نقاش مفتوح في عالم فن الرسم

[المحاق المشتعل]

شوق القلوب

اشكر تواجدج القيم

ترى الموضوع موضوعكم

وإذا ما شاركتوا فيه بيتجمد بمعلوماته

والكبار مثل فنانينا عمة العيم والريشة الزرقاء فعلاً ما يقصرون

وان شالله نحن نستفيد منهم بس يكون هالشي بالتواصل فقط

فنحن في انتظار مشاركاتكم الطيبه

[المحاق المشتعل]

عمتنا ما زلنا في انتظار اجاباتج

[أنامل قلب]

احم احم ..

عندي سؤال >>> انزين شو انسويلج ..

امممم .. أأأأأ .. مممممم .. >>> حاسة جي سؤالي ماله خص ..
أو يمكن يكون خارج الحدود المقصود منها هذا الطرح ..

المهم وايد أهذرب ..
بس حبيت اسأل سؤال يمكن تشوفونه مب راكب عدل .. >>
>> ياخي فهمنا ان سؤالج غلط ذبحتينا ..

.
.

انزين بقول كلتوني .. ^_^ ..

إذا وحدة شايفة الرسم لها مجرد هواية ..
يعني كل ما بغت تريح رسمت ..
تبي تونس نفسها رسمت ..
تبي تفضفض رسمت ..
تبي تعبر رسمت ..

بدون مالدير بالها على قواعد الرسم .. وغيره من اتقان لأسس يستند عليها
كل رسام ..

وحبت هذي الاخت بعد اللوحات السنعه اللي شافتهم " احزرو عاده بأي منتدى "
انها تدخل بهالمجال .. اللي هو الرسم كإتقان ..
يعني بإدراك القواعد والطرق السليمه والصحيحه للرسم .. وباقي الخربطان >>
>> طبعا ماشوفه خربطان .. بس كلمه وتنقال ..

وووووو بدون هذربان زايد من اختكم الكريمه ^_^ ..

بشو تنصحونا ..
وشو هي أول عتبة لازم تخطيها عشان تستند عليه بهالمشوار اللي
إن شاء الله تفلح فيه بعد ما لوعت بجبودكم .. ..

ويعني وايد اشيا بخاطري عليها علامة " ؟!؟ " ان شاء الله
ببط جبودكم ابها ..
بس صبرو علي انتو ^_* ..

(( وطبعا سؤالي موجه لكل من عنده راي وفكر واحساس وموهبه تسكن كيانه .. ))

.
.

وبالنسبة لما سبق من اسئلة طرحها غيري وأجاب عليها مبدعين ..
حبيت أقول اني مريت عليهم وأعجبت ابهم كلهم الصراحة ..
وباذن الرحمن أكون من أول المستفيدين منها ..

.
.

ولطارح الموضوع جل الشكر والامتنان على اهتمامه
بكل ما يخص هذا الفن واهله ..

جعلك ربي من المرتقين ابها أعلى المراتب بما يرضيه دائما يارب ..

.
.

آسفة عالاطالة اخوي المحاق .. فكالعاده ماروم ألخص بالكلام .. : )
ولا حرمنا ربي من طيب لوحاتكم ..

لك احترامي ..

اختك أنامل قلب .. ^_^ ..

.
.

[المحاق المشتعل]

انامل قلب

أشكر لج مشاركتج أول شي

وهاي المشاركات إلي مثل مشاركتج هي إلي ركزت موضوعي عليها

من زمان كنت نفس الشي

أرسم من غير قواعد ولين اليوم اخرج دائماً من القواعد

ويوم حبيت ارسم في بداية حياتي ما كانت عندي اي قاعده

لكن حب التعبير خلاني ارسم .. وهاي اهم قاعده عشان اتحبين باقي القواعد

القواعد ما انوجدت إلا عشان اتحسن أدائج وبس

أما إنج لازم تلتزمين فيها طبعاً مب لازم

وحتى لو سويتي لوحات أي كلام أو بأي اسلوب وتسويلهم معرض خاص فيج تقدرين

مثل العصور السابقه يوم كان الرسم موجود وخاصه في العصور الحجريه

اتحصلين ابداع مذهل على جدارن الكهوف وهي موجوده إلى يومنا هذا

انا عن نفسي الرسم عندي هو أفراغ مشارعي في اللوحه وليس النقل وبس

وهي اسهل عن لغة الكلام لو كنتي ما تعرفين أي لغه

....

