شـاهـد ما شـفـش حـاجـه !

[كـلـكـلـووش]

الـســلام عــليــكم

من زمــان ما ضـــجت و ما نــزلت موضــوع في الفضــفـضه ( الحمــدلله )

والله مــب عــارف شو اســوي
ما احـب حـد يــاخذ عــني فــكرة غــلط ! خصــوصا اذا انا ما اكــون غــلطان او مب مسـوي شي .. و ايي شــخص وياخذ عـنـي فــكرة غــلط !

يعني تخيــلو !

شخـصـين اعــاملهم بـكل احــتـرام .. و ســـاعدوني واايــد و احتـــرمهم جــدا جــدا .. فــي يوم من الايــام ! اييني واحــد منهم و يقــولي انت رامــس عــنا !! كيــف ويــن ! الله يــعلم !!
لــدرجة انهم ما ييـــلسون فــي المــكان اللي انا ايــلس فــيه ! و كــل ما ســألتــهم شو الســالفـه ؟! يقــولون لي وصــلتنا رمســه انك رامــس عــنا و الشــخص اللي قالنه نحن واثــقين فــيه و ما يجــذب عليــنا ! انزين كيف و متى و شو هي الرمســه ! الله يــعلم

انا واثــق من عــمري اني مب رامــس على حــد ! بس اللي قــاهرني ان هالشــخصين خصوصا ما كــنت احب ان يصــير بيني و بينهـم موقف مثل هذا خصــوصا انهم ســاعدوني وااايـد و احتــرمهم واايـد .. و اللي قــاهرني اكــثر ان انا جــني ( شــاهد ما شــفش حــاجـه ) ما اعرف شو الرمسه و لا اعرف شو السـالفه ! مع انهــا تخصــني .. خصــوصا ان في نــاس مــاخذه فــكرة عــني !

شو اســـوي

> ع فــكرة عــمري ما اتضــايجت لنــاس زعــلو عــلي شــرات ما اتضــايجـت هالــمرة <

ســلام
كـلـكـلـووش

[شوق القلوب]

الســلام عليــــكم..

هالشـــعور جداً يضايق خاصه مع الاشخاص اللي من زود ما اتعزهم و تحترمهم ما ودك اتضايقهم بشي..

..

بو شهــاب.. حاول وياهم بعد مره كلمهم و بينلهم انك صدق مب عارف شو السالفه و انك لو صدق غلطان بتعتذر و قولهم انك اشكثر تحترمهم و ما تباهم يضايقون منك..

اذا ما نفع هالشي.. دور على واحد ( ثقه ) اتكون علاقته طيبه وياك و وياهم.. خلهم يخبرونه شو اللي صار بالضبط ومنها اتعرف شو مستوي..

..

الله يعينك يا اخوي.. بس صدقني دامك مظلوم بيي اليوم و بيعرفون هالشي.. ولو عقب سنين

[قصايد غلا]

وعليـــكم السلام ورحمـــة الله وبركــاته

كلكلوووش لا تتكدّر دامك واثق من نفسك ، وإذا هم مب طايعين يرمسون أو يقولون شو هي الرمسه شو بتسوي بهم

عاملهم شرات قبل حتى لو هم جازوك بالجفــا ، بس إذا هم من النوع اللي يصدقون كل من هب و دب اغسل ايدك منهم والحق ويــااااك لأنك مب رامس عنهم ولأنهم بروحهم صدّقوا الرمسه من غير لا يتأكدّون

اصبر عليهم شويه لين تهدا النفوس ، عقب فتره ايلس وياهم أو اتصل بهم واسألهم عن الرمسه وقول لهم : انا ما رمست عنكم بشي غلط ، و ما أنسى الخير اللي جدّمتوه لي في يوم من الأيام
و أنا لو رمست عنكم عبارة إني رمست عن عمري ، واللي ما أرضاه لعمري كيف برضاه لكم
واستسمح منهم

إذا رضوا زين وإن ما رضوا تراك سويّت اللي عليك ، وخيرتهم بيردّون شرا قبل يوم بيعرفون الحـــق

والسموحه منك أخويــه
سوري على فلسفتي الزايـده ...

[وحيد الدرب]

و عليكم السلام والرحمة
أخوي كـلـكـلـووش
انا اضم صوتي لصوت أختي شوق القلوب
انت حاول ترمسهم اسالهم وقلهم لازم تخبروني شو اللي سمعتوه بالضبط مب مهم من منو عسب محد ينحرج وقلهم مثل ماسمعتوا الرمسه من الريال لازم تسمعون كلامي وردي وعسب اعرف كيف ارد عليكم لازم اعرف شو اللي وصلكم بالضبط؟؟؟؟؟

واذا مارضوا يسمعونك حاول تدخل واحد من الشباب اللي تثق فيهم يكون واسطة صلح من بينكم.

والصديق اللي ماكسبت محبته ماتخسره.

[كـلـكـلـووش]

القهر مب جذه .. الــقـهر انهــم يحـــاولون يبيـــنون لــي انهم شــرات قـــبل !
بس انا ما احــب حــد يشــل فــي قــلبه عــلي و بالنفــس الوقــت انا ما غــلطت عـــليه و وصــلت له رمـــسه غــلط عـــني !!

حــــاولت آخــذ منهــم رمســه بــس مــا شــي فــايــده !

