<font color='#000000'><span style='color:royalblue'>السلام عليكم ورحمة الله وبركاته
اشحالكم عساكم الا بخير ... شوفوا عاد انا بجرب اكتب قصه
من فنتكت رأسي ... عاد قلت اجرب يمكن يكون لي مستقبل
وانا ما ادري ... يمكن حد يكتشفني ... خقاقه والله .. على شو ان شاء الله</span>
المهم .. هذه أول قصه أقوم بكتابتها ... نريد رايكم بصراحه
القصه بعنوان ... غـــدر الزمـــان
<span style='color:darkblue'>في الصباح وقد بدأ أول يوم دوام للمدارس ... تتجه الأم إلى حجرة راشد اللي وعته أكثر من خمس مرات عشان يروح المدرسة .... وقد ذهب الجميع إلى مدارسهم ....
الأم : رشود ... رشود وصمخ ... الحين ما بتقوم وبتروح المدرسة مثل عيال خلق الله ... عنبوه زاد من رقاد حشى ... كله من السهر ... يعلك ما تلقاه ..
راشد ( وهو يحاول يفتح عيونه ) : أمايه ... قومي عني تعبااااااان ولا فيه اروح المدرسة ... وبعدين اليوم أول يوم ما لازم انداوم ....
الأم : شو ماخذ إجازه من مخباك انت ...
راشد : لا حول .... فكينا عاد
الأم : يا راشد قوم الحين الساعة تسع .... حشى مب رقاد هذا ...
راشد ( وهو يقوم من الفراش ) : أن شاء الله أمايه ... على العين والرأس الحين بقوم .. وبسير المدرسة .... بس لا تحشرينا
الأم : هيه جي اباك تسمع الكلام وتقوم لدوامك ... وبعدين لا تنسى أنك ثانوية عامه يعني شد حيلك ... وخلها بداية خير ان شاء الله
راشد : بعدنا على حنة الثانوية العامة .... يالله يا هادي
الأم : يالله ... انا بسير ازهب لك الريوق ... بسرعه انزل
تنزل الأم للصاله ثم تتجه للمطبخ لكي تعد الفطور لراشد .... وبعد قليل ينزل راشد ....
راشد : يالله أمايه انا ساير الحين ... شي تامرين علينا من المدرسة
الأم : ههههههههه ... جيه شو عندكم فالمدرسه
راشد : ما ادري عنكم موعيني من فير الله ... ومسويه هالحشره كلها ... وأنا متأكد مليون بالميه .. أنه محد من الربع مداوم
الأم : هيه ترا انت ما مخربنك غير هالربع ..... يلس اتريق
راشد : لا أمايه مستعيل الحين ... لا تفوتنا الدروس
الأم : الله يحفظك
ويخرج راشد ويركب في سيارة البيت النيسان لان هو ما عنده سياره ولا ماخذ اليسن بعده وكانت المدرسه قريبه من البيت .....
الساعه عشر ونص الأم يالسه في الصاله هي واليده يتقهوين ... يدخل راشد عندهم
راشد : السلام عليكم
الأم واليده : وعليك السلام
راشد : الله على هالقعده الغاويه .... احلى شي يوم تيلس ويا العيز
الأم : عنبوه مسرع ما خلص دوامك
راشد : رحت ما حصلت حد من الربع وطلعت
الأم : يالله يهالربع .... جيه انت تروح المدرسة عشان اتشوف ربعك
اليده : خليه يأم حميد ... خليه على راحته ... لاتغثي الولد
راشد : فديت يدوه أنا .... الله يطول بعمرج .... قوليلها أداريني ... ما عندها غيري
اليده : بسم الله ... جيه ما عندها غيرك .... وحميد الله يحفظه وين راح وخواتك
( حميد أخو راشد اللي أكبر عنه وعمره 20 سنه ... مسافر بريطانيا يدرس في المشروع )
راشد : حميد مسافر يعني محد عندها هني غيري .... والبنات غير ... انا ريال
الأم : يالله لو تسمعك حصوه .... بتغسل شراعك ... كله ولا التفرقه بين البنات والأولاد
( حصه أكبر وحده في خوانها .... وهي تدرس في الجامعه عمرها 22 سنه )
اليده : هيه يحافظ على حصوه ... ما في مثلها
راشد : عاد يبتي طاري حصوه ليدتي .... اعرف تراها المفضله عند يدوه ... دقه قديمه هالحصوه اللي يشوفها ايقول عيوز معبره الدهر ...
اليده : رشود ... لا تقول جي عن اختك .... عشان انها تحب سوالف أول تقول عنها جي
الأم : رشود اسكت عن يدتك ...
