<font color='#000000'>مرحبا جميعا ...
وسوري على التأخير .....
<span style='color:darkblue'>في بيت اليد واليوم هو الجمعه ... يت نوره من ابوظبي علشان اتسلم على اخوها سلطان ... وكانوا كلهم متجمعين فالصاله .. وبعد الغدا راح اليد حجرته علشان ايريح ... والباقين يلسوا ايسولفوا ...
راشد : اقول سعيد شو رايك نسير نلعب بولنج
سعيد : اوكي رشود ... ( سعيد اكبر عيال نوره وعمره 15 سنه )
يمعه : احم احم ... على وين ناوين الشباب
راشد : اظن انك سمعتني وانا اقول ... بنسير نلعب بولنج
يمعه : رشود تكلم بأدب ... وماشي سيره
راشد : خالي ... تعرف صالة البولنج قريبه ... بنسير انغير جو انا وسعيد ... ياي من بوظبي يعني ما يصير يقعد فالبيت ... لازم اطلعه
سعيد : هيه خالي خلنا نروح .... اعرفك طيوب
يمعه : لا طيوب ولا حبوب .... قلت ما شي سيره
راشد : يعني شو نسوي هني ...
يمعه : روح المزرعه وطالع البيدار شو يبي ... من يومين متصل ويدك محتشر
راشد : هيه حق الشغل برايني اطلع ... ويوم ابي اغير جو ... ممنوع الطلعه ... امحق عيشه
يمعه : شو مب عايبنك
راشد : لا عايبني ... افا عليك خالي منو قال ... ياللا سعيد خلنا انروح
سعيد : ياللا امايه انا بروح ويا رشود
نوره : زين الله يحفظكم بس لا تتأخرون ...
راشد : ان شاء الله خالوتي
وطلع راشد وسعيد وراحوا المزرعه ...
نوره : اشفيك يمعه على رشود ... مخلي دوبك من دوبه
يمعه : هذيلا ما يبالهم غير جي ... والا اذا حد خلاهم على كيفهم بيضيعوا وبيسون لنا مشاكل
نوره : حشى واقف له على الوحده ... بيعافك بعدين خف عليه
حصه : هي والله خالي ... عاد الا رشود فديته خدوم ويسوي أي شي تبونه منه
يمعه : هيه محامي الدفاع تراه اخوج اكيد بدافعي عنه
نوره : لا اله الا الله
يمعه : محمد رسول الله .... يالله انا بسير ... سمحولنا
سلطان : ها على وين يموع
يمعه : بسير عند الربع وبعدين بسير المزرعه ... بعزم رشود وسعود على طيور
سلطان : زين والله طلعت فيك الرمسه ... لو يدري رشود ان نوره كلمتك ... جان خلاها كل يوم تكلمك وتتوسط له عندك
يمعه : لا والله ... مب من رمسة نوره عزمته ... اباه ينتف ريش الطيور
سلطان : الله اكبر انت ما يفوتك شي ... مسكين رشود .. ما ادري كيف مستحملنك وياه
يمعه : قم سير معانا .... بنعشيك جبسه بطرانه
نوره : ومنو يطبخ لكم
حصه : الطباخ الشهير الشيف يمعه بن حمد بن علي
يمعه : هيه يلسي اطنزي ... انتي لو ذقتي طبخي بتاكلي صبوعج ... بس رأفتا مني ما بعزمج
حصه : وليش ما بتعزمني
يمعه : علشان ما تاكلي صبوعج
سلطان : عيل ما بنخلي هالعزيمه اتفوتنا
نوره : شو سلطان بتروح معاه ... الظاهر انه اغراك
سلطان : شو نسوي بعد السالفه فيها اكل
وطلع يمعه وسلطان راحوا المزرعه ... واول شي بيروحوا البر وبيصيدوا طيور وبعدين بيسيروا المزرعه وبيطبخون وطبعا ربع يمعه لازم متواجدين ومن بينهم ياسر وحمود عيال عمه محمد ويقعدوا فالمزرعه يسولفوا ويلعبوا بالدراجات ويتعشوا .....
