وقاحة أم

[الجنيه]

السلام عليكم ورحمة الله وبركاته ...

لا ابداً لا تستغربون هالعنوان لان المضمون بيثبت لكم صحته ...

الله يسلمكم اليوم كنت رايحه آخذ عشا من بن عيد الي في الراشديه ( دبي )

ياني الجرسون وخذ الطلبيه وانا اترياه يخلصها اذا بي اشوف المرسيدس الي عدالي فيها شاب في مقتبل العمر يعني تقريبا عمره 25 او اكثر يالس في امانة الله وعداله سياره ثانيه ما شفتها زين
المهم مر الوقت واذا بالشاب ينزل محل التلفونات الي مجابلنا ما طول فيه غير دقايق ورجع ,, الا اني اشوف هنتين نازلات من السياره الي عداله حرمه مبين عليها كبيره اشوي في السن وياها بنت قوم الطعش ( يعني 11 ومشتقاتها ) الأم متستره وعباتها حشيمه والبنت حدث ولا حرج اعوذ بالله نزلن الخياط الي عدال المطعم والأم مندمجه ويا الخياط تتفاهم وياه .. طبعا ست الحسن البنت ما تقدر اتقر مكانها ويا امها في المحل لازم تتنقل بين السياره والمحل وكل هذا تخلله نظرات وقحه وجرأه عجيبه لراعي المرسيدس هذا غير المشيه سبحانك ربي اتقول لاعب كوره مكسور ..
ناهيك عن صوت الضحك العالي الصادر من سيارتهم ما يدل ع وجود شله بنات في السياره وانا اراقب الوضع الي بدأ يتأزم لأنه الولد ما صدق على الله يشوف وحده تتطالعه بهاي الجرأه واتبين له انه انا اتطالعك سبحان الله انا لو اطيح عيني بعين اخوي الي من لحمي ودمي استحي واموت من الحيا عيل هاي وين ؟؟؟؟!!!!!! والله اني مستغربه للحين بنت صغيره مثل هاي كيف تتصرف جذه نحن في سنها حرام يا انه غير اللعب ما انعرف لكن هاي الي يشوفها اعوذ بالله وفوق هذا كله قلت يمكن الي وياها مب امها لاني اشوف عادي عندها الي اتشوفه من حركات البنت الين زقرت عليها البنت وقالت لها ماما هني والله جنه حد صب عليه ماي بارد كيف هاي امها ومودره بنتها جذه ؟؟؟؟؟؟؟؟؟؟؟؟؟
والولد ع فكره ما قصر راقبها لين شاف انها صدق تبا يرقمها نزل من الموتر وقرب صوبها اشوي ويلصق فيها ورقمها وهي تضحك بوقاحه وهذا كله جدام الأم الي تمت اونها تتطالعه بنظرات تهديد ( خرط والله لو لين سنه تتطالعه ما عبرها )

استغفر الله انا ما ابي اذم حد بس والله الي قاعد يصير حرام وما يرضي الله ورسوله ,,, كيف انتي ام وتسكتين عن بنتج ؟؟؟ باجر اذا صار بها شي لا سمح الله شو بتستفيد ام مثل هاي ؟؟؟ كيف بتجابلين ربج يوم القيامه وانتي ما عرفتي اتربين ؟؟؟؟


انزين لو الام غشيم البنت ما فيها عقل ؟؟؟!!! ما اتعرف الصح من الغلط ؟؟؟
الصراحه انا مصدومه من الي اشوفه بشكل يومي والله يستر من الياي

اسمحولي والله متغصصه للحين من الام وبنتها

[بوزايد]

كلامج واقعي ويصير الجنيه

فما بالج في وحده توصل بنتها لواحد

والله صايره هذي

اتخيلي لاي درجة وصلة الوقاحه

[نجمة دبي]

وانا بقول لج شي

الحريم اللي يدقون في جلسات المعلايه .. اغلبيتهن بناتهن اللي يرقصون ..
والله العالم شو هي جوايزهم اخر الجلسه

لا حول ولا قو الا بالله
لا حول ولا قو الا بالله
لا حول ولا قو الا بالله


نجــــــــ دبي ـــــــــمة

[بوزايد]

وانا بقول لج شي

الحريم اللي يدقون في جلسات المعلايه .. اغلبيتهن بناتهن اللي يرقصون ..
والله العالم شو هي جوايزهم اخر الجلسه

لا حول ولا قو الا بالله
لا حول ولا قو الا بالله
لا حول ولا قو الا بالله


نجــــــــ دبي ـــــــــمة

اتخيلي صارلي موقف ويا هذيلا

قبل كنا رايحين مال معلايه ( عادي شباب )

المهم ولد عمي وياي شو اسوى

جان يروح حق وحده من الحريم الكبار يغنن قاللها

اونه هذا ولد عمي يبا يشتغل وياكم عادي

اتخيلي شو قالت انصدمت بكلامها

جان تقول

فديته الله يحفظه لاهله ان شاء الله والله يخليه ... ان شاء الله ما بيسوي هالاشياء ولا يفكر فيها .... لانه عيب بس نحن يا ولدي الحاجه جبرتنا وتمت تدعي والله يبعده عن هالدرب