[شغل عبط]

يا حليلك أخوي لازم أحد يواسيك

ولا تزعل حاول إنك تصارحهم وهذا أحسن شيء

ذكرتني في سالفه صارت لي من فترة

ولكن مش معاي مع غيري

ومش في منتدى واحات بن دبي

ومش مع الأعضاء ؟؟؟؟

مع مشرفات لسالنهم طويل ؟؟؟

أدبتهم ثلاثتهم

وخليتهم يطلعون من المنتدى بكرامتهم

المفروض المشرفين يتفاهمون ويتناقشون ويتساعدون ؟؟!!

اما هن لا الشباب المشرفين في المنتدى كانوا جدا محترمين

يدخلون ويكتبون ريلاكس بس أو لا تعليق

أما هن هواشة لين ما لاعت جبودهن

فلانة رمست عني وعلانة قالت عني

هادين أقسمهم وطايحين في قسم المشرفين

و أنا كنت مشرفة قدرت أقبضهن الباب

[الجنيه]

السلام عليكم ورحمة الله وبركاته ..

يحليلك يا كلكلوش صدق ما تستاهل الي صار وياك وبالفعل موقف لا تحسد عليه وانا لو كنت مكانك ما بتحمل الوضع ثانيه .. اعتقد افضل شي اتسويه انك اتصارحهم بالي عندك يعني قول لهم انك انت واثق من عمرك ومتأكد انك مستحيل ترمس عنهم لو بكلمه غلط وانه الي وصل لهم الرمسه يمكن يكون اهل لثقتهم وما ينلامون انهم ما يصدقون غير هالشي وافضل شي يسوونه يواجهونكم اذا رضوا بالموضوع انت عارف تتصرف واذا رفضوا انت ما عليك غير انك تثبت لهم حسن نيتك واتعاملهم نفس قبل واحسن وصدقني كثر الدق يفج اللحام حتى لو هم شالين بخواطرهم عليك الا ما ايي يوم ويندمون ع انهم اتهموك من دون دليل ..

ربي يصبرك ويزول سوء التفاهم الي مبينكم ,,, الله لا يجيب الزعل بينك وبينهم

[تحفه]

ابدا ما أحب انحط في موقف ونا ماعرف شو سالفتي ..

الله يعينك .. ( يمكن مقلب ) XP

[تنينه]

ابدا ما أحب انحط في موقف ونا ماعرف شو سالفتي ..

الله يعينك .. ( يمكن مقلب ) XP

يـمكن صدق مـقلب ,,

[طير الحب]

تعرف ما عندي حل لأنه نفس موقفك صاب ريلي ...أول شيء انا ضد أنه اي انسان عاقي يسمع الرمسه من فلان وعلان وعلى اساسها يقيم الشخص...عيل شو خلو للحريم...شوف انا الكلام الي اصدقه لازم يكون جدامي اسمعه بأذني مش فلان قالي...

والله ما اعرف بشو انصحك موقف سخيف ويقهر...ليش ما تواجههم وتقولهم شو الرمسه الي سمعوها وعقب اكيد بتقدر توصل لهم وجهه نظرك.

[خيال الحب]

السلام عليــكم

مرحباا والله باخوي كلكلوش..

,, الله يعيــــــــنك ياخوووووووووووي ,,


,, دام انهم غاليين عليــك.. وانته غالي عليهم لازم ما يصدقون هالرمســـه..

احسن شي انك تدور لك ربع يداد احسن عن هذيلا .. يوم انهم صدقوو كلام العذال فيـــك..

بس حاول تقنعهم ..


وبالتوفيق يالغالي

[قرموشة]

صح يمكـن مـقـلــب !
بس لو مـاكـان الله يعيــنكـ الصـراحـه يا بـو شهـاب ..

بس دامكـ واثـق مـن عمـركـ فـلا تهتـم وخـلك طبيعــي .. أو حـاول عـلى الاقــل ..
وبالتدريــج صدقنـي بتعــرف ..

[وحيد الدرب]

الله يعينك أخوي كـلـكـلـووش

بس خليك أحسن عنهم وعاملهم مثل ماكنت تعاملهم قبل ولا يتغير طبعك عليهم وانشالله ف النهاية بيعرفون انهم على خطاااااا...

[دانة حتا]

مسكيـــــــــــــــــــــــــــــــن مظلوووم الفقير يا حليلك
ما عليك منهم اخر شي بيعرفون الصدق وبيعرفون
انك طيب وما يخصك بالسالفه ..انت خل الامور تهدا بينكم عقب
سير وكلمهم قولهم ذاك اليوم جذا جذا صار ,ممكن اتخبروني السالفه ؟؟
واكيد بيردون عليك
دونت ووري كلكلوووش

[نجم سهيل]

يقول الشاعر
لئن كنت قد بلغت عني وشاية................. لمبلغك الواشي أغش و أكذب

مثل ما ذكرو أخواني و أخواتي ان افضل أسلوب هو المواجهه و لكن عادة ما يقوم هذا الصديق بالتستر على الواشي
بأعتبار بوحه بالسر خيانه للأمانه و من ناحيتي أراه الملام الأول لأنه خسر صديق عمره لأدنى سبب دون التيقن و لربما
حمل له هذا الصديق من الحب و الاخلاص ما لا يعلمه الا الله.