جديد قصه من تاليف فنجان قهوة

[قــبقــوبـه]

محلااااااااتهــااا وااايييــد عيبتنـــي
بانتــظار التكمــله فنيــانا ..
لا تبطييـن عليييـنا ..

[فنجان قهوة]

ريف الصبا
له له له
انا في حلم و لا في علم
لا منو قدي ريف قرت قصتي
تسلمين الغاليه ع النقد البناء
و انا اعرف انج ما تجامليني<<<<اتمنى
ان شاء الله اليوم او باجر الصبح بنزل الجزء الثاني

[فنجان قهوة]

السلام عليكم و رحمة الله و بركاته

شحال اعضاء المنتدى الكرام

تولهت عليكم و انا متشوقه بان اعرف رايكم في تكملة القصه

و ها هو الجزء الثاني

الجزء الثاني \\ الحلقه الثانيه "احس احلا"

بعد صلاة الظهر الكل سار بيت يد موزه أبو امها .. كانوا قوم موزه يتيمعون كل جمعه في بيت يدها ام امها ع الغدا و ابو ابوها ع العشا
و هناك اتلاقن موزه مع غنيه و يلسوا يسولفن عن البنات و انهم اتولهوا على الشله
ما قدرن يرمسون عن موضوع غنيه مع الولد لان كل عيال الخالو الخاله ميلسات
بعد صلات العصر سحبت غنيه موزه و دخلوا حجرة خالهم علي و يلسوا يسولفون عن سالفة الريال
غنيه:موزان انا خايفه ان ها يسوي شيء .. حاشرني بمسجاته.. اندوج التيلفون و شوفي بعينج
موزه و هي تقرا المسجات .. عقدت حياتها و تحيس براطمها موحيه بزعل: اه .. اتعرفين هاي السالفه جايده .. انا ما كنت احس انها لهاي الدرجه ..
غنيه: و الحل مواز .. انا مب عارفه شو اسوي؟ اذا امي عرفت مصيبه
موزه: هيه تخبريني اصلا ما بيصدقون ان انتي مالج دخل و بيتمون شاكين فيج.. حتى و هم واثقين بتربيتج
غنيه و عيونها تدمع:موزوه الله يخليج فكري عني انا مخي واقف
موزه: اتعرفين ماشيء حل الى اني اخبر خالج سعيد.. هو يعرف هالسوالف و عنده سوابق فيها.. اذا قلتله عادي بيتلاسن ويا مسود الويه و بيضاربه .. و بيفكنا من الصدعه
غنيه: و شو عن الصوره
موزه: هيه صح راح عن بالي.. ما اعرف؟
غنيه:انزين نحن بنخبر خالي سعيد عشان يكون عارف السالفه و اذا امي شافت الرقم و لا شيء اقوللها ان انا خبرت خالي ان واحد يلعوزني وهو بيرمسه
موزه:هيه زين جي
موزه تنتبه ع جواز خالها المحطوط على الكوميدينو (الطاله الي يم السرير) مدت ايدها و خذته شافت في تذكره بين اوراق الجواز
موزه و هي حايسه بوزها: بيرد يسافر .. و الله افتقد هالانسان يوم يسافر
غنيه: الكل يتوله عليه .. فديته واصل وما يقطع حد..
موزه: الله يرزقه الي في باله
غنيه: الي في باله دراسته.. قولي الله يرزقه الحرمه الصالحه
موزه: هيه هالدعاء خليته حق امايه غريسه .. ما تقصر دوم تدعيله
يدخل علي الغرفه و ينصدم من وجودهم في غرفته
موزه: عمرك طويل.. تونه نرمس عنك
علي: خير ان شاء الله شو تحشون فيني
غنيه: لا نحش و لا شيء .. ندعيلك
علي: اخاف تدعون علي
موزه: خالي متى سفرك؟
علي: ممممممم .. شعرفج اني بسافر.. انا قلت ما بخبر حد لين قبل السفر بيوم.. عشان امكم غريسه ما تم تصيح كل ما تشوفني و تحشرني متى بتعرس متى بتعرس
موزه: لا تحاتي ما بنخبرها
علي:مكتوب في التذكره.. عقب العيد بيومين
موزه: يعني عقب يومين
علي: هيه .. الحين انتن شو اتسون هنه .. بدال ما تسيرن تتعبدن و تشوفون الحجاج في التلفزيون