أختي الكريمه

إذا كنتي حابه الفن بتتعلمين وبتحسين برغبه كبيره في تعلم التفاصيل والقواعد

لكن أشويه اشويه ولا تضغطين على نفسج لأنه لو ما كنتي متشجعه أو أنج

كنتي تتعلمين هاي القواعد بلا رغبه فقد تكرهين هالمجال بعدين

لكن إذا الرغبه موجوده بيكون الأمر مختلف

طبعاً إلي بقوله بعد انه التعليم في الواقع غير عن التعليم في المنتديات

لأن في الواقع تختصرين الوقت وتتعلمين بسرعه

....

وأحلى مافي الرسم يوم اتكون عندج مخيله كبيره وترسمين منها

وبعد انهاء اللوحه اتحسين انج فضفضتي في لوحتج الخاصه وإلي يشاهدها

يستغرب ويحاول يفك رموزها ..

أنسي القواعد يوم بترسمين لنفسج عشان تريحين فكرج وقلبج من أي قواعد

لأنه الرسم بحريه فيه راحه للنفس أحياناً لكن إذا كل شي ابقواعد وخلاص

آخر شي بتحسين انج ما تبغين ترسمين وبتكرهين الرسم أو بتملين منه.


....

أنامل قلب

نحن هنا متواجدين لكم إن شاء الله فإن احتجتم أية مساعده فلا تترددوا في طلبها

وإن شالله بنتعاون على بلوغ افضل المراتب في هذا الفن.

....

أشكر لج مشاركتج واتمنى مشاركاتج ما تنقطع ابداً

موفقه بإذن الله تعالى دائماً

محاق

[عمة العيم]

ساااااااااااامحوني

تأخرت عليكم

بس صبروا عليه

بنزل رد تحفه

(^_^)

...

[أنامل قلب]

.
.

(( لكن حب التعبير خلاني ارسم .. وهاي اهم قاعده عشان اتحبين باقي القواعد ))

(( وحتى لو سويتي لوحات أي كلام أو بأي اسلوب وتسويلهم معرض خاص فيج تقدرين ))

(( انا عن نفسي الرسم عندي هو أفراغ مشاعري في اللوحه وليس النقل وبس ))

(( وهي اسهل عن لغة الكلام لو كنتي ما تعرفين أي لغه ))

(( إذا كنتي حابه الفن بتتعلمين وبتحسين برغبه كبيره في تعلم التفاصيل والقواعد ))

(( وأحلى مافي الرسم يوم اتكون عندج مخيله كبيره وترسمين منها

وبعد انهاء اللوحه اتحسين انج فضفضتي في لوحتج الخاصه وإلي يشاهدها

يستغرب ويحاول يفك رموزها ..

أنسي القواعد يوم بترسمين لنفسج عشان تريحين فكرج وقلبج من أي قواعد

لأنه الرسم بحريه فيه راحه للنفس أحياناً لكن إذا كل شي ابقواعد وخلاص

آخر شي بتحسين انج ما تبغين ترسمين وبتكرهين الرسم أو بتملين منه. ))

.
.

اممم ... عباراتك أعجبتني صدقا ..

و السموحة ..
بغيت أرد عكل عبارة ونقطة ذكرتها ..
بس لقيت بكل وحدة شغله محتاجة اني اعقب عليها ..

واحترت الصراحة ^_^ ..

بس فعلا رد ماتوقعته .. واسلوب راقي استاذنا المحاق ..
وان شاء الله تكون كلمتك .. ومقصدك من الرد وصل ..