الساعه تسع فالليل رجع سعيد مع راشد على اساس يرجع مع اهله بوظبي ، كانت علاقة سعيد في عيال خالته ام حميد قويه لانه متربي معاهم من يوم صغير وخصوصا حصه لانها هي اللي كانت وايد تهتم فيه ولان حصه علاقتها قويه بخالتها نوره ، اما علاقة سعيد براشد فكانت زينة وكانوا دايم مع بعض واغلب الاجازة يقضيها سعيد فالعين عند قوم يده ......
وبعد ما راحت نوره وعيالها ، طلعت مهره مع حصه وراحن حجرة حصه اما ميره فرجعت اتكمل دراستها واليد واليده راحوا حجرتهم اما راشد قعد يسولف مع امه ، وفي حجرة حصه كانن مهره وحصوه يسولفن ....
حصه : شوفي كيف البيت يكون هادي بعد ما تروح خالتي
مهره : شو قصدج يعني فكه منها يوم راحت
حصه ( تمسك مخده وتفرها على مهره ) : عنبو هالويه الحين منو قال جي ... اتعرفيني اموت في خالتي
مهره : شو تموتين هذي كلمه قليله ... والا هي ما عندها غير حصوه ... ما ادري شو مسويتلها سحر انتي
حصه : اعوذ بالله من الحساد ... شو غيرانه مني
مهره : الصراحه اغار
حصه : عاد خالتي عندها ذوق تعرف قدر الناس
مهره : شو قصدج يعني .... اني انا ما لي قدر ... اوكي الله ايسامحج
حصه : الله يسامح الجميع .... الا قوليلي شو اخبار ريموه
مهره : ريم بنت عمي محمد ما غيرها
حصه : لا تستهبلين ... يعني حد غيرها
مهره : زينه .... الا انتي شو رايج فيها
حصه : الصراحه ... ما ادري بس ما استلطفها وايد تهذرب لعلوعه ... وما تخلي شي ما تخبر به
مهره : هيه صح ... أي شي تعرفه اتخبربه ... حتى ما اامنها على اسراري
ويدخل راشد عليهن ....
راشد : ها فمنو تحشن فهالوقت ...
حصه : هلا رشود ما شي قاعدين انسولف
راشد : اممممم اتسولفن .... قصدج اتحشن ... هذي غيبه غيبه ... استغفر الله ما زين تتكلمن فالناس الحين ... ايقولكم المثل .. رقاد ولا طاري العباد ...
مهره : اونك الحين .... لا يكون ياي من عند ميروه
راشد : لا ياي من عند امي
مهره : زين عطتك حنان
راشد : هيه وخلصته بعد ... ما خليت لج شي
مهره : شو نسوي ما نروم تراك دلوعة الماما
حصه : مهروه .... اونج الحين يالغياره
راشد : كيفي انا وامي ... ولدها الوحيد الموجود عندها
مهره : زين يا كاكا .... شوي شوي على عمرك
راشد : مهروه يوزي عني والا تراني بكفخج
مهره : هيه تروم انت
حصه : مهره حبيبتي سيري نامي باجر عندج دراسه
مهره : يعني طرده ... اوكي من اللي ايي حجرتج
حصه : مب طرده ... بس ابي مصلحتج ... تصبحين على خير ...
راشد : واااااااااه طردوها ... يالله سيري انخمدي
وطلعت مهره ولا ردت على راشد اللي كان يحب يغايضها لو على اتفه سبب ... بس حب النقره من بينهم شي عادي كل يوم ... واذا مر يوم ما اتناقروا فيه بيكون شي غلط ....
********
في اليوم الثاني اللي هو يوم السبت ... وفي الجامعه راحت وفا الرباعيه تبي ترمس حصه لانها هي دايم تحصلها هناك ويوم دخلت للرباعيه شافت حصوه قاعده مع ربيعتها العاش ... ويت صوبهن وسلمت عليهن ... وقعدت معاهن تسولف ....
حصه : وينج وفا محد يشوفج مختفيه فهالجامعه
وفا : تعرفيني طالبه مجتهده ....
عايشه : يا سلام على الطالبه المجتهده ... قولي الا في الكوفي هاوس هي وشلتها ما اتي الرباعيه
حصه : اها ... يعني دايم فالكوفي ... انا اقول بنت عمي بعد ما زود الاجتهاد اللي عندها
وفا : يغربل عدوج يالعاش ... زين جي اتشوهين صورتي جدام بنت عمي
عايشه : يعني هي اللي ما تعرفج الحين
حصه : اعرفها يالعاش .... ما يحتاي اتخبريني عنها
وفا : زين بعد يوم اتعرفيني ....
