بدون كافيين حق عموري
امنه: شيء دافي و لا بارد
موزه: لا دافي احسن
غنيه: فطوم نشي بنسير نشوف شو احدث المكياجات و العطور
فاطمه: لا دبنهامز بعيد
غنيه: و منو قال بنسير دبنهامز
فاطمه: عيل وين شيء عطور و مكياج غير دبنهامز
غنيه تحط ايدها على يبهت فاطمه تجيك درجت حرارتها: يالله بالستر .. بلاج يا اميه فيوزاتج حترقن .. (تاشر بيدها) وهاي البراحه الي جدامج مال الشو .. شماغات
فاطمه: اويه .. نسيت هالبوثات
موزه: اقول غنوي شمعنه شماغات
غنيه: عاد لا تدققين .. ها الي يه ع بالي
فاطمه: انزين يالله نشي
غنيه: يالله خلنا نشوف شو عندهم في البسطه الي مسوينها
فاطمه: أي بسطه بعد
موزه: فطوم هي تطري البوثات الي هني مال المكياج .. غنوي اظن هاذبل كرزما
فاطمه: شو بعد كرزما
غنيه: هي شو كرزما بعد .. مال المنجمنت .. كزما الكركترستك؟
موزه تضحك: أي منجمنت انتي بعد .. ها اسم المحل
فاطمه: كرزما .. هيه ها الي في بن سوقات
موزه: عليج نور .. اظن ها فرع مالهم
فاطمه: كلشيء جايز
غنيه: بسكن هذربان و طوفي يا فطوم جدامي
سارت غنيه عطول عند ديور و طلبت كريم اساس سائله .. اشترت غنيه كريم الاساس و خذت احمر خدود (بلشر) .. و سارت هي و فاطمه الحمام .. حطت غنيه الفاونديشن على ويها و عدلت لون البشره بالبلشر عسب تبين طبيعيه .. عقب ما خلصن من الحمام ردن عند موزه و امنه .. و كان عمر يشرب حليب
موزه: غنوي شو هاللي ع ويهج
غنيه: اخفي معالم جريمتج
امنه: ههههههههههه وحليلج اتحسين بنقص وويهج معضوض
غنيه: لا نقص و لا شيء .. اصلا انا زغت ان الناس ايوني و يطلبون قطمه من خدودي .. لان هم من بيشوفون العضه بيتاكدون ان طعمي لذيل
امنه: بيتاكدون ؟ يعني هم عارفين ان طعمج لذيذ
موزه: وين ذايقينج اختيه في أي كفتيريا .. ظني في رجب طاعمينج
غنيه: لا شو رجب .. في روشيه
موزه: يالله ياللي ما تخيلين .. مسويه عمرج ما اعرف شو
غنيه: ها تغارين
موزه: حشه علي ليش اغار
عمر يقطع كلامهم : ماما .. ماي
موزه: فديتك تبا ماي .. من عيوني
نشت موزه تيب ماي حق عمر
امنه: بعد يقوللها ماما
فاطمه: حبيبي عموري انا منو؟
موزه وصلت و سقت عمر الماي
ظهرن البنات من ستاربكس و راحن ركن الالعاب فوق عسب يلعبون عمر .. و عقب ساروا جيليز يتغدون ..
موزه تاكل عمر و هو هب طايع ياكل: ماما كل لا تلعوزني
امنه تصاصر فاطمه : تلعوزني قال .. و الله تنفع تكون ام
فاطمه: صدقتي .. و موزوه تستاهل كل خير .. د. عبدالرحمن ريال زين
غنيه: بلاكن تتصاصرن سمعوني
امنه: لا ماشيء بس جي خرابيط
غنيه: شو هالخرابيط انزين
امنه: خرابيط و بس
موزه تصد عليهن: بلاخرابيط .. كلن و انتن ساكتات
غنيه: هو حكم قاراقوش
موزه سكرت عينه و تذكرت نور .. اتنفست بصوت: لا حكم موزوش
الكل ضحك .. حتى عمر عيبته طريقه موزه في نطق حرف الشين و قام يقلد موزه .. خلصن اكلهن و دفعن الفاتوره .. ظهرن من جيليز متجهات للبوابه لان الدريول يترياهن .. موزه انتبهت لشخص كان يلاحقهن من اول ما تخلن السنتر بس سوت عمرها هب منتبهتله .. يوم اوصلن قريب الباب خافت موزه انه يشوف رقم السياره او يلحقهن لين البيت
موزه : امون ها لاحقنا من اول ما دخلنا
غنيه تحشر عمرها بينهم: انتبهت لما كنا في جليز ما شل عينه من علينا
فاطمه: خلوه يولي .. يوم كنا عند الالعاب كان يتبسم
امنه: متى ها كله ما انتبهت
غنيه: انتي متى تنتبهين .. انتي مثل ما يقولون تور الله في برسيمه
امنه تفتح عيونها: انا جي
موزه: الحين هب وقت ضرايب .. قربنا على الباب و هو ورانا .. انا ما اباه يشوف السياره .. خوفي يلحقنا او ياخذ الرقم او أي شيء .. دام هالخربوط ما رقمنا لين الحين ما يندره شو نواياه
فاطمه: اتعرفون عادي يلحقنا و عقب يدعمنا .. و تستوي خرابيط
موزه: خيالج واسع .. بس صدق انا جد سمعت شيء جي
امنه: انزين خلي الدريول يبركن صوب دبنهامز و لا ماركسبنسر .. و نحن بننقسم نصين .. نص يظهر من صور مارك و نص من صوب دبنهامز
موزه: و الله فكره .. بننقسم و القسم اللي بيلحقه بيتم يحاوط في المحل لين ما نمر عليه
غنيه: حبيت الفكره .. يالله تطبيق
موزه: انا و امنه و عمور بنسير مع بعض
غنيه: زين اتسوين لان انا وفطوم ما نروم على مخ امون
امنه: لا .. شو تقصدين
غنيه: اتمصخر يالدبه
موزه تمسك ظحكتها: يالله سيرن مارك و نحن بنسير دبنهامز
انفصلن الى مجموعتين و الشاب لحق موزه و امنه .. كانن يمشون بسرعه عشان يبتعدون عن انظاره .. خطوته كانت اسرع من ختوتهم و كان قريب منهم و هب رايمين يبتعدون عنه .. اما غنيه و فاطمه كانن يتصددون حوالينهم عن يكون حد ثاني لاحقدنهم .. كانت غنيه تتخيل عمرها في فلم اكشن
غنيه: ها محد مريب حوالينا
فاطمه: جي شو .. السنتر فاظي و ها شكله هب محصل حد يلحقه
غنيه : شكله جي
فاطمه: الحين هو يلحق موزه و امنه .. يا ترى حاط عينه ع منو منهن
غنيه: وابوك اللبو .. اخاف يبا عموري
فاطمه : بلا مصاخه
غنيه: لا صدق وايد يختطفون اليهال هاليومين