يعني هم يعرفون انه غلط بس يسوونه

[نجمة دبي]

اتخيلي صارلي موقف ويا هذيلا

قبل كنا رايحين مال معلايه ( عادي شباب )

المهم ولد عمي وياي شو اسوى

جان يروح حق وحده من الحريم الكبار يغنن قاللها

اونه هذا ولد عمي يبا يشتغل وياكم عادي

اتخيلي شو قالت انصدمت بكلامها

جان تقول

فديته الله يحفظه لاهله ان شاء الله والله يخليه ... ان شاء الله ما بيسوي هالاشياء ولا يفكر فيها .... لانه عيب بس نحن يا ولدي الحاجه جبرتنا وتمت تدعي والله يبعده عن هالدرب


يعني هم يعرفون انه غلط بس يسوونه

استغفر الله العظيم

يعني حتى لو كانت ظروفهم صعبه .. ما لقوا غير هالشغله ..؟!!!
وبناتهم .. في ربيع حياتهن .. يعني لو يشتغلون شغله شريفه ابرك

ومره على شارع الامارات .. كنا واقفين في الزحمه .. وعدلنا سياره .. صوت دق معلايه ينسمع من بعد امتار .. شباب اثنينه يالسين جدام واعمارهم حدود 19 \20
وبنت يالسه ورا عمرها تقريبا 16 او 17
ويرقصون .. والبنت استغفر الله تهز .. والسياره بكبرها تختض ..

يعني صدق صدق قهررررررررر
وين اهاليهم عنهم؟!!!!

لا حول ولا قوة الا بالله


نجـــــــــ دبي ــــــــمة

[أنامل قلب]

سبحان الله ..
وفعلا إن لم تستحي فاصنع ما تشاء .. !!؟؟!!

كما ان لهذا الموضوع قصص يشيب لها الرأس .. !!؟؟!!

والجهل والاستهتار بهذي الأمور صار شي لا بد منه بزمنا هذا ..
ومانلوم البنات .. دام اللي يعتبرونهم قدوه لهم يسلكون هالمسلك .. !!؟؟!!

الفساد منتشر والناس بدت تستصغر كل معصية ..
لا حول ولا قوة إلا بالله ..

اللهم اجعلنا من الهادين المهتدين .. وممكن كتبت لهم الثبات على صراطك المستقيم ..
واجعل كل طريق نسلكه هجرة إليك .. يارب ..

يزاج الرحمن قربه بالدارين اختي ..

رد فعل طبيعي وطيب منج .. وهو لا يدل إلا على غيرتج وحيائج الصافي ..
ولا أزكي على الله أحد ..

...

تقبلي منا كل ود واحترام ..
اختج أنامل قلب ..

..

[خيال الحب]

11 سنه وتسوي جييييييييه

عيل هاي لو استوى عمرها 20 شو بتسوي؟؟

الله يستــر من هالجيـــل,,


بس لاتظلمـــين الام.. يمكن لانه البنت صغيره.. يعني 11 سنه عاادي تلبس الي تباه لانه بعدها مب بالغه ولاشي ..

[أمواج]

.
.
عــيش كتيـر بتشـوف كتيـر

.
.

[مــهــابه]

وايـد منه

والله قــهر ، انا لو اشوف وحده جدامي جيه والله ماسكـت عنها بـعرف ارد عليها

[شوق القلوب]

السلام عليكم..

الله يهـــدي شبابنا و بناتنا.. و يستر عليهم يا رب..

[مملوح الوصايف]

هالشي عـادي الغاليه وما خفي أعظم
:
:
للحديث بقيه
خويتج مملوح الوصايف

[شمعة أمل]

الأمهات الى يرضون بناتهم جي يسون .. هم الأمهات الى عندهم مشــاكل زوجيه\عائليه! ^_^

مب شي يديد علي..

أحيد يوم كنت أِشتغل .. في أم متنقبه وبنتها شكلها طيوبه ومحترمه ..جوفو الصدمه انتو بس .. قالولي انه هالأم تودي بنتها كل يوم بيت هالولد .. ويمروون عليه .. ويوون هني عشان يسولفون ويغازلون ..والخ .. انا ماصدقت في البدايه .. لين ماشفت هالولد وياهم .. وكل كمن يوم اشوفهم ويا بعض .. ومرات يومياO_o

[الجنيه]

بوزايد
ما أقول غير الله المستعان ياخوي ,,
كيف الام ترضى لبنتها الغلط والمضره ؟؟؟
وأخييي عليك اتروح هالأماكن الطفسه بخبر عليك

نجمة دبي
عاد سالفة المعلايه خليها ع ينب هاي روحها يبالهامعلقه كامله من بلاويها ,,,
هو صح انه الانسان يسوي اي شي عشان يسد حاجته بس هالأي شي ما يتضمن الشي الغلط وايد اشياء ممكن يسوونها يعني الجمعيات الخيريه ما اتقصر وبعد الشغلات الثانيه مب عيب مهما كان حجمها او مسماها ...
الله المستعان اختي وربي يحفظج ويحفظنا اجمعين ان شاءالله