غنيه: نسولف خالي .. من متى ما سولفنه ظارين نشوف بعض كل يوم .. الحين من خلصنا الامتحانات ما سولفنا
علي: هيه ماشاء الله خلصتوا الامتحانات.. يا حيكم .. الباقي دوامات و انتن ماجزات
غنيه: هيه خلصنا بس الغصه ان الكل عنده دوام و نحن بس فاخين ارقاد
موزه: غنوي ما شفتي اذا دكتور عبدالرحمن نزل الدرجه و لا لا
غنيه: لا و الله ما افتكرت
علي: د.عبدالرحمن شو يدرس؟
غنيه: برمجه
علي: هو هب عبدالرحمن محمد
غنيه: هيه ليش اتعرفه
علي: هيهات اذا ما اعرفه اعرف منو.. ها زميل دراسه.. من يوم كنا في لندن ناخذ الباكلريوس
موزه: بس يمكن هب عبدالرحمن محمد الي تطريه .. هو عنده ولد اسمه عمر
علي: هيه هو .. انا ادري ان يدرس في جامعة الشارجه .. بس توني ادري ان يدرسكم
غنيه: خاليه صدق حرمته متوفيه!
علي: هيه حرمته ام عمر الله يرحمها توفت و هو ما طاع يعرس من عقب وفاتها.. كان ما خذنها عن حب مثل ما يقولون و هي سميه امه .. امه عليا .. عليه بنت خلفان
غنيه: مال ام القيوين .. جيه هو قيواني
موزه: يالله خالي تعيبك هاي السوالف
علي: لا هو مال دبي يالخديه.. جيه ماشيء عليه بنت خلفان غير في ام القيوين.. بس ما سرتي بعيد حرمته مال ام القيوين .. قوم جاسم.. الي حرمته سلامه
غنيه : هيه سلامه مرت جاسم.. هيه صح هي كان عندها بنت اسمها عليا و اتوفت اذكر حظرت عزاهم.. بس ما احيد اذا سرت العرس و لا لا .. من فتره كان عندهم عرس بنتهم الي خذها فيصل ولد يرانه
علي: انتي اخبر بالي يستوي في ام القيوين ..
موزه:جيه ما تدري اتصلوا وكالة الانباء وام تبغي غنيه تشتغل عندهم وكالة انباء .. و هي بروحها بتكون المدير و السكرتير و الفراش و المعد و المخرج و المذيع و
تقطع غنيه على موزه: هيه هيه انتي انجبي احسلج الحين انا كل ها يالدرام.. اصلا نحن اهل ام القوتين محد يروم ينقد علينا ما نقصر في يرانا و لا معارفنا حتى لو ما انعرف الناس بنسير و بنوقف وياهم في شدتهم و في فرحهم .. فديت اهل ام القيوين و الله .. مب اهل الشارجه
موزه: لا تغلطين ع الشارجه فديتها هاي الشارجه منبع العلم و الثقافه .. لو لا علمها جان خستي في جامعة الامارات و ما بنشوفج الى كل ويك اند
علي يضحك على ضرابتهن و تحرطيمهن.. يفتح باب الكبت و يطلعله كندوره و غتره .. و يزقر على البشكاره من الدريشه و يقوللها تيبله الميبر
غنيه: خالي العزيز الميبر اشحقه؟
موزه: بيدخن يالخديه
غنيه: يالدرام ادري بس مب من عوايد خالي الدخون.. انا الي اعرفه انه مال دهن عود و صلاحوا
علي: لا يا بوج انا اتدخن و اتعطر و اتزقرت دوم .. انتي اشعرفج
موزه: و انا اشهد
غنيه: لازم بتشهدين بو الشباب دومه في الشارجه مطيح في بيتكم .. يا خوفي ميوزينه شرجاويه من وراي
علي: لا شعباويه ههه .. اقول اتعرفون انا بتزقرت حق منو
غنيه: منو العروس؟
علي وهو مبتسم: د.عبدالرحمن
موزه: ويه ليش بي؟
علي: ياي يسلم علي و بنظهر سوى بنسير نتحوط في ربوع ام القيوين
غنيه: يعني هو ما حصل غير ربوع ام القيوين
علي: عيل ربوع ام القيوين شوي
غنيه: لا صدق ليش ياي و انت بتزقرت حق شو .. يعني لو ياي جي بس انت بتلبس أي كندوره و ما يهمك