عايشه : يالله عيل عن اذنكن انا بروح عندي محاضره
وفا : وين بعدنا قاعدين
عايشه : لا طال عمرج ورايه خط المخج
حصه : خيبه المخج ... الله يعينج ... بتحصلي السيكل موقف جدام الباب وانتي طالعه اخذيه بتوصلي بسرعه
عايشه : ويهالويه ... الهندي مالكم انا اركب على سيكل .. اتخيلي شكلي
وفا : ما فيها شي .... الا اقول شو عندج فالمخج
عايشه : عندي محاضرة أدب طفل
وفا : عند منو تاخذين أدب لايكون عند الظنحاني
عايشه : لا انا اخذه عند محمد موسى ... وبنت عمج الحبوبه تاخذه عند الظنحاني
حصه : هيه انا اخذ عند الظنحاني ... لا يكون بعد ما عايبنج
وفا : لا افا عليج ... بس اسأل ... يقولون
حصه ( وهي تقاطعها ) : وفا شو قلنا بطلي كلام عن الدكاتره ... انتي حمدي ربج يوم حد من هالدكاتره يستحمل لسانج
وفا : افا يا بنت عمي عاد اتقولي عني جي
حصه : والله من اللي اشوفه ... ما مخليه دكتور في حاله ... وكل دكاترة الجامعه يعرفوج
عايشه : يالله ابويه ما فيه اتأخر على الشيبه ... والا بيخليني موضوع محاضرته اليوم ... مع السلامه
حصه ووفا : مع السلامه
وفا : حليلها والله ... جدامها هالخط وفهالشمس
حصه : عادي فالاخر تراها بتوصل وهذي مب اول مره اتروح المخج
وفا : هيه صح ... تراج متعوده على الكراف
حصه : قولي اجتهاد
وفا : ما علينا من الاجتهاد الحين
حصه : اشوف فثمج رمسه
وفا : خطيره بنت عمي ... تعرفني وفاهمتني .... طال عمرج هذا وانا قاعده فالليل يتني فطوم الحبوبه اتعرفينها اختي ... الي هي بنت عمج
حصه ( وهي طالع وفا بنص عين ) : بترمسي والا شو يعني ... بالله عليج انا الحين ما اعرف فطوم قاعده اتخبريني عنها
وفا : انزين شوي شوي عليه يا يتنج السالفه .... الصراحه انتي شو رايج في خالج سلطان
حصه : ريال والنعم فيه
وفا : سمعوا هذي ... اونه ريال والنعم يعني هو حرمه تراني اعرفه ريال ... يالذكيه انا اقصد تصرفاته
حصه : اها تصرفاته .... شو عرفني عنه
وفا : وابويه انا ... جيه خالج هذا
حصه : انزين وخالي ... اصلا محد يشوفه كله في بوظبي وفالشهر ايي مره والا مرتين ... اتعرفينه ما يحب يختلط مع يدي ... ما يتواسا مع الشيبه
وفا : ليش ... شو بلاه عمي والنعم فيه
حصه : ما اعرف الصراحه وايد عن خالي سلطان ... قبل ما يسافر كان قليل ما نشوفه ... والحين يوم رجع من السفر قعد الخميس والجمعه والبارحه فالليل راح بوظبي
وفا : انزين انتي شو رايج فيه يعني
حصه : تبي الصراحه بالمقارنه مع خالي يموع هو شيخ وبعدين خالي سلطان فري وكله عنده عادي
وفا : اها زين
حصه : اطمني بترتاح فطوم معاه ... ان شاء الله ... بعدين ايسدها اني انا بعيش معاها في نفس البيت
وفا : اخاف الا تتعقد من هالسالفه ... الله يعينها عليج
حصه : ما عليج يالسباله
******
الساعه 12 ونص وجدام مدرسة خليفة بن زايد الثانويه ... كان راشد واقف مع ربعه ... يسولفون وكل واحد يبي يروح بيته وراشد راكب في سيارته ومعاه عبدالله ربيعه ... وفي نيسان وسط واقف عداله مال ربيعهم خالد .... وطبعا كلهم ما عندهم لياسن .....