أما عن هذي >>
>> (( نحن هنا متواجدين لكم إن شاء الله فإن احتجتم أية مساعده فلا تترددوا في طلبها
وإن شالله بنتعاون على بلوغ افضل المراتب في هذا الفن. )) >>

>> انت قلتها .. وعاد تحملو .. : )

شكلي بطرح واحد من رسومي البسييييييييطه >> دامها فضفضة
فبالغالب تحمل عناصر خفيفة والصفحة اغلبها فاضيه وهذا يحدده فحوا الخاطر >>
>> عاده الاتقان شلناه من بالنا والقواعد " حاليا "

بس شدو الهمه علينا .. انتو تراكم اتقنتو ووصلتو لمرتبه حلوه بهالمجال ..
واحنا اللي مبتلشين نبي نلحق ^_^ ..

وخلوني الحين ادور عالتخابيص اللي عندي .. والله يعينكم على بلواي ..

بس انتو اللي عطيتوني ويه ..

.
.

لك جل احترامي أستاذي >> تحمل تبخل علينا بالدرجات : )

والسموحه عالاطالة والازعاج ..

اختك أنامل قلب ..

.
.

ناطرين رد عمتنا .. ^_^ ..

وربي يجزاكم كل خير عهالمجهود الطيب ..
ولا حرمكم النية الصافية بكل قول وفعل لكم .. برحمته ..

.
.

[المحاق المشتعل]

عدنا من جديد

أنامل قلب

سعيد جداً بتواصلج هذا وفضفضتج الرائعه جداً

إلي إنتي قلتيه روحه أكبر مثال على الشخص إلي حاب يتعلم

لو ان شالله شو رسم

وانا عن نفسي ... لست بذلك الفنان الذي وصل اعلى المراتب في الفن

انا شخص ٍ هاوٍ أيضاً أحب الرسم وارسم متى ما شئت واقف فترةً طويلةً أحياناً

ولكن أحب ان اعبر عن الرسمه إلي ارسمها مثل كتابة القصه تماماً

أحب اتكون رسمتي قصه يقرأها من يشاهدها وتاخذ مني مجهود كبير اكثر عن النقل من الصور

لأن التفكير في كل زاويه من زوايا اللوحه ووضع الشي إلي مب موجود اساساً امامك يصعب ملئ

هذا الفراغ بالشكل الذي يعجب المتأمل..

لذا نبتدأ في ذلك الفراغ .. يحكى ان .. وعند نهاية الرسمه .. تكون نهاية القصه

حزينةً كانت ام سعيده ... فالغرض من هذه القصه التشويق بأيٍ اسلوبٍ كان

وهذا الامر موجودٌ في طريقة الرسم عندي وليس كل الفنانين من محبين هذا الجانب في الفن

وهنا اقول ان للفن ابواب فاختر الباب إلي يناسب مهارتك بدقه .

وعلى طاري القواعد الفنيه

بقولج قصة شخص كان يدرس ويايه

هالشخص كان وايد طيب كان ويانا في المعهد

وكان ما يعرف إلا القليل جداً عن القواعد الفنيه

لكن كان حبه لرسم الاشياء الغريبه حب عجيب

كانت لوحاته غريبه جداً... ومن لوحاته مزيج من وجوه لاصقه في بعض

واستايله كان جميل بس ماله قيمه مثل لوحات المدرسه الانطباعيه

واليوم هو رئيس الشعبة الفنيه على ما اعتقد في القرية العاليمه

استانست له وايد يوم عرفت انه وصل لهاي المرحله ويخبرني المدرس

انه الناس وايد عايبتنهم لوحاته .. رغم انه

إلمامه في الاساسيات ليست كافيه .. لكن القواعد مب كل شي في هالعالم

...

أختي الكريمه

سعيد جداً بمرورج وفضفضتج وإلي ابغيه منج كل ما في جعبتج من رسمات أو

أي شي تطرحينه عشان انفيدج قدر المستطاع من إلي اتعلمناه من غيرنا

ويفيدونج فنانينا الآخرين بإذن الله تعالى...

ننتظر لوحاتج بأسرع وقت ولا تترددين ابداً في الطرح

كل التوفيق ان شالله

محاق

[أنامل قلب]

.
.

أخوي المحاق ..

صدق فشيلة بهدلتك بهذرباني .. : )
بس ترى عباراتك وافكارك تعجبني وماقدر ما ارد اطل عليكم ..
وعاده انتو قبضو اعصابكم عني شوي ^_^ ..