علي و ببتسامه عريضه: بنسير ملجة اربيعنا
موزه: الحين العصر !.. لحظه بس اليوم وقفة عرفا
علي: لا يا بابا المغرب ..جيه في الوقفه الناس ما يعرسون و لا يملجون .. بس هي هب ملجه ملجه هي عزيمة ..
غنيه: هيه عيل انا بترياه عند الباب بتخبره عن درجاتنا ههههه و الله بينجلط يوم بيشوفني بيقول من وين ظهرت هاي مب كفايه في الجامعه
موزه: هههههههههههه هيه و الله
علي: بخبره عنكم هو يعرف اساميكم صح
غنيه: انا هيه موزوه ما يندره.. بس يمكن حفظ اسمج لان ولده كله ايي عندج
علي: بييب ولده عمر .. اظن بيوديه عند يدته
موزه: خله يخلي عندنا .. و الله وناسه هالولد كله معاند ما يبا يلعب ويا حد .. محد يايزله ... و يالله يالله يتقبل حد بالزور و بالقوه
علي: هيه مثل ابوه.. ابوه جي ما يرمس أي حد
غنيه: انا مالعبت وياه و لا حتى شفته.. بس اسمع منهم .. اذا هو وياه في السياره خله ينزله
علي: ان شاء الله
وصل د.عبدالرحمن و نزل من سيارته لان شاف يد موزه حمدان واقف في الحوي .. اليد حمدان لزم على عبدالرحمن ان يدخل الميلس و يتقهوه عندهم.. بعد الالحاح نزل د.عبدالرحمن ولده من السياره و دخل الميلس .. كان الميلس فاضي كل الرياييل اظهروا و ساروا القهوه بعد ما صلوا العصر في المسيد .. علي اتصل في بنات اخته و قالهم يتحجبن و اين بيفاجئ د.عبدالرحمن .. و الي خلاهم يتحمسون وجود عمر
نزلن البنات و هم يتعازمن ع دخول الميلس.. دخلهن علي.. د.عبدالرحمن يوم شاف عبي نزل راسه و هو مستغرب منو الي مدخلنهن علي..
غنيه: السلام عليكم د.عبدالرحمن
رفع راسه د.عبردالرحمن وهو مندهش منو الي يسلم عليه و اول ما شافهم فج عيونه و هو مندهش: و عليكم السلام .. غنيه و موزه؟
موزه: اشحالك د.عبدالرحمن ان شاء الله طيب؟
د.عبدالرحمن: الحمدلله.. علي انت شو تستوي حقهن
غنيه و هي مبتسمه: خالنا
د.عبدالرحمن: ما شاء الله
موزه: عمر حبيبي تعال
د.عبدالرحمن يدز عمر: روح سلم بابا
عمر يتجدم بخطوات ثقيله و هو يحرك ايده على الطاوله الي في نص الميلس
تتجدم موزه و اتشله.. غنيه حبيبي كتكوت عطيني اياه بشله .. اتمد ايدها غنيه و عمر يدز ايدها و هو يشير ان ما يباها..يلسن البنات على القنفه الي يم الباب يلعبون عمر.. اما علي و د.عبدالرحمن و اليد حمدان يلسوا يسولفون و علي يخبر اليد كيف البنات يعرفون د.عبدالرحمن
د.عبدالرحمن: يالله علي
علي: هيه يالله ماشيء وقت
حمدان: سايرين عزيمة عمار؟
علي: هي نعم ابويه
د.عبدالرحمن: عمر بابا يالله تعال
موزه: خله عندنا انتوا بتتوقهون فيه في العزيمه اليهال هب مال عزايم
د.عبدالرحمن: لا انا بوديه بيت يدته بييلس هناك
غنيه: هناك ملل هكوه هو خبرني هني بيستانس.. عدنا نقازيه في الحوي بنودي هناك و بيستانس ع النقازيه
د:عبدالرحمن: لا مره ثانيه انا هب يايبله ثياب.. ما يستوي اخليه بيخس عمره و لا شيء
عمر مشا صوب ابوه لان شاف الابو وقف..و ظهروا كلهم من الميلس اليد سار الحوي و يلس يشوف الزرع.. البنات ساروا عند الحريم يسمعون سوالفهم.. اما الدكتور عبدالرحمن و علي ساروا الملجه عقب ما نزلوا عمر عند يدته
.......................