خالد : رشود شو بلاه نيسانك ...
راشد : ما ادربيه من امس فيه هالصوت ... بوديه العصر الصناعيه ان شاء الله
خالد : عيل بشوفك هناك العصر
راشد : لا يكون تبي اطفر بالهندي ... تراه كرهك
خالد : لا بسير اركب هيدرز
راشد : هو ناقص نيسانك اتحط فيه ... بس بعده حمار ما يمشي الا حشره على الفاضي
خالد : حمار في عينك ... يالله سابقني بنشوف نيسانك اللي ما فيه هبه
راشد : اوكي بنشوف
عبدالله : رشود اذا بتتسابق ويا خالد انا بنزل
راشد : يالخواف ... ما بييك شي ... دريول طال عمرك ... وبعدين هذي مش اول مره
عبدالله : ومش كل مره تسلم الجره .... اعوذ بالله من بليس
بدأ السباق بين خالد وراشد وكان خالد في المقدمه في البدايه بس بعد ما تخطى الدوار كان راشد هو اللي سابق ... ويوم يا الدوار الثاني سبق راشد ... مر راشد بسرعه لانه كانت في شاحنه يايه من الصوب الثاني ... وكانت سيارة خالد ورا سيارة راشد ... وراشد في اخر لحظه طلع جدام ما تدخل الشاحنه في الدوار وسمع صوت قوي ... بس خالد ما طلع ... كان راشد يطالع في المنظره الجانبيه يريد يشوف نيسان خالد وراه بس ما شاف شي ... حس ان قلبه انقبض ويقول في خاطره يمكن دار على الدوار ..... والحين بيطلع ... والصوت .. شو الصوت اللي سمعته .... وفي هالوقت كان عبدالله يرمس راشد بس راشد كان في عالم ثاني .... وبعد شوي انتبه على صوت راشد وهو يريده ايوقف على جنب ..... ووقف راشد وهو ما عارف شو يسوي ....
عبدالله : راشد ... راشد ... شكل خالد دعم فالشاحنه
راشد : لا مش معقوله .... يمكن دار على الدوار ورد بطريجه ... ما يريدني اغلبه
عبدالله : خلنا نسير انطالع
ونزل راشد وعبدالله وراحو صوب الحادث ... كان النيسان منعدم والناس بدت تتجمع وبعضهم ايحاولون يطلعون خالد بس ما قدروا ايسوا شي وبعد شوي وصلت الشرطه والاسعاف وطلعوا خالد ... كان كله مغطاي بالدم وشلوه المستشفى .... كان راشد ايطالع والدمعه في عينه ... ايحس انه هو السبب ... وحاس بالندم .. بس شو ينفع الندم الحين ... المهم يعرف شو صار في خالد عساه ما مات .....
عبدالله : الله يعين .... يالله رشود انسير وخلني انا بسوق شكلك تعبان ولا بتروم اتسوق
راشد ساكت حاس عمره بيختنق والدمعه في عينه ... ما يقدر ينطق ... ما يقدر ايقول شي ... وطول الطريج وهو على هالحاله .... ووصل عبدالله بيت راشد .... كان يمعه راجع من الصلاه الظهر ويوم شاف عبدالله ايسوق النيسان استغرب .... ونزل عبدالله وسلم على يمعه ....
يمعه : شو بلاه رشود
عبدالله : تعبان شوي .... واحد من الربع سوا حادث
يمعه : منو اللي سوا حادث ....
عبدالله : خالد الكعبي ... اللي فالمسعودي
يمعه : هيه عرفته .... وعسى ما تعور
عبدالله : والله ما ادري .... شلوه المستشفى
يمعه : لا حول ولا قوة الا بالله ..... وشو السبب
هني عبدالله ما قدر ايقول ليمعه ان خالد كان يتسابق ويا راشد .... لانه اكيد راشد بيروح فيها ... عاد كله ولا خاله يمعه يدري ... بيذبحه لو يدري ....