.
.

امممم ..
بالنسبة لموضوع مابمقدور الرسام أن يقص من القصص من خلال
ما ينثر من خطوط لها مسارات مختلفة فهو أمر طيب وأراه محبذ ..
لما بذلك من عمق أكبر بمايجول بخاطر الرسام .. واحساس أصدق تميل اليه النفوس ..
فكما قلت .. (( لذا نبتدأ في ذلك الفراغ .. يحكى ان .. وعند نهاية الرسمه .. تكون نهاية القصه ))

وأما عن هذي .. (( وهنا اقول ان للفن ابواب فاختر الباب إلي يناسب مهارتك بدقه . ))
فهي فعلا أبواب .. ولا ينسج ماواراء ذاك الباب من عالم فائض .. إلا شخص
الرسام ذاته .. وفكره .. ومايملك من هواجس يبثها بتلك الصفحات الجامده ..

وكل ماكانت اللوحة تتطلب من الناظر اليها وقت اكبر لتمييز ملامحها ..
أو حتى لفهم توزيع العناصر ابها .. والسبب والمعنى والمقصد من كل منها شنو ..
كل ماكان للرسمه بهذي الطريقة نكهه خاصة لا يدركه الجميع ..

وحتى لو كانت الرسمة واضحه .. مثلا عنصر واحد فقط لا اكثر ..
يظل رغبة الناظر في العوم بتفاصيل هذا العنصر .. و ادراك توزيع الالوان والظلال فيه ..
من الامور المثيرة في فن الرسم ..
وأعيد وأقول هذا لايقوم به كثر .. >>> وتراه مجرد وجهة نظر ..

مثلا أن تسأل نفسك ..
لما رسمها بهذه الطريقة .. بهذا اللون .. أو حتى بدون لون ..
لما رسم بها هذا الشكل هناك .. لما اللون هنا اخف من هناك .. ؟؟

وكل ماظليت تعوم بالرسمه اكثر واكثر بكل تفاصيلها .. وتكرر النظر إليها أكثر من مرة ..
كل ما زادت الاسئلة وزاد حب الشخص لرسمة فلان من الناس مثلا ..
وترى مب شرط يفهمها الناظر بالمعنى اللي قصد ابها صاحب الرسمه ..
فلكل منا شخصه وفكره ..
ميول وخواطر وكيان ينظر من منظورها هذا الشخص لهذه الرسمه ..

.
.

أما عن صاحبك الطيب .. وموضوع القواعد وأسس الرسم ..
فسلملي أول شي عليه كونه رفعلي شوي من معنوياتي $_$ ..
وفعلا يمكن موضوع القواعد مايحدد قدرة الواحد على الرسم ..
ومامدى امكاناته لبث ابداعه ..
بس ترى مثل ماقلت بردك الأول .. إنها انوجدت يمكن بشكل أكبر لتحسين قدرات
الشخص في الرسم .. وهذا اللي أبيه .. لأن الحب والرغبه لهذي الهواية موجود ..
وبظلني أرسم حتى لو رسمي ما انعد ذات قيمة وجمال ..
لأني بالأول والأخير راسمتنهم لنفسي .. ولخاطر ما بقلبي ..
مثل الكتابة تماما .. وان كان للرسم نكهة مختلفة ..

.
.

أما عن اللوحات .. فآنا ماشوف ان اللي عندي " لوحات " ..
لكن خربشات يمكن أتجرا أطرح بعض منه ..
مو لزينهم طبعا .. ولا حلاتهم ..
بس لأني أدري إن بالنهاية لازم بحط شي عشان استفيد من آراءكم ..
وانتقاداتكم بشكل أكبر .. : )

.
.

وأخيرا بسكت بعد ماحشرتكم .. >>> مابغت تسكت هالبنت !؟ ياليتنا ماعطيناها ويه !؟

^_^ ..

لك منا جل الاحترام والتقدير أستاذنا ..

إختك أنامل قلب ..

.
.

والسموحة من الخاطر مرة ثانية ..

.
.