السبت اول يوم من ايام عيد الاضحى

نور تنش على صوت التيلفون : الو
فاطمه: نورووووه صباك الخير
نور بصوت واطي: و انتي بخير
فاطمه: يالله نشي العيد بيخلص
نور تبتسم: عيدج مبارك
فاطمه: لا لا ما احب جي اباها عقب ماتلبسين لبس العيد
نور: عادي انا لابسه بجامت العيد
فاطمه: جان جي عيل عساج من العايدين و السالمين .. يالله نشيء يمعي عيديه
نور: خلاص بابا عطاني عيديتي عقب الصلاه عطول ..
فاطمه: انزين نشي بيتكم السنتر و الكل بيي بيتكم نشي و فازعي قوم امج
نور: اف ما احب صباح العيد.. عيال عمومتي و عمي كلهم في بيتنا .. لازم البس مخور و اقايه.. يعني ماشيء كشخه
فاطمة: هههههههههه وحليلكن .. بس عادي انتي اكشخي بالمخور .. لعل وعسى واحد منهم يخطبج
نور: أي لا ما ابا كلهم احلا عني ما ابا
فاطمه: لو ما كنت شايفتنهم كنت بصدق .. بابا انتي احلى منهم لا تحاتين انتي بنت.. من الله كلكم تتشابهون جنكم اخوان.. يالله يالله نشي انا بسير اكمل مكالماتي
نور: انزين يالله باي
فاطمه: باي
نورطايحه ع الشبريه تسمع صوت في ممر الحجر ما تبا حد يفتح عليها الباب و يوعيها مالها خلق تنش ما تبا تشوف عيال عمومتها.. يرن تيلفونها مره ثانيه و المتصل امها
نور في خاطرها " ماما ليش تتصلين .. ما ابا أي اسلم": الو هلا بست الحبايب
ام نور: اهلين .. يالله نشي
نور: ماما انا مصطله و عيوني وارمه يبالي ساعتين لين ما اطلع من الحجره .. لا تقولين تعالي سلمي عيال عمج في الصاله
ام نور: ادريبج مزهبه ردج مثل كل عيد.. نشي و تعالي سلمي هكوه راشد ينشد عنكن .. كلكن ارقود
نور: الاولاد واعيين شو يبوبنا ني نسلم
ام نور: نشي بلا مصاخه
نور: ان شاء الله ماماتي
الام تسكر التيلفون بدون ما تقول مع السلامه و نور تكمل اسطوانت الغزل لامها و عقب ما خلصت تنتبه ان امها سكرت.. تيلس نور في نص الشبريه تفرك عيونها بديها.. بتصل في موزوه قبل ما تغلبني و تتصل مثل كل عيد.. نور تتريا موزه ترد
موزه بسرعه قبل ما نور ترمس: مباركن عيدكم.. و كل سنه و كل حول
نور تضحك: بعد تغلبيني ها و انا المتصله .. عساج من عوادة العيد
موزه تضحك: عيل شو تتحرين .. محد يغلبني .. اتعرفين شفت منو البارحه
نور: منو؟
موزه: د.عبدالرحمن.. طلع ربيع خالي علي
نور: قولي والله
موزه: عمر كان وياه .. لعبنا وياه انا و غنيه
نور: ها يعني كنتوا في بيت قوم يدج حمدان
موزه: هيه تخيلي عموري كفخ غنيه .. و تم يدي ناقع ع غنيوه من الضحك
نور: اويه فظيحه جدام الدكتور
موزه: هيه و يدي ما قصر اسمي فشل غنيوه
نور: ليش شو؟
موزه: ما خله شيء عن غنيوه و اليهال الا و قاله
نور: هههههههههههه سواد ويه عيل
موزه: هيه
نور: بس كشخه طلع خالج يعرف الدكتور .. اقولج يوزيني خالج فنان .. يعرف كل الفنانين
موزه: والله خالي علي ماشيء شراته ثنين في البلاد .. وايد قريب منا .. و هو فنان و متفهم و يقدر .. اتعرفين قالي اخاذ دورة رسم في معهد الفنون و شكلي بسير
نور: الله كشخه .. انا بي وياج
موزه: يالله عزمي بنسير خلال هاي الاجازه
نور: لا.. يمكن انسافر .. بس عادي بسجل و يوم برد من السفر بكمل
موزه: هيه جي تمام .. انزين انا ببند عنج بسير عندهم في الصاله اسمع حس قوم خالوه
نور: اوهو اتذكرت ان في بنآدمين في بيتنا يتريون ظهوري الكريم
موزه: ههههههههههههههههه نشي نشي انزين .. خل عنج التذمر الحين منو بيفكر يخطبج منهم
نور: انتي اتعرفين ان انا اعرف ان اعيال عمومتي ما يفتكرون بس انتي اتعرفين العمات يدورن حق عيالهن و عيال اخواهن .. يعني بيتمن يقولن محلوه .. ضعفانه .. متنانه.. ما اعرف شو .. يخلون الي ما يشوف يشوف .. و اكثر شيء يقهر يوم يقولون غاديه عروس
موزه و هي تضحك على اسلوب نور المتذمر: نور اتصدقين من اسلوبج الي بيسمعج بيقول عيال عموملتج مول هب زيني ..
نور: لا والله هم زينين بس انا ما ابا اخذ واحد قريب ابا غريب
موزه: يا سلام و غريب من وين بتيبينه
نور: انا بعرس عن حب
نور و موزه يضحكن و يختمون المكالمه و يبندن.. و اتنش نور تسبح
..........
د.عبدالرحمن بايت في بيت ابوه في دبي صباح العيد.. وعاه عمر قبل الصلاه لان نش يوعان.. و عقب ما ردوا من الصلاه سار بيت عمه العود لان التجمع صباح العيد يكون هناك و الكل يمر على العم .. من عادتهم انهم يتريقون عند العم و عقب صلاة الظهر يمرون على باقي الاهل