عبدالله : كان مسرع على الدوار ودعم في شاحنه
يمعه : ها رشود شفت السرعه والخبال .... يوم اقولكم شوي شوي ما اييبكم
راشد ساكت ولا نطق بكلمه .... ومشى ودخل داخل البيت وراح حجرته على طول من غير ما يسلم حتى على امه اللي كانت قاعده فالصاله ... مر من جدامها ولا كأنه شافها ... وبعد شوي دخل يمعه ....
أم حميد : شو فيه رشود
يمعه : واحد من ربعه مسوي حادث
أم حميد : بسم الله وعسى ما تعور
يمعه : والله ما ادري ... الحين بتصل في اخوه وبشوف شو السالفه
أم حميد : من ولده هو ....
يمعه : ولد منصور بن سعيد الكعبي .... اللي فالمسعودي
أم حميد : هيه عرفتهم ... مسكينه امه والله ... الله يعينها
دخل راشد حجرته .... ما عارف شو يسوي .... حاس بضيقه فضيعه في صدره ... ايحس انه هو السبب ولو صار شي في خالد كيف بيسامح عمره ... ويلعن الساعه اللي وافق فيها انه يسابق خالد .... بس خالد هو اللي طلب السباق .... ودخل يمعه عليه ويا صوبه ....
يمعه : رشود ... لا تخاف ... ان شاء الله خير ... ولا بيصير غير اللي الله كاتبنه
راشد : خالي ... انت عرفت شي عنه
يمعه : اتصلت في اخوه سالم ... وقال انه بعده داخل العنايه ما يعرفون عنه شي ... بس الحمد لله انه ما راح فيها
راشد : الحمد لله على كل حال
يمعه : يالله عاد رشود .... ان شاء الله خير ... واتعض عاد عن الخبال
راشد : ان شاء الله خالي
حس راشد براحه شوي ... اطمن على خالد انه ما مات ....
***
الساعه اربع جدام الجامعه كان راشد يتريا حصه تطلع ونادى عليها عبدالسلام .... وتأخرت حصوه ما طلعت فقرر راشد انه يتصل في خاله يمعه يتخبره عن خالد ... لان سالم اخو خالد ربيع يمعه ....
راشد : الو .... السلام عليك
يمعه : وعليك السلام ..... ها رشود شعندك
راشد : بغيت اتخبرك عن خالد
يمعه : ما ادري توني مرمس سالم وايقول انه يته ضربه قويه على ريوله وظهره واحتمال انه ينشل ... ورضوض في كل جسمه وراسه كان وايد متعور ... بس الحين ايقول احسن
راشد : ينشل ... اعوذ بالله ... الله يعينه
يمعه : قلت احتمال ... انت وين الحين
راشد : جدام الجامعه بييب حصوه
يمعه : زين بس شوي شوي
راشد : اوكي .... مع السلامه
ركبت حصه السياره وسلمت على راشد واللي حست انه متغير ... مب راشد اللي تعرفه .. كان ساكت ولا ينطق بكلمه ... واتشوف الدمعه في عينه تبي تنزل ... بس يحاول انه يمسكه على قد ما يقدر ....
حصه : راشد حبيبي شو فيك
راشد : ............
حصه : رشود فديت عمرك خبرني شو بلاك
راشد : ما شي
حصه : يعني ما بتخبرني شو فيك .... هذي انا حصوه اختك اللي تحبها
راشد : حصوه الحين ما اقدر اقول شي .... انا مركز فالسواقه
حصه : اوكي على راحتك ( وهي تتكلم شوي شوي ... اونه مركز فالسواقه )
وصلوا للبيت وطول الطريق ولا نطق بكلمه .... نزل وراح حجرته وبعد ما غيرت حصوه ملابسها راحت له ... تبي تعرف شو فيه ....
حصه : راشد قولي شو فيك
راشد : ما شي ... واحد من الربع سوا حادث ...
حصه : بسم الله ... وشي ياه
راشد : فالمستشفى ويمكن اييه شلل
حصه : مسكين والله .... ثانويه عامه ... الله يعينه ويعين أهله
راشد : هي والله ... الله يعينهم
حصه : انزين ما رحت اتزوره وتطمن عليه ....
راشد : لا ما رحت ....
حصه : رشود شو السالفه ... انت شو بلاك ...
راشد : تبي الصراحه ... انا كنت السبب ...