فاطمه: اميه زيغتيني .. امسات قريت حالة اختطاف لطفل في كارفور
غنيه: بتصل في امنه .. و بحرص عليها تشوف عمور و تمسكه من ايده .. ما بدق حق موزوه لان يمكن تكون شاله عمر و تنزله ع الارض
فاطمه: اتصلي بدون تخيلات .. و قوليلها نحن بنتصل للدريول عن يسمع الخطه هالمعتوه
غنيه و هي تضغط ارسال: معتوه .. منو قال ان نحن في مسلسل مكسيكي
ترد امنه على غنيه و تسمع كلمه مكسيكي: غنوي بلاج .. أي مكسيكي
غنيه: ها لا ما شيء الحين هب وقت مكسيكي .. اسمعي انتي شلي عمور و امسكيه عدل .. عن يكون ها من هاللي يختطفون اليهال
امنه: شو هالخرابيط
غنيه: انتي سوي الي اقولج عليه .. يقولج حرص و لا تخون .. انتي حرصي بس
امنه: انزين
غنيه: هيه نحن بندق حق الدريول عسب ما يسمعكن هالمعتوه
امنه تمسك ضحكتها: معتوه .. انزين و يا مصطلحاتج
بندت امنه عن غنيه و خبرت موزه بمحتوى المكالمه .. موزه اضكت على خيال فاطمه و غنيه .. بس حست ان ممكن يستوي شي من هالقبيل .. و شلت عمر و حضنته بقوه و هي خايفه عليه وايد
غنيه اتصلت بالدريول و قالتله يمر عليهن صوب مارك .. ركبن السياره .. اتصلن بامنه يسئلونها عن مكانهن
امنه: الو
غنيه: انتوا وين؟
امنه: في مكانا
غنيه : هالمعتوه
امنه تمسك ضكتها: ورانا
غنيه : نمر عليكم و لا لا
امنه: ما اعرف شكلنا بنفترق انا و موزوه و بني صوب الباب من جهتين مختلفات
غنيه تصرخ في التيلفون: لااااااااااااااااااااا ... شو تخبلتي .. ها دام يته الجرأه بان يلاحقنا عادي أي ويرمس او ما اعرف شو يسوي بعد
امنه: خلاص بنظهررباعه .. و اللي يستوي يستوي
غنيه: خير ان شاء الله .. يا رب يتكربع و يطيح
امنه تبتسم: حرام عليج ما سوى شيء
فاطمه: قوليلها بنطرش بابو يشل عمر .. عسب يركظن
غنيه: انزين هن بيركظن و بابو بيركظ و بعدين منو بيسوق بسرعه
فاطمه: هيه صدق
امنه: نحن قريب الباب .. ما اشوفه حوالينا .. شكله مل
امنه بغت تدعم شخص واقف في نص الدرب .. يوم ارفعت راسها الى هو نفس الشخص الي يلحقهن .. غيروا مسارهن .. بس للاسف مسك عمر من ايده و موزه كانت شاله عمر .. هذا الشيء وقفهن في مكانهن و ما عرفن شو يسوون .. غنيه وفاطمه كانن على الخط و سمعوا موزه و هي تقول : اترك ايد الولد
الشاب تم ساكت و يشوفهن بنظره غريبه
غنيه تكلم فاطمه: ظوفي بنسيرلهن
نزلن من السياره .. و المسافه بين السياره و الباب ميافت دقيقتين .. غنيه اول ما شافت الشاب و هو ماسك ايد عمر .. حست بشيء يدفعها انها تضربه .. اول ما وصلن غنيه و فاطمه يمهم .. بدا الشاب بالكلام .. ما انتبه لوجودهن لانهن كانن وراه
الشاب: بلاكن تركظن عنيه
موزه و امنه تمن ساتات
الشاب: انا ما اكل .. انا بس ابا اتعرف
موزه تشوفه بنظره حاده
الشاب: اميه زيغتيني
موزة تشوفه من فوق لين تحت
الشاب: منو هالولد الامور .. اكيد اخوج لان انتي احلى منه و مستحيل يكون ولدج .. شكلج بعدج هب معرسه
غنيه بغت تدز الشاب .. فاطمه مسكتها و اشرتلها اصبري
الشاب : انا اسمي ناصر .. شو اسمك يا حلو
عمر بدأ يحرك ايده و هو متظايج من مسكت الشاب
ناصر: حبيبي لا تخاف بعطيك حلاوه .. تعال عندي بشلك شوي
غنيه بصوت عالي: بس لا .. مصخيتها .. خوز جذاك .. اشوف خوز عن ويهي يالله
ناصر صد على غنيه و هد ايد عمر
موزه تحركت هي و امنه بسرعه ووقفن بعيد عنه تقريبا .. و كانن ورا غنيه و فاطمه
ناصر: يالله لهاي الدرجه اخوف شرتن مني .. و انتي من أي ملعب يايبينج .. ويا صوتج و لا خالد حريه
غنيه تشوفه من فوق لين تحت: طوفن .. خلو هالاشكال المعتوها تولي
ناصر و بكل جرأه مسك جتف غنيه: هيه انتي شو تتحرين عمرج .. تسبين و تشردين
غنيه تفج عيونها .. و تشوفه بنظره حاده و تدز ايده: ياللي ما تخيل و ما تستحي .. اقول اتصلن بعبدالله خلوه ينزل من السياره و يشوف هالمهزله الي استوت بخواته
فاطمه تساير غنيه و تدق حق موزه .. موزه تشوف فاطمه و ترد عليها و اتخلي التيلفون فيدها : الو .. عبدالله تعال في واحد ما يخيل يتحرش فينا
ناصر يرد خطوتين للخلف .. يتصدد يمين ويسار .. احمر ويها وروح عنهم بسرعه
ظهرن البنات من المحل بدون ما يرمسون .. اول ما ركبن السياره .. ما راموا يمسكون عمارهن من الضحك
موزه: من وين هالافكار النيره يا غنوي
امنه: ما شاء الله عليكن مستوين مافيا
غنيه: هاي فايده الافلام المصريه
موزه: ههههههههههههههههههههههههه هههههههههههههههههه
فاطمه: الله ياخذ بليسه سوالنا اكشن .. خرب علينا جونا
موزه: احس كان غباه يوم فكرنا في الاخطه ان نفترق .. و يوم خفت انه ياخذ رقم السياره او يلاحقنا .. يعني اذا لحقنا شو بيستوي
امنه: هيه صدق
البنات يلسن يسولفون في سوالف مختلفه .. وصلوا امنه و فاطمه بيوتهن .. و هم في الدرب للبيت اتصلبهن د. عبدالرحمن .. وقالوه انهم بينزلون عمر البيت .. وصلوا عمر و نزل الالعاب اللي خذوها حق عمر .. و روحن قبل ما تظهرلهن يدت عمر .. كانن خايفات اتيلسهن .. ردن البيت و حكن كل المغامرات حق حمده .. و حمده يلست تتنتقد موقفهم و تصرفاتهم ..