راشد : أن شاء الله .... الا وين خالي يموع .... احيده أول واحد يكون فالبيت
( يمعه خال راشد وهو راعي بر ومتشدد لأخر درجه .. بس طيب وحبوب .. عمره 24 سنه )
اليده : يموع راح يرقد ... هو عنده شغله غير الرقاد وتكسير سيارته فهالبر
راشد : والله خالي يموع ... هذا شيخ البيت
الأم : هي صح .... حد مثله فالحنه والرنه
اليده : هي والله محد يسوي له سبب
راشد : ها أم سلطان ... بدينا نميز .... ترا أخبره أول ما يقوم من الرقاد ... وأقوله ترى يدوه تمدح خالي سلطان وتذمك
اليده : الحين منو ياب طاري سلطان ... اسميك راعي مشاكل
راشد : على طاري خالي سلطان ... متى بيرجع من أمريكا
( سلطان أخو يمعه ... وهو مسافر رحلة علاج لواحد من ربعه )
اليده : يدك أمس مرمسنه .... سير اتخبره
راشد : وين يدي ما شفته اليوم ..... لايكون راقد بعد
الأم : جيه انت تحيد يدك مثلك ومثل خالك .... بتحصله راح صوب المزرعه
يرن تيلفون راشد .......
راشد : الو
حصه : السلام عليكم .... هلا أخوي رشود
راشد : وعليج السلام ...هلا فيج ... أكيد تبيني اييبج من الجامعه
حصه : ما عندي غيرك .... يالله تعال
راشد : هيه أنا الدريول مالكم ... يالله الحين ياينج
حصه : أوكي .... مع السلامة
الأم : هذي حصوه ....
راشد : هيه .... وانا الدريول مالكم .... شي تبون اييب لكم وانا راجع
الأم : مشكور وليدي .... الله يحفظك .... وعن السرعه الزايده ... لا تنسى انه ما عندك ليسن
راشد ( وهو طالع من الصاله ) : أوكي الغاليه ... يالله مع السلامة
تعيش أم حميد مع عيالها ( حميد وحصه وراشد ومهره وميره ) عند أهلها بعد ما مات زوجها ، لأن يوم مات زوجها كان عيالها صغار ، فما كان لها غير انها تسكن عند أهلها ، واللي هم اليد واليده ونوره معرسه وسلطان ويمعه وفهد .
*********
في السياره راشد ياييب حصه من الجامعه ...................
حصه : اقول رشود انت ما داومت اليوم
راشد : شو ؟؟؟ وابويه عليج وانا من متى اغيب عن المدرسه ... أنا من يوم يومي وانا ريال ملتزم
حصه : ههههههههه أونك عاد الحين .... لا تصدق عمرك ... يوم انت ما بتغيب عيل منو بيغيب
راشد : هييييييييييه يا حصوه بعدج ما عرفتيني زين
حصه : هي والله .... اصلا انت محد يعرفك كثري
راشد : الا قوليلي ... كيف دوامج فالجامعه عشان اعرف متى ارجعج كل يوم ...
حصه : عاد اسكت عن دوامي هالكورس ..... منقع من الخاطر
راشد : هيه انتي نقعي فالتسجيل واطيح على راسي انا بعدين
حصه : فديت اخوي انا
يرن تيلفون راشد .......
راشد : هذا رقم البيت ...... أكيد الوالده تبي شي
ويرد على التيلفون : السلام عليكم
الأم : وعليكم السلام ..... اشحالك وليدي
راشد : بخير وسهاله .... مسرع ما اشتقتيلي
الأم : هيه اشتقت لك شسوي بعد ...
راشد : فديت امي انا
الام : أقول رشود ... وانت راد من الجامعه خطف على مدرسة اختك مهره وييبها ...
راشد : شو خلصت
الأم : هيه .... ودقت قبل شوي تبي حد يرجعها
راشد : وانا الدريول .... أن شاء الله ماما ... يريد شي بعد
الأم : يزاك الله خير .... مع السلامة
راشد : مع السلامة
حصه : حشى ... شو بلاك ... تاكل حسانك بلسانك ... ابوك سو خير بدون ما تتمنن على الناس
راشد : لا حول .... خلاص احسن شي انطم واسكت
ومروا على مدرسة مهره ( مهره اصغر من راشد بسنه صف ثاني ثانوي علمي )
مهره : السلام عليكم
راشد و حصه : وعليكم السلام
مهره : اووووووووه ما بغى يخلص هاليوم .... حشى تعب
حصه : عنبوه هذا أول يوم ويالسين تتشكون ...