[المحاق المشتعل]

انامل قلب الطيبه

ليش هاي الحساسيه الزايده

بالعكس كلامج جميل والكثير يعاني منه مثلج ويخجل انه يتكلم فيه

والكثير ما يملكون شجاعتج في قول هاي الحقيقه

انتي تدرين يا أختي انه سبب طرحي لها الموضوع السبب الأساسي إلي ما بغيت اذكره

هو وجود فنانين غير قادرين على المشاركه والسبب متعلق في نفس موضوعج

وهو الإحراج أو الفشيله انه رسماتهم يمكن ما تعجب حد وغيره وغيره

....

تدرين أختي قبل كل هذا لازم اتعرفين والناس يعرفون ( ليس المرؤ يولد عالماً )

يعني محد بيصيب إذا كان ما يخطي

والياهل الصغير ما بيتعلم المشي إلا من عدة عثرات تواجهه في بداية حياته

وها حالنا في كل مجالات الحياه لنا عثرات في الدنيا لازم نصمد جدامها وما نخشاها

ولا ننحرج منها

وأحياناً تصادف الانسان إلي تصادفه هاي العقبات انه ينضحك عليه أو يستهزء فيه أو و أو

لكن الإنسان إلي يبغي يبلغ مرتبه لازم يصبر على هذا كله

أختي الكريمه

بذكر موقف عن نفسي عشان اصور أحراج هاك اليوم وإلي كان موقف صدمني جداً يومها

كنت انا وزميل لي في المرسم الحر

وجنسيته باكستاني ... وكان موجود قبلي بفتره اطول في المرسم قبل إلتحاقي بهم

وواصلنا التعليم معاً وثم قررنا انه نتعلم التلوين بالزيت رغم اني ما اعرف استخدام الزيت اساساً

وكان هذا طبعاً من سنين فائته عديده

وانتقلنا انا وهو إلى معهد آخر للتعلم على الألوان الزيتيه وفي المعهد الآخر

إلتقينا بمدرس في غاية الطيبة والفن .. كان معطاءاً وكان إذا رأى شخصاً يتعلم شجعه

كثيراً كثيراً ولم يذم عملاً قط .. كان بتشجيعه يجعل الفنان يتألق ويتطور بفترة قصيرة جداً من غير

ان يشعر المتعلم بذلك ... المهم وبعد حضورنا لتلك الحصص الفنية انا وصديقي

بدأنا مشوارنا بلوحة لطبيعة صامته ( جرات . أكواب . ... إلخ )

وكانت ظروفي اني لا استطيع القدوم دائماً إلى المرسم إلا إذا وجدت سيارة توصلني

فكنت اغيب احياناً اياماً عديده دون القدرة على أن الحضور

وزميلي كان بيته قريباً من المرسم فكان يأتي دائماً ولا يفوت لحظة من تلك الحصص الفنيه

ومن الطبيعي انه سينهي لوحته قبلي لاستمراره ولتأخري عنه بأيامٍ عديده

وبعد ان انجز لوحته اتت مديرة هذا المكان ورأت لوحتي والتي لم انتهي منها بعد

ثم ألقت كلمات كادت ان تبكيني يومها ( كرهت الرسم ) وكرهت كل شي في هاي اللحظه

وتمت تمدح زميلي والمدرس شكله تغير .. لكن رغم الحزن إلي اجتاح قلبي الصغير يومها

ياني هالمدرس الطيب وقالي ( صدقني انته لو تكمل لوحتك بتكون أجمل

عن لوحته لأنه ألوان لوحتك أجمل بكثير عن لوحته )

هالكلام إلي قاله لي مدرسي الفاضل في يوم خلاني أتعدى الكثير من العقبات في المستقبل

إلي ما كنت اتوقع إني في يوم اتعداها...