يتبع

[حركات]

متابعه يديده

من زمااان ماقريت قصه ع النت

قصتج حلوه واتريا التكمله

[فنجان قهوة]

حركات شكرا على المرور الكريم

[الاسطوري]

مانتبهت على الجزء هذا إلا قبل كم يوم وتوني قريته وخلصته وفي
إنتظار التكمله في أقرب فرصه ،، مشكوره
على هالقصه الحلوه

[قرموشة]

waitinG يافنجـان قهـوه ..

[دمعة عين]

~ فنجــان قهــوه ~

الســـلام عليــــكم ورحمـــه الله وبركاته
اشحــالج ..! عســاج إلا بخيــــر ..!

أنا قريت قصتج .. وما شالله عليـــج أبدعتي في ترتيب سطورها
وأحــداثها ..!!
حسيت فيها شي يديــد من زمــان ما شفنـــاه فـ القصص
إلي منتشره بـكثره هالايام .. إلي بهدف وإلي من دون هدف ..

حبيتها وايــــــد وايـــــــد .. خاصه شخصيه غنيـــه .. " يالله باسمـــه " ..
تميت قابضه هالكلمه .. !!

بانتضـــار الأجزاء القادمه اخـــتي ..
ولا طولين عليـــنا

.

.


والسموحه