د.عبدالرحمن كان هو مع ولده في بيت عمه .. عمر يلعب في كل شيء موجود في الميلس.. ميلس العم كان عود هو عباره عن ميلس خارجي موجود ع يمين باب الحوي.. الميلس كله رخام و فيه زوالي صغيره في النص .. القنفات عنابيه كبيره.. و الطاولات رخام مثل الرخام الي ع الارض.. في في اول الميلس بوفيه اصغير حاطين عليه الجاي و القهوه.. اما الطاولات الي في النص على الطاولتين الي ع الاطراف حلويات و الطاوله الكبيره الي في النص فواكه و حوالينها ملال المكسرات .. اما الطاولات الي بينهم عليهم حرارات فيها دنقو و باجله و هريس و بلاليط و خمير و بثيث و اشياء تتاكل ع الريوق و هي فاله في نفس الوقت
عمر كان مطنش الكل و يتنقل من طاوله لين طاوله هو مع باقي اليهال الي في الميلس .. محد يقدر يروغ الفروخ من الميلس لان اليد عبدالرحمن ما كان يرضى كان يحب يشوف كل اليهال حوالينه في العيد.. عمر كان ياخذ العيديه و يفره على الارض او يعطيها ابوه في حالت ان ابوه يكون يمه
كان د.عبدالرحمن زايغ من شطانت عمر ان يدز المقهوي و لا ينخش بين الطاولات و يطيح عليه شيء .. كانت عيونه كلها على عمر.. و الي مغصصه اكثر ان عمر بدل ملابسه اكثر من مره لان كل شوي يوصخ نفسه الى كيك و لا عصير و هلمه جرى
عمر: بابا حواوه
د.عبدالرحمن: بابا حشرتني كل شوي تبا شي .. يالله اركد و ابرك مكان واحد
اليد عبدالرحمن: بو عمر خله على راحته اليوم عيد و لا تخرب فرحته
د.عبدالرحمن: ابويه ها عمور هب امخلي شيء .. وهو اصلا هب يوعان بس هلاعه
اليد عبدالرحمن: برايه فداه خله يلعب على راحته
د.عبدالرحمن يعطي عمر الحلاوه و هو محرج لان مفتشل من الموجودين من شطانت ولده و ان ولده ما يسلم على حد
واحد من عيال عم د.عبدالرحمن اسمه خليفه كان يالس يم الدكتور و يسولف معاه
خليفه: عبدالرحمن انت هب ناوي تعرس
د.عبدالرحمن: و الله ما اعرف هاي سنة الحياه و انا هب حاط الموضوع في بالي الحين
خليفه: بس انت انسان مقتدر و هب ناقصنك شي
د.عبدالرحمن: انا وياك .. انا احاتي عمر.. عمر ما عنده حد يباريه الحين يحتاي اتفرغله
خليفه: ان زين انت عرس و خذ وحده ترضى بوضعك و ترضى انها تربي عمر وياك
د.عبدالرحمن: الموضوع ها هب في بالي الحين انا بتريا عمر لين ما يدخل المدرسه عقب بشوف
خليفه: انت لازم اتعرس و تيب اخو حق عمر
يقطع حوارهم رنت تيلفون يدة عمر سلامه المتصله
د.عبدالرحمن يرد عليها: السلام عليكم خالوه
سلامه: و عليك السلام و الرحمه بو عمر
د.عبدالرحمن: عيدج مبارك خالوه
سلامه: عساك من العايدي و السالمين.. انته وين اميه ما شفناك لين الحين
د.عبدالرحمن: بعدني في بيت عمي بو خليفه .. ان شاء الله من بظهر بييكم ام القيوين
سلامه: هيه ما اتعودنا نعيد اول يوم العيد بدون عموري كل سنه يكون ويانا.. شحال عموري فديته
د.عبدالرحمن: الحمدلله زين .. منشف ريجي .. يراكض و يدابج
سلامه: الله يحفظه تحمل عليه عن يتخرطف و لا يدق في راسه شيء
د.عبدالرحمن : من غير ما توصين خالوه
سلامه: عيل امك وينها .. ادقلها ما تجاوب
د.عبدالرحمن: ما ادريبها تلاقينها لاهيه و يا العرب
سلامه: هيه زين عيل خبرها اذا توايهت وياها اني اتصلبها و ما ترد
د.عبد الرحمن : يبلغ ان شاء الله
سلامه: في مال الله (في امان الله)
اذن الظهر وكل حد سار بدربه .. د.عبدالرحمن اتوجه الى ام القيوين سار بيت خالته و عقب ما سلم عليهم خلا عمر عندهم و اترخص رد بيته في الشارجه
...........................
العصر موزه اتصلت في نور
موزه: نور .. نور .. الحقي باجر عيدميلاد امنه
نور: اف نسيت السالفه
موزه: اذا ما سويناله حفله بتشل في خاطرها لان نحن ظارين نسوي حفله
نور: انزين كيف بنتيمع ما يستوي احس لان عيد
موزه: انا فكرت في شيء ان نحن نسوي عزيمه في بيتنا على نهايت الاسبوع.. و لازم محد منا يقولها يبينلها ان نحن بنسوي شيء .. عشان تحس ان نحن ناسين و في العزيمه بنسوي البارتي
نور: و الله انج ام الافكار.. خلاص انا بتصل في البنات و بخبرهم .. و انتي شوفي شو ترتيبات بيتكم
موزه: خلاص تم .. انزين و عن هديتها انا عصرت مخي و ما اعرف شو اييبلها
نور: مممممممم ما ادري شو رايج انسير سنتر من السناتر و نختار شيء ويا بعض
موزه: انزين خلاص بس ما اعرف اذا ابوي بيطيع و لا
نور: حتى انا هههههه .. اتعرفين بنتلاقه في مكان يعني انتي و اهلج و انا و اهلي
موزه: هي جي يستوي بابا بيطيع
نور: اف انا لازم ابند لان بعدهم قوم عموه عندنا ما اعرف ليش ما روحوا الاولاد لين الحين .. خسارة لبست صباح العيد الي شارتنها
موزه: هههه وعليه عنج.. يالله عيل باي
نور: باي باي