وهالي كنت أبغيه أوصله للناس إلي يخشون هاي التجربه

شو انخاف منه ؟ القلم بيخترب ولا الأوراق بتخلص من كثر ما نرسم ؟

ولا انخاف من كلام الناس وانتقاداتهم؟

المقيم العاقل لازم يعرف متى يقيم الشخص وشو هي المعايير المناسبه لكل تقييم

يعني التقييقم يكون للمبتدئين غير عن المحترفين

لأنه لو فرضاً وجه كلام قاسي لأي طفل في أي صف من صفوف الرسم

بتحصلونه بيكره حصة الرسم وبيكره الرسم وبيكره المدرس بعد

واحب أختم موضوعي انه بعد المثابره تحصدون افضل النتائج وليس ذلك إلا

للي يصبرون ... بعد الحادثه إلي صارتلي مع تلك المديره في ذلك المعهد

تأتي السنين اللاحق فتأيني هذه المديرة فتقول لي

يا فلان ترا يو اثنين يبغون يشترون لوحتك وانا ما بعتها لهم

وان دل هذا فبيدل على ان الصبر فادني وانه نصيحة المدرس وكفاحي خلوني اوصل لهاي

المرتبه ... لا اقول إني محترف ولكن كهاوي سعدت لوصولي لهذه الدرجه ...

لذا أختي الكريمة انتي وجميع أخواني وأخواتي الأعضاء

لا تضعوا حاجزاً يحول بينكم وبين آمالكم وأحلامكم الجميلة

شاركونا تلك الأحلام هنا ... لا تطفئؤا تلك الشموع الرائعه

نحن هنا لكم .. فلا تترددوا حتى لو كان بالرسائل الخاصه فلا نمانع ابداً

أختي الكريمه

ملاحظه : لا تنحرجي ابداً في طرح أي رد ومهما طال سرده
فبطول السرد نستفيد ونفيد ويقرأ الكثير ويرى الكثير انه يمر في امورٍ مشابهه

هذا موضوعج ولا تنحرجين في الكتابة فيه بالقدر إلي يعجبج ابداً
وربي يوفقج دوم ونحن في انتظار رسماتج بإذن الله

[أنامل قلب]

.
.

اممم .. ان شاء الله أخوي ..
كلام مقنع : )

بس حبيت أوضح أخوي ان الاحراج منوجد اهني لأن الرسم بالنسبة لنا
" لنا هذي لأي أحد شراتي ^_^ " مجرد هواية واسلوب
نفضفض فيه .. ومثل ماقلت قبل .. نريح بالرسم ..

وهذي اشيا التم بسيطه وبقدرات محدوده بالغالب لان
الشخص اهني معتمد عقدراته وعنفسة .. وما يراه من
حوله من ابداع وهواجس الغير في اللوحات ..

يعني الزبده >> هذي رسيمات ماجربنا نحطها بمكان كمنتدى مثلا ..
أوحتى إن نعرضها لأحد لأنها بالأول والأخير تظل مجرد هواية
وشغله نسويها لأن بكل بساطه نحبها وتريحنا .. مو لأن فيها اتقان ..
اللي ان شاء الله بنوصله بفضل الرحمن : )

والخجل بشكل عام يكون لهالسبب ..
وطبعا أدري إني مابنذبح لو عرضت شغله من خربطاني : )

.
.

ونقطة ثانية >> ماصدقت قالولها لا تنحرجين وطولي ^_^ ..
آنا من النوع اللي ما أحب المجاملات .. >> وهاي ممكن بعد
تكون من الاشيا اللي تمنعني أعرض أي خربطان لي ..
وعادي بالعكس أموت عشي اسمه انتقاد مهما كان اسلوبه ..
فخذ راحتك معاي بالانتقاد >> حط لي انتقاد لاذع استاذنا .. : )

وطبعا " رحم الله امرا عرف قدر نفسه " والحمدلله ادري إني مب
رسامه ولكن مجرد هاوية وأخربط عحسب المزاج ^_^ ..

.
.

ولك أخي شكر من الصميم على اسلوبك المميز في
في التعامل .. وطرح افكارك وما تملك من نصائح طيبة ..

^_^ لا حرمنا ربي من عذب رسماتكم ..
والفايده الصافية منكم ..

.
.

جل احترامي واسفي ..

.
.

[المحاق المشتعل]

أختي الكريمه انامل قلب

صدق ماشالله عليج استغربت من كلامج ويوم شفت الرسمات استغربت اكثر

من كثر ما نزلتي قيمة لوحاتج انا والله يوم ييت بفتح اللينك مال لوحاتج خفت

قلت يعني معقوله الرسمات بهاي البشاعه إلي وصفتيها

...