مهره : على الأقل احنا مداومين .... بس ناس ما داوموا اليوم
راشد : منو تقصدين بكلامج .... هيه محد غيري انا المقصود يعني ... يالله عاد يوم اليهال يرمسون
مهره : انا مب ياهل .... لا تنسى انك أكبر مني بسنه بس
راشد : انزين واكبر منج بسنه ....... بس عقلي يساوي عقلج مليون مره
حصه : فكونا عاد من هالرمسه الفاضيه ....
******
في بيت العايله ، كان يمعه يالس مع امه واخته أم حميد يسولفون ، ودخل راشد مع خواته وسلموا وبعدين البنات راحن حجرهن وراشد قعد معاهم ........
يمعه : ها رشود ... الحين بطيح بالسياره ولا حد بيقولك شي .... فرصه عاد الجامعه والمدارس
راشد : تعرف خالي لازم ... خواتي ما لهن حد غيري
يمعه : اونك الحين طيب وخدوم
راشد : مشكله من اللي ما يعرفون قدرك زين
الأم : راشد قوم تغدا ويا خواتك
راشد : هي والله اقوم اتغدى ... ميت يوع
يمعه : سير كل بالهنا والعافيه ..... بس لا تكثر رمسه وانت تاكل لا تغص
راشد ( وهو متجه لصالة الطعام ) : أن شاء الله خالي يموع
اليده : ها يموع ... اشوفك طالع .. على وين أن شاء الله
الأم : أمايه يعني ما تعرفين يموع
يمعه : بروح عند الربع ... ويمكن نسير صوب المزارع
اليده : الله يحفظك
*******
بعد مرور اسبوع على بداية المدرسه ، وفي حجرة حصه كانن البنات متيمعات ....
ميره : واخيرا يا يوم الأربعاء ... هذا احلى يوم .. ( ميره اصغر اخوانها وهي صف ثالث إعدادي )
مهره : هي والله ... اول مره ميروه تقول شي زين
ميره : الله يسامحج .... عاد جي تقولي عني
حصه : الحين بتفكنا من هالهذره والا شو
ميره : حصوه شو يالسه تسوين
مهره : يمكن تكتب قصة حياتها
حصه : هيه اكتب قصة حياتي .... ما لج خص
مهره : حشى ما قلنا شي
ميره : مهروه .. يعني ما تعرفي حصوه اكيد تسوي شي مهم وهي الحين مركزه .. يعني لا حد يرمسها
راشد يدق على الباب بيديه الثنتين .... ويغني ... ويدخل على البنات .......
حصه : اعوذ بالله يت الطامه العوده ... انت متى بتتعلم المذهب .....
مهره : عافانا الله شو هالصوت .... فكنا من هالحشره ...
راشد : يالله اونهن عاد .... شو يالسات اتسون
مهره : وانت شو يخصك فالبنات
راشد : حشى حرام الواحد يسأل ... وبعدين انا فضولي احب اعرف كل شي
ميره : انزين يالفضولي .... خالي فهود يا والا بعده ( فهد خال راشد وهو أكبر منه بسنه ... ويداوم في كلية زايد )
راشد : لا يا .... راح صوب حجرته .... الا ما خبرتكن
مهره : خبرنا ... يا بو الاخبار
راشد : عن الطنازه .... خلاص هونت ما بخبركن
مهره : بدينا في شغل المذله ... يالله قول وفكنا
راشد : انتي ما بقولج ... لانج ما تحترمين اللي اكبر عنج
مهره : خلينا الاحترام لك ...
حصه : أنا بسألكم ... انتوا ما تحلى لكم السوالف الا في حجرتيه
مهره : حصوه ... كملي كتابتج ... وانت خبرنا شعندك
حصه : حشى اشوف كلكم فارين المذهب ... والله حاله
راشد : شو تكتب حصوه
ميره : تكتب موسوعتها للأعشاب الطبيه
راشد : ههههههه والله يحصوه حاله ... الحين انتي مصدقه عمرج
حصه : بنشوف بعدين .... يوم ينشر لي أول كتاب ... يهتم بتراثنا ....
راشد ( وهو ماسك قلم في ايده على انه مذيع ويقدم برنامج ) : استاذه حصه ممكن نعرف شو عنوان أول مؤلفاتج
حصه ( وهي تحط ريل على ريل ) : أول كتاب بعنوان الأعشاب الطبيه واستعمالاتها ... وثاني كتاب ....
راشد ( وهو يقاطع حصه ) : بس بس .... والله اشفق عليج ... مصدقه عمرج
حصه ( وهي معصبه من راشد وأسلوبه ) : اقول اجلب ويهك ... وفكنا من حشرتك
يدق فهد الباب ويدخل عليهم ويقومن البنات يسلمن عليه ....