...............................

بعد انقضاء ايام العيد و حلول يوم العزيمه في بيت قوم موزه
كانت الشله كلها متيمعه و عازمين ربعهم مال الجامعه و بعض من ربع ايام المدرسه
و متفقين مع اخت امنه على انهم بيسوون الحفله عشان تي هي و بنات خالت امنه
الكل كان يمثل على امنه انها عزيمه عاديه
لين ما حلت ساعة الصفر يابوا الكيكه و كانوا مسوين بوستر كبير عليه صوره جماعية للشله و بينهم امنه و علقن البوستر بين نخلتين في حوي قوم موزه
و الكل تيمع على الكيكه .. حوي قوم موزه بعيد عن مدخل البيت فالي يدخل و يطلع ما يقدر يشوف الي في الحوي .. بس هم يقدرون يشوفون ليتات السياره اذا دخلت البيت
في اثناء اندماجهم انتبهوا على ليت سياره ضارب صوبهم البنات خافن انهم يبينون
موزه اكدت انهم ما يبينون و قالت بسير اشوف منو.. و طبعا لانها حفله موزه لابسه درس (فستان) قصير و فيه اكسات على الظهر و تحته بوت و حاطه ع جتفها شال من لون الدرس و فاتحه شعرها .. شعرها كان قصير لين اخر ارقبتها و مدرج ع طوله.. ركضت موزه صوب الباب و هي اتعرف ان محد يوقف هاي الوقفه غير حد من خوالها او عمومتها
يوم وصلت شافت خاله علي واقف ع الدري الي يدخل الفله و هي كانت يايه من بين الشير بحيث اذا كان في حد في السياره ما يقدر يشوفها
ازقرت خالها
موزه: خاليه ليش ضارب الليت ع الحوي.. سويتلنا حالة ذعر هناك
علي: هلا موزان لا تتجدمين ربيعي في السياره .. ها شو اتقولين ما انتبهت
موزه: اقول ضارب بالليت ع الحوي و البنيات يتحرن انهم ايبينن حق الي في السياره
علي: ها اوكي الحين بخلي عبدالرحمن يسكر الليت
موزه: د.عبدالرحمن؟
علي و هو مبتسم من ويه موزه الي جنه حد صب عليها ماي بارد: هيه عبد الرحمن
موزه: هيه انزين انا بسير عند ربعي عن ينتبهلي و لا شيء .. انا هب لابسه شيلتي و هب محتشمه
علي: انتي عندج حفله.. شو محتفلين براس السنه
موزه: ههههههه لا حفلة عيدميلاد
علي: فيها لعب و سوالف
موزه: اكيد كله مناقز و تنقيع بلونات
علي : عيل شلي عمر و ياج هو و بشكارته بدال ما يسير بيت عمته و ما في حد هناك غير العمه و البشاكير
موزه و هي تبتسم ابتسامة فرح: و الله عمر حبيبي وايد حبيته هالولد خله يي بيستانس
علي وهو يظهر تيلفونه من مخباته: صبري بتصل في ابوه (علي حاط السماعه على اذنه يتريه عبدالرحمن يرد عليه) الو بو عمر .. نزل عمر .. عنهن حفله البنيات و بيستانس و ياهم
نزلت البشكاره و نزلت عمر على الارض
موزه: عموري تعال هني
د.عبدالرحمن: اشحالج موزه؟
موزه من ورا الشير و هي متروعه انه شافها : بخير بخير
خذت موزه البشكاره و عمر وياها.. كل الشله استغربت وجود عمر..
نور: يالي ما تستحين عازمه الدكتور من ورانا
غنيه وهي تضحك: ههههههههههههههه .. أيه اكيد ياي ويه خاليه علي
موزه: هيه.. ما ادري شافني و لا لا ..ان شاء الله مااكون بينت
امنه: ليش عادي
موزه: هيه و انا بهاللبس
امنه: هههههههههههههه بينصدم بيقول اثرها فيل
نور: لا لا اصلا يوم بيشوفج بيغما عليه بيتحراج ذبيحت العيد
مزون: كلبوز هالواد
نور: الترجمه الفوريه لو سمحتي
مزون: ههههههه .. يعني تختوخ الولد
غنيه: ما شاء الله ما شاء الله عن يطيح علينا الولد
عفره : لا حرام هالجاكيت مسمننه و لا هو ظيعيفوني
(عمر كان لابس بدله و عليها جاكيت ثجيل)
نور: الحين خلكن من خطيبي .. (نور ترمس بصوت عالي تسمع كل الحضور) رحبوا معانا بالشاب الوسيم .. عمر عبدالرحمن زوجي المستقبلي
الكل يضحك على نور و حركاتها.. بس كان شيء غريب ان عمر مشى مع نور و ما صاح
غنيه: جنه اتعود على نور
موزه: يمكن شافها البق بوس قال ها هو المطلوب عشان اتلعبه
خذته نور صوب الالعاب و يلست اتلعبه و كانت تخوز اليهال عشان هو يلعب كانت من ظمن الاالعاب قلعه كبيره فيها زحلاقي و ميرحانه و بعد كان في نقازي يم الالعاب
حصه نشت من مكانها ووراها البشاكير شالين صندوق عود
حصه: سيداتي سادتي .. نعتذر عن التاخير .. مذيعتنا نور اعتزلت الفن و قررت تتفرغ لولدها اقصد خطيبها الي بتربيه ..
نور من عند الالعاب: اويه نسيت لا انا يايه.. عمور تعال بوديك عند موزوه
شلت نور عمر وودته عند موزه .. عمر من شاف موزه تم يصيح و ياشر عليها و نور اتقوله "تراني بوديك عندها".. شلت موزه عمر .. تعلق عمر في رقبت موزه و ماطاع يخليها و كل ما حد أي يلعب معاه يصيح صياح الدلع مال اليهال