أنامل قلب
آميـــــــــــــــــــــــــــــــــــــــــــــــ ن ,, الله يبعدنا عن الغلط وهاي الاشكال ويهديهم ويصلح بالهم ..
بالفعل الي انشوفه اليوم ونسمع عنه يشيب الراس عيل في أم صاحيه اتسوي الي سوته هاي ؟؟؟
وبزيدج من الشعر بيت امس ولد عمي يخبرني سالفه مشابهه عاد صايره في المستشفى الي يشتغل فيه وفـ عز رمضان البنت صغيره من قوم الطعش بعد لابسه بدي ونص البطن برع وبنطول لو وست وعباه مفتوحه وتتصقع بالضحكه جان تفتن عليها وحده من الموظفات وقالت لها ان ما قبضتي عباتج زين ويلستي بدون نصخ والله يا اني احرقج انتي بالي لابستنه ومن الزيغه قرت محلها والأم خبر خير

خيال الحب
اولا انا اقصد انه قوم الطعش يعني من سن 11 وفوق بس البنت باين عليها يعني 16 او 17 يعني مش صغيره ابداً
ولنفرض انه عمرها 11 هذا ما يعني انه الام تسكت عنها لان من شب على شي شاب عليه اذا هي 11 وحارقه نص الدنيا شو بتسوي يوم يصير عمرها 20 ؟؟؟؟!!!!! وغير انه الام كيف قلبها يطاوعها انه اتشوف بنتها بهاي الصوره والدرب وتسكت ؟؟؟
بنت اختي عمرها 11 سنه من كملت 10 سنين قالت لي خالوه شو رايج البس عباه ؟؟؟ تدري اني شجعتها وفصلت لها عباه شراتي ومن يومها البنت تحجبت مب من شي بس لاني قلت لها انه العباه استر حق البنت وع فكره ابوها كان رافض انها تلبس عباه وهي بهالعمر بس البنت مقتنعه من نفسها واتشوفنا نحن كيف واصرت ع هالشي الي اقصده انه التربيه تلعب دور كبير بالاضافه الي الاسره ودورها الفعال في النصح والاشاد ...

أمواج
وشو بقى بعد ما شفناه ؟؟؟؟
الله يستر علينا اجمعين

مــهــابه
والله كان ودي انزل واصفعها هاييج الصفعه الي اتفر راسها واتخليها تصحى من الي هي فيه بس ما ادري ليش ما تشجعت وقلت الله يهديها دام الام ساكته عنها كيف برمس انا ؟؟؟؟!!!! يمكن غلطت بسكوتي بس وايد كنت مصدومه بصراحه

لي عوده لبقية الردود ان شاءالله

[المزوحي]

انزين لو الام غشيم البنت ما فيها عقل ؟؟؟!!! ما اتعرف الصح من الغلط ؟؟؟
الصراحه انا مصدومه من الي اشوفه بشكل يومي والله يستر من الياي

اسمحولي والله متغصصه للحين من الام وبنتها[/QUOTE]



دايما نقول البنات هم السبب .. وهم يخلون الشاب يلحقهم أولا بنظراته وعقب بجسمه ..
لكن الشاب ماخاف .. مافكر .. ما قال هااي مراهقه ... لو صد عنها .. لو اتجاهلها ..
اعرف هالشاب بيقول هي اللي بدت وتمت تطالعني .. يعني تبغي الرقم

[الجنيه]

شوق القلوب

وعليكم السلام والرحمه ,,, آمين

مملوح الوصايف
صدقج والله وربي يستر من الياي ويحفظ الجميع ان شاءالله

شمعة أمل

حتى لو عندهم مشاكل عائليه هذا مش مبرر وبالعكس الحرمه الي اتكون حياتها الاسريه غير مستقره يحاولون قدر المستطاع انهم يربون بناتهم التربيه الصحيحه ويتفادون اي خطأ ممكن يأثر ع حياتهن المستقبليه


المزوحي

في هاي انا وياك مليون بالميه ,,, الغلط من الاثنين يعني الشاب عيب عليه يشجع البنت ع هالتصرف حتى لو انه هو ما بدا بهالشي بس يكفي انه بين لها انها مرغوبه حتى لو للتسليه هالشي عطاها الدافع انها تتمادى أكثر وأكثر ,,,
أما البنت فـ باعتقادي في زمنا هذا ما في وحده بعمر الـ 13 او 14 ما اتعرف عن سوالف الشباب والبلاوي الي اتصير هالجيل مفتحين أكثر من الي قبلهم ويعرفون اشيا حتى الكبار ما يعرفونها يعني البنت مش معفايه من هالناحيه عقلها في راسها واتعرف خلاصها يعني تقدر اتميز الصح من الخطأ حتى لو هي مراهقه ...

ودمتم سالمين