فهد : اشوفكن ما تزهبتن والا ما بتروحن
مهره : وين ..
فهد : راشد انت ما قلت لهن
راشد : وهن عطني فرصه اتكلم ..
مهره : خالي انت قولنا ... هذا رشود يذل الواحد
فهد : ابويه قال يبانا انسير صوب المزرعه ... وهم مناك بيروحوا عرس حد من الأهل
مهره : يا سلام بنطلع ... احلى شي ... يالله بنات
فهد : الا يموع وين ما شفته ....
راشد : اتصلت فيه قبل شوي ويقول انه فالمزرعه
فهد : زين عيل يالله بنات تزهبن .... اللي تبي تسير معايه
**********
في المزرعه العصر الكل يالسين يسولوفن .... وقام اليد ومعاه اليده وأم حميد ... وراحوا العرس وطبعا قبل هذا قام اليد وعطى ناصيح لفهد وراشد والبنات ... لانه يعرفهم مال ربشه وخبال ....
وطلعوا من المزرعه رايحين العرس ، ووصل يمعه بسيارته النيسان الوسط اللي محطي داخل بطنه كل انواع التزويد والخرابيط ماله ووقف عندهم وسلم عليهم ....
يمعه : ها اشوفكم هني .... شعندكم
فهد : نغير جو .... وبنتعشا هني .... قالوا الشيخ يمعه عازمنا على طيور
يمعه : فالكم طيب ما يخيب .... جان حصوه والبنات بيطبخن
حصه : حاضرين خالي .... شو تبون
مهره : اقدم اعتذاري ... انا يايه اغير جو ما يايه اطبخ
راشد : انا بسألج انتي شو فايدج .... ويا هالويه
مهره : طالع ويهك .... كيفي
يمعه : شو بلاكم انتو ما عندكم غير هالنقره
فهد : فكونا ... شو الحين بنأكل طيور والا شو
يمعه : عاد من حظج يا مهره ... اليوم ماشي صيد .... رشود سير بعدين واشتر لهم عشا
راشد : ان شاء الله خالي .... ياللا الحين نبي نلعب
فهد : هيه والله يموع ..... وين البانشي
يمعه : الحين بسير اييبها ... الا وين ميروه
حصه : اكيد قاعده تتأمل فالطبيعه
وراح يمعه وياب البانشي ماله .... وهو راكب عليها ومسوي عمره الزعيم ... ويسوي استعراض جدامهم ... شوي يشل وشوي يركز ... والبنات كل ما شافنه يسوي حركه من الحركات يصارخن خايفات عليه انه يطيح ويتعور .... ويا ووقف عندهم ...
فهد : والله انك خطير بهالحركات .... عطني بجرب اشل
حصه : شو تسوي ما تخاف اطيح
يمعه : طال عمرج مهاره
راشد : يالله انا ابي اسوق
فهد : انا قبل .... يالله يموع
يمعه : اوكي بس شوي شوي ....
فهد : اوكي
وشل فهد البانشي وتم يدور فيها وجرب انه يشل ... بس كان يشل مسافه بسيطه لانه ما يعرف وايد ... وبعده يا راشد وساق البانشي .... وبعدين احتشرت مهره تبي تسوق .... بس يمعه ما خلاها وركبها معاه وتم يركز وهي متعلقه فيه وتصارخ ... وبعدين كل شوي يشل وحده منهن .... لين ما اذن المغرب ....
يمعه : يالله بسنا .... بنسير انصلي
راشد : بعد المغرب بنلعب .... زين خالي
يمعه : لا ما شي انا بروح عند واحد من الربع
فهد : افا .... انزين روح انت برايك ... واحنا بنلعب
يمعه : لا ما فيه بعدين تسون فيها شي ... ويحتشر الوالد
وراحوا وصلوا المغرب .... وطلع يمعه بعد الصلاه وراح عند ربعه ... اما فهد وراشد قعدوا مع البنات يسولفون ... لكنهم حسوا بالملل ...
فهد : اقول رشود شو رايك نلعب بالبانشي
راشد : كيف ... ترا يموع قال لا تلعبوا .... والسويج ما نعرفه وين
فهد : ما عليك انت ... انا عندي الحل ... يالله قوم
حصه : عن الخبال انت وياه ... والله بيجتلكم خالي يموع لو يدري
راشد : ومن وين بيدري
مهره : انا بخبره
راشد : عنبوه يالوشايه
مهره : اذا ما تبوني اخبر خلوني اسوق</span></font>
رد مع اقتباس
مواقع النشر (المفضلة)