نور اوقفت يم حصه و تمسك طرف البكس: احم احم .. اتعرفون بعد صاحبت الصوت الجهوري ما اتروم تعتزل الفن... الى جميع المدعويين الكرام .. بدون أي معارضات او أي كلام زايد .. بتنشون كلكم و بتلعبون ويانا .. طبعا نحن المصونات اعضاء الشله الكريمه عدينالكم هاي الفقره و فيها وايد العاب
حصه تقاطع نور و اتحط ايدها ع حلج نور: استلم المايك من الدبه نور و اقول بنلعب توستر اول لعبه و الي يعرفها يتجدم
نور تمط عمرها من تحت ايد حصه: حصوه صدق انج الفك المفترس.. طبعا مثل ما اتعرفون كيمرتي الحلوه بتشتغل و بتكمل مسيرتها الصحفيه و باخذ صور اتضحك فاستعدن
غنيه و عفره يتطاولون العبه من البوكس و يفرشونها .. بدن البنات باللعب
حصه: البقيه شورايكم نلعب لعبة بلونات الماي
امنه: لا بنخترس
مزون: مش مشكله الحفله و راح تخلص و صوره و اخدنا شو بدنا كمان
حصه: يالله سماطي طلعي الكرتون ها و حطي هالصوب و الثاني الصوب الثاني
امنه : انا بتزعم و بوزع البلونات هههههههه .. عشان ما اخيس وايد
مزون: شو في كمان
حصه: في الكراسي .. و احلا بتاسمه و وايد العاب
الكل انشغل في اللعب لين ما بدوا يروحون وحده وحده .. روحن كلهن و تمن نور و امه و حصه و طبعا عمر
حصه: عموري استانست
عمر ما رد عليها بس اكتفا بان يشوفها
موزه: احسبه يبا يرقد
نور: وين بشكارته
موزه: سارت تيلس داخل هب عايبتنها الحشره اونها مصدعه
نور: عدال بس
حصه: هي شو فصيلتها.. ما ظني من الي دوم نيبهم
امنه: جيه بقره شو فصيلتها هههههههه
موزه: و الله ما اعرف بس انجليزيها قوي
نور: ما علينا المهم انا وايد استانست و احس حفله و لا اروع
امنه: شكرا و الله ع الحفله انا اتحراكم نسيتوني
موزه: افا افا كم امون عندنا الى هي وحده
حصه: يالله اتزهبوا حق عيدميلادي .. عاد ما بيكون في الشارجه بيكون في دبي عندنا
نور: دبي الليقعه .. اتعرفين بيكون ايام دوامات بنسويه في الجامعه خخخخخخخ
موزه: شو هالضحكه بعد .. هيه في الجامعه اكشخ الكل بيكون موجود
امنه: بس حلاته في البيت ناخذ راحتنا اكثر
موزه: شو رايكم ندخل داخل و نتستر لاني بردت صدق
نور: ها و انتي حاطه شال عيل انا شو اقول الي لابسه حمالات جني من مذيعات LBC
ضحك الجميع و مشوا ورا موزه عشان تتاكد من خلو المدخل.. وصلن عند الدري و هم يتسابقوم مع عمر الي ارتبش اكثر وياهم يوم تمن بروحهن.. سمعو صوت الباب ينفتح موزه: يالله اسرع ها اكيد بابا .. سيروا الميلس عطول
يتراكظن البنات و موزه صاده وراها تشوف منو الي بيدخل بالسياره.. انتبهت انها سياره خالها
موزه: اويه ها خاليه
نور: د.عبدالرحمن في السياره تعالوا بنسلم عليه (قالتها عقب ما دخلوا الميلس خلاص)
امنه: هيه يالله ... هههههههههههه
نور: صح عادي هو ابو ريلي مب مشكله
حصه: زين ان هالفرخ ما يفتهم و لا صدق بتنفضحين يوم بتيلسين جدام الدكتور في المحاضره
نور و هي مفتشله: لا عادي .. بس بيموت الدكتور من الضحك كل ما يشوفني
يرن تيلفون موزه
موزه:ها خاليه علي اكيد يبا عمر: الو هلا خاليه
علي: موزه انتن في الميلس
موزه: هيه
علي: هيه يستوي تظهرن لان انا و عبدالرحمن بننزل .. عشان الحين دريول عبدالرحمن بييب سيارته
موزه و هي تتطالع البنات : انزين خالي حياكم.. بس عطني دقيقتين
بندت موزه عن خالها و قالت حق البنات انهم لازم يطلعن من الميلس.. شلن البنات عبيهن و لبسوها في دربهم لين الصاله.. رن تيلفون حصه و من عقبها امنه و روحن
تمت موزه هي و نور مع عمر يلعبون.. عمر تعب و حط راسه على ريل موزه وهو مدوخ
علي يه الصاله و هو يتنحنح : موزان وين عمر و مربيته؟
موزه: هاذم
نور تغشت لانها حاطه مكب كامل على ويها .. و في نفس الوقت رن تيلفونها
نور: موزي انا بروح بابا برع
موزه يالله .. طوفي بوصلج
طلعت موزه مع نور عند الباب و كان الدكتور عبدالرحمن واقف يم سيارته و الخال جد ركب سيارته و حركها عشان سيارة ابو نور تقدر تطلع
موزه: السلام عليكم دكتور
د.عبدالرحمن و هو يرمس بسرعه: و عليكم السلام .. ان شاء الله مايكون عمر تعبكم
موزه: لا و الله وايد استانسنا وياه.. وحليله دوخ من كثر المناقز
نور امنزله ادريشه تبغي تسمع الحوار بس ما رامت لان ابوها طلع ابسرعه
رد خال موزه و دخل البيت مره ثانيه .. و تم يسولف مع د.عبدالرحمن عند الباب
اما موزه فدشت داخل الفله
..............................