حصه ( وهي فاجه عيونها ) : شووووو
خبر راشد حصه السالفه كلها .... كان يحب يفضفض لها لانها اقرب شخص له ... كانت تفهمه وتنصحه بطريقه ما تزعله ... وكان يحبها ويحترمها وهي نفس الشي .....
حصه : الحين منو قال أنك أنت السبب ... الله كاتب أنه يستوي جي .... ليش اتخلي عمرك الغلطان ... فكر شو الحكمه من اللي استوا .... وسبحان الله اكيد له حكمه في هالشي ....
راشد : حكمه !!!
حصه : يمكن الله يريدك انت تتعض ولا تسوي جي .... والروح أمانه يا أخوي ... وبعدين سبحان الله يعني يت فيه هووه ولا يت فيك انت .. بعيد الشر عنك ... لانا احنا محتاجين لك ... الله رحم أمك المسكينه ...
راشد : ما أدري والله ....
حصه : الحين قوم وغير جو .... شكلك شين وانت زعلان
راشد : أن شاء الله ....
طلعت حصه عن راشد وبعد شوي طلع وراح عند ربيعه عبود .... وراحوا جبل حفيت لانه يحس براحه يوم يسير هالمكان ....
***
يوم الخميس رجع حميد في إجازه مدتها 10 أيام .... الساعه سبع ونص الصبح توصل الطايره في دبي وراح حمود ولد أبو ياسر ومعاه راشد علشان يستقبلوا حميد ... كانت علاقة راشد مع حمود غير ... حمود يعامل راشد باحترام ودوم يساعده اذا احتاج لاي شي .... وصل حميد وسلم عليهم ورجعوا للعين وطول الخط سوالف ... ويوم وصلوا البيت .... كان في استقباله حصوه وأمه ويدته ... اما اليد فسار صوب المزرعه ... ويمعه وسلطان ومهره وميره فبعدهم رقود ....
الأم : الحمد لله على السلامه
حميد ( وهو يحب امه على رأسها ) : الله يسلمج من الشر يالغاليه .... اشحالج يدوه ( وحبها على رأسها ) وسلم على حصوه ...
حصه : اشحالك حميد ... وشو العلوم ..
حميد : الحمد لله بخير دامكم بخير ...
حمود : اشحالج عمتي عساج الابخير ...
الأم : مرحبا حمود ... الحمد لله بخير وعافيه ... اشحالك وشحال اهلك عساهم بخير ..
حمود : كلهم بخير يسلمون عليكم ... وحمد لله على سلامة حميد
الأم : الله يسلمك ... اقرب اتريق ويا عيال عمك ... حصوه سيري يبي الريوق
حصه : أن شاء الله امايه ...
حميد : انا يبسير اسبح وغير وبييكم ... رشود هالله الله في حمود ...
راشد : أوكي حميد ... لا تخاف عليه ما بكله ..
حمود : شو تاكلني اصبر شوي الحين حصوه بتيب لك الريوق وكل لين ما تشبع ...
كان حمود طول هالوقفه وهالسلام حاط عيونه على حصه ... كان يحبها وحاط في باله انها له وبتكون زوجة المستقبل ... وحصه كانت حاسه بهالشي من نظراته لها ... ومن اهتمامه في اخوانه وارتباطه فيهم ... بس ما كانت تحس بأي ميول تجاهه .. لانها تشوفه مثل اخوانها ... يلسوا الشباب يتريقوا وبعدين راح حمود عنهم ... وتموا الاخوان ايسولفون وبعدين نزلت مهره وميره وقعدن معاهم ...
***
الظهر في بيت بوحمد كانت فطوم اتحاول اتقوم وفا من الرقاد .... تبي تتخبرها شو سوت مع حصوه وهي من أمس ما شافتها ....
فطوم : يالنقوحه قومي ... بسج من الرقاد ..
وفا : فطوم قلبي ويهج عني ... خليني اشبع رقاد
فطوم : عنبوه الحين الساعه وحده وبعدج راقده ... الله لو يدري عنج احمدوه
وفا : اووووووووف ... انزين الحين بقوم ...
فطوم : يالله بسرعه .... الا شو سويتي مع حصوه
وفا : اها قولي جي من الصبح .... تبين اتعرفين شو قالت حصوه عن خالها ...
فطوم : يالله قولي شو قالت لج ..