لكن يوم شفتها كل النقد مب على الرسمات إلي برأتها محكمة أبداعج فيها

لكن النقد بس على كلامج إلي قلل من قيمة روعة تلك اللوحات ولو كانت من غير ألوان

انا وايد أحب هاي الطريقه في الرسم ... وهاي الطريقه مثل ما قلت يستخدمها في الغالب

الخياليون ... مادري إذا لحقتي على صفحات الشعر في المجلات في السابق بتلقين رسمات بقلم

الحبر أو قلم الجرافيك إلي هو شبيه بالحبر ... ويكون التعبير في غاية الجمال والروعه

وأسلوبج مقارب لهالأسلوب وهذا مجال موجود في عالم الفن وليس على قولتج خرابيط

أبداً... هذا ابداع والأبداع مكون من خطوط رائعه ومبدعه وليست خرابيط

بس أنا جداً شاكر شجاعتج على طرحج للموضوع رغم انه كان لازم ينطرح من زمان

ورغم ان اللوحات جميله وفنانه بس صاحبة اللوحات كانت متردده للأسف وحرمتنا من هاي

المتعه أيام

أختي الكريمه

لا تحرمينا من جديدج أبداً ولا تتوقفين عن الكتابه في هالموضوع

بالعكس النقاش بينمي تفكيرنا الفني والحياتي أيضاً

ولا تعتذري ابداً على مشاركه قمتي فيها في موضوع هو أصلاً انوجد لكم

وبيكون موجود إذا انوجدت مشاركاتكم الكريمه أما اذا توقفت

بيختفي الموضوع من التواجد

أسأل الله أنه يوفقج ويعطيج ألف عافيه

[عمة العيم]

السلام عليكم

تأخرت عليكم

بس بعدني ماخلصت من اللوحه اللي بديت فيها و صورتها من البدايه و كل الخطوات

لكني براويكم لوحه واصله فيها في النص و بعدني ما انهيتها

هذه خلفيه فوشيا و ورود بيضا و فيها ظل وردي و اصفر و الورود مب واقعيه هذه عندي صوره مرسومه بالكمبيوتر




يمكن بعضكم يوم يشوفها يقول لوحه متكامله

لكنها غير متكامله

يوم بخلصها براويكم الشغل النهائي و بتعرفون شو الفرق

عسب تصدقوني يوم قلت لكم

لا تحكمون على الرسمه من اول مره اشتغلوا عليها اكثر تبين و تبرز و تحلو اكثر


اتريوني لين نهاية القصه

...

[المحاق المشتعل]

عمتنا

عرفت أي صوره هاي

شفتج حاطه موضوع من زمان ادورين صور مشابهه لهاي الصوره إلي رسمتي منها

الصراحه رسمتج جمليه وبالفعل أنا يوم شفت اللوحه عرفت انج مب امخلصه

بس عمتنا ... ما تفكرين اتزيدين شي أسفل اللوحه ولا بتتركينها بهاي الطريقه

صح الصوره إلي عندج مافيها أشي من اللأسفل لكن

أحس لوحتج لو اتحطين لها شي زياده تحت بتكون متوازنه وأجمل فشو رايج ؟

وننتظر إن شالله عقبال ما تنتهي الرسمه ونستمتع بشوفتها

بالتوفيق عمتنا

محاق

[عمة العيم]

حي االله محاقنا

هي والله افكر احط اغصان من تحت

وهذه اللوحه يبتها تسلمون عليها بس بعدهاااا ماخلصت

[المحاق المشتعل]

روعه استوت

عمتنا اللوحه ما خلصت بس ألاحظ إنج ترسمين ابفرشاه صغيره حق المساحات الواسعه

ليش ما تستخدمين فرشاه كبيره وتعطين شكل أروع للخلفيه

إذا استخدمتي فرشاه كبيره وفيها شعر كثيف بيكون أدائج للخلفيه جداً جميل

حاولي اتجربينها

وماشالله عليج الورود قامت تحلو أكثر

يالا ننتظر التعديلات بفارغ الصبر