اتريا ردودكم الكريمه
تشجيع الله يرضى عليكم

[ا ل غ ل ا]

الجزء الأول عجيييييييييييييب ،، وببدا في الثاني ألحين ^^..

[ا ل غ ل ا]

أبا التكملللللللللللللللللللللللللللللللللللللللل لة

حلوة وايد ،،

ومتابعييييييييييييين ^ ^

بليز لا تتأخرين في الجزء =)

[قرموشة]

يا عيييينييييي
متاابعييين متاابعيييييييين
اترياا التكلمــه فنياانيي

[فنجان قهوة]

ا ل غ ل ا
حبيبتي تسلمين و الله ع الاهتمام
جان استانس وايد من ردج
ان شاء الله قريب الجزء الثالث بينحط

قرموشتنا
تسلمين حبيبتي على المتابعه الحلوه

[فنجان قهوة]

اتريا ردود باقي الاعضاء

[خنفروش]

فنيال ماشاء الله عليج الصراحه ممتعه

يالله اتريا تطورات القصه بين نورة و الدكتور عبدالرحمن

و تطور موضوع غنيه مع العاشق الولهان

[المحاق المشتعل]

فنجان قهوه

لم يتسن لي قراءتها بعد ولكني متشوقٌ لقراءتها

لي عودة بإذن الله تعالى

[فنجان قهوة]

خنفروش
شكرا ع النقد الحلو
ان شاء الله عن ما قريب بحط التكمله

المحاق المشتعل
انتظر هذه العوده و يهمني رايك كثيرا

[المحاق المشتعل]

السلام عليكم

تبغين الصراحه

سرت قبل أيام المكتبه

كنت ادور روايات

وكل الروايات إلي حصلتها خرابيط في خرابيط

واضايقت وايد من الروايات

وشخلت المكتبه كلها وحصلت ثلاث روايات أي كلام

لكن هاي القصه جميله وماعليها كلام

واسلوبها جميل جداً وعن نفسي عجبني الجزء الأول أكثر

ونحن في انتظار الجديد منج بإذن الله يافنانة الكتابه

أشكرج على إمتاعنا بهاي القصه الجميله

محاق

[فنجان قهوة]

المحاق المشتعل
الكلمات تكون فقط كلمات
و لكن عندما يشعر الانسان انها من القلب الى القلب يستلذ بسماعها
انتقاد بناء
نعم ان الجزء الاول احلى من الجزء الثاني
لان الجزء الثاني مبتور لانني لم انسخ الجزء المطلوب كاملا في المنتدى
التمس العذر من الجميع
ان شاء الله خلال ايام قليله ساطرح الجزء الثالث و انشاء الله سينال اعجابكم

[خنفروش]

يالله يالفنيال عذبتينا نبا نسير ابيوتنا // تعبنا و نحن نترياااا

[فنجان قهوة]

خنفروش
ما عاش من تعبك
افا الحين انا الي هب امخلتنكم اتسيرون ابيوتكم
جي تخلوني اغتر بعمري
خلاص تم ان شاء الله قبل الساعه 5 العصر بيكون الجزء الثالث في المنتدى