وفا : ما بخبرج ... انزين
فطوم : عن البياخه يالله قولي
وفا : مثل ما قلت لج ما بتقول شي عن خالها غير انها بتمدحه ... اتقول انه فري ودومه في بوظبي قليل ما يشوفوه في البيت ... اونه ما يتواسا مع الشيبه ..
فطوم : طبعا ما بيتواسا مع عمي حمد ... لان سلطان فري .. وعمي اتعرفينه متشدد
وفا : اقولج وافقي واتكلي على الله
وفي الليل يا ابوحمد وسأل فطوم عن رايها ... وخبرته انها موافقه دامهم ايشوفنه ريال زين ... أما أحمد يوم درى انها وافقت دخل عليها الحجره ...وبارك لها ولو انه مش راضي على هالزواج ...
****
في نفس هالليله الساعه عشر وصل ياسر لبيت عمه بوسلطان علشان ايسلم على حميد ... وهو كان متصل في حميد قبل ما يوصل البيت ومخبرنه انه بيي ايسلم عليه فالبيت ... وحميد قاله انه بيي بعد شوي ... دق تيلفون لراشد علشان يفتح له الباب .... وكان راشد قاعد مع حصه ومهره فالصاله ... وقام وفتح له الباب ...
راشد : هلا ... حي الله يسور
ياسر : اصغر عيالك انا اتقولي يسور
راشد : ما فيها شي ادلعك ... بس ليش ما دقيت جرس
ياسر : ما فيه على حشرت يدك بعد ... اتعرفه عمي بيقول ياي اصيعكم
راشد : اخ لو يدري انك هني ... بيعطيك محاضره غاويه .. الصراحه ما يتعوضن محاضراته عن الاخلاق والقيم ...
ياسر : خل المحاضرات لك انت .. انا سادني ابويه
راشد : لا والله ... انزين تعال بنقعد فالصاله
ياسر : محد هني
راشد : محد بس انا وحصوه ومهره قاعدين انطالع التلفزيون
يوم قال راشد ان حصه موجوده حس ياسر بأحساس غريب ... حس ان قلبه يدق بسرعه وان ريوله ما قادره تشله... ما مصدق انه بيشوف حصه ... حصه اللي ساكنه في قلبه وفي عقله من يوم هم صغار ... اخر مره شايفنها من سنه تقريبا ... يوم بوياسر وعياله راجعين من العمره في اجازة نص السنه اللي طافت ... آه يا حصه ما ادري شو شعورج ... ما ادري اذا تبادليني نفس الحب .... وقطع عليه راشد ... وهم داخلين للصاله ..
راشد : أي يسور شو بلاك ...
ياسر : ما بلاني شي ... السلام عليكم ... اشحالج حصه عساج بخير
حصه : الحمد لله بخير وعافيه ... ( وطلعت تييب عصير )
مهره : احم احم ترانا هني موجودين
ياسر : اشحالج مهره
مهره : بخير وعافيه ... اشحالك انت وشحال ريموه
ياسر : الحمد لله انا بخير وعافيه ... وريموه اتعرفين علومها واخبارها
مهره : اونها ثانويه عامه ... محد يشوفها ... وبعض من الناس ناسين اعمارهم
راشد : مهروه خلج في حالج انا ساكت عنج
ياسر : مالت على ريموه ما يخصها في شي ... ولا عندها غير هالتلفزيون .. حتى المذيعه اول ما تخابر تقول صباح الخير انسه ريم ..
مهره : ههههههههه ... ما عليه بخبرها عليك تراني
ياسر : خبريها ما عليه منها
ودخلت حصه وهي يايبه العصير ... وبعد شوي دخل عليهم حميد وقعد ايسولف معاهم ... ومن وصل حميد حصه ومهره طلعن على حجرهن ... علشان حميد منبه عليهن ما يقعدن مع عيال عمهن ... ويلسوا الشباب يسولفون ... وبعدين طلع ياسر عنهم وراح بيتهم ... كان كل اللي شاغل تفكير ياسر هو حصه ... ويتذكرها من يوم كانوا صغار وكيف كان حمود اخوه يضربها ولا يحبها وكان ياسر دوم ايدافع عنها ...</span></font>
رد مع اقتباس
مواقع النشر (المفضلة)